Mpitsara

Toko faha-10

¹⁰ Noho izany dia niantso vonjy tamin'ny TOMPO izy ka nanao hoe: Nanota taminao izahay, satria nandao Anao Andriamanitray ka nanompo ny Bahala andriamani-tsiizy.

¹¹ Dia hoy ny TOMPO tamin'ny Israelita: Raha nampahory anareo ny Ejiptianina sy ny Amorita na ny Hamonita sy ny Filistinina

¹² na ny Tsidonianina sy ny Hamalekita ary ny Midianita ka niantso vonjy tamiko ianareo, moa tsy namonjy anareo ho afaka teo an-tanan'ireny va Aho?

¹³ Saingy ianareo dia nandao Ahy ka nanompo ireo andriamani-kafa. Noho izany dia tsy hamonjy anareo intsony Aho.

¹⁴ Andeha antsoy ireo andriamani-tsiizy efa nofidinareo. Aoka ireo no hamonjy anareo amin'ny androm-pahorianareo!

¹⁵ Fa hoy ny Israelita tamin'ny TOMPO: Efa nanota izahay. Ataovy izay rehetra sitrakao hatao aminay, fa anio mba vonjeo ihany izahay!

¹⁶ Dia narian'ny Israelita tsy ho eo anivon'izy ireo ny andriamani-kafa, ka notompoiny indray ny TOMPO Izay tsy nahazaka hijery ny fijalian'i Israely.

¹⁷ Ary nifanangona ny Hamonita ka nitoby tao amin'ny faritanin'i Gilehada; dia nifamory koa ny Israelita ka nitoby tao Mitsepa.

¹⁸ Ary nifanontany ny foko tao Gilehada sy ny mpitarika azy ka nanao hoe: Iza no lehilahy sahy hanapoaka ady amin'ny Hamonita? Izany lehilahy izany no ho filohan'ny mponina rehetra eto Gilehada.

Toko faha-11

¹ Tany Gilehada, dia nisy miaramila mahery fo nantsoina hoe Jifta, zanakalahin'ny vehivavy janga sy ny lehilahy atao hoe Gilehada.

² Niteraka zanakalahy maro ny vadin'i Gilehada; ka nony efa lehibe ireny, dia nandroaka an'i Jifta ary nilaza taminy hoe: Tsy manan-jo amin'ny lova avy amin'ny raintsika ianao satria zanaky ny vehivavy hafa.

³ Dia nandositra lavitra ny rahalahiny i Jifta ka nonina tao amin'ny faritanin'i Toba. Ary nisy koa olom-poana nivondrona teo aminy ka nanao asan-jirika niaraka taminy.

⁴ Taoriana kelin'izany, dia nanafika ny Israelita ny Hamonita.

⁵ Ary rehefa vaky ny ady teo amin'ny Hamonita sy ny Israelita, dia nandeha ireo loholon'i Gilehada mba haka an'i Jifta any amin'ny faritanin'i Toba,

⁶ ka nanao taminy hoe: Avia ho mpitarika ny tafikay ianao, mba hahafahanay miady amin'ny Hamonita.

⁷ Fa novalian'i Jifta hoe: Moa tsy nankahala ahy ve ianareo ka nandroaka ahy hiala tao an-tranon'ny raiko? Koa nahoana no mankaty amiko ianareo ankehitriny, rehefa tra-pahoriana?

⁸ Hoy kosa ny loholona tamin'i Jifta: Mitodika aminao izahay ankehitriny mba handehananao hiaraka aminay ka hiadianao amin'ny Hamonita; dia ho filohanay sy ho filohan'ny mponina rehetra any Gilehada ianao.

⁹ Dia hoy indray i Jifta taminy: Raha mampody ahy ianareo ankehitriny mba hiady amin'ny Hamonita, ka hatolotry ny TOMPO eo anoloako ireny, dia ho filohanareo aho.

¹⁰ Dia hoy ny valin-tenin'ny loholon'i Gilehada hoe: Ny TOMPO no ho vavolombelona amintsika fa araka izay efa nambaranao no hataonay!

¹¹ Dia nandeha niaraka tamin'ireo loholon'i Gilehada i Jifta ka noraisin'ny olona ho filoha sy ho mpitari-tafika. Ary tao Mitsepa, teo anatrehan'ny TOMPO, dia nohamafisin'i Jifta ny teny rehetra efa nifanarahany tamin'ireo loholona.

¹² Nandefasan'i Jifta iraka ny mpanjakan'ny Hamonita mba hilaza aminy hoe: Inona no antony hiadiantsika no tonga aty amiko hanafika ny taniko ianao?

¹³ Dia hoy ny mpanjakan'ny Hamonita tamin'ireo irak'i Jifta: Fony niakatra avy tany Ejipta ny Israelita, dia naka ny taniko hatreo amin'ny lohasahan'i Arnona ka hatrany amin'ny renirano Jaboka sy hatrany Jordana. Koa ankehitriny avereno amiko am-pilaminana ireo faritany ireo.

¹⁴ Dia nandefa iraka fanindroany ho any amin'ny mpanjakan'ny Hamonita indray i Jifta

¹⁵ mba hilaza izao hafatra izao: Tsy naka ny faritanin'ny Moabita na ny faritanin'ny Hamonita ny Israelita.

¹⁶ Fa raha niakatra avy tany Ejipta ireo, dia namakivaky ny taniefitra hatreo amin'ny Ranomasin'ny Volotara ary nankany Kadesy.

¹⁷ Tao izy no nandefa iraka nangataka tamin'ny mpanjakan'i Edoma mba hahazo hamaky ny faritaniny, saingy tsy navelany. Ary nandefa fangatahana toy izany koa tamin'ny mpanjakan'i Moaba izy nefa tsy nekeny; ka dia nipetraka tao Kadesy ny Israelita.

¹⁸ Avy teo, dia nandeha namakivaky ny taniefitra izy, nanodidina ny faritanin'i Edoma sy i Moaba ary tonga tao atsinanan'i Moaba. Dia nitoby teo ampitan'ny renirano Arnona izy fa tsy niditra tao anatin'ny faritanin'i Moaba, satria i Arnona no sisin-taniny.

¹⁹ Ary nandefa iraka ho an'i Sihona mpanjaka amorita izay nanjaka tao Hesbona ny Israelita, ka nangataka taminy mba hahazo hamaky ny faritaniny hatrany amin'ny toerana izay halehany.

²⁰ Tsy natoky ny Israelita i Sihona ka tsy namela azy hamakivaky ny taniny; fa namory ny tafiny manontolo, dia nitoby tao Jahatsa ary nanafika ny Israelita.

²¹ Ary natolotry ny TOMPO Andriamanitr'i Israely teo an-tanan'ny Israelita i Sihona sy ny tafiny ka resiny. Dia nalain'ny Israelita ny faritany rehetra nonenan'ny Amorita,

²² manomboka hatreo amin'ny lohasahan'i Arnona ka hatrany amin'ny renirano Jaboka, ary hatreo amin'ny taniefitra atsinanana ka hatrany amin'ny ony Jordana.

²³ Ny TOMPO Andriamanitr'i Israely ary no efa namela anay vahoakany haka ny tanin'ny Amorita, ka dia ianao indray ve no te hanaisotra azy aminay?

²⁴ Moa tsy tananao ho fanananao ve ny faritany izay nomen'i Kemosy andriamanitrao anao? Noho izany, dia zonay koa ny hitana ho fanananay izay tany rehetra nomen'ny TOMPO Andriamanitray anay.

²⁵ Moa mihevi-tena ho tsara lavitra noho i Balaka zanakalahin'i Tsipora sady mpanjakan'i Moaba ve ianao? Izy anefa tsy mba nila ady tamin'ny vahoaka Israely sady tsy nanafika azy.

²⁶ Efa telonjato taona izao no nipetrahan'ny Israelita tao Hesbona sy Harohera mbamin'ireo tanana kely manodidina azy avy ary koa tao amin'ireo tanana rehetra eny amoron'i Arnona; koa nahoana no tsy nalainareo io faritany io tamin'izany fotoana rehetra izany?

²⁷ Raha izaho aloha dia tsy nanota taminao, fa ianao no manisy ratsy ahy amin'ny iadianao amiko. Ny TOMPO mpitsara anie hitsara ny Israelita sy ny Hamonita anio!

²⁸ Kanefa tsy niraharaha ny hafatr'i Jifta ho azy ny mpanjakan'ny Hamonita.

²⁹ Ary nirotsaka tao amin'i Jifta ny Fanahin'ny TOMPO, dia nandeha nitety ny faritanin'i Gilehada sy i Manase izy, ary tonga tao Mitsepa any Gilehada mba hiampita ho any amin'ny faritanin'ny Hamonita.

³⁰ Ary nivoady tamin'ny TOMPO i Jifta ka nanao hoe: Raha hatolotrao tokoa eo an-tanako ny Hamonita,

³¹ dia hatokako ho ANAO sady hatolotro ho sorona dorana manontolo ho Anao izay olona mivoaka voalohany ny varavaran'ny tranoko mba hitsena ahy rehefa miverina avy nandresy ny Hamonita aho.

³² Dia nihoatra ny sisin-tanin'ny Hamonita i Jifta mba hiady aminy; ary natolotry ny TOMPO teo an-tanany ireo.

³³ Nandresy azy i Jifta, ka nahazo ny tanana roapolo teo anelanelan'i Harohera sy ny manodidina an'i Minita ary hatrany Abela-Keramima. Faharesena goavana ny an'ny Hamonita, ka dia nilefitra teo anoloan'ny Israelita izy.

³⁴ Fa nony niverina tany aminy tao Mitsepa i Jifta, dia ny zanany vavy no nivoaka nitsena azy sady nandihy tamin'ny amponga tapaka; vavy tokany anefa io, fa tsy nanan-janaka hafa izy.

³⁵ Koa raha vao nahita azy i Jifta, dia nandriatra ny fitafiany sady niantso hoe: Indrisy, anaka, fa nampidi-doza ahy ianao, ary ianao izao no fototry ny hakiviako! Efa nanao voady tamin'ny TOMPO manko aho, ka tsy mahazo mitsoaka ny teny nomeko.

³⁶ Fa namaly azy ny zanany vavy hoe: Dada o, raha nanao voady tamin'ny TOMPO ianao, dia tanteraho amiko izay efa naloaky ny vavanao taminy satria IZY efa namela anao hamaly faty ny Hamonita fahavalonao.

³⁷ Nefa na izany aza, dia mba omeo fe-potoana roa volana aho hankanesako eny an-tendrombohitra miaraka amin'ny namako mba hitomaniako ny tenako tsy maintsy ho faty nefa tsy mbola nanambady akory.

³⁸ Dia nomen'i Jifta lalana handeha mandritra ny roa volana izy. Koa nandeha izy sy ireo namany ka nitomany teny an-tendrombohitra noho ny tenany tsy maintsy ho faty nefa tsy mbola nanambady akory.

³⁹ Nony afaka roa volana, dia niverina tany amin'ny rainy izy; ka notanterahin-drainy taminy tokoa izay voady efa nataony. Dia maty mbola virijiny razazavavy. Ary hatramin'izay dia nanjary fanao teo amin'ny Israelita izao fomba izao:

⁴⁰ Isan-taona ny vehivavy israelita dia mandeha mitomany mandritra ny efatra andro ny zanakavavin'i Jifta, ilay Gilehadita.

Toko faha-12

¹ Nifamory ny vatan-dehilahin'i Efraima, dia niampita an'i Jordana ary tonga tao Tsafona, ka niteny tamin'i Jifta hoe: Nahoana no nandeha niady tamin'ny Hamonita ianao, nefa tsy mba niantso anay handeha hiaraka aminao? Hodoranay aman-trano ianao anio.