Matio

Toko faha-8

⁸ Dia novalian'ny kapiteny hoe: Tompo o, tsy mendrika handrosoanao an-trano aho; fa teny fotsiny re atao, dia ho sitrana ny mpanompoko.

⁹ Izaho manko, na ambany fahefan'olona aza, dia mba mifehy miaramila ihany; ka raha misy ataoko hoe Mandehana, dia mandeha izy; na misy antsoiko hoe Avia, dia avy izy; ary raha ny mpiasako no ilazako hoe Ataovy izao, dia manao izy.

¹⁰ Gaga i Jesoa raha nandre izany, ka loa-bolana tamin'ireo nanaraka Azy nanao hoe: Lazaiko marina aminareo fa mbola tsy nisy olona nahitako finoana toy izany tamin'i Israely.

¹¹ Ambarako aminareo fa maro ny avy any atsinanana sy avy any andrefana no hipetraka hiara-misakafo amin-dry i Abrahama sy i Itsehaka ary i Jakoba any amin'ny Fanjakan'ny lanitra.

¹² Ireo natao handova ny Fanjakan'ny lanitra kosa dia horoahina any amin'ny maizina any ivelany; ka any ireo no hitomany sy hikitro-nify.

¹³ Dia hoy i Jesoa tamin'ilay kapiteny: Mandehana, ary aoka ho tonga aminao araka izay ninoanao. Dia sitrana tamin'izany ora izany ilay mpanompony.

¹⁴ Dia niantrano tao amin-dry i Petera i Jesoa, ary nahita ny rafozambavin'i Petera nandamaka fa voan'ny tazo.

¹⁵ Nokasihin'i Jesoa ny tanan-dravehivavy; ary nialan'ny tazo ravehivavy dia nitsangana nandroso sakafo ho an'i Jesoa.

¹⁶ Nony hariva ny andro, dia maro ny azon'ny demony no nentin'ny olona teo amin'i Jesoa; teny fotsiny no nataon'i Jesoa handroahana ireny fanahy ratsy ireny. Ary izay rehetra narary dia nositraniny avokoa;

¹⁷ hany ka tanteraka ilay voalazan'ny Tompo tamin'ny alalan'i Isaia mpaminany hoe: Izy no naka ny rofintsika sy nitondra ny aretintsika.

¹⁸ Nony hitan'i Jesoa ny vahoaka betsaka nanodidina Azy, dia nanome baiko Izy mba hankeny ampitan'ny farihin'i Galilea.

¹⁹ Nisy anefa mpahay lalana nanatona Azy ka nilaza taminy hoe: Mpampianatra o, hiaraka aminao aho na aiza na aiza alehanao!

²⁰ Fa hoy i Jesoa taminy: Ny fosa manan-davaka ary ny voro-manidina manana akany; fa ny Zanak'olona tsy mba manan-trano handriany sy hialany sasatra!

²¹ Dia nisy olon-kafa, anisan'ny mpianatr'i Jesoa, nilaza taminy hoe: Tompo o, avelao aho aloha handevina an'i dada!

²² Fa hoy i Jesoa taminy: Andao hiaraka amiko; avelao izy samy maty no hifandevina!

²³ Ary niondrana an-tsambokely i Jesoa, ka niarahan'ireo mpianany.

²⁴ Ary nisy tafio-drivotra mahery tonga tampoka teo amin'ny farihin'i Galilea, hany ka efa nila ho safotry ny alon-drano ny sambokely; i Jesoa anefa natory.

²⁵ Dia nohatonin'ireto mpianany Izy, ka nofohaziny sady nataony hoe: Tompo o, vonjeo fa ho faty isika!

²⁶ Ary hoy i Jesoa taminy: Nahoana no saro-tahotra ianareo, ry kely finoana? Izay vao niarina i Jesoa, dia niteny mafy ny rivotra sy ny farihy, ary nanjary tony dia tony ny andro.

²⁷ Gaga ny olona ka vaky vava hoe: Avy aiza ary io Lehilahy io no manaiky Azy hatramin'ny rivotra sy ny farihy?

²⁸ Rehefa tonga teny ampita teo amin'ny faritanin'i Gadara i Jesoa, dia nisy olona roa lahy nipoitra avy eny amin'ny fasana, nitsena Azy. Azon'ny demony izy roa lahy ary tena nasiaka mihitsy ka tsy nisy olona sahy nandalo tamin'izany lalana izany.

²⁹ Dia indreo izy roa lahy niantsoantso hoe: Fa ataonao inona izahay, ry Zanak'Andriamanitra? Tonga eto ve Ianao mba hampijaly anay alohan'ny fotoanandro?

³⁰ Ary nisy kisoa maro, andiany iray, nitrongy teny lavidavitra teny.

³¹ Koa nitalaho tamin'i Jesoa ireo demony nanao hoe: Raha dia roahinao re izahay, mba alefaso amin'itsy andian-kisoa itsy.

³² Dia hoy i Jesoa tamin'ny demony: Mandehana. Dia niala tamin'izy roa lahy ny demony ka lasa niditra tao amin'ny kisoa. Ary indreo ny kisoa andiany manontolo fa nirifatra ka nivarimbarina tan-kilahila ho any anaty farihy dia maty an-drano tao.

³³ Nandositra kosa ireo mpiandry kisoa, ary nankany an-tanana nilaza ny zava-nitranga rehetra sy ny momba azy roa lahy azon'ny demony teo aloha.

³⁴ Tamin'izay ny mponina rehetra iray tanana dia niainga nitsena an'i Jesoa; ka nony nahita Azy, dia nitalaho mba hialan'i Jesoa eo amin'ny taniny.

Toko faha-9

¹ Dia niondrana an-tsambokely i Jesoa ary niampita indray ka tonga tao an-tananany.

² Ary indro nisy lehilahy malemy nilamaka am-pandriana, nentin'olona teo aminy. Hitan'i Jesoa ny finoan'ireto olona, ka hoy Izy tamin'ilay malemy: Mahereza, anaka; voavela ny helokao!

³ Tamin'izay ny sasany tamin'ny mpahay lalana dia nanao anakampo hoe: Manevateva an'Andriamanitra ilay io!

⁴ Fantatr'i Jesoa ny eritreritry ny mpahay lalana ka hoy Izy: Nahoana ianareo no mieritreri-dratsy ao am-ponareo?

⁵ Fa inona moa no tsotsotra kokoa, ny milaza hoe: Voavela ny helokao, sa ny milaza hoe: Mitsangana ka mandehana?

⁶ Aoka ho fantatrareo fa ny Zanak'olona eto an-tany dia manam-pahefana hamela heloka! Tamin'izay dia hoy i Jesoa tamin'ilay malemy: Mitsangana, batao ny fandrianao ka ndeha mody!

⁷ Dia nitsangana ralehilahy ka lasa nody.

⁸ Natahotra ny vahoaka nony nahita izany ary nanome voninahitra an'Andriamanitra Izay nanolotra fahefana hamela heloka toy izany tamin'ny olona.

⁹ Raha niala teo i Jesoa, dia nahita lehilahy atao hoe Matio nipetraka teo amin'ny birao famorian-ketra, ka hoy Izy taminy: Avia hiaraka amiko. Dia nitsangana i Matio ka nandeha niaraka taminy.

¹⁰ Ary raha nisakafo tao an-tranon'i Matio i Jesoa, dia maro ny mpamory hetra sy ny mpanota no tonga niara-nihinana tamin'Izy sy ny mpianany.

¹¹ Nahita izany ny Farisianina ka nilaza tamin'ny mpianatr'i Jesoa hoe: Nahoana ny Mpampianatrareo no dia miara-misakafo amin'ny mpamory hetra sy ny mpanota?

¹² Fa hoy i Jesoa raha nandre izany: Tsy ny salama no mila dokotera fa ny marary.

¹³ Ndeha mba ianaro ny hevitr'ilay tenin'ny Soratra Masina hoe: Ny hamindranareo fo amin'ny namana no sitrako, hoy Andriamanitra, fa tsy ny hanateranareo sorona. Tsy hiantso ny olo-marina no nahatongavako fa hiantso ny mpanota.

¹⁴ Tamin'izay dia nanatona an'i Jesoa ny mpianatr'i Johany Mpanao batisa ka nanontany Azy hoe: Ahoana izahay sy ny Farisianina no mifady hanina matetika, fa ny mpianatrao kosa tsy mba mifady?

¹⁵ Dia hoy i Jesoa taminy: Moa azon'ireo mpanotrona ny mpampaka-bady atao ve ny misaona raha mbola miaraka aminy eo ny mpampakatra? Tsia. Fa ho avy ny andro hanesorana ny mpampakatra eo aminy, ka amin'izay andro izay vao hifady hanina ireo mpanotrona.

¹⁶ Tsy misy olona manampina fitafiana tonta amin'ny tapa-damba vaovao; fa handrirotra ny fitafiana tonta ilay tapa-damba natampina, ary vao mainka hitatra ny rovitra.

¹⁷ Tsy mba siny hoditra tranainy no itahirizana divay vaovao; fa raha izany, dia ho rotika ny siny hoditra; ka ny divay ho raraka, ny siny hoditra hafoy. Fa siny hoditra vaovao no itahirizana divay vaovao, dia miara-maharitra izy roroa.

¹⁸ Raha mbola niteny izany tamin'ny mpianatr'i Johany Mpanao batisa i Jesoa, dia indro tonga ity manampahefana jiosy anankiray niankohoka teo anatrehany sady nanao hoe: Maty vao izao ny zanako vavy; ka andeha re hametraka ny tananao aminy dia ho velona izy.

¹⁹ Dia nitsangana nandeha nanaraka azy i Jesoa mbamin'ny mpianany.

²⁰ Fa indro nisy vehivavy mitsi-dra efa nandritra ny 12 taona, nanatona an'i Jesoa avy eo ivoho ary nikasika ny somotraviavin-dambany;

²¹ fa hoy izy anakampony: Na dia ny lambany fotsiny aza no voakasiko, dia ho sitrana aho.

²² Dia nitodika i Jesoa ka nahita azy ary niteny hoe: Mahereza, anaka; ny finoanao no nahasitrana anao! Ary nanomboka tamin'io ora io dia sitrana ravehivavy.

²³ Nony tonga tany an-tranon'ilay manampahefana i Jesoa ka nahita ny mpitsoka sodina sy ny vahoaka nitabataba