Hezrà

Toko faha-10

²¹ tamin'ny taranak'i Harima, dia ry i Mahaseia sy i Elia mbamin'i Semahia sy i Jehiela ary i Hozia;

²² tamin'ny taranak'i Pasehora, dia ry i Eliohenay sy i Mahaseia mbamin'i Jismahela sy i Netaneela ary i Jozabada sy i Elehasa.

²³ Tamin'ny levita dia ireto avy: ry i Jozabada sy i Simehy mbamin'i Kelaia (atao hoe koa Kelita) sy i Petahia ary i Jehoda sy i Elihezera.

²⁴ Tamin'ny mpihira dia i Eliasiba. Tamin'ny mpiandry varavarana dia ry i Saloma sy i Telema ary i Ory.

²⁵ Tamin'ny sarambabem-bahoaka israelita dia ireto avy: tamin'ny taranak'i Parehosy dia ry i Ramia sy i Jizia ary i Malkia mbamin'ny Miamina sy i Elehazara ary i Malkia sy i Benaia;

²⁶ tamin'ny taranak'i Helama dia ry i Matania sy i Zakaria mbamin'i Jehiela sy i Habdy ary i Jeremota sy i Elia;

²⁷ tamin'ny taranak'i Zato dia ry i Eliohenay sy i Eliasiba mbamin'i Matania sy i Jeremota ary i Zabada sy i Haziza;

²⁸ tamin'ny taranak'i Bebay dia ry i Johanana sy i Hanania ary i Zabay sy i Hatlay;

²⁹ tamin'ny taranak'i Bany dia ry i Mesolama sy i Maloka mbamin'i Hadaia sy i Jasoba ary i Seala sy i Jeremota;

³⁰ tamin'ny taranak'i Pahata-Moaba dia ry i Hadna sy i Kelala ary i Benaia sy i Mahaseia mbamin'i Matania sy i Betsalela ary i Binoy sy i Manase;

³¹ tamin'ny taranak'i Harima dia ry i Elihezera sy i Jisia ary i Malkia sy i Semahia mbamin'i Simehona

³² sy i Benjamina ary i Maloka sy i Semaria;

³³ tamin'ny taranak'i Hasoma dia ry i Matenay sy i Matata ary i Zabada sy i Elifelety mbamin'i Jeremay sy i Manase ary i Simehy;

³⁴ tamin'ny taranak'i Bony dia ry i Mahaday sy i Hamrama ary i Oela,

³⁵ i Benaia sy i Bedia ary i Keloho,

³⁶ i Vania sy i Meromota ary i Eliasiba,

³⁷ i Matania sy i Matenay ary i Jahasay,

³⁸ i Bany sy i Binoy ary i Simehy,

³⁹ i Selemia sy i Natana ary i Hadaia,

⁴⁰ i Maknadebay sy i Sasay ary i Saray,

⁴¹ i Hazarela sy i Selemia ary i Semaria,

⁴² mbamin'i Saloma sy i Amaria ary i Josefa;

⁴³ tamin'ny taranak'i Nebao, dia ry i Jehiela sy i Matitia ary i Zabada sy i Zebina mbamin'i Jadao sy i Joela ary i Benaia.

⁴⁴ Ireo lehilahy rehetra ireo no samy efa naka vehivavy hafa firenena ho vadiny, sady efa niteraka ny vehivavy sasantsasany tamin'ireny.

Nehemià

Toko voalohany

¹ Tantaranalahatr'i Nehemia zanakalahin'i Hakalia. Tamin'ny taona faha-roapolo nanjakan'i Artakserksesa, volana Kisleo, raha tany an-dapa tao Sosany aho,

² dia tonga avy any Joda i Hanany, anankiray amin'ireo rahalahiko, miaraka amina lehilahy vitsivitsy. Nanontaniako azy ny amin'ny Jiosy efa afaka, izany hoe tafaverina avy any an-tsesitany, ary ny amin'i Jerosalema.

³ Ka izao no navaliny ahy: Ireo Jiosy tafaverina avy any an-tsesitany, ao amin'ny faritr'i Joda, dia mitondra latsa sy fahoriana be; ny mandan'i Jerosalema kosa voarodana, ary ny vavahadiny dia kilan'ny afo.

⁴ Rehefa nandre izany vaovao izany aho, dia nipetraka nitomany sy niferinaina andro maromaro sady nifady hanina sy nivavaka teo anatrehan'Andriamanitry ny lanitra

⁵ ka nanao hoe: Indrisy, ry TOMPO Andriamanitry ny lanitra, Andriamanitra lehibe sy mahatahotra! Mitandro ny fanekempihavanana sy famindrampo Ianao amin'izay mitia Anao sy mitandrina ny didinao;

⁶ koa enga anie Ianao hihaino sy hijery ahy! Ekeo ny vavaka izay ataoko aminao ankehitriny fa mpanomponao aho. Andro aman'alina aho no mivavaka aminao ho anay Israelita mpanomponao; avelao heloka izahay fa miaiky ny fahotana nataonay taminao aho. Eny, izaho sy ny razako samy efa nanota avokoa;

⁷ efa nanao izay ratsy indrindra taminao izahay, ka tsy nitandrina ny didy sy lalana amam-pitsipika nampitainao tamin'i Mosesy mpanomponao.

⁸ Tsarovy ilay teny nasainao nolazain'i Mosesy mpanomponao hoe: Raha manao izay mahadiso ianareo, dia haeliko any amin'ny firenen-kafa;

⁹ nefa raha miverina amiko ianareo ka imasoanareo hotanterahina ny didiko, na dia hisy voasesy any am-paran'ny tany aza ianareo, dia hangoniko avy any sy hoentiko ho ao amin'ilay toerana voafidiko hiatrehanareo Ahy.

¹⁰ Tompo o, mpanomponao sy vahoakanao izahay sady efa navotanao tamin'ny herinao lehibe sy ny fahefanao tsy hay tohaina.

¹¹ Koa mitalaho aminao aho, Tompo o; aoka Ianao hihaino ny vavaka ataoko sy ataon'ireo mpanomponao rehetra izay faly manaja Anao. Hambininao anie aho ka hataonao mahazo famindrampo eo imason'ny amperora! Mpandroso divay ho an'ny amperora aho tamin'izay.

Toko faha-2

¹ Tamin'ny taona faha-roapolo nanjakan'i Artakserksesa, volana Nisana, raha ilay nisakafo iny indrindra ny amperora, dia naka divay aho ka nandroso azy taminy. Vao izay aho no mba nalahelo teo anatrehan'ny amperora

² ka hoy izy tamiko: Nahoana no malahelo tarehy ianao, kanefa tsy marary tsinona? Tsy zavatra hafa izao fa alahelom-po mihitsy. Dia raiki-tahotra mafy aho

³ ka niteny tamin'ny amperora hoe: Ho velona mandrakizay anie ianao, ry andriamanjaka! Nahoana no tsy halahelo tarehy aho, fa rava ny tanana misy ny fasan-drazako sady levon'ny afo ny vavahadiny?

⁴ Dia hoy ny amperora tamiko: Inona ary no angatahinao? Nivavaka tamin'Andriamanitry ny lanitra aho aloha,

⁵ vao niteny tamin'ny amperora hoe: Raha sitrakao izany, ry andriamanjaka, ary raha misy fankatelemanao ahy mpanomponao, dia mba alefaso ho any Joda aho, ho any amin'ilay tanana misy ny fasan-drazako mba hanamboarako azy.

⁶ Ny amperora, izay nanana ny vadibeny nipetraka teo anilany, dia mbola nanontany ahy hoe: Haharitra fotoana firy any anefa ianao ary rahoviana no hiverinay Dia sitraky ny amperora ny handefa ahy, koa nilaza fetr'andro taminy aho

⁷ sady nanampy teny hoe: Raha sitrakao, ry andriamanjaka, dia aoka hisy taratasy homena ahy ho an'ireo governoran'ny faritra any andafy andrefan'ny ony Eofrata, mba hamelany ahy handeha hatrany Joda.

⁸ Aoka hisy taratasy homena ahy koa ho an'i Asafa mpiandraikitra ny alam-panjakana mba hanomezany hazo ahy hatao amin'ny varavaran'ny trano fiarovana manolotra ny tempoly sy amin'ny mandan'ny tanana ary amin'ny trano hitoerako. Dia nomen'ny amperora ahy ireo taratasy ireo, araka ny fiarovana nanambinan'Andriamanitra ahy.

⁹ Nankany amin'ireo governora any andafy andrefan'ny ony Eofrata aho ka nanolotra azy ny taratasin'ny amperora. Nisy manamboninahitra sy mpitaingin-tsoavaly rahateo nirahin'ny amperora mba hiaraka amiko.

¹⁰ Raha nahare izany i Sanebalato ilay Horonita sy i Tobia ilay Hamonita mpanampy azy, dia samy sosotra tokoa satria nisy lehilahy tonga hikarakara izay hahasoa ny Israelita.

¹¹ Dia tonga tany Jerosalema aho ka nipetrapetraka tao telo andro;

¹² nefa tsy nisy olona nilazako izay natsindrin'Andriamanitra ny foko mba hatao ho an'i Jerosalema. Avy eo dia niainga alina aho, nomban'olona vitsivitsy; ary tsy nisy biby nentiko afa-tsy ilay boriky nitaingenako ihany.

¹³ Nandeha alina aho ka nivoaka ilay vavahadin'ny Lohasaha dia nandroso nankany amin'ilay loharanon'ny Dragona ary nihazo ilay vavahadin'ny Fanariam-pako. Nozahako ny mandan'i Jerosalema efa rava sy ny vavahady efa levon'ny afo.

¹⁴ Dia nizotra nankany amin'ilay vavahadin'ny Loharano aho sy nihazo ilay farihin'ny mpanjaka; nefa tsy nisy intsony lalana azon'ilay biby nitaingenako naleha.

¹⁵ Iny alina iny ihany no niakarako ny tevana amoron'ny lohasahan-driaka sy mbola nizahako ny manda; izay vao nitampody aho, dia niditra ilay Vavahadin'ny Lohasaha ka tafaverina.