Marka

Toko faha-10

¹⁵ Lazaiko marina aminareo fa na iza na iza tsy mandray ny Fanjakan'Andriamanitra toy ny andraisan'ny ankizy madinika azy, dia tsy ho tafiditra ao.

¹⁶ Avy eo dia notrotroin'i Jesoa ireo zaza ireo ary nametrahany tanana ka notsofiny rano.

¹⁷ Ary nony niainga handeha i Jesoa, dia nisy lehilahy nanatona Azy, ka nandohalika teo anoloany ary nanontany Azy hoe: Ry Mpampianatra tapitra ohatra o, inona no tokony hataoko hananako anjara amin'ny fiaina-maharitra mandrakizay?

¹⁸ Dia hoy i Jesoa taminy: Nahoana Aho no ataonao hoe tapitra ohatra? Tsy misy tapitra ohatra afa-tsy Andriamanitra irery ihany.

¹⁹ Fantatrao ny didy hoe: Aza mamono olona, aza maka vadin'olona, aza mangalatra, aza manao vavolombelona tsy marina, aza manambaka, hajao ny rainao sy ny reninao.

²⁰ Fa hoy ralehilahy taminy: Mpampianatra o, izany rehetra izany dia efa voatandriko hatramin'ny fahatanorako!

²¹ Dia nijery azy tsara i Jesoa ka velom-pitiavana azy ary niteny taminy hoe: Zavatra iray no tsy ampy aminao; ndeha amidio ny fanananao rehetra ka zarao amin'ny mahantra ny vidiny, dia hanana rakitra any an-danitra ianao; raha efa izany, dia hiaraka amiko.

²² Dia nanjombona endrika ralehilahy noho izany teny izany; ka lasa nandeha tamin'alahelo, satria nanan-karembe.

²³ Fa i Jesoa kosa nijerijery manodidina azy ka niteny tamin'ny mpianany hoe: Sarotra mihitsy amin'ny mpanankarena ny hiditra ao amin'ny Fanjakan'Andriamanitra!

²⁴ Gaga ny mpianatra noho izany teniny izany, kanefa dia mbola namerina ny teniny indray i Jesoa ka nanao taminy hoe: Sarotra mihitsy, anaka, ny miditra ao amin'ny Fanjakan'Andriamanitra.

²⁵ Moramora kokoa ny idiran'ny rameva ao amin'ny vodifanjaikely noho ny idiran'ny mpanankarena ao amin'ny Fanjakan'Andriamanitra.

²⁶ Vao mainka talanjona ireo mpianatra ka nifanontany hoe: Ka iza ary no mety ho voavonjy?

²⁷ Fa nojeren'i Jesoa tsara ireto mpianany sady nataony hoe: Raha amin'ny olombelona, dia zavatra tsy hainy izany; fa tsy mba toy izany amin'Andriamanitra. Raha amin'Andriamanitra manko, dia hainy avokoa ny zava-drehetra.

²⁸ Dia hoy i Petera tamin'i Jesoa: Indro izahay efa nahafoy ny zavatra rehetra ary dia izao miaraka aminao izao.

²⁹ Ka hoy i Jesoa tamin'ny mpianany: Lazaiko marina aminareo fa tsy misy olona mahafoy trano na mpiray tampo na reny na ray na zanaka na tany noho ny fitiavana Ahy sy fitiavana ny Vaovao Mahafaly,

³⁰ ka tsy hahazo injato henin'izany ankehitriny amin'izao ety izao, dia trano sy mpiray tampo sy reny sy zanaka sy tany, ombam-panenjehana ihany koa, ary hahazo ny fiaina-maharitra mandrakizay amin'ny andro ho avy.

³¹ Kanefa maro amin'ireo voalohany no ho farany, ary maro amin'ireo farany no ho voalohany.

³² Teny an-dalana miakatra ho any Jerosalema i Jesoa sy ny mpianany; ka i Jesoa no lohalalana, ary gaga ny mpianatra; ny olon-kafa tafara-dia tamin-dry zareo kosa raiki-tahotra. Dia nalain'i Jesoa ho eo aminy indray ny 12 lahy, ka nilazany an'izay madiva hanjo Azy:

³³ Indro miakatra ho any Jerosalema isika; ary ny Zanak'olona dia hatolotra an'ireo lohandoha-mpisorona sy mpahay lalana, hohelohiny ho faty; ry zareo kosa hanolotra azy amin'ny hafa firenena

³⁴ ka hoesoiny, hororany sy hokapohiny ary dia hovonoiny ho faty. Kanefa andro fahatelo aorian'izany, dia hitsangana velona Izy.

³⁵ Fa nanatona an'i Jesoa ry i Jakoba sy i Johany zanakalahin'i Zebedeo ka nanao taminy hoe: Mpampianatra o, irinay ny hanaovanao aminay izay hangatahinay aminao izao!

³⁶ Dia hoy i Jesoa taminy: Inona ary no irinareo hataoko aminareo?

³⁷ Ka novalian'izy mirahalahy hoe: Ny anankiray aminay mirahalahy mba hipetraka eo ankavananao ary ny anankiray eo ankavianao, rehefa heni-boninahitra Ianao.

³⁸ Fa hoy i Jesoa taminy: Tsy fantatrareo manko izay angatahinareo; vitanareo ve ny hiaritra fijaliana tahaka ny hiaretako, na ny hiroso amin'ny batisa hirosoako?

³⁹ Ka novalian'ireo hoe: Vitanay! Dia hoy i Jesoa taminy: Ny fijaliana hiaretako dia hiaretanareo tokoa, ary ny batisa hirosoako dia hirosoanareo tokoa;

⁴⁰ fa izany hoe hipetraka eo ankavanako na eo ankaviako izany kosa tsy miankina amiko, fa ho an'izay nanomanan'Andriamanitra azy.

⁴¹ Nony nandre izany izy folo lahy, dia tezitra tamin'i Jakoba sy i Johany.

⁴² Fa nantsoin'i Jesoa hanatona azy izy rehetra ka nilazany hoe: Fantatrareo fa, eo amin'ny hafa firenena, ireo heverina hoe filohany dia manjakazaka; ary ny lehibeny dia manampatra fahefana.

⁴³ Tsy mba toy izany kosa eo aminareo; fa izay te ho lehibe eo aminareo dia ho mpiasanareo,

⁴⁴ ary izay te ho voalohany eo aminareo dia ho mpanomponareo.

⁴⁵ Satria tsy hotompoina no nahatongavan'ny Zanak'olona, fa hanompo ary hanolotra ny ainy ho fanavotana ny besinimaro!

⁴⁶ Dia tonga tao Jerikao ry i Jesoa sy ny mpiara-dia taminy. Ary fony niala ny tanana i Jesoa sy ny mpianany mbamin'ny vahoaka be, dia efa nipetraka teo amoron-dalana i Bartimeo jamba mpangataka.

⁴⁷ Reny fa i Jesoa avy any Nazareta izay, ka nanomboka niantsoantso mafy izy hoe: Ry Jesoa Zanak'i Davida o, mamindra fo amiko!

⁴⁸ Norahonan'ny olona maro izy hangina, fa vao mainka koa niantsoantso mafy hoe: Ry Zanak'i Davida o, mamindra fo amiko!

⁴⁹ Ary nijanona i Jesoa ka nilaza hoe: Antsoy izy! Dia nantsoin'ny olona ilay jamba nataony hoe: Mahereza, antsoiny ianao ka mitsangana!

⁵⁰ Natsipin'i Bartimeo ny lambany, ka niantsambotra nanatona an'i Jesoa izy.

⁵¹ Dia niteny i Jesoa nanao taminy hoe: Inona no tianao hataoko aminao? Dia hoy ilay jamba taminy: Mpampianatra o, ny hampahiratra ahy!

⁵² Ka hoy i Jesoa: Mandehana, ny finoanao no nahasitrana anao! Dia nahiratra niaraka tamin'izay ilay jamba, ka lasa nanaraka an'i Jesoa teny an-dalana.

Toko faha-11

¹ Ary nanakaiky an'i Jerosalema i Jesoa mbamin'ny mpianany sy ny vahoaka tafaraka taminy, ka mby tao amin'ny faritr'i Betifage sy i Betania, teo akaikin'ny tendrombohitra atao hoe Analanoliva. Dia naniraka roa lahy tamin'ny mpianany i Jesoa

² ka nanao taminy hoe: Mankanesa amin'itsy tanana manoloana anareo itsy. Raha vao tafiditra ao ianareo, dia hahita zana-boriky mifatotra mbola tsy nitaingenan'olona; vahao izy dia ento aty.

³ Ary raha misy olona manontany anareo hoe: Ahoana no anaovanareo izao?, dia valio hoe: Misy ilan'ny Tompo azy, fa vetivety foana dia haveriny eto.

⁴ Dia lasa izy roa lahy ka nahita zana-boriky mifatotra eo alatrano akaiky varavarana teo amoron-dalana, dia novahany.

⁵ Fa ny sasany tamin'ny olona nijoro teo nanontany azy roa lahy hoe: Hataonareo inona no vahanareo ity zana-boriky?

⁶ Dia novaliany araka ny nanafaran'i Jesoa azy, ka navelan'ny olona.

⁷ Nentin'izy roa lahy nankeo amin'i Jesoa ilay zana-boriky, ka nametrahan'ny mpianatra rehetra ny lambany teo amboniny ary dia nitaingenan'i Jesoa.

⁸ Maro ny olona namelatra ny lambany teny amin'ny lalana; ny an'ny sasany kosa rantsan-kazo tinapaka teny an-tsaha.

⁹ Ary ireo olona nialoha an'i Jesoa na ireo nanaraka Azy dia samy niantsoantso hoe: Dera anie ho an'Andriamanitra! Hombam-pitahiana amin'ny anaran'ny Tompo anie Ilay avy!

¹⁰ Hombam-pitahiana anie ity Fanjakana tonga, dia ny Fanjakan'i Davida raintsika! Dera anie ho an'Andriamanitra any amin'ny avo indrindra!

¹¹ Dia niditra tao Jerosalema i Jesoa ka namantana tao an-kianjan'ny tempoly; ary nony avy nijerijery ny zavatra rehetra Izy, sady efa hariva ny andro, dia lasa nankany Betania niaraka tamin'ny 12 lahy.

¹² Ny ampitson'iny, raha niala tao Betania i Jesoa sy ny mpianany, dia nahatsiaro noana i Jesoa.