Jôba
Toko faha-20
6 Fa na dia mipaka any an-danitra aza ny haavony ka mitehina amin'ny rahona ny lohany,7 dia ho levona mandrakizay toy ny dikiny izy; ary izay nahita azy dia hanontany hoe:"Mba aiza ary izy?"
8 Manidina tahaka ny nofy izy ka tsy hita intsony, ary levona tahaka ny fahitana amin'ny alina.
9 Izay nahatazanan'ny maso azy dia tsy hahitana azy intsony, fa ny toeram-ponenany aza tsy hahatsikaritra azy intsony.
10 Ny zanany hanonitra amin'ny mahantra, ary ny tanany ihany no hamerina izay nalainy.
11 Herim-pahatanorana no manenika ny taolany, nefa hiara-mandry aminy ao am-pasana izany.
12 Na mamy ao am-bavan'ny tsy mpivavaka aza ny ratsy ka afeniny ao ambanin'ny lelany,
13 ary na ankafiziny ela aza izany ka tahiriziny ao ambanin'ny lanilaniny,
14 dia hivadika hankarary kibo fa efa tonga poizina ao anatiny.
15 Handoa ny harena izay nateliny izy; holoaran'Andriamanitra tao an-kibony izany.
16 Fa poizin'ny bibilava no efa notsentsefiny: ka dia ho fatin'ny kaikitry ny menarana izy.
17 Tsy ho hitany intsony ny tantely sy ronono, izay mitosaka toa renirano na ony aman-driaka.
18 Haveriny izay nisasarany fa tsy azony hanina; koa na betsaka aza ny tombom-barony, dia tsy mba hifaliany akory izany.
19 Eny, nanosihosy sy nahafoy ny mahantra izy, ary nangalatra tranon'olona an-keriny fa tsy mba nanao ho an'ny tenany.
20 Tsy mba nahalala onony velively izy, koa tsy hahavonjy ny zavatra nankamaminy.
21 Ary tsy nisy tsy nanamparany fahalian-karena; ka dia tsy haharitra ny hasambarany.
22 Hitaintaina ny tsy mpivavaka na dia manan-karembe aza, satria tebiteby mangeja no hianjady aminy.
23 Iny izy mbola sondriana mameno kibo iny, dia andefasan'Andriamanitra fahatezera-mirehitra izay hirotsaka aminy ho solon-tsakafony.
24 Raha miala ny sabatry ny fahavalo izy, dia ho voatrobaky ny tsipika varahina.
25 Ongotany ny zana-tsipika nitrobaka azy; ka raha vao tafatsoaka amin'ny atiny izany, dia ny tenany indray no iharan'ny horohorom-pahafatesana.
26 Ny haizim-pandringanana no voatokana ho an'ny zava-tsoa rehetra izay voaangony; ary afo tsy narehitr'olombelona no mandoro azy ka mandevona ny sisa ao an-tranony.
27 Ny lanitra mampiharihary ny helok'io olona io, ary ny tany mitsangan-kiampanga azy.
28 Lasa rano ny harembe ao an-tranony, amin'ny androm-pahatezeran'Andriamanitra.
29 Toy izany no anjara sy lova voatokan'Andriamanitra ho an'ny olon-dratsy sy voatendrin'ny teniny hianjady aminy.
Toko faha-21
1 Dia namaly i Joba ka nanao hoe:2 Mba henoy tsara izay lazaiko, fa izany no hampiononanareo ahy.
3 Mandefera amiko mba hahazoako miteny; fa rehefa tapitra ny teniko, dia afaka mananihany ianareo.
4 Ny ataon'olombelona ve no itarainako? Tsia, koa nahoana aho no hahalefitra?
5 Mitodiha aty amiko, fa ho gaga ianareo ary hitampim-bava tsy hahaloa-peo.
6 Raha mieritreritra izany ny tenako, dia raiki-tahotra sady mari-koditra.
7 Nahoana no mbola ahaveloman'ny olon-dratsy? Nahoana izy no tratra antitra sady be fahefana?
8 Ny taranany koa mipetraka tsara eoa miny, ary ny zafikeliny mitombo eo imasony.
9 Miadana ao an-tranony izy ka tsy matahotra; ary ny fikapohan'Andriamanitra tsy mahavoa azy.
10 Ny ombilahiny manaraka ka mahavanona; ary ny ombivaviny tsy mba mamotsotra.
11 Mampiriaria ny zanany toy ny zanak'ondry izy ary mampifalihavanja ireo zafikeliny.
12 Mihira miaraka amin'ny amponga sy ny lokanga izy sady faly mandihy amin'ny feon-tsodina.
13 Rehefa niaina tamim-pahasambarana izy, dia midina miadana any amin'ny fonenan'ny maty,
14 Kanefa hoy ireo tamin'Andriamanitra: "Miala aminay, fa tsy te hahalala akory izay lalanao any izahay.
15 Zinona koa ilay Tsitoha noho TOMPOinay? Ary mitondra inona izay fivavahana aminy?"
16 Marina fa tsy tompon'ny fahasambarany izy. Ho lavitra ahy anie ny fisainan'ny olon-dratsy.
17 Matetika ve no maty tampokany jirom-piainan'ny olon-dratsy? Matetika ve izy no iharan-doza, na ianjadian'ny fahatezeran'Andriamanitra mba ho anjara sahaza azy?
18 Sa ho toy ny mololo entin-drivotra sy akofa indaosin-tadio araka ny fiteny?
19 Fa hoy ianareo hoe: "Andriamanitra noho ny helo-dray, dia mbola hanasazy ny zanany. "Tsia! Fa aoka ilay meloka ihany no hosazin'Andriamanitra mba hahatonga saina azy.
20 Aoka ny olon-dratsy hahita maso ny fahoriany ka higoka ny fahatezeran'ilay Tsitoha.
21 Ahoan'ny meloka inona moa izay hanjo ny taranany, rehefa tapitra hatreo ny androm-piainany?
22 Andriamanitra va no hampianarina izany, nefa na ny anjely aza eo ambany fifehezany?
23 Ny olona sasany dia tomady tsara sady miadana no tsy manana ahiahy, mandra-piavin'ny fahafatesany;
24 mavesatry ny tavy ny kibony, ary vonton-tsoka ny taolany.
25 Fa ny olona sasany kosa maty ao anatin'ny ngidim-piainana, ka tsy mba nanandram-pahasambarana.
26 Samy mandry eo amin'ny vovoka ny tenan'izy roa tonta ireo, ka samy rakotry ny olitra.