Josoa

Toko faha-16

² Dia mankany Lozy, mandalo an'i Hatarota izay sisin-tanin'ny Arkita,

³ midina miankandrefana ho any amin'ny sisin-tanin'ny Jafletita, mandalo an'i Bety-Horona ambany sy i Gezera, ary mipaka amin'ny Ranomasina Mediteranea.

⁴ Ireo taranak'i Josefa, izany hoe ny fokon-dry i Manase sy i Efraima, no nandova izany.

⁵ Izao kosa no velaran-tanin'ny Efraimita ho an'ireo tarika ao anatiny: ny sisiny atsimo dia manomboka hatreo Hatarota-Adara any atsinanana, tonga hatrany Bety-Horona ambony

⁶ ary mipaka amin'ny Ranomasina Mediteranea. Ny sisin-tany tendrony avaratra kosa dia eo Mikmetata. Eo atsinanan'i Mikmetata dia mihodina mankany Taanata-Silao ary mizotra miantsinanana ho any Janoha;

⁷ avy eo dia midina ho any Hatarota sy Nahara, dia mihazo an'i Jerikao ary mipaka any Jordana.

⁸ Eo andrefan'i Mikmetata kosa dia mihodina mankany Tapoa, manaraka ny reniranon'i Kana, ary mipaka amin'ny Ranomasina Mediteranea. Izany no zaratany nomena ireo tarika ao anatin'ny fokon'i Efraima,

⁹ miampy ireo tanana sy zana-bohitra notsongaina teo anivon'ny zara tanin'ny fokon'i Manase.

¹⁰ Ary ny taranak'i Efraima dia tsy nandroaka ny Kanahanita izay nonina tao Gezera. Koa mbola miara-monina aminy ihany ireny kanahanita ireny mandraka androany, ary nampanaoviny asa fanompoana.

Toko faha-17

¹ Izao no zaratany navoakan'ny antsapaka ho an'ny fokon'i Manase izay lahimatoan'i Josefa. Teny atsinanan'i Jordana, ny tarik'i Makira, lahimatoan'i Manase sady rain'i Gilehada, dia nomena ny faritany Gilehada sy Basana, satria miaramila mahery fo i Makira.

² Ny tany teny andrefan'i Jordana kosa dia nomena ny Manasita sisa ho an'ireo tarika ao anatiny: dia ny tarik'i Abihezera, ny tarik'i Heleka, ny tarik'i Asriela, ny tarik'i Sekema, ny tarik'i Hefera, ny tarik'i Semida. Tera-dehilahy taranak'i Manase izay zanakalahin'i Josefa ireo, samy araka ny tarika misy azy avy.

³ Fa i Tselofehada, zanakalahin'i Hefera sy zafikelin'i Gilehada ary zafiafin'i Makira sy zafin-dohalik'i Manase, dia tsy mba niteraka zazalahy fa zazavavy ihany. Ka ireto avy no anarany: i Mahala, i Noha, i Hogla, i Milka ary i Tiritsa.

⁴ Nanatona an'i Elehazara mpisorona sy i Josoa zanakalahin'i Nona ary ireo loholom-bahoaka izy dimy mirahavavy ka nanao hoe: Ny TOMPO efa nandidy an'i Mosesy mba hanome anay zaratany eo anivon'ireo lehilahy mpiray foko aminay. Dia nisy zaratany nomena azy teo anivon'ireo lehilahy mpiray foko aminy araka ny didin'ny TOMPO.

⁵ Koa nanana tsinjara folo ny fokon'i Manase ankoatry ny faritany Gilehada sy Basana izay eny ampita atsinanan'i Jordana,

⁶ satria ny vehivavy taranak'i Manase dia nomena zaratany koa fa tsy ny lehilahy ihany. (Ny faritany Gilehada dia an'ireo Manasita hafa).

⁷ Ny velaran-tanin'i Manase dia mahafaoka hatreo Asera ka hatrany Mikmetata, any atsinanan'i Sekema; avy eo dia midina mianatsimo any amin'ny mponin'i Haina-Tapoa.

⁸ Ny faritanin'i Tapoa dia an'i Manase; fa ny tananan'i Tapao izay eo amin'ny sisintany kosa dia an'ny Efraimita.

⁹ Avy eo ny sisin-tany dia midina atsimon'ny lohasahan-driakan'i Kana, kanefa an'ny Efraimita ireo tanana eo atsimon'ny lohasahan-driaka na dia ao anatin'ny faritanin'i Manase aza. Dia mandalo any avaratry ny lohasahan-driaka indray ny sisin-tanin'i Manase ary mipaka amin'ny Ranomasina Mediteranea.

¹⁰ Ny tanin'i Efraima dia mitomandavana mianatsimo fa ny an'i Manase kosa mianavaratra; ary ny Ranomasina Mediteranea no samy sisiny andrefana. Ny fokon'i Asera no eo avaratra andrefan'ny fokon'i Manase ary ny an'i Jisakara no eo avaratra atsinanana.

¹¹ Tao amin'ny faritanin'i Jisakara sy i Asera dia nahazoan'ny fokon'i Manase an'ireto tanana ireto: i Bety-Seana sy i Iblehama mbamin'ireo tanana kely miankina aminy; i Dora sy i Haina-Dora ary i Tahenaka sy i Megidao mbamin'ny mponina ao aminy avy sy ny tanana kely samy miankina aminy, izany hoe ny faritanin'i Dora.

¹² Tsy naharoaka an'ireo Kanahanita hiala tamin'ireo tanana ireo anefa ny taranak'i Manase; koa mbola nipetrahan'ny Kanahanita ihany izany faritany izany.

¹³ Ary na dia efa nihanatanjaka aza ny Israelita, dia tsy naharoaka ny Kanahanita mihitsy saingy nampanao azy asa fanompoana.

¹⁴ Ary nitaraina tamin'i Josoa ny taranak'i Josefa nanao hoe: Nahoana no anjara iray ihany tamin'ny antsapaka no mba nomenao anay, kanefa izahay efa tonga vahoaka marobe araka izay nitahian'ny TOMPO anay?

¹⁵ Dia novalian'i Josoa hoe: Raha tahiny vahoaka marobe ianareo ka tery ho anareo ny havoanan'i Efraima, dia mandehana any amin'ny tanin'ny Perizita sy ny Refaita ka tevezo ny ala any hipetrahanareo.

¹⁶ Hoy kosa ny taranak'i Josefa hoe: Tsy ampy ho anay tokoa ny havoana, kanefa manana kalesy vy ireo Kanahanita rehetra monina ao amin'ny tany lemaka, na izay any Bety-Seana sy amin'ireo tanana kely miankina aminy na izay any amin'ny lohasahan'i Jizrehela.

¹⁷ Fa hoy i Josoa tamin'ny taranak'i Josefa, dia ny fokon'i Efraima sy ny antsasa-pokon'i Manase tany andrefana: Vahoaka marobe sady matanjaka tokoa ianareo, ka tsy anjara iray ihany no ho anareo.

¹⁸ Ho anareo koa ny havoana rakotra ala, dia hotevenareo ny ala ka halainareo ny vava ala; fa ho voaroakanareo ny Kanahanita na dia matanjaka sy manana kalesy vy aza ry zareo.

Toko faha-18

¹ Taorian'ny nandresen'ny Israelita ilay tany, dia nivory tao Silao ny fiangonana israelita tsivakivolo ka tao no nananganany ny Tranolay fihaonana amin'Andriamanitra.

² Ary mbola nisy foko fito tsy mbola nahazo ny zarataniny.

³ Ka hoy i Josoa tamin'ireo Israelita ireo: Mandra-pahoviana no hiandrasanareo tsy handeha handray ny tany izay nomen'ny TOMPO Andriamanitry ny razanareo anareo?

⁴ Koa manendre lehilahy telo isam-poko mba hirahiko hitety ny tany; avy eo dia hiverina hanao tatitra eo anatrehako ny amin'ny anjara tany noteteziny.

⁵ Dia hozarain'ireo ho fito toko ny tany. Ny taranak'i Joda dia hijanona amin'ny faritaniny ao atsimo, ary ny taranak'i Josefa kosa hijanona amin'ny azy ao avaratra.

⁶ Ataovinareo an-tsoratra ny toetoetr'ireo tany fito toko ireo ka ento aty amiko izany; dia hataoko antsapaka eo anatrehan'ny TOMPO Andriamanitsika izay ho anjara fokonareo avy.

⁷ Tsy hisy anjara ho an'ny Levita eo anivonareo satria ny fisoronana amin'ny TOMPO no lovany. Ny fokon'i Gada sy fokon'i Reobena ary antsasa-pokon'i Manase koa dia efa nahazo ny zaratany teny ampita atsinanan'i Jordana, ka i Mosesy mpanompon'ny TOMPO no nanome azy izany.

⁸ Dia nioman-kandeha ireo lehilahy voatendry hisafo ny tany, ka izao no baiko nataon'i Josoa taminy: Mandehana, tetezo ny tany, ataovy an-tsoratra ny toetoetrany, dia miverena aty amiko; fa eto Silao, eto anatrehan'ny TOMPO no hanaovako antsapaka izay ho anjaranareo avy.

⁹ Dia nandeha ireo lehilahy ireo ka nitety ny tany sy nanao an-tsoratra ny toetoetrany ary nizara azy ho fito toko miaraka amin'ny lisitry ny tanana; dia niverina ho any amin'i Josoa tao amin'ny toby tao Silao.

¹⁰ Ary nanao ny antsapaka teo anatrehan'ny TOMPO tao Silao i Josoa ka nizara ny tany ho an'ny Israelita araka ny anjara tandrifin'ny fokony avy.

¹¹ Ny anjara voatendrin'ny antsapaka voalohany dia azon'ny foko benjaminita ho an'ireo tarika ao anatiny; ka ny velaran-taniny dia teo anelanelan'ny an'ny taranak'i Joda sy ny an'ny taranak'i Josefa.

¹² Ny sisin-taniny, lafy avaratra, dia miainga hatreo Jordana ka miakatra ho any amin'ny ilany avaratr'i Jerikao, dia mahazo ny tendrombohitra any andrefana, ary miafara amin'ny taniefitr'i Bety-Avena;

¹³ avy eo dia mankany Lozy ka mandalo amin'ny ilany atsimon'i Lozy izay antsoina koa hoe Betela, ary midina ho any Hatarota-Adara, rehefa avy mandalo ny tendrombohitra eo atsimon'i Bety-Horona ambany.

¹⁴ Ao andrefan'io tendrombohitra io no miolaka ny sisin-tany ka mihodina mianatsimo ary miafara ao Kiriata-Bahala (antsoina koa hoe Kiriata-Jeharima), izay tananan'ny taranak'i Joda. Izany no sisin-tany lafy andrefana.

¹⁵ Ny sisin-tanin'i Benjamina, lafy atsimo kosa, dia miainga hatreo Kiriata-Jeharima, ka miankandrefana ary miafara any amin'ny loharanon'i Neftoa.

¹⁶ Avy eo midina hatrany am-pototr'ilay tendrombohitra manoloana ny lohasahan'i Hinoma ao avaratry ny lohasahan'ny Refaita, dia manaraka ny lohasahan'i Hinoma amin'ny ilany atsimo manamorona ny havoanan'ny Jebosita, ary midina hatrany Haina-Rogela.

¹⁷ Avy eo mihodina mianavaratra ka mandroso hatrany Haina-Semesa sy hatrany Gilelota izay manoloana ny fiakaran'i Adomima, ary midina ho any amin'ilay vato atao hoe vaton'i Bohana (I Bohana dia zanakalahin'i Reobena).

¹⁸ Avy eo mihazo ny ilany avaratr'ilay havoana mandondona ny lohasahan'i Jordana, dia midina amin'io lohasaha io,

¹⁹ ary mitohy any avaratr'i Bety-Hogla ka miafara any amin'ny tendrony avaratry ny Ranomasina Maty, eo am-bavaranon'i Jordana. Izany no sisin-tany, lafy atsimo.

²⁰ I Jordana kosa no sisin-tany, lafy atsinanana. Izany no zaratany nolovan'ny Benjaminita ho an'ireo tarika ao anatiny, araka ny sisin-tany manodidina azy.

²¹ Ireto avy ny tanana azon'ny foko benjaminita ho an'ny tarika ao anatiny: i Jerikao, i Bety-Hogla, i Hemeke-Ketsitsa,

²² i Bety-Haraba, i Tsemaraima, i Betela,

²³ i Havima, i Para, i Hofra,