Mpitsara
Toko faha-4
22 Tamin'izay no tonga i Baraka izay nanenjika an'i Sisera; koa niainga hitsena azy i Jahela ary nanao taminy hoe: Avia, fa hasehoko anao ilay lehilahy tadiavinao. Dia niditra tao an-dainy izy, ka nahita an'i Sisera efa maty mitsitra eo amin'ny tany sady gorobaky ny tsimaday ny fihirifany.23 Tamin'izany andro izany no naetrin'Andriamanitra teo anatrehan'ny Israelita i Jabina mpanjaka kanahanita.
24 Fa nihamafy hatrany ny famelezan'ny Israelita azy ambara-pahafatiny azy mihitsy.
Toko faha-5
1 Tamin'izany andro izany i Debora dia nihira niaraka tamin'i Baraka zanakalahin'i Abinohama ka nanao hoe:2 Efa samy vonon-kiantafika ny vatan-dehilahy eto Israely, nanolo-tena hiady ny vahoaka; koa isaory ny TOMPO izany!
3 Mihainoa ianareo, ry mpanjaka, manongilana sofina ianareo, ry mpifehy, fa hihira ho an'ny TOMPO aho; eny, hikaloako salamo ny TOMPO Andriamanitr'i Israely.
4 Rehefa tonga avy tany Edoma Ianao, Tompo o, ka nidina avy teny an-tendrombohitra Sehira, dia nihovotrovotra ny tany, ary nandrotsaka orana ny rahona, dia ora-mikija avy any an-danitra;
5 ny tendrombohitra niempo teo anatrehanao, ry TOMPO niseho tany Sinay; ny tendrombohitra niempo teo anatrehanao, ry TOMPO Andriamanitr'i Israely.
6 Tamin'ny andron'i Samgary zanakalahin'i Hanata sy tamin'ny andron'i Jahela dia nidify ity faritra ity ny andian'ireo mpitaingin-drameva; fa nanaraka lalan-kafa ireo mpandeha.
7 Tsy nisy lehibe intsony, tsy nisy lehibe intsony teto amin'i Israely, mandra-pisehoko izaho Debora ho toy ny reny teto amin'i Israely.
8 Nifidy andriamani-baovao ny olona ka vetivety dia vaky ny ady; nefa zara raha nahitana ampinga na lefona iray ho an'ny vatan-dehilahy andiany efapolo teto Israely.
9 Ny ahy ny fo dia miandany amin'ireo komandin'i Israely; ny foko dia miandany amin'ireo vahoaka nanolo-tena hiady; koa isaory ny TOMPO izany!
10 Ianareo izay mitaingina borikivavy fotsy, ianareo izay mipetraka eo ambony karipetra, ianareo izay mandeha eny an-dalana, mankalaza ny TOMPO noho ny fandresena!
11 Teo akaikin'ny fampisotroan-drano, ireo mpizara rano ho an'ny biby fiompy no nankalaza ny fandresen'ny TOMPO, dia fandresena nomeny ireo lehiben'i Israely fony injay nirotsaka hiady teo am-bavahadin'ny tanana ilay vahoakan'ny TOMPO.
12 Mifohaza, mifohaza ianao, ry Debora, mifohaza, mifohaza ianao, ka miventesa hiran'ady. Ry Baraka zanakalahin'i Abinohama, mitsangana ka ataovy babo ireo mpamabo anao.
13 Nirohotra nankany amin'ny lehibeny ireo Israelita ary nivory teo amiko ny vahoakan'ny TOMPO niaraka tamin'ireo lehilahy mahery fo.
14 Ireo taranaka avy any Efraima dia efa tonga ao an-dohasaha, ka narahin'ny fokon'i Benjamina izay nifangaro tamin'ny andian-tafiny. Nipoitra avy amin'ny terak'i Makira ireo mpitari-tafika ary avy amin'ny fokon'i Zebolona ireo manampahefana.
15 Ireo lehiben'i Jisakara dia niandany tamin'i Debora; ary nifikitra tamin'i Baraka ny fokon'i Jisakara ka niriotra nanaraka azy teny amin'ny tany lemaka. Tao amin'ny fokon'i Reobena kosa dia adihevitra tsisy farany.
16 Nahoana ianareo no nijanona teny anelanelan'ny vala hihaino ny siotsiokan'ny mpiandry ondry? Tao amin'ny fokon'i Reobena tokoa dia adihevitra tsisy farany.
17 Tsy nihetsika koa ny terak'i Gilehada teny an-dafy atsinanan'i Jordana. Ary nahoana ny fokon'i Dana no nipetra-potsiny teo anilan'ny sambony? Ny fokon'i Asera koa nonina teo amoron-dranomasina ka nijanona teo amin'ny fitodian-tsambony.
18 Ny vahoakan'i Zebolona mbamin'i Naftaly kosa dia nanaiky hanao vy very ny ainy teo an-tany fiadiana, na dia ho faty aza!
19 Tonga hiady ireo mpanjakan'i Kanahana ka dia nanafika tao Tahenaka, teo akaikin'ny loharanon'i Megidao, nefa tsy nahazo na babo na volafotsy!
20 Avy eny an-danitra eny no nandray anjara tamin'ny ady koa ny kintana, ka ny fihodinkodinana arahiny no niadiany tamin'i Sisera.
21 Renirano efa nikoriana hatry ny ela, dia ny renirano Kisona, no nipaoka ny fahavalo. Aoka mba hiroso hiady amin-kerim-po koa aho!
22 Dia nihazakazaka mafy ny soavaly; ka nikatrokatroka ny hitsa-kitrony.
23 Ozony ny tanana Meroza, hoy ilay anjelin'ny TOMPO. Ozony, ozony ny mponina ao aminy noho izy tsy tonga hikatroka niaraka tamin'ireo mahery fo mba hanampy ny TOMPO hiady.
24 Hotahina mihoatra noho ny vehivavy rehetra kosa anie i Jahela izay vadin'i Hebera lehilahy kenita! Eny, hotahina mihoatra noho ny vehivavy rehetra izay mitoetra an-day anie izy!
25 Fa rano no nangatahin'i Sisera; nefa ronono kosa no nomeny azy, dia rononomandry tao anaty tsatokaty marevaka.
26 Avy eo noraisiny tamin'ny tanan-kavia ny tsimaday ary tamin'ny tanan-kavanana ny tantanan'ny mpiasa, dia nasiany ka vaky ny lohan'i Sisera; ary nataony gorobaka ny fihirifany.
27 Teo an-tongo-dravehivavy izy no nitolefika sy nianjera ary nitsitra; teo an-tongo-dravehivavy teo izy no nitolefika sy nianjera; teo amin'ny nahatolefika azy teo izy no nianjera ka maty.
28 Nitazana teo am-baravarankely ny renin'i Sisera, teo anelanelan'ny makarakara izy no nitaraina hoe: Nahoana ary no mbola tsy tonga ihany ny kalesiny? Nahoana ary no mitaredretra any ny kalesiny?
29 Izay hendry indrindra tamin'ireo andriambavy namany no nanome azy izao valinteny manaraka izao, ka izany koa no naverimberin'ny tenany hoe:
30 Manangona babo izay ny miaramila, ary mbola eo am-pizarana azy: tovovavy iray na roa isaky ny mahery fo; karazan-damba miloko samy hafa sady vita peta-kofehy ho an'i Sisera; eny, lamba vita peta-kofehy anatiny sy ivelany no hahodidina ny vozon'ilay mpamabo.
31 TOMPO o, aoka ny fahavalonao rehetra ho faty tahaka an'i Sisera avokoa; fa ny sakaizanao kosa anie ho toy ny masoandro fony izy miposaka mamirapiratra mafy indrindra! Dia nandry feizay ny tany nandritra ny efapolo taona.
Toko faha-6
1 Ary nanao izay ratsy eo imason'ny TOMPO indray ny Israelita ka natolotry ny TOMPO ho eo an-tanan'ny Midianita nandritra ny fito taona.2 Ary nahery vaika tamin'ny Israelita loatra ny famelezan'ny Midianita; koa noho ny tahony azy dia nanamboatra lalan-kizo sy zohy fierena ary toerana sarotra anihina tany an-tendrombohitra ny Israelita.
3 Fa isaky ny avy nanao famafazam-boa ny sahany ny Israelita, dia tonga nanafika ny Midianita niaraka tamin'ny Hamalekita sy ireo mpifindrafindra lasy avy any atsinanana.
4 Nitoby teo amin'ny sahan'ny Israelita ireny ka nanimba ny vokatry ny taniny hatrany Gaza, ary tsy nisy zavatra navelany hohanin'ny Israelita, tsy nisy navelany ho azy na ondry aman'osy na omby na boriky.
5 Nifindrafindra niaraka tamin'ny biby fiompiny sy ny lainy ireny sady toy ny valala no fiaviny; fa maro izy mbamin'ny ramevany ka tsy hita isa. Niditra tamin'ny tany izy mba handrava azy;
6 ary nahantra loatra ny Israelita noho ny nafitsoky ny Midianita, ka niantso vonjy tamin'ny TOMPO.
7 Rehefa nitaraina tamin'ny TOMPO ny Israelita mba hanafaka azy amin'ny Midianita,
8 dia nanirahany mpaminany hiteny aminy hoe: Izao no lazain'ny TOMPO Andriamanitr'i Israely: Izaho no nitondra anareo niala tany Ejipta sy namoaka anareo tao amin'ny toerana nanandevozana anareo.
9 Izaho no nanafaka anareo teo am-pelatanan'ny Ejiptianina sy izay rehetra nampahory anareo. Noroahiko ny fahavalonareo arakaraky ny nandrosoanareo ka nomeko anareo ny taniny.
10 Ary nambarako taminareo fa Izaho no TOMPO Andriamanitrareo. Ka tsy tokony hatahoranareo ny andriamanitry ny Amorita eo amin'ny tany izay onenanareo nefa tsy nihaino Ahy ianareo.
11 Ary tonga tao an-tanana Hofra ilay anjelin'ny TOMPO ka nipetraka teo ambanin'ny hazo terebinta izay an'i Joasy lehilahy anisan'ny tarik'i Abihezera. I Gidehona zanakalahin'i Joasy tamin'izay dia teo am-pivelezam-bary tao amin'ny famiazam-boaloboka mba tsy ho hitan'ny Midianita.
12 Ary nisehoan'ilay anjelin'ny TOMPO izy ka nilazany hoe: Ny TOMPO no momba anao, ry ilay mpiady mahery fo!
13 Fa novalian'i Gidehona hoe: Azafady, tompoko! Raha momba anay ny TOMPO, nahoana no iharan'izao loza rehetra izao izahay? Aiza avokoa ireo zava-mahagaga notantarain'ny razanay fa nataon'ny TOMPO fony Izy namoaka azy ireny avy tany Ejipta? Fa ankehitriny efa nanary anay ny TOMPO, ka nanolotra anay eo an-tanan'ny Midianita.
14 Dia nitodika nijery azy ny TOMPO ka niteny taminy hoe: Mandehana amin'izao herinao izao, ka afaho teo am-pelatanan'ny Midianita ny Israelita, fa Izaho no naniraka anao.
15 Dia novalian'i Gidehona hoe: Indrisy, Tompo o, ahoana no ahazoako mamonjy an'i Israely? Kanefa ny fianakaviako no osa indrindra amin'ny fokon'i Manase ary izaho no tanora indrindra ao an-tranon'ny raiko.
16 Fa hoy kosa ny TOMPO taminy: Homba anao Aho, ka toy ny famelezana olona iray monja no hamelezanao ny Midianita.