Josoa

Toko faha-11

⁸ Natolotry ny TOMPO teo an-tanan'ny Israelita ireo ka resiny, nenjehiny nianavaratra hatrany Sidona tanan-dehibe sy hatrany Misrefota-Maima ary hatrany amin'ny lohasahan'i Mitsepa any atsinanana. Nasian'ny Israelita ireo ka tsy nisy niangana.

⁹ Araka izay nolazain'ny TOMPO no nataon'i Josoa taminy, ka notraingoiny ny soavalin'ireo ary nodorany tamin'ny afo ny kalesiny.

¹⁰ Rehefa niverina i Josoa, dia naka an'i Hatsora satria i Hatsora no renivohitr'ireo fanjakana tany avaratra. Novonoiny tamin'ny sabatra ny mpanjakany

¹¹ ary nasainy naringana avokoa ny olona rehetra tao; tsy nisy zava-manana aina niangana mihitsy, sady nodorana ny tanana.

¹² Ary nalain'i Josoa koa ny tananan'ireo mpanjaka hafa rehetra mbamin'ny fanjakany, ka naringany tamin'ny sabatra ireo mpanjaka sy ny mponina rehetra isan-tanana, araka izay efa nandidian'i Mosesy mpanompon'ny TOMPO.

¹³ Kanefa ireo tanana rehetra niorina teny amin'ny havoana dia tsy mba nodoran'ny Israelita, afa-tsy i Hatsora irery izay nasain'i Josoa nodorana.

¹⁴ Ary norobain'ny Israelita ho azy avokoa ny zavatra rehetra tao amin'ireo tanana an-kavoana ireo mbamin'ny biby fiompy, fa ny olona rehetra ihany no naringany tanteraka tamin'ny sabatra ka tsy nisy niangana.

¹⁵ Izay baiko rehetra nomen'ny TOMPO an'i Mosesy mpanompony dia nampitainy tamin'i Josoa; ka izany no nataon'i Josoa tsy nisy namelany.

¹⁶ Dia azon'i Josoa avokoa ilay tany: dia ny faritra be tendrombohitra sy i Negeba manontolo any atsimo, ny faritr'i Gosena manontolo, ny lemak'i Sefela, ny lohasahan'i Jordana, ary ny faritra misy tendrombohitra sy lemaka any avaratra.

¹⁷ Resin'i Josoa ary novonoiny ireo mpanjaka nipetraka teo anelanelan'ilay tendrombohitra ngazana miakatra ho any Sehira ao atsimo sy i Bahala-Gada eo amin'ny lohasahan'i Libano am-pototry ny tendrombohitra Hermona any avaratra.

¹⁸ Naharitra ela ny ady nataon'i Josoa tamin'ireo mpanjaka rehetra ireo.

¹⁹ Tsy nisy tanana nanaovan'ny Israelita fanekempihavanana afa-tsy i Gibehona izay nonenan'ny Hivita; fa ireo tanana hafa rehetra dia nalainy tamin'ny ady avokoa.

²⁰ Ny TOMPO manko no nahatonga azy ireny ho mafy fo ka hihantsy ady tamin'ny Israelita mba handringanana azy tanteraka tsy misy indrafo, satria tsy maintsy naringana ireny araka izay efa nandidian'ny TOMPO an'i Mosesy.

²¹ Tamin'izany fotoana izany koa i Josoa no nandeha niady tamin'ny Hanakita rehetra izay tany amin'ny faritra be tendrombohitra, dia tany Hebrona sy Debira ary Hanaba mbamin'ny havoan'i Joda sy i Israely manontolo. Nasain'i Josoa naringana avokoa izy sy ny tananany

²² ka tsy nisy Hanakita tavela intsony teo amin'i Israely, afa-tsy tao Gaza sy Gata ary Asdoda.

²³ Dia azon'i Josoa avokoa ilay tany, araka izay rehetra efa nambaran'ny TOMPO tamin'i Mosesy; ary nomen'i Josoa ho fananan'ny Israelita izany ka nozarazarainy araka ny fokony avy. Dia nitsahatra ny ady ka nandry ny tany.

Toko faha-12

¹ Mpanjaka roa no efa noresen'ny Israelita tany atsinanan'i Jordana ka nobodoiny ny taniny, nanomboka hatreo amin'ny lohasahan-driaka Arnona ka hatrany amin'ny tendrombohitra Hermona, ary mahafaoka ny lohasahan'i Jordana ilany atsinanana.

² Ny voalohany dia i Sihona, mpanjaka amorita izay nonina tao Hesbona: izy no nanjaka tamin'ny antsasaky ny lohasahan-driaka Arnona hatreo Harohera no midina, sy tamin'ny antsasaky ny faritany Gilehada tafapaka hatrany amin'ny renirano Jaboka izay sisintanin'ny Hamonita;

³ azy koa ny lohasahan'i Jordana ilay atsinanana, manomboka hatreo amin'ny farihin'i Genesareta any avaratra, ka hatrany amin'ny Ranomasina Maty eo akaikin'i Bety-Jesimota; ary tao atsimo kokoa dia azy ny faritany eo am-pototry ny havoana Pisga.

⁴ Ny faharoa dia i Hoga, iray amin'ireo Refaita sisa tavela; mpanjakan'i Basana izy ary nipetraka tao Hastarota na Edrehy.

⁵ Ny faritra nanjakan'i Hoga dia ireto avy: ny tendrombohitra Hermona; i Sala, i Basana manontolo tafapaka hatrany amin'ny sisin-tanin'ny Gesorita sy Mahekatita; ary farany ny antsasaky ny faritrany Gilehada tafapaka hatrany amin'ny sisin-tanin'i Sihona, mpanjakan'i Hesbona.

⁶ Resin'i Mosesy sy ny Israelita ry i Sihona sy i Hoga; ka ny taniny dia nomen'i Mosesy, mpanompon'ny TOMPO, ho lovan'ny fokon'i Reobena sy ny fokon'i Gada ary ny antsasa-pokon'i Manase.

⁷ Avy eo i Josoa sy ny Israelita dia nandresy ireo mpanjaka teny an-dafy andrefan'i Jordana, manomboka hatreo Bahala-Gada ao amin'ny lohasahan'i Libano any avaratra ka hatrany amin'ilay tendrombohitra ngazana miakatra ho any Sehira any atsimo. Nozarazarain'i Josoa izany tany izany ho fananan'ireo foko israelita sisa.

⁸ Isan'izany ny faritra be tendrombohitra, ny lemak'i Sefela, ny lohasahan'i Jordana, ny kisolosolo, ary ny taniefitra sy i Negeba any atsimo: ireo faritra ireo dia an'ny Hetita sy Amorita, an'ny Kanahanita sy Perizita, ary an'ny Hivita sy Jebosita.

⁹ Ireto kosa ireo tanana nisy mpanjaka resy: i Jerikao, i Hay akaikin'i Betela,

¹⁰ i Jerosalema, i Hebrona,

¹¹ i Jarmota, i Lakisy,

¹² i Heglona, i Gezera,

¹³ i Debira, i Gedera,

¹⁴ i Horma, i Harada,

¹⁵ i Libna, i Hadolama,

¹⁶ i Makeda, i Betela,

¹⁷ i Tapoa, i Hefera,

¹⁸ i Afeka, i Sarona,

¹⁹ i Madona, i Hatsora,

²⁰ i Simrona-Merona, i Aksafa,

²¹ i Tahenaka, i Megidao,

²² i Kedesa, i Joknehama any Karmela,

²³ i Dora eo amoron-tsiraka, i Goima any Galilea,

²⁴ ary i Tiritsa; ka 31 izany no isan'ireo mpanjaka rehetra ireo.

Toko faha-13

¹ Nony efa tena antitra i Josoa, dia nitenenan'ny TOMPO hoe: Efa tena antitra ianao ity, nefa midadasika tokoa ny faritany sisa tsy mbola azo:

² dia ny faritany manontolo misy ny Filistinina sy ny Gesorita,

³ izany hoe ny faritra noheverina ho kanahanita manomboka hatreo amin'ny lohasahan-driaka Sihora izay sisin-tany atsinanan'i Ejipta ka hatrany amin'ny faritanin'i Hekrona any avaratra; ao no misy ireo fanjakana dimy tamin'ny Filistinina, dia i Gaza, i Asdoda, i Askelona, i Gata ary i Hekrona; ao koa no misy ny Havita

⁴ any atsimo. Tsy mbola azo koa ny tanin'ny Kanahanita, manomboka hatreo Hara izay an'ny Tsidonianina ka hatrany Afeka any amin'ny sisin-tanin'ny Amorita.

⁵ Ao ihany koa ny faritanin'i Gebala sy i Libano atsinanana manomboka hatreo Bahala-Gada eo am-pototry ny tendrombohitra Hermona ka hatrany Lebo-Hamata.

⁶ Anisany koa ny faritra be tendrombohitra eo anelanelan'i Libano sy i Misrefota-Maina izay Tsidonianina avokoa no monina ao. Izaho no handroaka ireny mponina ireny eo anoloan'ny Israelita; fa ianao kosa no hizara antsapaka ny taniny ho lovan'ny Israelita araka izay efa nandidiako anao.

⁷ Koa ankehitriny, zarao ireto tany efa azo ireto ho lovan'ny foko sivy sy antsasa-pokon'i Manase.

⁸ Ny Reobenita sy Gadita miaraka amin'ilay antsasa-pokon'i Manase manko dia efa nahazo ny zaratany nomen'i Mosesy teny atsinanan'i Jordana. Araka izay nomen'i Mosesy mpanompon'ny TOMPO azy,

⁹ ny tanin'izy telo tonta dia manomboka eo amin'ny tanana Harohera amoron'ny lohasahan-driaka Arnona sy eo amin'ilay tanana antenatenan'io lohasaha io, any atsimo; dia mahafaoka ny lembalemba rehetra manodidina an'i Medeba ka hatrany Dibona;

¹⁰ dia mahazo ireo tananan'i Sihona, ilay mpanjaka amorita nanjaka tao Hesbona sy nanan-tany tafapaka hatrany amin'ny sisin-tanin'ny Hamonita;