Josoa
Toko faha-6
16 Ary tamin'ny fihodinana fahafito, rehefa nampaneno ny trompetra ireo mpisorona, dia hoy i Josoa tamin'ny vahoaka: Manaova akoran'ady fa efa natolotry ny TOMPO anareo ny tanana!17 Ary ny tanana mbamin'izay rehetra ao aminy dia haringana hafoy ho an'ny TOMPO. Fa i Rahaba mpivaro-tena sy izay rehetra miaraka aminy ao an-tranony ihany no avelao ho velona, satria ravehivavy io no nanafina ireo mpitsikilontsika.
18 Kanefa mitandrema ianareo fandrao hitsiriritra ireo zavatra haringana hafoy ho an'ny Tompo ka maka amin'ireo, fa hitondra loza sy fandravana ho an'ny tobin'i Israely ianareo.
19 Ny volafotsy sy volamena rehetra ary ny fanaka rehetra halimo sy vy dia hatokana ho Azy TOMPO ka haiditra ao amin'ny firaketan'ny TOMPO.
20 Dia nitsoka trompetra ny mpisorona. Ka raha vao nandre ny feon-trompetra ny vahoaka, dia nanezaka mafy nanao akoran'ady; koa nirodana tamin'izay ny manda. Dia niakatra hamely tao an-tanana samy araka ny tandrifiny avy ny Israelita ka naka ny tanana.
21 Ary naringany tamin'ny sabatra avokoa ny mponina rehetra tao na lehilahy na vehivavy na antitra na tanora, mbamin'ny omby sy ny ondry aman'osy ary ny boriky.
22 Ary hoy i Josoa tamin'ireo roa lahy nisafo ny tany: Mankanesa any an-tranon'i Rahaba mpivaro-tena, ka avoahy tao izy sy ny havany rehetra araka izay efa nianiananareo taminy.
23 Dia nandeha tany izy roa lahy ka namoaka an'i Rahaba sy ny ray aman-dreniny ary ny mpiray tampo aminy sy ireo havany sisa rehetra; ary toerana azo antoka teo ivelan'ilay tobin'ny Israelita no nametrahany azy.
24 Vita izay, dia nodorana tamin'ny afo ny tanana mbamin'izay rehetra tao aminy, afa-tsy ny volafotsy sy volamena ary ny fanaka halimo sy vy izay napetraka ho rakitra tao an-tranon'ny TOMPO.
25 Fa i Rahaba mpivaro-tena mbamin'ny fianakaviany manontolo kosa dia novelomin'i Josoa noho ny nanafenan-dravehivavy an'ireo mpitsikilo izay nalefany tany Jerikao. Nonina teo anivon'ny Israelita i Rahaba ary mbola ao mandraka androany ny taranany.
26 Tamin'izany fotoana izany koa dia nanambara izao fampitandremana momba an'i Jerikao izao i Josoa nanao hoe: Ho voaozona eo anatrehan'ny TOMPO anie izay olona mitsangana hanamboatra an'ity tanana ity ka ny ain'ny lahimatoany no ho sandan'ny hanorenany ny fototra ary ny ain'ny faralahiny no ho sandan'ny hananganany ny vavahady!
27 Ary nomban'ny TOMPO i Josoa ka niely laza eran'ny tany izany.
Toko faha-7
1 Nanao fahadisoana bevava ny Israelita tamin'ny fandikana didy momba ireo zavatra voatokana hafoy ho an'ny TOMPO; fa naka zavatra sasany tamin'ireo i Hakana, zanakalahin'i Karmy sy zafin'i Zabdia ary zafiafin'i Zera sady anisan'ny fokon'i Joda, koa tezitra tamin'ny Israelita ny Tompo.2 I Josoa kosa naniraka vatan-dehilahy avy tao Jerikao ho any Hay, izay tanana ao atsinanan'i Betela eo akaikin'i Bety-Avena, ka nanome baiko azy mba hiakatra hisafo iny faritra iny. Dia niakatra nisafo an'i Hay ireo lehilahy ireo
3 ary niverina tany amin'i Josoa ka nanao taminy hoe: Aoka tsy hiakatra avokoa ny tafika manontolo; fa roa arivo na telo arivo lahy ihany no aoka hiakatra hamely an'i Hay. Aza manasatra ny tafika manontolo any fa vitsy ihany ry zareo.
4 Koa tokony ho lehilahy telo arivo no niakatra tany. Kanjo voatery nandositra teo anatrehan'ny mponina tao Hay ireo;
5 fa nahafatesany olona 36 ny Israelita sady nenjehiny nanomboka hatreo ambavahadin'ny tanana ka hatrany Sebarima ary nasiany teny am-pidinana. Dia ketraka ny fon'ny vahoaka fa hoatra ny voatapo-drano.
6 Dia nandriatra fitafiana i Josoa sy ireo loholon'i Israely ka nanosom-bovoka ny lohany sady niankohoka tamin'ny tany teo anoloan'ny Vatamasin'ny TOMPO mandra-paharivan'ny andro.
7 Ary hoy i Josoa hoe: Indrisy, ry Tompo ANDRIANANAHARY o! Nahoana moa izahay vahoakanao izao no nentinao nita an'i Jordana? Mba hanoloranao anay ho eo an-tanan'ny Amorita ka handringanana anay ve? Naleonay ihany nijanona tany an-dafin'i Jordana!
8 Inona moa no azoko lazaina, ry Tompo, fa ny Israelita efa nandositra teo anoloan'ny fahavalony?
9 Ho henon'ny Kanahanita sy ny mponina rehetra amin'ity tany ity izany, dia hikambana hamely anay ireo ka handringana anay; koa inona ary no hataonay mba hiekena ny lazanao lehibe?
10 Dia hoy ny TOMPO tamin'i Josoa: Mitsangana fa nahoana ianao no miankohoka toy izao?
11 Nanota ny Israelita ka nivadika tamin'ny fanekempihavanana nodidiako hotandremany; fa ny zavatra nasaiko nolevonina dia nakany sy nangalany ary nanafenany ka nataony tanaty entany.
12 Izany no tsy hahazoan'ny Israelita hanohitra ny fahavalony; fa handositra eo anoloan'ireo ny Israelita, satria efa voaozona ho ringana. Tsy homba anareo intsony Aho raha tsy fongotra teo aminareo izay nasaiko nolevonina.
13 Mandehana omany ny vahoaka mba hihaona amiko rahampitso ka ilazao izy mba samy hanadio ny tenany; fa Izaho TOMPO Andriamanitr'i Israely no milaza amin'ny Israelita hoe: Mbola manana zavatra nasaiko nolevonina ianareo; noho izany, tsy afaka hanohitra ny fahavalonareo ianareo raha tsy foana teo aminareo ireny zavatra ireny.
14 Rahampitso maraina dia hiseho eo anatrehako araka ny fokony avy ianareo. Ny foko izay voatondroko dia hiseho eo anatrehako isan-tarika; ary ny tarika izay voatondroko dia hiseho isam-pianakaviana; ary ny lehilahy ao amin'izay fianakaviana voatondroko dia hiseho tsirairay eo anatrehako.
15 Ary hotondroiko ilay lehilahy mitana zavatra tokony holevonina, ka hodorana amin'ny afo izy mbamin'izay rehetra azy satria nivadika tamin'ny fanekempihavanako izy ka nanao izay tsy fanao teo amin'i Israely.
16 Dia nifoha vao maraina i Josoa ny ampitso ary nampanatona ny Israelita isam-pokony, ka ny fokon'i Joda no voatondro.
17 Ary nampanatoniny isan-tarika ny fokon'i Joda ka ny tarik'i Zera no voatondro. Dia narosony isam-pianakaviana ny tarik'i Zera ka ny fianakavian'i Zabdy no voatondro.
18 Dia narosony tsirairay ny lehilahy tao amin'ny fianakavian'i Zabdy ka i Hakana, zanakalahin'i Karmy sy zafin'i Zabdy ary zafiafin'i Zera sady anisan'ny fokon'i Joda, no voatondro.
19 Dia hoy i Josoa taminy: Anaka, omeo voninahitra sy haja ny TOMPO Andriamanitr'i Israely; lazao amiko izay nataonao fa aza misy afenina ahy.
20 Dia novalian'i Hakana hoe: Marina tokoa fa izaho no nanota tamin'ny TOMPO Andriamanitr'i Israely ary ireto avy no nataoko:
21 Tamin'ny zavatra babo dia nahitako kapaoty tsara tarehy iray avy any Babilona sy volafotsy roa kilao ary anja-bolamena antsasa-kilao. Notsiriritiko fatratra ireo ka nalaiko. Ho hitanareo milevina anaty tany ao an-daiko ireny ka ny volafotsy no any ambany indrindra.
22 Dia nandefa iraka vitsivitsy ho any amin'ny lain'i Hakana i Josoa. Nirohotra ho any faingana ireo, ary dia nahita ny zavatra nalevina ka ny volafotsy no tao ambany indrindra.
23 Navoakan'ireo avy tao an-day ireny ka nentiny tany amin'i Josoa sy ny Israelita rehetra, ary napetrany teo anatrehan'ny TOMPO.
24 Dia noraofin'i Josoa sy ny Israelita rehetra i Hakana zafiafin'i Zera, noraofiny niaraka tamin'ny volafotsy sy ny akanjobeny ary ny anja-bolamena. Nalain'ireo koa ny zanakalahin'i Hakana sy ny zanakavaviny, mbamin'ny ombiny sy ny borikiny, ondry aman'osiny, ary ny lainy mbamin'izay rehetra azy ka nentiny ho any amin'ny lohasaha Hakora.
25 Dia hoy i Josoa tamin'i Hakana: Nampidi-doza anay loatra ianao! Koa hahatonga loza aminao kosa ny Tompo anio! Dia novonoin'ny Israelita rehetra tamin'ny tora-bato i Hakana. (Novonoiny toy izany koa ny ankohonany, ary indray nodorany tamin'ny afo ny fananany rehetra).
26 Avy eo dia nananganany antontam-bato lehibe teo ambonin'i Hakana, ary mbola eo mandraka androany ilay antontam-bato. Izany no niantsoana io toerana io hoe lohasaha Hakora mandraka ankehitriny. Taorian'izany vao nitony ny hatezeran'ny Tompo.
Toko faha-8
1 Dia hoy ny TOMPO tamin'i Josoa: Aza matahotra na mivadi-po ianao. Ento miaraka aminao ny tafikao manontolo ka miainga hamely an'i Hay. Indro fa hatolotro ho eo an-tananao ny mpanjakan'i Hay sy ny vahoaka ary ny tananany sy ny taniny.2 Tahaka izay nataonao tamin'i Jerikao sy ny mpanjakany no hataonao amin'i Hay sy ny mpanjakany, saingy azonareo baboina avokoa ny fananany sy ny biby fiompiny. Ametraho miaramila mamitsaka hamely ny tanana avy ao ivoho.
3 Dia niainga hamely an'i Hay i Josoa sy ny tafiny. Ary i Josoa nifidy lehilahy mahery fo miisa telo alina, dia naniraka azy nony alina
4 sady nanome baiko azy hoe: Mandehana mamitsaka ao ivohon'ny tanana ianareo ka aza manalavitra azy loatra fa samia vonombonona.
5 Izaho sy ny olona rehetra miaraka amiko kosa hanatona ny tanana; ary rehefa mivoaka hifanehatra aminay toy ny tamin'ny voalohany ny mponin'i Hay, dia handositra eo anoloany izahay.
6 Hivoaka hanenjika anay ireo ka hotarihinay ho lavitra ny tanana. Hoheveriny manko fa mandositra eo anoloany toy ny tamin'ny voalohany izahay.
7 Amin'izay ianareo no hipoitra avy ao amin'ny famitsahana ka haka ny tanana, satria hatolotry ny TOMPO ho eo an-tananareo i Hay.
8 Ary raha vao azonareo ny tanana, dia dory amin'ny afo araka ny tenin'ny TOMPO. Izany no baiko omeko anareo.
9 Dia nalefan'i Josoa ireo lehilahy mahery fo ireo ho any amin'ny faritra hamitsahany ka lasa naka toerana teo andrefan'i Hay, teo anelanelan'i Betela sy i Hay; fa i Josoa nijanona teo anivon'ny tafika sisa ihany tamin'io alina io.
10 Nony ampitso dia nifoha vao maraina be i Josoa ka nisafo ny tafika; avy eo dia nitarika azy hiakatra hamely an'i Hay izy sy ny loholon'i Israely.
11 Ny miaramila rehetra izay niaraka tamin'i Josoa dia niakatra ka tonga teo amin'ny tandrifin'ny tanana; ary nitoby teo avaratr'i Hay ireo ka lohasaha no nanelanelana azy amin'ny tanana.
12 Efa nifantina tokony ho dimy arivo lahy moa i Josoa ka nametraka azy hamitsaka teo andrefan'ny tanana, teo anelanelan'i Betela sy i Hay.