Salamo
Toko faha-62 (61)
13 -TOMPO o, Anao ihany koa ny fitiavana; sady Ianao no mamaly ny olona araka ny asa nataony avy.
Toko faha-63 (62)
1 Salamo nataon'i Davida, fony izy tany an-taniefitr'i Joda.2 Andriamanitra o, Ianao no Andriamanitro; mitady fatratra Anao aho sy mangetaheta Anao. Maniry Anao ny tenako manontolo toy ny tany maina sy mangentana toy ny tany haraka mila rano.
3 Koa enga anie ho afa-mibanjina Anao ao amin'ny Toeramasina aho mba hahitako ny hery amam-boninahitrao!
4 Eny, hambarako ny fiderana Anao satria tsara noho ny aina ny fitiavanao;
5 koa mandritra ny fiainako no hisaorako Anao. Hanandra-tanana aho rehefa manonona ny anaranao;
6 dia ho heni-tsoa toy ny voky sakafo tsara aho ka ho faly handredona hira fiderana Anao.
7 Eo am-pandriana aho mahatsiahy Anao; tontolo alina, any aminao ny eritreritro
8 satria nombanao fitahiana hatrany aho ka mibitaka mialoka eo ambany elatrao.
9 Mifikitra aminao ny tenako manontolo, satria manohana ahy ny herinao.
10 Ireo olona mitady hahafaty ahy, aoka hiharan-doza tsy ampoizina ka hiditra amin'ny toeran'ny maty, any amin'ny fanambanin'ny tany!
11 Ho afaka aina any an'ady anie izy ka ho anjara sakafon'ny amboadia!
12 Fa ny mpanjaka kosa anie hifaly aminao, ry ilay Andriamanitra nampandresy azy! Ireo rehetra nanao fianianana ka nitonona Anao ho vavolombelona, aoka hifampiarahaba noho ny aminao satria voakombonao tsy ho afa-miteny ny vavan'ny olona mpandainga!
Toko faha-64 (63)
1 Tao amin'ny tahirin-kiran'ny filohan'antoko-mpihira. Salamo nataon'i Davida.2 Andriamanitra o, mitaraina aminao aho ka henoy. Ny aiko mba arovy amin'ny fahavalo atahorako.
3 Afeno aho tsy ho azon'ny olon-dratsy miokona ho voan'ny mpanao heloka miray tetika.
4 Ranitiny ho toa sabatra ny lelany, teny mandratra no zana-tsipika alefany;
5 miafina izy mikendry ny olo-mahitsy, dia mitifitra tampoka, tsy miahotrahotra.
6 Mifampirisika izy hanao ratsy mifampidinika hamela-pandrikaka manao hoe: "Zovy no hahita antsika?"
7 Dia ampiadiny eo ny teti-dratsiny: "Tomombana tsara ny paikantsika, hoy izy. Tsy hay fantarina ny ao am-pon'olombelona!"
8 Indreo kosa izy tifirin'Andriamanitra ka voan'ny zana-tsipika tampotampoka.
9 Ny tenin'ireo ihany no mifotitra aminy; izay rehetra mahita azy, dia mihifi-doha.
10 Mitolagaga avokoa ny besinimaro ka manambara ny asan'Andriamanitra sady maka anatra avy amin'izany.
11 Aoka ny olo-marina hifaly amin'ny TOMPO sy hanao Azy ho fialofany hatrany; ary aoka ny mahitsy fo rehetra hifampiarahaba noho ny aminy!
Toko faha-65 (64)
1 Tao amin'ny tahirin-kiran'ny filohan'antoko-mpihira. Salamo nataon'i Davida. Tononkira.2 Ry Andriamanitra monina ao Tsiona o, mendrika hoderaina Ianao sy hanefana ny voady natao.
3 Satria mpihaino vavaka Ianao, dia hatonin'ny olona rehetra
4 samy vesaran'ny heloka vitany. Ny hadisoanay tsy zakanay; Ianao kosa no mikosoka azy.
5 Sambatra ny olona izay voafidinao ka asainao honina ao an-kianjanao! Hamoky anay ny zava-tsoan'ny tranonao, dia ny zava-masin'ny tempolinao.
6 Manasoa anay tokoa Ianao, ry Andriamanitra Mpamonjy anay; ka dia zava-mampitolagaga no amalianao ny vavakay, ry hany fanantenan'ny vahoaka hatrany am-paran'ny tany rehetra mbamin'ireo nosy any lavitra any.
7 TOMPO o, tanjaka sy hery no asehonao, ka ataonao miorina mafy ny vohitra,
8 tonenao ny riaka misamboaravoara sy ireto onjany mirohondrohona, ampangininao ny firenena mitabataba.
9 Noho ireo famantarana ataonao, dia mitolagaga ny vahoaka hatrany am-paran'ny tany; na tatsinanana na tandrefana dia entaninao hihorakoraka hihoby.
10 TOMPO o, miahy ny tany Ianao, manondraka azy amin'ora-mikija ka mahatonga azy ho vokatra tokoa. Ilay reniranonao , Andriamanitra o, dia tondraka midibadiba hatrany. Vary ho an'ny olona no omaninao ka toy izao no fikolokoloanao ny tany:
11 ny soritr'asa ataonao ampo-dranony bainga motahinao sy aravonao; oram-batravatra no amontosanao azy ka ombanao fitahiana ny tsirim-bary.
12 Dia zava-tsoa no toa fehiloha izay asatrokao ny taona; ka fahavokarana mitafotafo no amin'izay andalovanao.
13 Maitso mavana ny ahitra an-tanety, ka feno fifaliana ny havoana;
14 Rakotra ondry aman'osy ny tanimbilona, ary voasarom-bary ny lohasaha ka manako ny hoby sy ny hira ho Anao.
Toko faha-66 (65)
1 Tononkira tao amin'ny tahirin-kiran'ny filohan'antoko-mpihira. Salamo. Mihobia an'Andriamanitra, ry mponina eran-tany.2 Ihirao Salamo Izy satria be voninahitra. Tolory voninahitra Izy amin'ny fideranareo.
3 Lazao amin'Andriamanitra hoe: "Endrey mampitolagaga ny asanao! Lehibe dia lehibe tokoa ity herinao, ka indro fa ikoizan'ny fahavalonao.
4 Hiankohoka aminao anie ny mponina eran-tany, sy hihira salamo ho Anao Andriamanitra, eny, hihira salamo ho fanajana Anao!"
5 Tongava hizaha ny asan'Andriamanitra; mitolagaga ny olombelona amin'ity ataony:
6 ny ranomasina novany ho tany maina, nitan'ny razanay an-tongotra ny ony. Aoka hifaliantsika eto izany asany izany!
7 Mahery Izy ka mifehy mandrakizay; arahiny maso ny firenena isan-tokony ka ny mpikomy dia tsy ho afa-mitraka.
8 Rey vahoaka, isaory ilay Andriamanitray, ataovy maredona ny fiderana Azy,
9 satria Izy no mahavelona aina anay; tsy navelany ho solafa-mamindra izahay.
10 Nozahanao toetra izahay, Andriamanitra o, nosedrainao toa volafotsy anaty memy,
11 nampidirinao am-pandrika sy novesaranao fitsapana.
12 Olon-dratsy no navelanao hanosihosy anay; izahay dia voatery namaky afo sy rano, kanjo nafahanao ihany sy nampahazoinao aina.