Hebreo
Toko faha-12
5 Ary efa hadinonareo ve ny teny fampaherezana milaza aminareo toy ny amin-janaka hoe: Anaka, aza atao tsirambina ny famaizana ampiharin'ny Tompo; ary aza ketraka rehefa anariny.6 Fa ny zanaka tiany no faizin'ny Tompo ary izay rehetra raisiny ho zanaka no kapohiny?
7 Ho famaizana anareo no aoka hiaretanareo fijaliana; toy ny zanaka no itondran'Andriamanitra anareo, satria iza moa no zanaka tsy faizin-drainy?
8 Fa raha tsy faizina tahaka ny atao amin'ny zanaka rehetra ianareo, dia tsy tena zanaka fa zazasary.
9 Nanana ny raintsika eto an-tany isika, ary nampihatra famaizana tamintsika izy ka izany no anajantsika azy; fa vao mainka tokony hanaiky ilay Raintsika any an-danitra isika mba ho velona.
10 Famaizana mandritra ny andro vitsivitsy ihany no nampiharin'ireo raintsika eto an-tany, araka izay heveriny fa mety; fa soa ho antsika kosa no amaizan'Andriamanitra antsika, dia ny mba hiombonantsika anjara amin'ny fahamasinany.
11 Rehefa faizina isika, dia heverintsika ho zavatra mampahory fa tsy mahafaly izany eo no ho eo; fa aty aoriana, ny olona tinaiza tamin'izany famaizana izany vao mahita ny voka-tsoany: dia fiadanana vokatry ny fitondrantena mahitsy.
12 Hatanjaho ary ny tanana miraviravy sy ny lohalika malemy.
13 Mizora amin'ny lala-mahitsy hatrany mba tsy hipitsoka ny tongotra mandringa fa mba ho sitrana tsara.
14 Iezaho ny hahatsara fihavanana amin'ny olona rehetra sy ny hanana toe-piainana masina; fa izay tsy manana toe-piainana masina dia tsy hahita ny Tompo.
15 Mitandrema tsara mba tsy hisy hiala amin'ny fahasoavan'Andriamanitra. Aoka mba tsy hisy ho tonga ahitra mangidy mitrebona ka hanapoizina sy hanimba ny maro.
16 Aoka mba tsy hisy mpijangajanga na olona mpanazimba ny zava-masina tahaka an'i Hesao izay nivarotra ny fizokiany hahazoany hanina indraim-bava.
17 Fantatrareo fa te hahazo ny tsodranon-drainy izy taty aoriana, kanefa dia nolavina; satria tsy afaka hanova ny efa nataony izy, na dia nitady fatratra tamin-dranomaso aza.
18 Tsy mba tendrombohitra azo tsapain-tanana toy ny an'ny vahoaka Israely tsy akory no efa nohatoninareo, dia ny tendrombohitra Sinay mirehitra afo, rakotra haizina sy rahona mainty, omban'orambaratra
19 sy trompetra maneno ary feo mireondreona. Nony ren'ny vahoaka Israely izany feo izany, dia nitalaho izy mba tsy hisy intsony teny hafa hatao aminy,
20 satria tsy tohany rahateo ny baiko hoe: Na dia izay biby mikasikasika ny tendrombohitra aza, dia hatao matin'ny torabato.
21 Nahatsiravina loatra ny zava-niseho ka hoy i Mosesy: Mangorohoro aho fa matahotra loatra.
22 Fa ny efa nohatoninareo kosa dia ny tendrombohitra Tsiona misy ny tananan'Andriamanitra velona, dia i Jerosalema any an-danitra. Ny efa nohatoninareo dia ny anjely marobe tsy hita isa
23 ary koa ny Fiangonana ivorian'ireo zanaka malalan'Andriamanitra toa lahimatoany, dia ireo voasoratra anarana any an-danitra. Ny efa nohatoninareo dia Andriamanitra mpitsara ny olona rehetra ary koa ireo fanahin'ny olo-marina efa tonga lafatra.
24 Ny efa nohatoninareo dia i Jesoa, mpanalalana amin'ny Fanekempihavanana Vaovao, ary koa ny rany nafafy izay miteny tsara lavitra noho ny ran'i Abela.
25 Mitandrema ary! Aza manentsin-tadiny amin'izay miteny aminareo. Fa raha tsy afa-nandositra ireo nanentsin-tadiny tamin'ilay nilaza hafatr'Andriamanitra taminy teto an-tany, mainka fa isika raha miala amin'Ilay miteny amintsika avy any an-danitra.
26 Ny feony dia nanozongozona ny tany fahizay; ankehitriny kosa dia mbola mampanantena antsika Izy manao he: Hohozongozoniko indray mandeha koa, tsy ny tany ihany, fa ny habakabaka koa.
27 Ny hoe indray mandeha koa dia manambara fa hohozongozonina sady hovana ny zavaboaary, mba haharetan'izay zavatra tsy azo hozongozonina.
28 Aoka ary isika hahay misaotra an'Andriamanitra noho isika mandray Fanjakana tsy azo hozongozonina. Izany fahaiza-misaotra Azy izany dia aoka hasehontsika amin'ny fanompoana sitrak'Andriamanitra, fanompoana ombam-panajana sy fahatahorana;
29 fa ilay Andriamanitsika dia afo mandevona.
Toko faha-13
1 Mifankatiava hatrany toy ny mpiray tampo ao amin'i Kristy.2 Tsarovy ny fampiantranoam-bahiny. Nisy tokoa izay mahavatra nanao izany ka hay anjely aza no nampandrosoiny nefa tsy fantany.
3 Tsarovy ny voafonja, ka hevero ho toy ny miaraka voafonja aminy koa ny tenanareo; tsarovy ny ampahorina, ka hevero ho toy ny ampahorina tahaka azy ireo koa ny tenanareo.
4 Aoka samy hanaja ny fanambadiana, ary aoka tsy hifanitsakitsaka ny mpivady; fa hohelohin'Andriamanitra ny mpijangajanga sy mpaka vadin'olona.
5 Aza avela hahazo laka amin'ny fiainanareo ny fitiavam-bola; aoka ianareo hianina amin'izay anananareo, fa hoy Andriamanitra: Tsy handao anao mihitsy Aho, ary tsy hahafoy anao velively.
6 Ka dia sahintsika ny manao hoe: Ny Tompo no mpanampy ahy, ka tsy hatahotra aho. Inona no ho azon'olona atao amiko?
7 Tsarovy ireo mpitarika anareo ara-pivavahana, izay efa nitory ny tenin'Andriamanitra taminareo; hevero izay niafaran'ny fiainany ka alao tahaka ny finoany.
8 I Jesoa Kristy no tsy miova omaly sy anio ary mandrakizay.
9 Aza mety havilivilin'ny fampianarana samihafa tsy araka an'i Kristy ianareo; tsara manko raha ampaherezina amin'ny fahasoavan'Andriamanitra ny fonareo, fa tsy amina fitsipika momba ny hanina izay tsy mahasoa ireo mahavatra azy.
10 Ireo mpanaraka fanompoam-pivavahana ao amin'ny toeram-pivavahana jiosy dia tsy mahazo mihinana amin'izay sorona atao eo amin'ny alitarantsika.
11 Entin'ny mpisorombe ao amin'ny Toeramasina Indrindra ny ran'ny biby hatao sorona ho fanalana ny ota; fa ny fatin'ireo biby ireo kosa dia dorana any ivelan'ny toby.
12 Izany koa no anton'ny nahafatesan'i Jesoa tany ivelan'ny tanana, mba hanadio ny vahoaka amin'ny ra nafoiny.
13 Aoka ary isika hivoaka ny toby hankeo amin'i Jesoa, ka hiara-mizaka aminy ny fandatsana nozakainy.
14 Fa tsy manana tanana maharitra eto an-tany isika; fa ilay tanana ho avy no katsahintsika.
15 Koa amin'ny alalan'i Jesoa aoka hatolotsika ho sorona ho an'Andriamanitra mandrakariva ny fiderantsika Azy, dia fiderana ventesin'ny molotr'ireo olona miaiky an'Andriamanitra ho Tompo.
16 Aza hadinoina ny fanaovan-tsoa sy ny fifanampiana, fa sorona toy izany no sitrak'Andriamanitra.
17 Manoava an'ireo mpitarika anareo ara-pivavahana, ka maneke azy. Fa ireo no miambina hatrany ny fanahinareo, toy ny olona mbola hampamoahin'Andriamanitra ny amin'izany. Raha manoa ianareo, dia amin'ny hafaliana no hanaovan'ireo ny raharahany; fa raha tsy manoa ianareo, dia amin'ny fisentoana no hanaovany azy ka tsy hahasoa anareo izany.
18 Mivavaha ho anay; satria matoky izahay fa mahitsy fieritreretana, ka satrinay tokoa ny hanana fitondrantena tsara amin'ny zavatra rehetra.
19 Iangaviako manokana ianareo hangataka amin'Andriamanitra mba hamerenany ahy faingampaingana aty aminareo.
20 Andriamanitra dia efa nitondra an'i Jesoa Tompontsika hiala amin'ny fahafatesana, i Jesoa Tompontsika Izay Mpiandry lehibe miahy ny ondry noho ny ra nafoiny ho antoky ny Fanekempihavanana mandrakizay.
21 Andriamanitra loharanon'ny fiadanana anie hahatonga anareo ho vonon-kanao ny asa soa rehetra mba hanatanterahanareo ny sitrapony; ka hataony ao anatintsika amin'ny alalan'i Jesoa Kristy anie izay sitrany. Ho an'i Jesoa Kristy anie ny voninahitra mandrakizay mandrakizay! Amen.
22 Mangataka aminareo aho, ry havana; raiso tsara izany lahateny fampaherezana izany, fa teny fohifohy ihany no andefasako azy an-tsoratra aminareo.
23 Aoka ho fantatrareo fa efa afaka i Timoty havantsika, koa raha tahiny tonga faingampaingana izy, dia hiaraka aminy hamangy anareo aho.
24 Veloma any amin'izay rehetra mpitarika anareo ara-pivavahana sy any amin'ny havana rehetra iray finoana. Manao veloma anareo ny havana avy any Italia.
25 Homba anareo rehetra anie ny fahasoavan'Andriamanitra!