Daniela Grika
Toko faha-13
44 Nohenoin'ny TOMPO ny antson'i Sozanina.45 Raha ilay nentina ho vonoina iny izy, dia nohetsehin'Andriamanitra ny Fanahy Masina tamin'ny zatovolahy iray atao hoe Daniela.
46 Dia niantso mafy ilehio nanao hoe:-Afa-tsiny amin'ny fahafatesan'io vehivavy io aho!
47 Nitodika tany aminy ny vahoaka rehetra ka nanontany azy hoe: -Inona no tianao hambara amin'izany teny izany?
48 Dia nitsangana teo afovoan'ireo i Daniela sady nanao hoe: -Adala ve ianareo, ry Israelita, no dia hanameloka vehivavy israelita toa anareo tsy misy famotopotorana sady tsy misy porofo.
49 Miverena any amin'ny fitsarana, fa vavolombelona mandainga hamelezana azy fotsiny ireo olona ireo!
50 Dia niverina faingana ny olon-drehetra. Ary hoy ny loholona hafa tamin'i Daniela: -Nomen'Andriamanitra ny fahamendrehan'ny anti-panahy ianao, koa avia hiara-mitsara aminay ary ampahafantaro anay ny hevitrao.
51 Hoy kosa ny navalin'i Daniela: -Saraho hifanalavitra ireo olona anankiroa ireo, fa hotsaraiko mitokana avy.
52 Dia nosarahina ireo; ary nampiantsoin'i Daniela ny voalohany ka nilazany hoe: -Ry lahiantitra feno haratsiana! Indro hianjady aminao ny valin'ny fahotanao fahiny!
53 Namoaka didim-pitsarana tsy marina ianao, fa nomelohinao ny tsy manan-tsiny ary nafahanao ny olo-meloka. Ny Tompo kosa efa nilaza hoe: "Aza mampamono ho faty ny olon-tsy manan-tsiny sy ny olo-marina"
54 Ka raha nahatratra an'i Sozanina niaraka tamina tovolahy ianao, dia mba lazao amiko hoe: "Teo ambany hazo inona moa no nahitanao azy ireo niaraka?" Dia namaly izy hoe:-Teo ambany hazo lentiska.
55 Fa hoy kosa i Daniela: -Injay ilay lainga be hahafaty anao, satria ny anjelin'Andriamanitra efa nahazo baiko hanasamaka anao eo afovoany.
56 Dia noroahin'i Daniela ilehio ary nampiantsoiny ilay faharoa ka nilazany hoe: -Ry taranak'i Kanahana fa tsy an'i Joda, nahalasa adala anao ny hatsaran-tarehim-behivavy ary nampivily ny fonao ny fanirianao azy!
57 Izany koa no nataonareo tamin'ny vehivavin'i Israely, ka nandry taminareo izy satria natahotra anareo; fa tsy mba nanaiky izany fitondrantena maloto izany kosa ity vehivavin'i Joda ity.
58 Koa mba lazao amiko ankehitriny hoe: "Teo ambany hazo inona moa no nahatraranao azy ireo niaraka?" Dia namaly izy hoe: -Teo ambany hazo oaka.
59 Fa hoy kosa i Daniela: -Injay ilay lainga be hahafaty anao koa, satria ny anjelin'Andriamanitra efa miandry amin'ny sabatra, hikapa anao eo afovoany ka hahafaty anao.
60 Nihoraka mafy nisaotra an'Andriamanitra ny rehetra tafangona teo, fa mahavonjy izay miankina aminy Izy.
61 Dia nirohotra namely ireo loholona roa lahy izy rehetra, satria voaporofon'i Daniela ny tsy mahamarim-pototra ny fanambarana izay nataony; koa izay ratsy nokasainy hatao tamin'ny mpiray firenena aminy ihany no nampiharina taminy,
62 mba hahatanteraka ny lalan'i Mosesy. Dia nohelohina ho faty ny vavolombelona mandainga; fa voavonjy kosa tamin'izany andro izany ny tsy manan-tsiny.
63 Dia nidera an'Andriamanitra noho ny amin'i Sozanina zanany vavy i Hilkia sy ny vadiny ary i Joakima mbamin'ny fianakaviany manontolo, satria tsy nahitana zava-mahafa-baraka akory ny toetrany.
64 Hatramin'izay andro izay sy ny manaraka dia nalaza tamin'ny besinimaro i Daniela.
Toko faha-14
1 Rehefa voaangona tany amin'ny razany i Astoaga mpanjaka, dia i Kirosa avy any Persia no nandimby azy.2 Nitokian'ny mpanjaka i Daniela sady nalaza mihoatra noho ireo mpanolotsaina namany hafa rehetra.
3 Nanana sampy anankiray natao hoe Bela ny Babilonianina. Isan'andro izy dia nandaniany lafarinina dimanjato kilao eo ho eo sy ondry efapolo ary divay 250 litatra eo ho eo.
4 Nanasina azy io ny mpanjaka, ka tonga mivavaka aminy isan'andro. I Daniela kosa nivavaka tamin'ny Andriamaniny, ka indray andro dia nanontanian'ny mpanjaka hoe:-Nahoana ianao no tsy mba mivavaka amin'i Bela?
5 Ary hoy ny navalin'i Daniela: -Tsy ireo sampy nataon-tanan'olona no ivavahako fa ilay Andriamanitra velona Izay nahary ny lanitra sy ny tany sady manam-pahefana amin'ny miaina rehetra ihany.
6 Dia nanontany azy indray ny mpanjaka hoe: -Moa ve ataonao fa tsy mba andriamanitra velona i Bela? Tsy hitanao angaha ireo zavatra rehetra haniny sy sotroiny isan'andro ireo?
7 Sady nihomehy i Daniela no niteny hoe: -Aza diso hevitra ianao, ry mpanjaka, fa tanimanga no nanaovana ny atin'io ary halimo kosa ny ivelany ; ary tsy mbola nihinana na nisotro na inona na inona izy.
8 Vinitra ny mpanjaka ka niantso ny mpisorona sady nanao taminy hoe: -Raha tsy ambaranareo amiko izay mihinana ireny zavatra rehetra aterina ho an'i Bela ireny, dia hataoko maty ianareo.
9 Fa raha voaporofonareo amiko kosa fa i Bela ihany no mihinana ireny, dia i Daniela no ho faty, satria sahy nanevateva an'i Bela izy. Ary hoy i Daniela tamin'ny mpanjaka: -Ho tanterahina anie ny teninao!
10 Nisy fitopolo ny mpisoron'i Bela afa-tsy ireo vadiny aman-janany. Nony tonga tao amin'ny tempolin'i Bela ny mpanjaka niaraka tamin'i Daniela,
11 dia hoy ireo mpisoron'i Bela: -Hivoaka ny tempoly izahay, ry mpanjaka; fa asaovy apetraka eo amin'ny latabatra kosa ny hanina mbamin'ny divay mifangaro, dia hidio ny varavarana ka asio ny tombokasenao.
12 Koa raha miverina ianao rahampitso maraina ka mahita fa nisy tsy nohanin'i Bela ireny rehetra ireny, dia hatao maty izahay. Fa raha ny mifanohitra amin'izany kosa, dia i Daniela no ho faty satria niampanga lainga anay izy.
13 Tsy nanahy kely akory ireo mpisorona, satria efa nanao lala-miafina mankao ambanin'ny latabatra izy mba hahafahany miditra malalaka ao amin'io efitra io haka ny fanatitra.
14 Raha vao tafavoaka ireo mpisorona, dia nasain'ny mpanjaka napetraka teo anoloan'i Bela ny hanina natokana ho azy. Avy eo nobaikoin'i Daniela ny mpanompony mba hitondra lavenona, ka nafafifafiny manerana ny tempoly teo imason'ny mpanjaka irery. Taorian'izany dia nivoaka ny trano izy rehetra; nohidina ny varavarana sady nasiana ny tombokase manokan'ny mpanjaka, ary lasa izy nandeha.
15 Nandritra ny alina, dia tonga araka ny fanaony ireo mpisorona nombam-bady aman-janaka nihinana sy nisotro izay rehetra naterina teo.
16 Ny ampitso dia nifoha maraina ny mpanjaka, ka nankany amin'ny tempoly niaraka tamin'i Daniela.
17 Ary hoy izy taminy: -Tsy nisy nanohinana ve ny fitombokase, ry Daniela? Ka hoy ny navalin'i Daniela: -Tsia, ry mpanjaka!
18 Raha vao novohana ny varavarana, dia nojeren'ny mpanjaka ny latabatra sady niantsoantso mafy izy nanao hoe: -Lehibe ianao, ry Bela , sady tsy misy fitaka mihitsy ao aminao!
19 Nihomehy kosa i Daniela ary nisakana ny mpanjaka tsy hitsofoka ao amin'ny tempoly izy no niteny taminy hoe: -Mba diniho kely ange ny gorodona e! Fantaro mba dian'iza moa ireo?
20 Ka hoy ny mpanjaka: -Dian-tongo-dehilahy sy zaza amam-behivavy no hitako!
21 Vinitra ny mpanjaka, ka nampisambotra ireo mpisorona mbamin'ny vadiny aman-janany. Dia nasehon'ireo mpisorona azy ny lala-miafina izay nahafahany mitsofoka ao amin'ny tempoly hihinana izay zavatra naterina teo amin'ny latabatra.
22 Dia nasain'ny mpanjaka novonoina ho faty ireo, ary natolony an'i Daniela ny sarivongan'i Bela ka nopotehiny mbamin'ny tempoliny.
23 Nisy dragona lehibe koa izay nivavahan'ny Babilonianina.
24 Dia hoy ny mpanjaka indray andro tamin'i Daniela: -Tsy hilaza amiko ianao fa tsy andriamanitra velona koa izy io. Koa mivavaha aminy!
25 Dia hoy i Daniela: -Ny TOMPO Andriamanitro ihany no hivavahako , fa Izy irery no Andriamanitra velona!
26 Koa raha omenao lalana aho, ry mpanjaka, dia hovonoiko ho faty tsy amin-tsabatra na tehina io dragona io. Ka novalian'ny mpanjaka hoe: -Omeko lalana ianao.
27 Dia naka ditin-kazo sy jabora ary volo i Daniela ka nampangotrahiny avokoa sy nataony bolabola dia natsipiny tao am-bavan'ny dragona. Rehefa nitelina izany ilay dragona, tonga dia nitsitra teo noho eo. Dia hoy i Daniela:-Jereo fa izao ny zavatra izay nivavahanareo!
28 Raha nandre izany ny Babilonianina, dia tezitra mafy ka nanao fihetsiketsehana hanoherana ny mpanjaka sady nihorakoraka hoe: "Efa tonga Jiosy ny mpanjaka, fa noravany ny sarivongan'i Bela, novonoiny ho faty ny dragona ary naringany ny mpisorona!"
29 Dia nankany amin'ny mpanjaka ireo ka nanao taminy hoe: -Atolory anay i Daniela; fa raha tsy izany, dia ianao mbamin'ny fianakavianao no hataonay maty.