Salamo
Toko faha-71 (70)
6 Vao teraka aho, dia niantehitra taminao; mbola tany am-bohoka aho, efa mpiaro ahy Ianao. Ianao lalandava no fiderako.7 Toa zava-mahagaga ho an'ny maro aho, kanefa Ianao no fialofa-mafy ho ahy.
8 Ho feno fiderana Anao anie ny vavako ary ho feno fankalazana Anao isan'andro.
9 Aza arianao aho, nony antitra; aza afoy, rehefa lany hery.
10 Fa miresaka ahy ny fahavaloko, miara-mioko mikendry ny hahafaty ahy.
11 Hoy ireo hoe: "Nafoin'Andriamanitra io ka enjeho; sambory fa tsy misy mpanafaka."
12 Andriamanitra o, aza manalavitra ahy; Andriamanitro o, faingana re hamonjy.
13 Ho menatra sy ho afa-baraka anie ireo olona mpiampanga ahy; ho voatevateva sy ho very haja anie ireo olona mitady hanisy ratsy ahy!
14 Izaho kosa hanantena Anao lalandava, ary hampitombo ny fiderana Anao;
15 isan'andro no hitanisan'ny vavako ny fahamarinanao sy ny famonjenao, na tsy voaisako avokoa aza ireny.
16 TOMPO ANDRIANANAHARY o, hiditra ao an-tranonao aho, satria Ianao nirotsaka an-tsehatra nomba ahy; ary dia ny fahamarinanao irery no ho tsahiviko.
17 Hatry ny fony aho mbola tanorano efa nampianarinao, Andriamanitra o; ary mandraka izao dia tsy mitsahatra manambara ireo asanao mahagaga.
18 Antitra sy fotsy volo aho ankehitriny, nefa aza afoy, Andriamanitra o; enga anie aho ho afaka hanambara ny asanao mahery vaika sy mahomby amin'ireo tanora sy ny taranaka manaraka!
19 Ambony dia ambony tokoa ny fahamarinanao, Andriamanitra o; ary nahavita zava-baventy Ianao! Tsy misy toa Anao, Andriamanitra o.
20 Fahoriana be sady mafy no navelanao hihatra tamiko; kanefa hovelombelominao indray aho, ary hampiakarinao indray ho afaka amin'ny fasana mampihitsoka.
21 Dia mbola hampionona indray Ianao ary hamerina amiko ny voninahitro.
22 Izaho kosa hidera Anao amim-baliha noho ny toetranao mahatoky, ry Andriamanitro o, sy hiredona salamo arahin-dokanga ho Anao, ry ilay Masin'i Israely.
23 Eny, hihorakoraka hihoby Anao aho sady hankalaza Anao amin-java-maneno, satria efa notsimbininao ny aiko.
24 Isan'andro no hitanisako ny fahamarinanao, satria efa menatra sy mangaihay ireo olona nitady hanisy ratsy ahy.
Toko faha-72 (71)
1 Tao amin'ny tahirin-kiran'i Salomona. Andriamanitra o, omeo ny mpanjaka izany fahaizanao mitsara; omeo ity taranak'andriana izany fitandroanao ny rariny.2 Aoka ho entiny ara-drariny sy hitsiny ireo malahelonao, dia ny vahoakanao.
3 Koa fanambinana sy rariny ho an'ny vahoaka anie no ho vokarin'ny tendrombohitra sy ny havoana!
4 Homeny rariny sy ho vonjeny anie ny malahelo sy ny mahantra amin'ny vahoaka, fa ny mpamoritra kosa hopotehiny!
5 Enga anie ity mpanjaka ity sy ireo taranany haharitra mandritra ny taona mifandimby, raha mbola hamiratra koa ny masoandro ary mbola hanazava koa izany volana!
6 Aoka izy ho tahaka ny erika mifafy amin'ny vilona, ho tahaka ny oram-baventy manondraka ny tany!
7 Amin'ny andro ny anie dia hamony ny rariny ary hiroborobo mandavantaona ny fiadanana!
8 Aoka izy hanjaka hatreo amin'ny ranomasina ka hatrany amin'ny ranomasina hafa , ary hanjaka manomboka amin'ny ony Eofrata ka tafapaka amin'ny faran'ny tany!
9 Ny mpanohitra azy handohalika eo anoloany ary ny fahavalony hihohoka am-bovoka.
10 Ny mpanjakan'i Tarsisy sy ny an'ireo nosy dia handefa fanomezana ho azy; ny mpanjakan'i Saba sy ny an'i Seba kosa ho avy handoa hetra aminy.
11 Ny mpanjaka hafa rehetra hiankohoka eo anatrehany; ary ny firenen-drehetra hanompo azy.
12 Eny, hafahan'ity mpanjaka ity ny mahantra miantso vonjy aminy sy ny ory tsy mba manan-kanampy.
13 Hangorahany ny osa sy mahantra ka ho vonjeny ny ain'izy ireo,
14 hotsoahany amin'ny fampahoriana sy amin'ny fanaovana an-keriny satria sarobidy eo imasony.
15 Ho ela velona anie ny mpanjaka! Aoka ho volamena avy any Sabano hatao fanomezana ho azy! Enga anie izy harahim-bavaka lalandava sady horarina soa isan'andro isan'andro!
16 Hahavokatra vary betsaka anie ny tany; hatrany an-tampon-tendrombohitra aza no aoka hihondrahondra ny vokatra ka hilonjehitra toy ny any Libano ny salohy! Ary ny mponina isan-tanana anie hiroborobo toy ny ahitra eny an-tsaha!
17 Ny lazan'ny mpanjaka anie ho mandrakizay ka hitatra hatrany eto ambany masoandro! Izy anie ho fitahiana ireo fokon'ny tany tontolo ka hataon'ny firenena rehetra hoe: "Sambatra!"
18 Hisaorana anie ny TOMPO Andriamanitr'i Israely, Ilay hany mahefa zava-mahagaga!
19 Hisaorana mandrakizay anie ny anarany malaza; ary aoka ny any tontolo ho henika ny voninahiny! Amen! Amen!
20 Tapitra eto ny tonombavak'i Davida zanakalahin'i Jisay.
Toko faha-73 (72)
1 Salamo nataon'i Asafa. Tsara mihitsy Andriamanitra amin'i Israely, dia amin'izay rehetra madio fo.2 Kanefa saika nibolisatra ny tongotro, kely foana dia solafaka ny diako.
3 Fa nialona ny mpaniratsira aho raha nahita ny fahombiazan'ny olon-dratsy,
4 satria tsy nisy mahory azy mandra-pahafatiny fa sady vaventy izy no matavy koa.
5 Tsy mba mahakasika azy akory ny fahorian'ny olona; ary tsy mba voakapoka miaraka amin'ny hafa izy.
6 Ny fireharehana no iambozonany toy ny rojo; ary ny herisetra no itafiany toy ny lamba.
7 Ny masony mila ho difotry ny taviny, nefa tazana eo tsara izay kendren'ny fony.
8 Maneso izy sady miresaka zava-doza, ary mirehareha ery miresaka famoretana.
9 Misoka-bava hamely an'Andriamanitra any an-danitra izy ary manao teny manodoka mahatety ny tany.
10 Noho izany, na dia ny vahoakan'Andriamanitra aza dia lasa mirona mankany amin'ireo ary migoka ny teniny toa rano fisotro.
11 Hoy izy hoe: "Tsy mahalala na inona na inona Andriamanitra; tsy mahalala ny ataontsika ilay Avo Indrindra."