Mpitsara

Toko voalohany

¹⁰ Avy eo dia nandeha izy namely ny Kanahanita tao Hebrona, izay nantsoina hoe Kiriata-Arba tamin'izany fotoana izany, ka nandresy ny tarik'i Sesay sy i Ahimana ary i Talmay.

¹¹ Avy tao Hebrona izy no nandeha namely ny mponina tao Debira izay nantsoina hoe Kiriata-Sefera tamin'izany fotoana izany.

¹² Dia hoy i Kaleba hoe: Izay mandresy an'i Kiriata-Sefera ka mahazo azy dia homeko azy i Haksa zanako vavy ho vadiny.

¹³ Ary i Hotniela, zanakalahin'i Kenaza izay zandrin'i Kaleba, no nahazo ny tanana; koa nomen'i Kaleba azy i Haksa zanany vavy ho vadiny.

¹⁴ Rehefa tonga teo anilan'i Hotniela razazavavy, dia notoroany hevitra mba hangataka saha amin'ny rainy. Vao nidina niala tamin'ny borikiny kosa i Haksa, dia nanontanian'i Kaleba ny amin'izay ilainy;

¹⁵ ka izao no navaliny azy: Mba anaovy fanomezana aho! Tany ngazana any atsimo no natolotrao ahy, ka mba omeo loharano aho. Dia nomen'i Kaleba azy ny loharano any ambony sy ny loharano aty ambany.

¹⁶ Ary ny Kenita, taranaky ny rafozan-dahin'i Mosesy, dia niainga avy tao Jerikao, tanana be rofia. Niainga niaraka tamin'ny vatan-dehilahin'i Joda izy ka nandeha nanorim-ponenana tany amin'ny taniefitr'i Joda tao atsimon'i Harada ary niara-nonina tamin'ny Hamalekita. 17 Ary ny vatan-dehilahin'i Joda dia mbola nandeha nanafika niaraka tamin'ny taranak'i Simehona rahalahin'i Joda ihany ka nandresy ny Kanahanita nonina tao Tsefata. Noravany tanteraka io tanana io, ka nanomboka hatreo ny anaran'ny tanana dia nataony hoe Horma na Faharavana.

¹⁸ Avy eo dia nalain'ny olon'i Joda koa ny tanana Gaza sy Askelona ary Hekrona mbamin'ireo faritra manodidina azy avy.

¹⁹ Ny TOMPO mihitsy no efa nomba ny olon'i Joda tamin'izany, ka azony ny faritra be tendrombohitra. Nefa tsy voaroakany ireo mponin'ny tany lemaka, satria nanana kalesy vy ireny.

²⁰ Dia nomena an'i Kaleba i Hebrona araka izay efa nolazain'i Mosesy azy. Ireo tarika hanakita telo mponin'i Hebrona dia noroahin'i Kaleba hiala tao.

²¹ Fa ny Jebosita izay nonina tao Jerosalema kosa dia tsy voaroakan'ny taranak'i Benjamina, ka mbola miara-nonina amin'ny taranak'i Benjamina ao Jerosalema mandraka androany.

²² Ny taranak'i Efraima sy i Manase zanakalahin'i Josefa kosa dia niakatra nanafika an'i Betela ary nomban'ny TOMPO.

²³ Nandefa iraka izy aloha mba hijery ny tanana, izay nantsoina hoe Lozy tamin'izany fotoana izany.

²⁴ Dia nahita lehilahy iray nivoaka avy tao an-tanana ireto iraka, ka niteny taminy hoe: Atoroy anay ny fomba hidiranay ao an-tanana, dia hamindra fo aminao izahay.

²⁵ Dia natoron-dralehilahy azy ny fomba hidirany ao an-tanana. Koa naringan'ireo tamin'ny sabatra ny mponina tao an-tanana, fa ilay lehilahy sy ny fianakaviany manontolo kosa navelany handeha.

²⁶ Dia nankany amin'ny tanin'ny Hetita ralehilahy ka nanorina tanana anankiray nantsoiny hoe Lozy; ka mbola izany ihany no anarana entiny mandraka androany.

²⁷ Ary ny taranak'i Manase dia tsy naharoaka ny mponina tao Bety-Seana sy Tahenaka na ny tao Dora sy Jiblehama ary Megidao na tamin'ireo tanana madinika samy miankina aminy avy; koa nanohy nipetraka tamin'izany faritany izany hatrany ny Kanahanita.

²⁸ Ary na dia efa natanjaka aza i Israely taty aoriana, dia tsy naharoaka azy ireo mihitsy fa nampanompo azy fotsiny.

²⁹ Ny taranak'i Efraima ihany koa dia tsy naharoaka ny Kanahanita izay nonina tao Gezera; ka nipetraka teo anivon'ny Efraimita ireo Kanahanita tao Gezera.

³⁰ Ny taranak'i Zebolona dia tsy naharoaka ireo mponina tao Kitrona na ny tao Nahalola; ka nipetraka teo anivon'ny Zebolonita ireo Kanahanita ireo saingy nampanompoiny.

³¹ Ny taranak'i Asera dia tsy naharoaka ny mponina tao Hakao sy Tsidona na ny tao Mehaleba sy Akziba na ny tao Helba sy Afika ary Rehoba.

³² Koa nipetraka teo anivon'ny Kanahanita izay nonina teo amin'ny tany ireo Aserita satria tsy naharoaka azy.

³³ Ny taranak'i Naftaly dia tsy naharoaka ny mponina tao Bety-Semesy sy Bety-Hanata; ka nonina teo anivon'ny Kanahanita izay nipetraka tao ireo Naftalita saingy nampanompo azy.

³⁴ Ny Amorita kosa dia naharesy tosika ny taranak'i Dana teny amin'ny faritany be tendrombohitra ka tsy namela azy hidina teny amin'ny tany lemaka.

³⁵ Nanohy nipetraka tao Hara-Heresa sy Aialona ary Sahalbima ny Amorita; kanjo tato aoriana dia nanjakan'ny taranak'i Efraima sy i Manase izy, ka voatery nanompo azy.

³⁶ Ny faritanin'ny Edomita kosa miainga eo amin'ny fiakarana Hakrabima, dia eo amin'ny harambato no ho miakatra.

Toko faha-2

¹ Dia niainga avy any Gilgala ka tonga tany Bokima ny anjelin'ny TOMPO ary nanambara tamin'ny Israelita hoe: Izaho no nampakatra anareo hiala tany Ejipta ka nampiditra anareo amin'ny tany izay nianianako homena ny razanareo. Ary nilaza Aho fa tsy hanapaka na oviana na oviana ny fanekempihavanako aminareo.

² Ianareo kosa tsy tokony hanao fifanekena amin'ny mponina amin'ity tany ity fa tokony handrava ny alitarany. Kanjo tsy nanaraka ny teniko ianareo! Ahoana izao nataonareo izao?

³ Noho izany tapa-kevitra Aho fa tsy handroaka azy eo anoloanareo. Ho fandrika hamely anareo izy; ary ho longoa hahavoa anareo koa ny andriamaniny.

⁴ Rehefa avy nilaza izany teny izany ilay anjelin'ny TOMPO, dia nanandra-peo nitomany kosa ny Israelita rehetra.

⁵ Ary izany toerana izany dia nantsoiny hoe Bokima na Mpitomany; dia nanao sorona teo izy ho an'ny TOMPO.

⁶ Rehefa nampodin'i Josoa ny vahoaka, dia samy nandeha namonjy ny anjara taniny avy ny Israelita rehetra, ka nahazo ny tany.

⁷ Ary ny vahoaka dia nanompo ny TOMPO nandritra ny andro rehetra niainan'i Josoa ary koa taorian'ny nahafatesany, izany hoe nandritra ny andro rehetra niainan'ireo loholona izay nahita ny zava-dehibe isan-karazany nataon'ny TOMPO ho an'i Israely.

⁸ Ary maty i Josoa, zanakalahin'i Nona sady mpanompon'ny TOMPO, rehefa feno 110 taona.

⁹ Dia tao amin'ny faritra anjara lovany no nandevenana azy, izany hoe tao Timnata-Heresa, any amin'ny tany be tendrombohitra any Efraima, eo avaratry ny tendrombohitra Gahasa.

¹⁰ Ary rehefa tapitra maty avokoa izany taranaka izany ka voaangona any amin'ny razany, dia taranaka hafa indray no nandimby azy, taranaka izay tsy nahalala akory ny TOMPO sy ny asa nataony ho an'i Israely.

¹¹ Ary nanao izay ratsy eo imason'ny TOMPO ny Israelita fa nanompo ireo Bahala andriamani-tsiizy.

¹² Nandao ny TOMPO Andriamanitry ny razambeny Izay nitondra azy niala tany Ejipta izy ka nandeha nanompo andriamani-tsiizy, dia ny andriamanitr'ireo firenena manodidina azy. Andriamani-tsiizy no niankohofan'ny Israelita; ka nahatezitra ny TOMPO izany.

¹³ Eny, nandao ny TOMPO tokoa ny Israelita mba hanompo ireo Bahala sy ireo Hastoreta.

¹⁴ Dia nirehi-pahatezerana tamin'ny Israelita ny TOMPO, ka namela azy ho azon'ireo andian-dahalo izay nandroba azy; natolony ho resin'ny fahavalo manodidina izy, hany ka tsy nahatohitra ireny intsony.

¹⁵ Isaky ny nandeha nanafika ireo Israelita, dia nataon'ny TOMPO resy foana araka izay efa nambarany mialoha sady efa nianianany; ka nijaly mafy ireo.

¹⁶ Dia nanangana mpitsara ho azy ny TOMPO, ka ireny no nanafaka azy tamin'ny fahefan'ny dahalo.

¹⁷ Kanefa ny Israelita tsy nankato ihany koa ireo mpitsara azy, fa nandeha nanao fanompoan-tsampy tamin'ireo andriamani-tsiizy ka niankohoka teo anatrehany. Nalaky niala ny lalana izay nizoran'ireo razany tamin'ny fankatoavana ny didin'ny TOMPO izy, fa tsy mba nanahaka azy.

¹⁸ Koa isaky ny manangana mpitsara ho azy ny TOMPO, dia nomba izany mpitsara izany ka nanafaka ny Israelita tamin'ny fahefan'ny fahavalony nandritra ny andro rehetra niainan'ilay mpitsara. Fa onena azy ny TOMPO, rehefa nitaraina izy noho ny nafitsok'ireo mpampahory sy mpampijaly azy.

¹⁹ Kanjo raha vao maty ilay mpitsara, dia miverina indray amin'ny ratsy fanaony mihoatra noho ireo razany ny Israelita, ka manompo andriamani-tsiizy sy miankohoka eo anatrehany. Tsy nialany akory ny ratsy fanaony sy ny toetra maditra mahazatra azy.

²⁰ Nirehi-pahatezerana tamin'ny Israelita ny TOMPO, ka niteny azy hoe: Ity firenena ity dia nandika ny fanekempihavanana izay nandidiako ny razany, fa tsy nankato Ahy;

²¹ koa tsy handroaka na dia olona iray eo anoloany intsony Aho amin'ireo firenena izay tsy mbola resy tamin'ny andro nahafatesan'i Josoa. 22 Fa hampiasaiko ireny mba hizahako toetra azy na hanaraka ny sitrapoko ny Israelita ka hankato Ahy tahaka izay nataon'ny razany na tsia.

²³ Koa navelan'ny TOMPO haharitra teo amin'ny tany ireo firenena izay tsy natolony teo an-tanan'i Josoa; ary tsy nahamaika Azy ny handroaka ireny.

Toko faha-3

¹ Ireo firenen-kafa ireo moa no navelan'ny TOMPO haharitra teo amin'ny tany dia mba hizahany toetra ny Israelita rehetra izay tsy mbola nandray anjara tamin'ny ady nahazoana an'i Kanahana;

² tian'ny Tompo mba hianatra hiady manko ny taranaka vaovao izay tsy mbola nahalala ady.