Mpitsara

Toko faha-3

³ Koa ireto avy ary ireo firenen-kafa ireo: ny mponina tamin'ny fanjakana dimin'ny Filistinina, ny Kanahanita rehetra, ny Tsidonianina, ary ny Hivita izay nipetraka tany amin'ny tendrombohitra Libano, manomboka hatreo an-tendrombohitra Bahala-Hermona ka hatrany Lebo-Hamata.

⁴ Ireo no nizahan'ny TOMPO toetra ny Israelita mba hahafantarany na hankato ny didy izay nomeny ny razany tamin'ny alalan'i Mosesy izy na tsia.

⁵ Toy izany no nahatonga ny Israelita honina teo anivon'ny Kanahanita sy ny Hetita ary ny Amorita mbamin'ny Perizita sy ny Hivita ary ny Jebosita.

⁶ Ary naka ny zanakavavin'ireny ho vadiny izy sady nanome ny zanany vavy ho vadin'ny zanakalahin'ireny, ka nanompo ny andriamani-tsiizy nifikirany.

⁷ Ary nanao izay ratsy eo imason'ny TOMPO ny Israelita fa nanadino ny TOMPO Andriamaniny ka nanompo ireo Bahala sy ireo Asera.

⁸ Dia nirehi-pahatezerana tamin'ny Israelita ny TOMPO ka nanolotra azy teo an-tanan'i Kosana-Risehataima, mpanjakan'i Mezopotamia; ary nandritra ny valo taona no nanompoany azy.

⁹ Koa niantso vonjy tamin'ny TOMPO ny Israelita; ary IZY nanangana mpamonjy izay hanafaka ny Israelita, dia i Hotniela, zanakalahin'i Kenaza izay zandrin'i Kaleba.

¹⁰ Dia nitoetra tao aminy ny Fanahin'ny TOMPO, ka nitondra ny Israelita izy. Ary niainga hiady i Hotniela; dia natolotry ny TOMPO teo an-tanany i Kosana-Risehataima mpanjakan'i Mezopotamia ka resiny.

¹¹ Dia nandry fahalemana ny tany nandritra ny efapolo taona; avy eo dia maty i Hotniela, zanakalahin'i Kenaza.

¹² Ary nanao izay ratsy eo imason'ny TOMPO indray ny Israelita. Noho izany dia nampirisihin'ny TOMPO hamely azy i Heglona, mpanjakan'i Moaba.

¹³ Ary i Heglona nivondrona tamin'ny Hamonita sy ny Hamalekita ka nandeha nanafika ny Israelita, ary nahazo ny tanana Jerikao.

¹⁴ Dia nanompo an'i Heglona, mpanjakan'i Moaba, ny Israelita nandritra ny 18 taona.

¹⁵ Niantso vonjy tamin'ny TOMPO ny Israelita ka nanirahany mpamonjy, dia i Ehoda, lehilahy kavia, izay zanak'i Gera avy amin'ny fokon'i Benjamina. Dia nalefan'ny Israelita i Ehoda mba hitondra fanomezana ho an'i Heglona, mpanjakan'i Moaba.

¹⁶ Ary nanamboatra sabatra maranitra roa lela i Ehoda, dia sabatra ankevitry ny antsasa-metatra izay nafeniny tao anaty akanjony nanolotra ny feny ankavanana.

¹⁷ Dia nandeha izy nanatitra fanomezana ho an'i Heglona izay lehilahy matavibe.

¹⁸ Ary rehefa vitany ny fanolorana ny fanomezana ho an'i Heglona, dia lasa izy niara-nody tamin'ireo vahoaka nitondra ny fanomezana.

¹⁹ Kanjo nony efa tonga teo akaikin'ny tsangambaton-tsampy tao Gilgala i Ehoda, dia niverina ka nilaza tamin'i Heglona hoe: Misy hafatra miafina holazaiko aminao, ry mpanjaka o. Dia nandidy ny mpanompony teo ny mpanjaka mba hamela azy mitokana; koa nivoaka ny trano izy rehetra.

²⁰ Ny mpanjaka tamin'izay dia nipetraka tao amin'ny efitrano fihatsiatsiahana izay natokana ho azy teo an-tampontrano. Ary nanatona azy i Ehoda ka nanao hoe: Misy teny avy amin'Andriamanitra nentiko ho anao. Dia nitsangana niala teo amin'ny sezany ny mpanjaka.

²¹ Ary nalain'i Ehoda tamin'ny tanany havia ilay sabatra nanolotra ny feny ankavanana, ka natsatony tamin'ny kibon'i Heglona.

²² Difotra mbamin'ny zarany sady voasaron'ny tavin'ity mpanjaka ny lelan-tsabatra, satria tsy notsoahin'i Ehoda teo amin'ny kibony.

²³ Taorian'izany, rehefa avy nandrindrina sy nanidy ny varavaran'ilay efitrano i Ehoda, dia nivoaka avy teo am-baravarankely.

²⁴ Ary nony tafavoaka izy, dia tonga ireo mpanompon'ny mpanjaka izay nahita fa mihidy ny efitrano fihatsiatsiahana; koa noheveriny fa mbola miavela ao ny mpanjaka.

²⁵ Niandry teo ivelany izy ireo ambara-pahavelon'ahiahy azy, kinanjo tsy mbola nisy namoha ihany ny varavarana. Dia naka ny fanalahidy ireo ka namoha ny trano, ary indro ny tompony maty mitsitra eo amin'ny tany.

²⁶ Fa raha mbola variana tao ireo, dia efa nitsoaka i Ehoda, ka efa tafahoatra ny tsangambaton-tsampy ary nandositra tany Sehira.

²⁷ Vao tonga tany Sehira izy; dia nitsoka trompetra teny amin'ny faritra be tendrombohitra any Efraima hamory ny Israelita; avy teo izy dia nitarika ireo Israelita ireo ka niara-nidina taminy avy teny an-tendrombohitra

²⁸ sady nanainga azy hoe: Manaraha ahy fa efa natolotry ny TOMPO eo an-tanantsika ny Moabita fahavalontsika. Dia nanaraka an'i Ehoda ireo, ka nandeha nibahana ny toerana fitana ny ony Jordana, ary tsy nisy Moabita navelany hita na iray aza.

²⁹ Tamin'izay andro izay dia Moabita sahabo ho andiany folo no matiny, dia vatan-dehilahy tomady sy mahery fo avokoa; ka tsy nisy afa-nitsoaka ireny na iray aza.

³⁰ Tamin'izany andro izany dia nietry teo ambany fahefan'ny Israelita ny Moabita; ka nandry fahalemana ny tany nandritra ny valopolo taona.

³¹ Ary i Samgary, zanakalahin'i Hanata, no nandimby an'i Ehoda. Nahafaty ny Filistinina eninjato lahy tamin'ny fanindronan'omby izy, ka nanafaka ny Israelita ihany koa.

Toko faha-4

¹ Ary rehefa maty i Ehoda, dia nanao izay ratsy eo imason'ny TOMPO indray ny Israelita.

² Koa natolotry ny TOMPO izy ho eo ambany fifehezan'i Jabina, mpanjaka kanahanita, izay nanjaka tao Hatsora. I Sisera, izay nonina tao Haroseta-Goima, no lehiben'ny tafiny.

³ Nanana kalesy vy sivinjato i Jabina ary nampahory fatratra ny Israelita nandritra ny roapolo taona; koa niantso vonjy tamin'ny TOMPO ireo.

⁴ Tamin'izany fotoana izany dia i Debora, mpaminanivavy vadin'i Lapidota, no mpitsara nitondra an'i Israely.

⁵ Ny sezam-pitsarana nipetrahan'i Debora dia teo ambany hazo rofia, izay nantsoina taty aoriana hoe Hazo Rofian'i Debora, teo anelanelan'i Rama sy i Betela, any amin'ny faritra be tendrombohitra any Efraima. Niakatra tany ny Israelita rehefa hotsaraina.

⁶ Indray andro i Debora dia nampiantso an'i Baraka zanakalahin'i Abinohama; nampiantsoiny avy any Kedesa any amin'ny faritra naftalita izy ka nilazany hoe: Izao no andidian'ny TOMPO Andriamanitr'i Israely anao: Mandehana maka vatan-dehilahy andiany folo avy amin'ny fokon'i Naftaly sy i Zebolona, ka tariho any an-tendrombohitra Tabora.

⁷ Fa hoentaniko i Sisera lehiben'ny tafik'i Jabina ho tonga eo amoron'ny renirano Kisona mba hanafika anao miaraka amin'ny kalesiny sy ny andian-tafiny; dia hatolotro eo an-tananao izy.

⁸ Fa namaly an'i Debora i Baraka nanao hoe: Raha handeha hiaraka amiko ianao, dia handeha aho; fa raha tsy handeha hiaraka amiko kosa ianao, dia tsy handeha aho.

⁹ Ka hoy i Debora taminy: Handeha hiaraka aminao aho, saingy tsy hisy voninahitra ho anao izao dia halehanao izao, satria ho eo an-tanam-behivavy no hanoloran'ny TOMPO an'i Sisera. Dia nandeha ho any Kedesa niaraka tamin'i Baraka i Debora.

¹⁰ Nangonin'i Baraka tao ny vatan-dehilahy zebolonita sy naftalita. Andiany folo no nanaraka azy teny an-tendrombohitra Tabora, ary niakatra niaraka taminy koa i Debora.

¹¹ Tao akaikin'i Kedesa no nisy an'i Hebera lehilahy kenita. Noho izy tafasaraka tamin'ireo Kenita hafa taranak'i Hobaba zaodahin'i Mosesy, dia nanorin-day teo akaikin'ny terebintan'i Tsahananima izy.

¹² Dia notantaraina tamin'i Sisera fa niakatra any an-tendrombohitra Tabora i Baraka, zanakalahin'i Abinohama.

¹³ Koa novoriny tao Haroseta-Goima ny kalesiny vy sivinjato sy ny miaramilany rehetra; dia avy teo izy no nankany amin'ny renirano Kisona.

¹⁴ Ary hoy i Debora tamin'i Baraka: Andao amin'izay fa anio no hanoloran'ny TOMPO an'i Sisera eo an-tananao. Ny TOMPO mihitsy no mandeha eo alohanao! Dia nidina avy teo an-tendrombohitra Tabora i Baraka narahin'ireo vatan-dehilahiny nisy andiany folo.

¹⁵ Tamin'izay no nataon'ny TOMPO nifanaritaka teo anoloany kosa i Sisera sy ny kalesiny mbamin'ny miaramilany rehetra. Niala tamin'ny kalesiny mihitsy aza i Sisera ka nandositra an-tongotra.

¹⁶ Nanenjika ireo kalesy sy ny andian-tafiky ny fahavalony hatrany Haroseta-Goima i Baraka; dia naringany tamin'ny sabatra avokoa ny miaramilan'i Sisera ka tsy nisy niangana na iray aza.

¹⁷ I Sisera dia nandositra an-tongotra hatrany amin'ny lain'i Jahela izay vadin'i Hebera lehilahy kenita, satria nihavana ny fianakavian'i Hebera sy i Jabina mpanjakan'i Hatsora.

¹⁸ Ary niainga i Jahela mba hitsena an'i Sisera ka nanao taminy hoe: Midira, tompoko, midira ato amiko fa aza matahotra! Dia niditra tao an-dainy izy ka norakofany bodofotsy.

¹⁹ Ary hoy izy tamin-dravehivavy: Mba omeo rano kely aho hosotroiko fa mangetaheta! Dia nanokatra ny siny hoditra misy ronono i Jahela ka nampisotro azy; avy teo i Sisera dia norakofany bodofotsy indray.

²⁰ Ary hoy koa i Sisera taminy: Mijanona eo am-baravaran'ny tranolay; ka raha misy manontany anao hoe: Misy olona ve ato?, dia valio hoe: Tsia.

²¹ Ary efa sasatra loatra i Sisera ka renoky ny torimaso. Dia naka tsimaday i Jahela, vadin'i Hebera, sady nandray tantanana ka nanatona moramora an'i Sisera. Ary natsatony teo amin'ny fihirifany ny tsimaday ka niboroaka hatramin'ny tany, dia maty i Sisera.