Nehemià

Toko faha-4

⁸ Rehefa nijery izany aho, dia niainga nilaza tamin'ny loholona sy mpanapaka mbamin'ny vahoaka sisa hoe: Aza atahorana ny fahavalonareo! Tsarovy fa ny Tompo no lehibe sy mahatahotra; ka miadia hiaro ny rahalahinareo sy ny zanakareo lahy aman-janakareo vavy ary ny vadinareo sy ny tranonareo.

⁹ Nony ren'ny fahavalonay fa efa fantatray sady efa nofoanan'Andriamanitra ny tetik'adiny, dia niverina ho any amin'ny manda izahay rehetra, samy nandray ny asany avy.

¹⁰ Saingy nanomboka tamin'io andro io, dia ny antsasaky ny oloko no nanao ny asa, fa ny antsasany kosa nitana lefona sy ampinga ary tsipika aman'akanjo fiarovan-tratra; ireo filoha dia samy teo ivohon'ny olona rehetra amin'i Joda

¹¹ izay namboatra ny manda. Ny mpitondra entana dia samy niasa tamin'ny tanany anankiray ary nitan-defona kosa ny tanany an'ila;

¹² ny mpandrafitra rehetra, teo am-pandrafetana, dia samy nanan-tsabatra anankiray voafehy teo amin'ny etrany avy; ary ny mpitsoka anjomara dia teo anilako.

¹³ Dia hoy aho tamin'ny loholona sy mpanapaka mbamin'ny vahoaka sisa: Be sady midadasika ny asa; ka dia voazarazara eny amin'ny manda sy mifanalavitra isika!

¹⁴ Na aiza na aiza ianareo no mandre ny feon'anjomara, dia mivoria aty aminay; fa Andriamanitra no hiady ho antsika!

¹⁵ Dia nanao ny asa izahay manomboka ny mazava atsinanana ka mandra-piposaky ny kintana; ary ny antsasakay kosa nitan-defona.

¹⁶ Tamin'izany andro izany, dia hoy koa aho tamin'ny vahoaka: Samia mitoetra eto Jerosalema ianareo mbamin'ny mpanomponareo mba hiambina antsika raha alina ary hiasa raha antoandro.

¹⁷ Fa na izaho, na ny havako na ny mpanompoko, na ny mpiambina nanaraka ahy, dia samy tsy niala akanjo mihitsy afa-tsy raha handro. 

Toko faha-5

¹ Indray andro dia nisy lehilahy sy vehivavy sarambabem-bahoaka nitaraina mafy noho ny ataon'ny Jiosy sasany mpiray firenena aminy. 

² Fa nisy nanao hoe: Maro izahay mbamin'ny zanakay lahy aman-janakay vavy; koa te hahazo vary izahay mba hohaninay sy hivelomanay.

³ Nisy koa nanao hoe: Ny sahanay sy ny tanimboalobokay ary ny tranonay dia efa nataonay antoka; koa te hahazo vary izahay mandritra ny mosary.

⁴ Nisy indray nanao hoe: Efa nisambo-bola izahay handoavanay ny hetran'ny amperora; ary ny sahanay sy ny tanimboalobokay no nataonay antoka.

⁵ Kanefa mba tahaka ireo mpiray firenena aminay ihany ny tenanay, ary tahaka ny zanak'ireo ihany ny zanakay; saingy na izany aza, dia voatery manolotra ny zanakay lahy sy vavy ho mpanompo izahay, ary ny sasany amin'ny zanakay vavy efa mpanompo rahateo. Tsy manan-ko enti-manavotra azy izahay, satria lasan'ny hafa ny sahanay sy ny tanimboalobokay.

⁶ Dia tezitra mafy aho rehefa nahare ny fitarainan'ny olona sy izany teny izany.

⁷ Koa nanapa-kevitra anakampoko aho fa ny loholona sy mpanapaka no hanariko noho izy samy nampanana zavatra tamin'ny mpiray firenena aminy. Dia nampanao fivoriam-be hitsarana azy aho

⁸ sady niteny taminy hoe: Izahay, araka izay tratry ny fanananay, dia efa nanavotra ny mpiray firenena aminay, izany hoe ireo Jiosy namidy tamin'ny hafa firenena; fa ianareo kosa mivarotra ny mpiray firenena aminareo, ka amintsika samy isika ihany no ivarotanareo azy. Dia sina ry zareo fa tsy nahita havaly.

⁹ Ary hoy koa aho hoe: Tsy tsara izao ataonareo izao! Moa tsy tokony niaina tamim-pahatahorana an'Andriamanitra ve ianareo mba tsy hiharan'ny fanaratsian'ireo hafa firenena fahavalontsikay

¹⁰ Izaho sy ny havako ary ny mpanompoko dia efa nampisambotra vola sy vary, koa aoka re isika mba samy hamoy izany trosa izany!

¹¹ Eny, avereno amin'ny mpitrosa, izao anio izao ihany, ny sahany sy ny tanimboalobony mbamin'ny tanin'olivany sy ny tranony; ary afoizo ny tombon-tsoa ateraky ny vola mbamin'ny vary sy divay ary menaka izay nampisamborinareo.

¹² Dia hoy ireo hoe: Eny, hanao araka izay lazainao izahay. Hamerina izay nalainay izahay ary tsy hitaky na inona na inona amin'ny mpitrosa. Dia niantso ny mpisorona aho ka teo anatrehany no nampianianako an'ireo mpampisambotra fa hanao araka izany toky nomena izany.

¹³ Avy eo aho dia nanakopaka ny lambako sady niteny hoe: Ho tahaka izany anie no hanakopahan'Andriamanitra ny olona rehetra izay tsy hahatanteraka izany toky nomena izany! Eny, ho voakopaka hiala amin'ny tranony sy ny fananany anie izy, ka ho tavela tsy hanana na inona na inona! Dia ny fivoriam-be no indray namaly hoe Amen sady nidera ny TOMPO; ary nanao araka izany toky nomena izany tokoa ny olona.

¹⁴ Nanomboka tamin'ny andro nanendrena ahy ho governoran'ny faritanin'i Joda, dia ny taona faha-roapolo nanjakan'i Artakserksesa ka niafara tamin'ny taona faha-32 nitondrany, na izaho na ny havako, nandritra izany 12 taona izany, dia tsy mba nitaky ny anjara-fiveloman'ny governora.

¹⁵ Kanefa ireo governora talohako dia nanahirana ny olona ka nampandoa azy hanina sy divay ary sekela volafotsy efapolo; eny, na ny mpanompony aza, dia nisetrasetra tamin'ny olona. Izaho kosa tsy mba nanao izany noho ny fahatahorako an'Andriamanitra.

¹⁶ Ny namboatra io manda io no nilofosako ary vory nifantoka tamin'ny asa teto avokoa ny mpanompoko, ka tsy mba nisy nividy tany izahay.

¹⁷ Nisy mpanapaka jiosy 150 nisakafo teo amin'ny latabatro, afa-tsy izay vahiny tonga ao aminay avy tamin'ny firenena nanodidina;

¹⁸ ka ny niantohako namboarina isan'andro dia omby iray sy ondry matavy enina ary vorona koa, fa indray mandeha isaky ny folo andro no nanaterana divay betsaka aho. Nefa na izany aza dia tsy mba nitaky ny anjara fiveloman'ny governora aho, satria efa navesatra mafy tamin'ny vahoaka ny asa nataony.

¹⁹ Mba tsarovy hanasoavana ahy, ry Andriamanitra o, izay rehetra nataoko ho an'ity firenena ity!

Toko faha-6

¹ Ren'i Sanebalato sy i Tobia ary i Gesema ilay Arabo mbamin'ny namany fahavalonay fa tafatsangako indray ny manda ka tsy misy banga intsony. Kanefa tamin'io fotoana io dia tsy mbola voalatsako ny lela-vavahady.

²  Koa nandefa iraka hankaty amiko i Sanebalato sy i Gesema hilaza hoe: Tongava mba hihaona ao Kefirima amin'ny tany lemak'i Onao isika! Kanjo nikasa hanisy ratsy ahy izy roa lahy.

³ Dia nandefa iraka hankany aminy kosa aho hanao hoe: Asa lehibe no ataoko ka tsy afa-midina aho; raha ilaozako midina any aminareo manko ny asa, dia hiato.

⁴ Mbola nandefa iraka tamiko inefatra miantoana araka izany ihany izy roa lahy; saingy izany ihany koa no navaliko azy hatrany.

⁵ Dia nirahin'i Sanebalato fanindiminy hankaty amiko ny mpanompony, nitondra taratasy nivelatra teny an-tanany

⁶ ka izao no voasoratra tao: Efa mahoraka any amin'ny firenena maro sady lazain'i Gesema koa fa hoe mikasa hikomy ianao sy ny Jiosy; ka izany no anangananao ny manda. Ary, araka izany siosio miely izany, dia maniry ho mpanjakanay ianao.

⁷ Efa nanendry mpaminany mihitsy aza ianao mba hanambara ao Jerosalema fa ianao no mpanjakan'i Joda. Ankehitriny dia ho ren'ny amperora izany raharaha izany; koa avia isika hiara-mikaon-doha.

⁸ Dia nandefa iraka ho any amin'i Sanebalato aho hanao hoe: Tsy marina izany zavatra lazainao izany fa noforoninao fotsiny.

⁹ Ny hampatahotra anay manko no kendren'izy rehetra, satria heveriny fa ho kivy amin'ny asa izahay ka tsy hahatontosa. Koa ankehitriny herezo aho, Andriamanitra o!

¹⁰ Indray andro aho dia nankao an-tranon'i Semahia zanakalahin'i Delata sy zafin'i Mehetabeela, satria nisy sampona tsy nahatongavany tany amiko. Ka hoy izy hoe: Ao an-tranon'Andriamanitra, ao anatin'ny Toeramasina, no ndeha isika hihaona; ary aoka hohidintsika ny varavarana fa ho avy hamono anao ireo mpanohitra anao; eny, ho avy alina hamono anao izy.

¹¹ Fa novaliako hoe: Lehilahy toa ahy izao tsy tokony handositra. Ary olona tahaka ahy ve no hiditra ao amin'ny Toeramasina ka ho velonay Tsia, tsy hiditra ao aho!

¹² Hitako manko fa tsy Andriamanitra no naniraka an'i Semahia, fa hamitahana ahy no nilazany tamiko izany hafatra izany, satria voakaraman'i Tobia sy i Sanebalato izy.

¹³ Ny nanakaramany azy dia mba hampitahotra ahy hanarahako ny toroheviny sy hanotako, ka hahazoany miteny ratsy ahy sy manala baraka ahy.

¹⁴ Ry Andriamanitra o, tsarovy i Tobia sy i Sanebalato araka izany asany izany, ary tsarovy koa i Nohadia mpaminanivavy sy ireo mpaminany hafa izay nitady hampitahotra ahy.

¹⁵ Ny andro faha-25, tamin'ny volana Elola, no nahavitana ny manda, izany hoe 52 andro niasana.

¹⁶ Rehefa ren'ny fahavalonay tamin'ny firenena manodidina rehetra izany, dia raiki-tahotra ry zareo sady nahatsapa ny maha tsinontsinona azy. Ary niaiky ireo fahavalonay fa ilay Andriamanitray no nahavitana izany asa izany.

¹⁷ Tamin'izay ny loholona jiosy dia nampitondra taratasy maro ho any amin'i Tobia; ary ny taratasy avy tamin'i Tobia kosa tonga aty amin'ireo loholona ireo.

¹⁸ Betsaka manko ny Jiosy efa nianiana niray tetika taminy, noho izy vinanton'i Sekania zanakalahin'i Ara; ary i Johanana zanakalahin'i Tobia koa efa nanambady ny zanakavavin'i Mesolama zanakalahin'i Berekia.

¹⁹ Nanao tsara laza an'i Tobia teo anatrehako ry zareo sady nitatitra ny teniko tany aminy; i Tobia kosa nampitondra taratasy hampitahotra ahy.

Toko faha-7

¹ Nony vita ny manda ka voalatsako ny lela-vavahady, dia napetraka tamin'ny fandraharahany avy ny mpiandry varavarana sy ny mpihira ary ny levita.

² Notendreko hitantana an'i Jerosalema i Hanany rahalahiko sy i Hanania, lehiben'ny tranomimanda, izay lehilahy mahatoky sady matahotra an'Andriamanitra mihoatra noho ny maro.