2 Tantara

Toko faha-25

¹⁸ Fa i Joasy mpanjakan'i Israely dia nandefa iraka tany amin'i Amatsia mpanjakan'i Joda hamaly azy hoe: "Ny kirihitra tsilo izay tany Libano, hono, dia nandefa iraka tany amin'ny sedera izay tany Libano mba hiangavy azy hoe: 'Omeo ho vadin'ny zanakolahy ny zanakao vavy.' Kanjo nisy bibidian'i Libano namaky teo ka nanosihosy ny kirihitra tsilo.

¹⁹ Lazainao, ry Amatsia, fa nandresy ny Edomita ianao, ka dia nasesiky ny fonao hirehareha; mitoera ihany re ao an-tranonao, fa nahoana ianao no hanomboka ady handoza anao sady hahalavo ny tenanao mbamin'ny tafik'i Joda?"

²⁰ Kanefa tsy nanaiky i Amatsia; avy tamin'Andriamanitra rahateo izany, satria tiany hatolotra eo an-tanan'ny fahavalo i Amatsia sy ny tafiny noho ireo nivavaka tamin'ny andriamanitry ny Edomita.

²¹ Dia niakatra hiady i Joasy mpanjakan'i Israely avaratra; ka ny tafiny sy ny an'i Amatsia mpanjakan'i Joda dia nifanandrina tao Bety-Semesy tananan'i Joda.

²² Resy teo anoloan'ny tafik'i Israely ny tafik'i Joda; ka samy nandositra ho any an-tranony avy ny miaramila jodeanina.

²³ Tao Bety-Semesy no voasambotr'i Joasy mpanjakan'i Israely i Amatsia, zanakalahin'i Joasy sy zafin'i Ahazia sady mpanjakan'i Joda, ka nentiny nankany Jerosalema; ary nandravan'i Joasy roanjato metatra ny mandan'i Jerosalema hatreo amin'ny vavahadin'i Efraima ka hatrany amin'ny vavahady anjorony.

²⁴ Dia nalain'i Joasy avokoa ny volamena sy ny volafotsy ary ny zava-tsarobidy izay hita tao an-tranon'Andriamanitra sady teo ambany fiambenan'i Hobeda-Edoma na izay hitatao amin'ny raki-tsoan'ny lapan'ny mpanjaka; ary nisy ihany koa olona nalainy hatao takalon'aina. Izay izy vao niverina nankany Samaria.

²⁵ Taorian'ny nahafatesan'i Joasy zanakalahin'i Joahaza sady mpanjakan'i Israely, dia mbola naharitra 15 taona i Amatsia zanakalahin'i Joasy sady mpanjakan'i Joda.

²⁶ Ny sisa amin'ny tantaran'i Amatsia, na tamboalohany na tafara, dia voasoratra ao amin'ny Bokin'ireo mpanjakan'i Joda sy i Israely.

²⁷ Nanomboka tamin'ny andro nihatahan'i Amatsia tsy hanaraka ny TOMPO, dia nisy olona nikomy tamin'ity mpanjaka tao Jerosalema, ka nahatonga azy nandositra tany Lakisy ; fa nampanaraka azy ireto mpikomy ka nampamono azy ho faty tany an-toerana.

²⁸ Dia nampodina an-kalesy tarihin-tsoavaly ny fatiny, ka nalevina am-pasan-drazany tao an-drenivohitr'i Joda.

Toko faha-26

¹ Vao 16 taona i Hozia no nalain'ny vahoaka jodeanina rehetra ka notendreny ho mpanjaka handimby an'i Amatsia rainy.

² Rehefa lasa nodimandry any amin'ny razany kosa ity rainy, dia i Hozia no nampody ny seranana Elota ho an'ny fanjakan'i Joda sy nanamboatra azy indray.

³ Feno 16 taona i Hozia fony tonga mpanjaka; ary naharitra 52 taona no nanjakany tao Jerosalema. Ny anaran-dreniny dia i Jekolia izay avy ao Jerosalema ihany.

⁴ Nanao izay mahitsy eo imason'ny TOMPO i Hozia, tahaka izay rehetra nataon'i Amatsia rainy.

⁵ I Hozia tamin'ny andro niainan'i Zakaria izay nampianatra azy hanaja an'Andriamanitra, dia nivavaka tokoa tamin'ny TOMPO Andriamanitra sady nomeny fanambinana.

⁶ Nandeha niady tamin'ny Filistinina i Hozia, ka nandrava ny mandan'i Gata sy ny an'i Jabne ary ny an'i Asdoda ; avy eo izy dia nanamafy tanana jodeanina takaikin'i Asdoda sy takaikin'ny Filistinina.

⁷ Ary nanampy azy hatrany Andriamanitra hanohitra ny Filistinina sy ny Arabo nonina tao Gora ary ny Mehonita.

⁸ Ireto Mehonita ireto aza dia nandoa hetra ho azy.Tonga nahery fatratra i Hozia ka niely laza hatrany amin'ny sisin-tanin'i Ejipta.

⁹ Nanao tilikambo tao Jerosalema izy, teo amin'ny Vavahadin'ny Zoro sy teo amin'ny Vavahady mankany an-dohasaha sady nohamafisiny tsara.

¹⁰ Nanao tilikambo fiambenana ihany koa izy tao an-taniefitra sady nihady lavaka maro ho famorian-drano, satria nanana omby aman'ondry betsaka izy teny amin'ny faritr'i Sefela sy teny amin'ny lemaka; ary nanana mpiasa tany teny an-kavoana sy mpamboly voaloboka teny an-tanimboaloboka koa ny mpanjaka, satria tia asa tany tokoa izy.

¹¹ Nanana tafika i Hozia, dia tafika afa-mifanandrina amin'ny fahavalo sy vonona hiatrika ady; notsinjaraina ho vondro-miaramila izany, araka ny vokatry ny fanisana notontosain'i Jehiela mpitan-tsoratra sy i Mahaseia mpitantan-draharaha, sady napetraka ho eo ambany fifehezan'i Hanania izay anankiray tamin'ireo komandy voatendrin'ny mpanjaka.

¹² Andiany roa nisy olona eninjato no filohan-tarika nibaiko ireo miaramila maherifo ireo;

¹³ ary ny tafika matanjaka nofeheziny kosa dia antokony telonjato nisy vatan-dehilahy 7500, izay nahery niady tokoa mba homba ny mpanjaka hamely ny fahavalony.

¹⁴ Isaky ny hiantafika ireo, dia efa nanomanan'i Hozia ampinga sy lefona, satro-by fiarovan-doha sy akanjo vy fiarovan-tratra, ary tsipika sy vaton'antsamotady.

¹⁵ Nanamboatra milina tao Jerosalema izy izay noforonina manokana mba hapetraka teny amin'ny tilikambo sy teny amin'ny zoron'ny manda ary mba handefasana zana-tsipika na vato lehibe. Nahagaga ny nanampian'Andriamanitra an'i Hozia, ka tonga nahery tokoa izy sady niely lavitra ny lazany.

¹⁶ Kanjo nampiavonavona am-po azy izany hery nananany izany, ka nitarika loza ho an'ny tenany. Nivadika tamin'ny TOMPO Andriamaniny izy ka niditra tao amin'ny Toeramasin'ny TOMPO mba handoro vovo-javamanitra teo amin'ny alitara fanaovana izany.

¹⁷ Fa mba niditra nanaraka azy kosa i Hazaria mpisorombe, niaraka tamin'ny mpisoron'ny TOMPO valopolo lahy izay samy mahery fo avokoa.

¹⁸ Dia nijoro teo anoloan'ny Hozia mpanjaka ireo ka nanao taminy hoe:-Tsy anjara raharahanao, ry Hozia, ny handoro vovo-javamanitra ho an'ny TOMPO; fa anjaran'ny mpisorona taranak'i Aharona izay natokana hanao izany. Miala amin'ny Toeramasina ianao, satria manimbazimba an'Andriamanitra; ary tsy ho voninahitra ho anao eo anatrehan'ny TOMPO Andriamanitra izany.

¹⁹ Mbola teny an-tanan'i Hozia ny fitaovana fandoroana vovo-javamanitra no nisafoaka tamin'ireo mpisorona izy.Tamin'izay indrindra dia nisy aretin-koditra nipoitra teo amin'ny handriny raha izy mbola tao an-tranon'ny tompoiny, teo anatrehan'ny mpisorona sady teo anilan'ny alitara fandoroana vovo-javamanitra.

²⁰ Ary i Hazaria mpisorombe sy ireo mpisorona hafa rehetra dia nanatrika nijery azy ka nahita ny aretin-koditra teo amin'ny handriny. Dia noroahiny hiala ny Toeramasina izy; sady ny tenany koa mba nivoaka ny tempoly faingana ihany, satria tsapany efa namely azy ny TOMPO.

²¹ Dia nianjadian'izany aretin-koditra izany i Hozia mpanjaka ambara-pahafatiny; ary nitoetra mitokana tao amin'ny trano anankiray izy , sady tsy nahazo niditra tao an-tranon'ny TOMPO intsony. Ka dia i Jotama zanany lahy, efa mpifehy ny tao an-dapan'ny mpanjaka, no nitondra ny tany sy ny fanjakana.

²² Ny sisa amin'ny tantaran'i Hozia, na tamboalohany na tafara, dia nosoratan'i Isaia mpaminany zanakalahin'i Amotsa.

²³ Rehefa lasa nodimandry any amin'ny razany kosa i Hozia , dia nalevina tao an-tsaha filevena-mpanjaka; kanefa tsy tao amin'ny fasan-drazana no nandevenana azy, satria hoy ny olona hoe: "Voan'ny aretin-koditra izy!" Ary i Jotama zanany lahy no nanjaka nandimby azy.

Toko faha-27

¹ Feno 25 taona i Jotama fony izy tonga mpanjaka; ary naharitra 16 taona no nanjakany toa Jerosalema. Ny anaran-dreniny dia i Jerosa zanakavavin'i Tsadoka.

² Nanao izay mahitsy eo imason'ny TOMPO i Jotama, tahaka izay nataon'i Hozia rainy, kanefa tsy mba niditra tao amin'ny Toeramasin'ny TOMPO. Saingy mbola niharatsy toetra ihany ny vahoaka.

³ I Jotama no nanamboatra ny vavahady ambony tamin'ny tranon'ny TOMPO sady nanatontosa rafitra be tamin'ny mandan'i Hofela.

⁴ Nanorenany tanana teny amin'ny havoan'i Joda ary nanaovany trano fiarovana sy tilikambo tany an'ala.

⁵ Niadian'i Jotama ny mpanjakan'ny Hamonita ka resiny. Tamin'io taona io no nanomezan'ny Hamonita azy volafotsy telo taonina sy varimbazaha telo taonina ary vary orza telo taonina; dia mbola izany ihany koa no naloan'izy ireo tamin'ny taona roa manaraka.

⁶ Nitombo hery hatrany i Jotama noho izy tsara fitondrantena teo anatrehan'ny TOMPO Andriamaniny.

⁷ Ny sisa amin'ny tantaran'i Jotama mbamin'ny adiny rehetra sy ny zava-bitany dia indreo efa voasoratra ao amin'ny Bokin'ny mpanjakan'i Israely sy i Joda izany.

⁸ Feno 25 taona izy fony tonga mpanjaka; ary naharitra 16 taona no nanjakany tao Jerosalema.

⁹ Rehefa lasa nodimandry any amin'ny razany kosa i Jotama, dia nalevina taoan-Tananan'i Davida; ary i Ahaza zanany lahy no nanjaka nandimby azy.

Toko faha-28

¹ Feno roapolo taona i Ahaza fony izy tonga mpanjaka; ary naharitra 16 taona no nanjakany tao Jerosalema. Tsy mba nanao izay mahitsy eo imason'ny TOMPO tahaka an'i Davida razambeny izy,

² fa nitondra tena tahaka ny mpanjakan'i Israely avaratra. Nanao sarivongan-tsampy ho fanajana an'ireo Bahala mihitsy aza i Ahaza.

³ Nandoro vovo-javamanitra tao amin'ny lohasahan'i Bena-Hinoma koa izy, ary nanolotra ny zanany ho sorona dorana tamin'ny afo , araka ny fomba maharikoriko fanaon'ny hafa firenena izay noroahin'ny TOMPO teo anoloan'ny Israelita.

⁴ Nanao sorona biby izy sy nandoro azy hanetona teny amin'ny toeram-panasinana ary koa teny an-tampon-kavoana sy teny ambany hazo maitso midoroboka rehetra teny.

⁵ Koa dia natolotry ny TOMPO Andriamaniny ho eo an-tanan'ny mpanjaka sirianina i Ahaza; nandresy azy ny mpanjaka sirianina ary nitondra olona sambo-belona betsaka nankany Damasy. Ny tenan'i Ahaza koa dia natolotry ny TOMPO ho eo an-tanan'i Peka zanakalahin'i Remalia sady mpanjakan'i Israely , izay namely mafy ka naharesy azy.

⁶ Indray andro monja i Peka dia nampamono ho faty vondro-miaramila jodeanina 120, noho ny nandaozan'ireo ny TOMPO Andriamanitry ny razany.

⁷ Ary i Zikry, lehilahy maherifo tamin'ny Efraimita, no namono nahafaty an'i Mahaseia zanakalahin'i Ahaza mpanjaka sy namono nahafaty an'i Hazrika mampifehy ny tao an-dapa ary namono nahafaty an'i Elkana izay mpiara-miasa akaiky indrindra tamin'ny mpanjaka.