2 Tantara

Toko faha-28

⁸ Dia nahazo olona sambo-belona andriany 200 tamin'ireo havany tatsimo ny Israelita, dia zaza amam-behivavy; nahazo babo betsaka taminy koa izy, ka nitondra ireny tany Samaria.

⁹ Nisy mpaminanin'ny TOMPO tao Samaria, ary Hobeda no anarany. Niainga hitsena ny miaramila israelita tavaratra izay niditra ny tanana izy, ka nanao taminy hoe:-Indro fa tezitra mafy tamin'ny Jodeanina tokoa ny TOMPO Andriamanitry ny razanareo, ka nanolotra azy ho eo an-tananareo.Kanefa nisafoaka diso tafahoatra ianareo fony namono nahafaty azy, hany ka nanaka-danitra ny akon'izany.

¹⁰ Ankehitriny ny terak'i Joda sy i Jerosalema, na lahy na vavy, dia kasainareo handevozina; ka tonga manan-keloka amin'ny TOMPO Andriamanitrareo koa ianareo!

¹¹ Henoy ary aho: Alefaso ny olona sambo-belona izay nentinareo avy tamin'ny Jodeanina havanareo, satria irehetan'ny fahatezeran'ny TOMPO ianareo.

¹² Nitsangana tamin'izay ny lehibeny sasany anisan'ny loholona efraimita, dia i Hazaria zanakalahin'i Johanana, i Berekia zanakalahin'i Mesilemota, i Hezekia zanakalahin'i Saloma, ary i Hamasa zanakalahin'i Hadlay. Notoherin'izy efa-dahy ny miaramila izay avy niantafika

¹³ sady nilazany hoe:-Aza ampidirinareo aty ireo olona sambo-belona ireo, fa tonga hanan-keloka amin'ny TOMPO isika. Mbola kasainareo hampiana ihany ve ny fahotana amam-pahadisoantsika, na dia efa mavesatra tokoa aza izany ary na dia efa mirehi-pahatezerana amintsika Israelita tavaratra aza Andriamanitra?

¹⁴ Teo anatrehan'ny manampahefana sy ny vahoaka rehetra tafangona teo no nalefan'ireo miaramila ny sambo-belona sy babo azony.

¹⁵ Ary olona voatonona anarana manokana no nitsangana nampahery ny sambo-belona: tamin'ny zavatra voababo ihany no nampiakanjoiny izay rehetra tsy nitafy na koa nanomezany azy kapa; notolorany sakafo sy zava-pisotro ny besinimaro, nohosorany diloilo ny nangotsokotsoka, nampitaingeniny boriky izay rehetra nandringa; dia izy sambo-belona mianakavy no nentiny tany Jerikao, tanana mpamokatra rofia, ho any amin'ny mpiray foko aminy. Avy eo vao niverina nody tany Samaria ireo mpanatitra.

¹⁶ Tamin'izany andro izany i Ahaza mpanjaka no nandefa iraka ho any amin'ny mpanjakan'i Asiria mba hangataka ny any hanampy azy.

¹⁷ Tonga indray manko ny Edomita namely ny Jodeanina sy nitondrasambo-belona.

¹⁸ Ary ny Filistinina koa nanafika ny tanana tao Sefela sy tao Negeba izay anisan'ny fanjakan'i Joda, dia nahazoan'i Bety-Semesy sy i Aialona ary i Gederotambamin'i Sokao sy i Timna ary i Gimzao miaraka amin'ny tanana kely manodidina azy avy; ka nonenan'ny Filistinina ireny.

¹⁹ Nampietren'ny TOMPO toy izany ny fanjakan'i Joda noho i Ahaza mpanjakany efa nitaona ny Jodeanina hiala amin'ny TOMPO sy hanimbazimba Azy.

²⁰ Dia tonga i Tiglato-Pilesera mpanjakan'i Asiria kanefa nanao fahirano an'i Ahaza fa tsy nanampy azy akory.

²¹ Efa nakan'i Ahaza ampahany aza ny zavatra tao an-tranon'ny TOMPO sy tao an-dapany ary tao an-tranon'ny manampahefana, ka efa nomeny ny mpanjakan'i Asiria; saingy tsy nahazoany tombontsoa akory izany.

²² Tamin'ny andro nanaovana fahirano azy, dia mbola nanao izay nahadiso amin'ny TOMPO ihany io Ahaza mpanjaka io.

²³ Fa ireo andriamanitr'i Damasy, izay andriamanitra nandresy an'i Ahaza, no nanolorany sorona satria hoy izy anakampony hoe: "Nanampy ny mpanjakan'i Siria ireo andriamanitra ireo, ka dia hanolorako sorona koa mba hanampiany ahy." Kanjo tonga fandravana an'i Ahaza sy ny vahoakany rehetra ireo.

²⁴ Nangonin'i Ahaza ny fanaky ny tranon'Andriamanitra ka nomontsamontsaniny; ary nohidiany avy ny varavaran'ny tranon'ny TOMPO. Dia nanaovany alitara teny amin'ny fihaonan-dalana rehetra tao Jerosalema ;

²⁵ ary isan-tananan'ny fanjakan'i Joda dia nanaovany toeram-panasinana mba handoroana sorona hanetona ho an'ny andriamani-kafa, ka izany no nahatezitra ny TOMPO Andriamanitry ny razany.

²⁶ Ny sisa amin'ny tantaran'i Ahaza sy ny zavatra nataony, na tamboalohany na tafara, dia voasoratra ao amin'ny Bokin'ireo mpanjakan'i Joda sy i Israely.

²⁷ Rehefa lasa nodimandry any amin'ny razany kosa i Ahaza , dia nalevina tao an-tanana Jerosalema; saingy tsy tao amin'ny fasan'ny mpanjaka no nampidirana azy. Ary i Hezekia zanany lahy no nanjaka nandimby azy.

Toko faha-29

¹ Feno 25 taona i Hezekia fony tonga mpanjaka; ary naharitra 29 taona no nanjakany tao Jerosalema. Ny anaran-dreniny dia i Abia, zanakavavin'i Zakaria.

² Ary nanao izay mahitsy eo imason'ny TOMPO i Hezekia, tahaka izay rehetra nataon'i Davida razambeny.

³ Tamin'ny volana voalohan'ny taona voalohany nanjakany, dia novohany sady namboariny avy ny varavaran'ny tranon'ny TOMPO.

⁴ Ary nasainy tonga ireo mpisorona sy levita ka nangoniny teo amin'ny Kianja Atsinanana

⁵ ary nilazany hoe:-Henoinareo aho, ry taranak'i Levy! Ankehitriny midiova tena ianareo, diovy koa ny tranon'ny TOMPO Andriamanitry ny razanareo, ary esory amin'ny Toeramasina ny zavatra maloto ara-pivavahana.

⁶ Fa nivadika tamin'ny TOMPO Andriamanitsika ny razantsika sy nanao izay ratsy eo imasony ary nandao Azy; niamboho ny TOMPO ireo ka tsy niatri-maso ny fonenany intsony.

⁷ Nohidiany ny varavarana amin'ny lalantsara fidirana, navelany ho faty ny jiro, ary tsy nandoroany vovo-javamanitra sady tsy nanolorany sorona dorana manontoloho an'Andriamanitr'i Israely intsony tao amin'ny tempoliny.

⁸ Ka dia niharan'ny fahatezeran'ny TOMPO i Joda sy i Jerosalema; ary hataony ohatra hampihoron-koditra sy hampahonena ary ho enti-maneso, toy izao mbola hitanareo maso izao.

⁹ He! matin'ny sabatra ireo vatan-dehilahy razantsika, ary ny vady aman-janany dia efa natao sambo-belona.

¹⁰ Koa nanapa-kevitra aho ny hanao fanekem-pihavanana amin'ny TOMPO Andriamanitr'i Israely mba hiala amintsika ny fahatezerany mirehitra.

¹¹ Ianareo kosa, manaova fanarenan-javatra ankehitriny ka aza malaina, satria ianareo no voafidin'ny TOMPO hiatrika Azy mba hanao fanompoam-pivavahana aminy sy ho mpandraharahany ary ho mpandoro vovo-javamanitra ho Azy.

¹² Ireto avy ny levita tonga teo: tamin'ny terak'i Kehata dia i Mahata zanakalahin'i Hamasay ary i Joela zanakalahin'i Hazaria; tamin'ny terak'i Merary dia i Kisy zanakalahin'i Habdy ary i Hazaria zanakalahin'i Jehalaleela; tamin'ny Gersonita, dia i Joazanakalahin'i Zima, ary i Hedera zanakalahin'i Joa;

¹³ tamin'ny terak'i Elitsafana, dia i Simry sy i Jehoela; tamin'ny terak'i Asafa, dia i Zakaria sy i Matania;

¹⁴ Tamin'ny terak'i Hemana, dia i Jehiela sy i Simehy; ary tamin'ny terak'i Jedotona, dia i Semahia sy i Hoziela.

¹⁵ Dia namory ny mpiray tarika aminy avy izy ireo, ka samy nidio tena; avy eo dia niditra ny tranon'ny TOMPO mba hanadio izany, araka ny didin'ny mpanjaka mifototra amin'ny tenin'ny TOMPO.

¹⁶ Ny mpisorona no niditra tao amin'ny efitrano malalaka anatiny amin'ny tranon'ny TOMPO mba hanadio izany ary namoaka ny fanaka maloto rehetra izay hitany tao amin'ny Toeramasin'ny TOMPO ho eo an-kianjan'ny tranon'ny TOMPO; ny levita kosa nandray ireny mba havoakany ho any amin'ny lohasahan-driaka Kidrona.

¹⁷ Tamin'ny andro voalohan'ny volana voalohany no nanombohana ny fanadiovana; ary tamin'ny andro fahavalon'io volana io no tafapaka teo amin'ny lalantsara fidirana ho ao an-tempoly izany. Valo andro koa no naharetan'ny fanadiovana ny tranon'ny TOMPO, ka andro faha-16 tamin'io volana voalohany io no vita tanteraka ny fanadiovana manontolo.

¹⁸ Dia niditra tao an-tranon'i Hezekia mpanjaka ireto taranak'i Levy ka nanao hoe:-Efa voadionay avokoa, ry Andriamanjakao, ny tranon'ny TOMPO sy ny alitara fisoronana mbamin'ny kojakoja rehetra momba azy ary ny latabatry ny mofo alahatra mbamin'ny kojakoja rehetra momba azy koa.

¹⁹ Ary ny fanaka rehetra, izay nozimbazimbain'i Ahaza mpanjaka tamin'ny fahotana vitany nandritra ny nanjakany, dia nohavaozinay sy nodiovinay; koa indreo izy eo anoloan'ny alitaran'ny TOMPO.

²⁰ Ny ampitso dia nifoha maraina koa i Hezekia mpanjaka, ka namory ny manampahefan'ny tanana, dia niakatra ho ao an-tranon'ny TOMPO.

²¹ Ombilahy fito mbamin'ny ondrilahy fito sy zanak'ondry fito no nentina hatao sorona dorana manontolo, ary nisy koa osilahy fito hatao sorona fanalana ny ota ho an'ny ankohonan'ny mpanjaka sy ho an'ny vahoaka jodeanina sady hatao sorona fanadiovana ny tempoly; ka ny mpisorona, taranak'i Aharona, no nasain'i Hezekia nanolotra ireo teo ambony alitaran'ny TOMPO.

²² Dia novonoina ny ombilahy, ary nalain'ny mpisorona ny ra ka nararany tamin'ny alitara; novonoina ko any ondrilahy sy ny zanak'ondry ka samy nararaka tamin'ny alitara ny rany.

²³ Ary ny osilahy hatao sorona fanalana ny ota dia nentina teo anatrehan'ny mpanjaka sy ny vahoaka tafangona ka nametrahan'izy rehetra tanana;

²⁴ dia novonoin'ny mpisorona ireo osilahy ireo, ka ny rany no natolony teo amin'ny alitara araka ny fanao mba ho sorona famelan-keloka ho an'i Israely manontolo; fa nasain'ny mpanjaka natolotra ho an'iIsraely manontolo na ny sorona dorana manontolo na ny sorona fanalana ny ota.

²⁵ Ary napetraky ny mpanjaka tao an-tranon'ny TOMPO ireo levita omban'ny kipantsona sy valiha ary lokanga, araka ny didy nataon'i Davida mpanjaka ary koa nataon'i Gada mpahitany sy i Natana mpaminany; izany no didy nampitain'ny TOMPO tamin'ny alalan'ireo mpaminaniny.

²⁶ Dia naka toerana ny levita omban'ny zava-manenon'i Davida, ary koa ny mpisorona omban'ny trompetra.

²⁷ Avy eo nasain'i Hezekia natolotra teo ambony alitara ny sorona dorana manontolo; ka vantany vao natomboka izany fanoloran-tsorona izany, dia natomboka noredonina koa ny hira ho an'ny TOMPO sady narahin'ny feon-trompetra sy ny zava-manenon'i Davida mpanjakan'i Israely.

²⁸ Niankohoka avokoa ny vahoaka tafangona teo, fa ny mpihira kosa nihira hatrany ary ny mpanao mozika nitsoka trompetra, mandra-pahavitan'ny sorona dorana manontolo.

²⁹ Nony efa tapitra ny fanoloran-tsorona, dia nandohalika sy niankohoka ny mpanjaka mbamin'izay rehetra tafaraka taminy.

³⁰ Ary i Hezekia sy ny manampahefana dia nanainga ny levita mbola hidera ny TOMPO tamin'ny tononkiran'i Davida sy ny an'i Asafa mpahita; ka nihira fiderana tamin-kafaliana izy, avy eo dia niondrika sy niankohoka hitsaoka ny TOMPO.