Jôba
Toko voalohany
13 Indray andro raha nihinana sy nisotrotao an-tranon-jokiny lahimatoa ireo zanak'iJoba,14 dia nisy iraka tonga tany amin'i Joba nilaza taminy hoe: "Raha teo am-piasanainy indrindra ny omby ary raha nihinana teo akaikiny ny borikivavy,
15 dia nidinan'ny Sabeanina tampoka ka norobainy; novonoiny ho faty tamin'ny sabatra ny mpanomponao, ary dia izaho irery no afa-nandositra hampandre anao."
16 Fa raha tsy mbola tapitra akory ny teniny, dia nisy iray hafa koa tonga nilaza hoe: "Nilatsaham-potaka ny ondry aman'osy sy ny mpiandry azy ka levona, ary dia izaho irery no afa-nandositra hampandre anao."
17 Fa raha tsy mbola tapitra akory ny tenin'io, dia nisy iray hafa koa tonga ka nanao hoe: "Nasian'ny andian-jiolahy kaldeanina telo toko ny rameva ka norobainy; novonoiny ho faty tamin'ny sabatra ny mpanomponao. Izaho irery no afa-nandositra hampandre anao."
18 Fa raha tsy mbola tapitra koa ny teniny, dia nisy iray hafa koa tonga ka nanao hoe: "Raha teo am-pihinanana sy teo am-pisotroana tao an-tranon-jokiny ireo zanakao,
19 dia nifofofofo avy any an-taniefitra ny rambon danitra ka nipaoka ny zoron-trano efatra; maty nianjeran'ny trano tao avokoa ireo zatovo, ary dia izaho irery no afa-nandositra hampandre anao."
20 Dia nitsangana i Joba ka nandriatra ny fitafiany sy nanaratra ny lohany ary niampatra tamin'ny tany ka niankohoka
21 sady nanao hoe: Nitanjaka no nivoahako avy tao an-kibon'ineny, ary mitanjaka koa no hiverenako any an-kibon'ny tany. Ny TOMPO no nanome, ny TOMPO no naka. Hisaorana anie ny anaran'ny TOMPO.
22 Tamin'izany fahoriana rehetra izany dia tsy mba nanota i Joba ary tsy nanome tsiny an'Andriamanitra.
Toko faha-2
1 Indray andro raha tonga nanao tatitra tamin'ny TOMPO ireo zanak'Andriamanitra, dia mba tafaraka taminy teo koa i Satana.2 Dia hoy ny TOMPO tamin'i Satana: -Avy taiza moa ianao? Dia namaly ny TOMPO izy hoe: -Avy nitetitety ny tany sy nihaodihaody teny aho.
3 Hoy indray ny TOMPO taminy: -Efa nahita an'i Joba mpanompoko ve ianao? Fa tsy misy tahaka azy eny ambonin'ny tany: lehilahy tsy misy ho kianina sady mahitsy ary manaja Ahy izy ka mifady ny ratsy. Ary na dia nandrisika Ahy hamely azy tsy amin'antony aza ianao, dia mbola mahatoky ihany izy.
4 Fa mbola namaly ny TOMPO i Satana ka nanao hoe: -Hoditra solon'ny hoditra. Izay ananan'ny olona dia homeny hiarovany ny ainy.
5 Fa ahinjiro aminy ange ny tananao ka kasiho ny taolany sy ny nofony e, raha tsy an-kitsirano izao no haniratsirany Anao!
6 Dia hoy ny TOMPO tamin'i Satana: -Indro eo am-pelatananao izy, ny ainy tokana ihany tsimbinina.
7 Dia niala teo anatrehan'ny TOMPO i Satana ka namely aretin-koditra mahatsiravina an'i Joba hatreo am-paladiany ka hatrany an-tampon-dohany.
8 Dia nitombina teo an-davenona i Joba ary naka vakim-bilany tany hihaorany.
9 Ary hoy ny vadiny taminy: -Mbola mikiry amin'ny fahamarinanao foana ve ianao? Lavy Andriamanitra, dia matesa any ianao!
10 Dia hoy i Joba namaly azy: -Miteniteny foana tahaka ny vehivavy adala ianao. Raha ekentsika fa avy amin'Andriamanitra ny zavatra tsara, nahoana no tsy anekentsika ny zavatra ratsy ho avy aminy? Tamin'izany fitsapana azy izany, dia tsy mba nanota tamin'ny molony i Joba na dia kely aza.
11 Ary nandre ny fahoriana rehetra nianjady tamin'i Joba ny sakaizany telo lahy, dia i Elifaza avy any Temana sy i Bildada avy any Soha ary i Tsofara avy any Nahama , ka samy niala tany aminy avy ary nifanaiky fa haneho aminy ny fiaraha-miory sy hankahery azy.
12 Saiky tsy nahafantatra azy anefa ireo raha nahatazana an'i Joba, ka dia nitomany; nandriatra fitafiana izy ary nanopy vovoka teny amin'ny rivotra mba hiraraka eny an-dohany avy.
13 Dia nijanona nipetraka tamin'ny tany niaraka tamin'i Joba nandritry ny fito andro sy fito alina ireo sady tsy nisy niteny na inona na inona taminy satria hitany ny halehiben'ny fahoriany.
Toko faha-3
1 Niloa-bava ihany i Joba tamin'ny farany ka nanozona ny andro nahaterahany.2 Nandray fitenenana izy ka nanao hoe:
3 Enga anie ka ho foanan'Andriamanitra ny andro nahaterahako sy ny alina izay nanao hoe; "zazalahy no torontoronina"!
4 Ho tonga haizina anie izany andro izany, ka tsy hotsarovan'Andriamanitra any ambony any ary tsy hisy mazava hamiratra aminy intsony.
5 Izay aloka mainty indrindra anie handrakotra azy; ary aoka hisy raho-matevina hitatao aminy na koa fanakona-masoandro mahatahotra.
6 Enga anie ka izany no ho alina maizina indrindra ka tsy ho tafasisika amin'ny marikandron-taona ary tsy hiditra intsony amin'ny fanisam-bolana.
7 Ho momba anie izany alina izany ka tsy handrenesam-pihobiana mihitsy!
8 Hanozona azy anie ny mpanozona andro izay mahay mamoha ilay dragona lehibe !
9 Tsy hahita ny kintan'ny maraina anie izy ka hiandry ny mazava tsy ho tonga ary koa tsy hahatsinjo akory ny fiposahan'ny mazava atsinanana!
10 Satria tsy nahasakana ny hahaterahako izy sy ny hahitako izao fahoriana izao.
11 Nahoana aho no tsy maty hatrany am-bohoka, na tsy niala aina fony vao nivoaka avy tany an-kibo?
12 Nahoana no nisy lohalika roa nandray ahy sy nono roa ninonoako?
13 Tahaka izay aho mba nilamina tany am-pasana ka nandry am-piadanana feizay
14 niaraka tamin'ny mpanjaka sy ireo mpifehy ny tany izay nanangana indray ny tsangambato efa rava,
15 na niaraka tamin'ny andriandahy be volamena sady manana volafotsy mameno trano.
16 Na koa naleoko fotsiny tsy ary toy ny zaza tsy azo ka nafenina, dia toy ny zaza tsy nahita mazava.
17 Any am-pasana any ny olon-dratsy no mitsahatra amin'ny fampahoriana ary any ny reraka no miala sasatra.
18 Mahita fiadanana koa ny mpigadra, ka tsy handre intsony ny antsoantson'ny mpiambina.
19 Samy tafakambana any na kely na lehibe ary ny mpanompo aza dia ho afaka amin'ny tompony.
20 Nahoana no ataon'Andriamanitra mahita masoandro ny olona ory ary ataony velona ireo tototra alahelo?
21 Miandry ny fahafatesana tsy ho tonga izy sady mitady azy fatratra mihoatra noho ny harena.
22 Hibita-kafaliana tokoa ireo sady ho ravoravo hahazo fasana!
23 Nahoana no tsy mahita lalan-kombana ny olona fa toa voahidin'Andriamanitra ho anaty tamboho?
24 Eny, toloko hatrany no sakafo fihinako ka migororoana toy ny rano ny fidradradradrako.
25 Izay atahorako ka mampitebiteby ahy no tanteraka sy mihatra amiko.
26 Tsy manam-pitoniana na fiadanana aho, tsy misy fitsaharana fa tebiteby lava.
Toko faha-4
1 Dia nandray fitenenana i Elifaza avy any Temana ka nanao tamin'i Joba hoe: