1 Mpanjaka

Toko voalohany

²³ Ary nisy nilaza tamin'ny mpanjaka hoe: Indro ao i Natana mpaminany. Dia nankeo anatrehan'ny mpanjaka i Natana ka niankohoka hatreo amin'ny tany ho fanajana azy

²⁴ ary niteny hoe: Ry andriamanjaka o, angaha ianao efa nilaza fa i Adonia no hanjaka handimby anao ka hipetraka eo amin'ny sezafiandriananao?

²⁵ Fa androany izy dia nidina tao amin'ny vaton'i Zoheleta ka nanao fety be izay namonoana omby sy zanak'omby matavy ary ondry maro. Nasainy tao avokoa ny zanakalahinao rehetra sy ny filohan'ny tafika ary i Abiatara mpisorona. Indreo izy rehetra fa mihinana sy misotro eo anatrehany ka mihorakoraka hoe: Ho ela velona anie i Adonia mpanjaka!.

²⁶ Nefa dia tsy mba nasainy na ny tenako na i Tsadoka mpisorona, na i Benaia zanakalahin'i Joiada, na i Salomona zanakalahinao.

²⁷ Moa ve baiko avy taminao, ry andriamanjaka, no nahatonga izany? Fa izahay mpanomponao ireto tsy mba nampahafantarinao izay handimby anao eo amin'ny sezafiandriananao.

²⁸ Tamin'izay dia niteny i Davida mpanjaka ka nanao hoe: Antsoy hankaty i Baty-Seba. Dia nankeo anatrehan'ny mpanjaka izy ka nijoro teo anoloany.

²⁹ Ary ny mpanjaka nanao izao fianianana izao taminy: Velona ny TOMPO, Izay nanafaka ahy tamin'ny fahoriana rehetra,

³⁰ koa mianiana aminao aho fa hotanterahiko anio izay efa nampanantenaiko taminao teo anatrehan'ny TOMPO Andriamanitr'i Israely hoe: I Salomona zanakao no hanjaka handimby ahy ka hipetraka eo amin'ny sezafiandrianako.

³¹ Dia nandohalika i Baty-Seba ka niankohoka hatreo amin'ny tany ho fanajana ny mpanjaka ary nihiaka hoe: Ho ela velona mandrakizay anie ianao, ry Davida andriamanjaka!

³² Dia nampiantsoin'i Davida i Tsadoka mpisorona sy i Natana mpaminany ary i Benaia zanakalahin'i Joiada; rehefa tonga teo anatrehan'ny mpanjaka izy telo lahy ireo,

³³ dia nobaikoiny hoe: Vorio ny miaramila mpiambina ahy, dia ampitaingeno ny borikivaviko i Salomona zanako, ka ento midina any Gihona izy.

³⁴ Any no hanosotra azy ho mpanjakan'i Israely i Tsadoka mpisorona sy i Natana mpaminany; ary ianareo sisa kosa hitsoka ny anjomara sady hihiaka hoe: Ho ela velona anie i Salomona mpanjaka!

³⁵ Avy eo ianareo dia hiakatra hanaraka azy ao an-tanana; ary hiditra i Salomona dia hipetraka eo amin'ny sezafiandrianako ka hanjaka hisolo ahy, satria izy no voatendriko ho filohan'i Israely sy i Joda.

³⁶ Dia hoy i Benaia zanakalahin'i Joiada namaly ny mpanjaka: Amen! Izany no tenin'ny TOMPO Andriamanitrao, ry andriamanjaka.

³⁷ Toy ny efa nanomban'ny TOMPO anao anie, ry andriamanjaka, no hanombany koa an'i Salomona; ary hataony be voninahitra noho ny anao anie ny sezafiandrianan'i Salomona!

³⁸ Dia nidina nankany amin'i Salomona i Tsadoka mpisorona sy i Natana mpaminany ary i Benaia zanakalahin'i Joiada, niaraka tamin'ny Keretita sy ny Peletita mpiambina andriana ka nampitaingina azy ny borikivavin'i Davida, ary nitondra azy nankany Gihona.

³⁹ Dia nalain'i Tsadoka mpisorona ny tandroka misy menaka tao amin'ny Tranolay Fihaonana ka nandrarahany tamin'ny lohan'i Salomona ho fanosorana azy ho mpanjaka. Notsofina tamin'izay ny anjomara, ary ny vahoaka rehetra teo samy nihiaka hoe: Ho ela velona anie i Salomona mpanjaka!

⁴⁰ Dia niakatra nanaraka azy tao an-tanana ny vahoaka rehetra izay nitsoka sodina sady faly aoka izany, ka dia nila hitresaka ny tany noho ny horakorany.

⁴¹ Rehefa tapi-nihinana i Adonia sy ny nasainy rehetra dia samy nahare ny horakoraky ny olona; i Joaba aza dia nandre ny feon'anjomara ka velom-panontaniana hoe: Fa inona izany kotaba be manerana ny tanana izany?

⁴² Raha mbola niteny toy izany izy, dia indro niditra i Jonatana zanakalahin'i Abiatara mpisorona; ka hoy i Adonia taminy: Mandrosoa fa olom-banona ianao, ka ho vaovao tsara no entinao.

⁴³ Fa niteny i Jonatana ka nanao tamin'i Adonia hoe: Indrisy, tsy izany akory fa izao: I Davida andriamanjaka no efa nanangana an'i Salomona ho mpanjaka handimby azy.

⁴⁴ Ary i Davida efa naniraka an'i Tsadoka mpisorona sy i Natana mpaminany ary i Benaia zanakalahin'i Joiada mbamin'ny Keretita sy ny Peletita mpiambina mba hiaraka amin'i Salomona; ka ireo no nampitaingina azy ny borikivavin'ny mpanjaka.

⁴⁵ Ary i Tsadoka mpisorona sy i Natana mpaminany nanosotra azy ho mpanjaka teo Gihona. Avy eo ny olona rehetra dia niakatra tao an-tanana naneho ny hafaliany, ka dia feno horakoraka ny tanana. Izany izao kotaba be renareo izao.

⁴⁶ Manaraka izany koa dia efa tafapetraka amin'ny sezafiandrianana maha mpanjaka i Salomona;

⁴⁷ ary tonga niarahaba an'i Davida andriamanjaka ireo minisitra ka nanao hoe: Hataon'ilay Andriamanitrao ho tsara laza kokoa noho ianao anie i Salomona, ary hataony ho be voninahitra noho ny sezafiandriananao anie ny sezafiandrianany. Dia niankohoka teo am-parafara ny mpanjaka,

⁴⁸ ka niteny hoe: Hisaorana anie ny TOMPO Andriamanitr'i Israely, fa nanome izay ho mpandimby ahy eo amin'ny sezafiandrianako androany; ary mbola mihiratra ny masoko no mitranga izany.

⁴⁹ Raiki-tahotra avokoa ireo olona nasain'i Adonia ka nitsangana ary samy nandositra tamin'izay azony nitsoahana.

⁵⁰ Natahotra an'i Salomona koa i Adonia, dia nitsangana ka lasa namikitra tamin'ny tandroky ny alitara.

⁵¹ Ary nisy nanambara izany tamin'i Salomona ka nanao hoe: Natahotra anao mafy i Adonia, ry Salomona mpanjaka; ka indro izy fa mamikitra amin'ny tandroky ny alitara sady manao hoe: Tsy hiala eto mihitsy aho raha tsy mianiana amiko i Salomona mpanjaka fa tsy hamono ahy ho faty amin'ny sabatra.

⁵² Fa hoy i Salomona: Raha mitondra tena toy ny olom-banona izy, dia tsy hisy hikasika na dia singam-bolony iray aza; fa raha hita ho manan-keloka kosa izy, dia ho faty ihany.

⁵³ Dia naniraka olona hampidina azy hiala teo amin'ny alitara i Salomona. Ary tonga niankohoka teo anatrehan'i Salomona mpanjaka i Adonia ka nitenenany hoe: Mahazo mody an-tranonao ianao!

Toko faha-2

¹ Rehefa nandindona an'i Davida ny andro hahafatesany, dia nandidy an'i Salomona zanany lahy izy nanao hoe:

² Efa ho faty araka ny lalan-kizoran'ny besinimaro aho; koa aoka ianao hahery sy hiseho ho tena lehilahy!

³ Tandremo izay andidian'ny TOMPO Andriamanitrao hanarahanao ny sori-dalany ary hitandrovanao ny lalanany sy ny didiny amam-pitsipiny sy ny satany araka ny voasoratra ao amin'ny lalanan'i Mosesy; dia hahomby ianao amin'izay rehetra hataonao sy hokasainao.

⁴ Ary hotanterahin'ny TOMPO ilay fampanantenana izay nambarany tamiko hoe: Raha tandreman'ireo taranakao ny fitondrantenany ka amin'ny fony manontolo sy ny fanahiny manontolo no izorany eo anatrehako amim-pahitsiana, dia tsy ho diso zanakalahy handimby eo amin'ny sezafiandrianan'i Israely ianao.

⁵ Ankoatra izany, ianao koa mahalala ny ratsy rehetra nataon'i Joaba zanakalahin'i Tseroia tamiko sy tamin'ny filohan'ny tafik'i Israely roa lahy, dia i Abinera zanakalahin'i Nera sy i Hamasa zanakalahin'i Jetera izay samy novonoiny ho faty sady nalatsany ra toy ny amin'ny ady nefa tsy nisy ady akory; ka dia tompon'andraikitra feno izy ny amin'ny nafitsony.

⁶ Koa araka ny fahendrenao no ataovy, ary aza avela ho tratra antitra amim-piadanana izy no hidina any amin'ny toeran'ny maty.

⁷ Fa ireo zanakalahin'i Barzilay avy any Gilehada kosa dia asio soa ary aoka izy hihinana eo amin'ny latabatrao, satria tonga namonjy ahy izy fony aho nandositra an'i Absaloma rahalahinao.

⁸ Farany dia aza hadino i Simehy zanakalahin'i Gera sady Benjaminita avy any Bahorima. Mafy loatra ny nanozonany ahy tamin'ny andro nankanesako tany Mahanaima; nefa nidina nitsena ahy tao Jordana izy, ka dia nianiana tamin'ny TOMPO aho fa tsy hamono azy ho faty amin'ny sabatra.

⁹ Koa ankehitriny, aza atao afa-maina izy, fa lehilahy hendry ianao ka mahafantatra izay tokony hanaovana azy; na dia efa antitra aza izy, dia amin'ny fandatsahan-dra no hampidinanao azy any amin'ny toeran'ny maty.

¹⁰ Rehefa lasa nodimandry any amin'ny razany i Davida, dia nalevina tao an-tananan'i Davida.

¹¹ Naharitra efapolo taona no nanjakan'i Davida tamin'i Israely, ka fito taona tao Hebrona ary telo amby telopolo taona tao Jerosalema.

¹² I Salomona no nipetraka teo amin'ny sezafiandrianan'i Davida rainy ary niorina tsara ny fahefam-panjakany.

¹³ Indray andro dia nankany amin'i Baty-Seba renin'i Salomona i Adonia zanakalahin'i Hagita. Ary hoy ravehivavy taminy: Hitondra fihavanana va no ahatongavanao? Ka novaliany hoe: Eny!

¹⁴ Ary hoy koa izy: Misy teny kely holazaiko aminao. Dia hoy ravehivavy: Lazao ary.

¹⁵ Dia hoy izy: Fantatrao fa ahy ny fanjakana, ary i Israely iray manontolo no efa nitodika tamiko mba hampanjaka ahy; kanjo dia tafahodina ny fanjakana ka lasan'ny rahalahiko, satria izay no sitrapon'ny TOMPO.

¹⁶ Zavatra tokana no mba angatahiko aminao ankehitriny, ka aoka re mba tsy holavinao. Ary hoy ravehivavy taminy: Lazao ary.

¹⁷ Dia hoy i Adonia: Miangavy anao re aho hiteny amin'i Salomona mpanjaka, (fa tsy handa anao izy) mba hanomezany ahy an'i Abisaga avy any Sonema ho vadiko.

¹⁸ Hoy i Baty-Seba: Eny ary fa dia hiteny momba anao amin'ny mpanjaka aho.

¹⁹ Dia nankany amin'i Salomona mpanjaka i Baty-Seba hiteny aminy momba an'i Adonia. Ary nitsangana nitsena an'i Baty-Seba ny mpanjaka sady niondrika teo anatrehany; dia niverina nipetraka teo amin'ny sezafiandrianany izy ary nasainy nasiana sezafiandrianana iray ho an-dreniny teo ankavanany.