Mpitsara

Toko faha-20

¹⁹ Niainga vao maraina ny vatan-dehilahy israelita ka nitoby tao akaikin'i Gibeha.

²⁰ Ary niroso hifanandrina amin'ny Benjaminita izy ka nilahatra hiady teo anoloan'i Gibeha.

²¹ Nivoaka avy tao an-tanana kosa ny Benjaminita, ka naharingana Israelita andiany 22 izay niampatrampatra tamin'izany andro izany.

²² Ary nandeha nitomany teo anatrehan'ny TOMPO mandra-paharivan'ny andro ny Israelita sady nanontany AZY na tokony mbola hiady amin'ny Benjaminita mpiray firenena aminy na tsia; ka novalian'ny TOMPO hoe: Miakara hiady aminy. Dia nifampahery ny Israelita ary nandeha hilahatra hiady teo amin'ny toerana izay efa nilaharany tamin'ny andro voalohany ihany.

²⁴ Tamin'ny andro faharoa no nanatona hamely ny Benjaminita indray ny Israelita.

²⁵ Kinanjo tamin'io andro faharoa io dia nivoaka avy tao Gibeha ny Benjaminita ka nandringana andiany 18 indray tamin'ny vatan-dehilahy israelita, dia lehilahy kinga famely sabatra avokoa.

²⁶ Ary nandeha niakatra tany Betela ny Israelita rehetra sy ny tafiny manontolo ka nipetraka nitomany teo anatrehan'ny TOMPO; tamin'izay dia nifady hanina mandra-paharivan'ny andro izy sady nanao sorona dorana manontolo sy sorom-pihavanana teo anatrehan'ny TOMPO.

²⁷ Tamin'izany andro izany moa mbola tao Betela ny Vatamasina misy ny fanekempihavanan'Andriamanitra; ary i Pinehasa, zanakalahin'i Elehazara sady zafikelin'i Aharona, no mpitandrina azy. Dia nanontany ny TOMPO ireo Israelita na tokony mbola handeha hiady amin'ny Benjaminita mpiray firenena aminy na tsia; ka novalian'ny TOMPO hoe: Mandehana, fa rahampitso dia hatolotro eo an-tananareo izy.

²⁹ Dia nanafina miaramila manodidina an'i Gibeha ny Israelita.

³⁰ Ary tamin'ny andro fahatelo no niakatra hamely ny Benjaminita ireo Israelita, ka nilahatra hiady teo anoloan'i Gibeha toy ny teo aloha ihany.

³¹ Fa nivoaka hiady aminy kosa ny Benjaminita ka voatarika handeha lavitra ny tanana. Ary toy ny teo aloha dia nanomboka namely ny Israelita izy ka nahafaty tokony ho telopolo lahy teny an-dalana mankany Betela sy mankany Gibehona.

³² Tamin'izay dia nihevitra ho naharesy ny Israelita toy ny teo aloha izy; kinanjo nanapa-kevitra ny Israelita fa hanao tari-dositra mba hisarika ny Benjaminita ho any amin'ny lalana mankany an-tsaha ka hanalavitra an'i Gibeha.

³³ Dia niainga avy tamin'ireo toerana rehetra nisy azy ny Israelita ka nilahatra hiady tao Bahala-Tamara; tamin'izay kosa ny miaramila israelita niafina dia nipoitra avy tao amin'ny fiereny teo andrefan'i Geba.

³⁴ Koa nisy andiany folo ny vatan-dehilahy voafantina, avy amin'i Israely manontolo, no tonga teo anoloan'i Gibeha. Nangotraka ny ady, nefa tsy nampoizin'ny Benjaminita ny fahavoazana hihatra aminy.

³⁵ Nataon'ny TOMPO resy teo anatrehan'ny Israelita ireo Benjaminita, ka nahafatesana vatan-dehilahy miisa andiany 25 miampy 100 lahy tamin'izay andro izay, dia lehilahy kinga famely sabatra avokoa.

³⁶ Takatry ny Benjaminita tamin'izay fa resy tokoa izy. Nanao tari-dositra ny Israelita, satria niantehitra tamin'ireo miaramila nafeniny manodidina an'i Gibeha.

³⁷ Ireo miaramila niafina ireo dia niroatra haingana nankany Gibeha ka namely ny tanana manontolo sy nandringana ny mponina tao.

³⁸ Ary ny famantarana efa nifanomezany tamin'ny Israelita sisa rehetra dia tsangan'afo lehibe midona-tsetroka avy ao an-tanana.

³⁹ Koa rehefa nihemotra an'ady ny Israelita ka nahafatesana tokony ho telopolo lahy, dia nihevitra ho naharesy azy tahaka ny teo aloha ny Benjaminita.

⁴⁰ Kinanjo tamin'izay indrindra no nitambolimbolina niakatra ny setroka avy tao Gibeha. Niherika ny Benjaminita ka nahatazana ny afo manaka-danitra avy tao an-tanana izay nirehitra tanteraka.

⁴¹ Nisampotina namely ny Benjaminita tamin'izay ny Israelita. Nivarahontsana ireto Benjaminita satria hitany ny fahavoazana nihatra taminy.

⁴² Vaky nandositra teo anoloan'ny vatan-dehilahy israelita izy ary nizotra nankany an-taniefitra; saingy narahin'ny andian-tafika lehibe sy ireo vatan-dehilahy israelita nivoaka avy tao an-tanana izy ka naringany.

⁴³ Notemerin'ny Israelita ireo Benjaminita, nenjehiny tsy an-kiato ka nataony matin-kitsaka teny an-dalana mandra-pahatonga hatrany atsinanan'i Geba.

⁴⁴ Nahafatesana vatan-dehilahy andiany 18 ny Benjaminita tamin'io andro io, dia lehilahy mahery fo avokoa.

⁴⁵ Ny Benjaminita sisa dia nitodi-doha nandositra nankany an-taniefitra ho any amin'ny harambaton'i Rimona. Ny andiany dimy tamin'ireo anefa dia maty noraofim-potsiny teny an-dalana, fa ny sisa kosa nenjehina ka ny nokendrena dia ny hahafongana azy; ary mbola nahafatesana andiany roa koa ireo.

⁴⁶ Ny tontalin'ny Benjaminita maty tamin'izany andro izany dia vatan-dehilahy andiany 25, ka lehilahy kinga famely sabatra sady samy mahery fo avokoa.

⁴⁷ Na izany aza, dia nisy eninjato lahy tamin'ireo nitodi-doha nandositra nankany an-taniefitra no afaka nitsoaka ihany ka tonga tao amin'ny harambaton'i Rimona ary nitoetra tao efa-bolana.

⁴⁸ Dia niverina namely ireo Benjaminita hafa ny Israelita ka isan-tanana no nandringanany tamin'ny lelan-tsabatra ny olona mbamin'ny biby fiompiny; ary ny tanana rehetra, izay hitany tamin'izany faritany izany, dia nodorany avokoa.

Toko faha-21

¹ Fony nivory tao Mitsepa ny lehilahy israelita, dia nianiana fa tsy hisy hanome ny zanany vavy hanambady lehilahy Benjaminita.

² Fa tamin'izao indray mandeha izao kosa dia nankany Betela ny vahoaka ary nijanona teo anatrehan'Andriamanitra mandra-paharivan'ny andro. Nitaraina mafy izy ireo ary nitomany fatratra

³ sady nanao hoe: Ry TOMPO Andriamanitr'i Israely o, inona no anton'izao mahalevona ny foko iray amin'Israely izao ankehitriny?

⁴ Ny ampitson'iny, dia nifoha maraina koa ny olona ka nanorina alitara teo ary nanolotra sorona dorana manontolo sy sorom-pihavanana.

⁵ Dia nifanontany ny Israelita hoe: Tamin'ny fokon'i Israely rehetra, moa nisy foko tsy tonga tamin'ilay fivoriana natao teo anatrehan'ny TOMPO tao Mitsepa ve? Efa nianiana mafy manko ry zareo tamin'izay fa na iza na iza tsy tonga teo anatrehan'ny TOMPO tao Mitsepa dia hatao maty.

⁶ Kanefa onena tokoa izy tamin'ireo Benjaminita mpiray firenena aminy, ka niteny hoe: Foko iray eto amin'i Israely no mila ho levona androany.

⁷ Inona no hataontsika mba hanomezana vady ho an'ireo lehilahy Benjaminita sisa velona, satria efa nianiana mafy teo anatrehan'ny TOMPO isika fa tsy hanome ny zanakavavintsika ho vadiny?

⁸ Dia nifanadihady teo izy mba hahalalana raha nisy vondron'olona tamin'ny fokon'i Israely tsy tonga niseho teo anatrehan'ny TOMPO tao Mitsepa. Koa hitany fa ny olona avy any Jabesy-Gilehada ihany no tsy tonga tao an-toby nivoriana.

⁹ Fa rehefa natao ny fanisana ny mpandray anjara, dia tsy nisy vatan-dehilahy tonga avy any Jabesy na iray aza.

¹⁰ Noho izany ny mpivory dia nandefa lehilahy mahery fo andiany 12 nankany Jabesy sady nanome baiko azy hoe: Ndeha aringano ny mponina ao Jabesy-Gilehada hatramin'ny zaza aman-behivavy.

¹¹ Vonoy ny lehilahy rehetra sy ny vehivavy rehetra izay efa nanam-bady. Izany no hataonareo.

¹² Tamin'ny mponina tao Jabesy-Gilehada dia nahitana tovovavy efajato mbola virijiny, ka nentin'ireo iraka ho any amin'ny toby tao Silao, tao amin'ny tany Kanahana.

¹³ Avy eo ny vahoaka tafangona rehetra dia nandefa iraka nirary fihavanana tamin'ireo Benjaminita nandositra niery tao amin'ny harambaton'i Rimona.

¹⁴ Koa niverina nody tany aminy teo no ho eo ihany ireo Benjaminita; ary nomena ho vadiny ireo vehivavy sisa velona tao Jabesy-Gilehada, nefa tsy nahenina azy rehetra.

¹⁵ Fa onena tokoa ny vahoaka tamin'ireo Benjaminita, satria efa nanisy banga teo amin'ny fokon'i Israely ny TOMPO.

¹⁶ Koa hoy ireo loholon'ny vahoaka tafangona teo hoe: Tsy misy vehivavy intsony ao amin'ny foko benjaminita, koa inona no hataontsika mba hanomezana vady ho an'ireo lehilahy sisa?

¹⁷ Fa tokony hisy taranaka mpandova ireo Benjaminita sisa velona mba tsy ho fongotra ny foko iray amin'i Israely.

¹⁸ Kanefa tsy azontsika atao ny mamela azy ireo hanambady ny zanatsika vavy, satria efa nianiana isika fa ho voaozona izay Israelita hanome ny zanany vavy ho vadin'ny lehilahy benjaminita.

¹⁹ Tamin'izay dia tsaroan'ny loholona fa hisy ny fety fanao isan-taona ho an'ny TOMPO any Silao izay eo avaratr'i Betela sy ao atsimon'i Lebona ary ao atsinanan'ny lalana mampitohy an'i Betela sy i Sekema.

²⁰ Koa nanoro hevitra ireo lehilahy benjaminita izy hoe: Mandehana miafina any anaty voaloboka,

²¹ ka miandrasa ao. Rehefa mivoaka hiara-mandihy ireo tovovavin'i Silao, dia mipoira avy tao anaty voaloboka ianareo, ka samia misambotra tovovavy iray avy; dia ento miaraka aminareo any amin'ny faritanin'i Benjamina izy mba ho vadinareo.

²² Ary raha misy rainy na anadahiny tonga hitaraina aminay, dia hovalianay hoe: Miangavy anareo izahay mba tsy ho sarotiny amin'ireo lehilahy benjaminita, satria tsy nahazo vehivavy ho azy ireo tsirairay avy izy tamin'ny ady tao Jabesy. Ary satria tsy ianareo no nanome azy ny zanakareo vavy, dia tsy azo ampangaina ho meloka amin'ny fianianana ianareo.