1 Makabeo

Toko faha-2

²⁴ Nony nahita izany i Matatia, dia nirehitra zotompo sady indray niontana ny tenany. Hatezerana araka ny lalana no nisondrotra tao aminy ka nampiantoraka azy namono an-dralehilahy teo amin'ny alitara.

²⁵ Niaraka tamin'izay koa no namonoany an'ilay iraky ny mpanjaka, nanery hanao sorona; ary dia nazerany ny alitara.

²⁶ Toy izany no nirehetan'ny zotom-pon'i Matatia hiaro ny lalanan'i Mosesy, tahaka ny nataon'i Pinehasa izay namono an'i Zimry, zanakalahin'i Salo.

²⁷ Avy eo dia nandeha eran'ny tanana i Matatia niantso tamim-peo avo hoe: -Izay rehetra mirehitra zotompo hiaro ny lalanan'i Mosesy sy hitana ny fanekem-pihavanana nataon'Andriamanitra, samia miainga hanaraka ahy avokoa.

²⁸ Taorian'izany i Matatia sy ireo zanany lahy dia nandositra nankany an-tendrombohitra, ary nandao izay rehetra nananany tao an-tanana.

²⁹ Tamin'izay koa dia nisy Jiosy marobe izay nikatsaka ny fahamarinana sy nilofo tamin'ny lalanan'i Mosesy, ka nidinaho any an-taniefitra ,

³⁰ tapa-kevitra honina tany izy ireo mbamin'ny vady aman-janany sy ny biby fiompiny, satria efa nitambesaran'ny lozam-panenjehana nanjo azy.

³¹ Nilazana ny manamboninahitry ny mpanjaka mbamin'ny miaramila tao Jerosalema, teo amin'ny Tananan'i Davida, fa nisy olona nitsipaka ny didin'ny mpanjaka, ary lasa nidina any amin'ny toeram-pierena any an-taniefitra.

³² Dia nirohotra nanenjika azy ny andia-miaramila; ka rehefa nahatratra azy kosa ireo, dia nitoby tandrify azy sy nivonon-kamely amin'ny andro sabata.

³³ Hoy izy tamin'ireo mpandositra: -Ampy izay! Mivoaha tao ianareo; tanteraho ny didin'ny mpanjaka, dia ho velona ianareo.

³⁴ Fa novalian'ny Jiosy hoe: -Tsy hivoaka tato izahay ary tsy hanatanteraka ny didin'ny mpanjaka, mampandika ny fepetran'ny andro sabata.

³⁵ Niaraka tamin'izay ny miaramila dia nandraikitra ady taminy,

³⁶ kanefa tsy namaly azy ny Jiosy na nitora-bato iray akory hanoherana azy na nanampina toeram-pierena.

³⁷ Fa hoy izy hoe: "Aoka izahay rehetra ho faty avokoa amin'ny hitsimponay! Ny lanitra sy ny tany no vavolombelona mahita anay, fa vonoinareo ho faty tsy an-drariny izahay."

³⁸ Dia nasian'ny fahavalo tamin'ny andro sabata izy ireo mbamin'ny vady aman-janany sy ny biby fiompiny. Tokony ho arivo no isan'ny olona maty.

³⁹ Nalahelo mafy i Matatia sy ireo sakaizany nandre izany famonoana ho faty izany,

⁴⁰ ka nifampilaza hoe: "Raha samy manao toy izany nataon'ny mpiray firenena amintsika izany avokoa isika, ka tsy miady amin'ny hafa firenena mba hiaro ny aintsika sy ny fomba amam-panaontsika, dia ho fongorany vetivety eto ambonin'ny tany isika."

⁴¹ Koa tamin'izany andro izany ihany no nanaovany izao fanapahan-kevitra izao: "Na iza na iza tonga hamely antsika amin'ny andro sabata, dia hasiantsika; fa tsy hety hovonoina ho faty fotsiny isika, tahaka ny nahafatesan'ireo mpiray firenena amintsika tao amin'ny toeram-piereny."

⁴² Tamin'izay ny antokon'ny Hasidianina dia nomba an-dry Matatia koa: lehilahy mahery fo tao Israely ireo sady niraiki-po avokoa tamin'ny lalanan'i Mosesy.

⁴³ Ankoatra izany, nanatevina isa sy nampitombo hery azy koa izay rehetra nitady ho afaka amin'ny lozam-panenjehana.

⁴⁴ Dia nampijoro tafika iray izy mitambatra, ka namely tamin-katezerana sy tamin-kavinirana ireo mpivadika sy tsy mpivavaka; ny sisa tsy azony kosa dia nandositra any amin'ny hafa firenena mba hanavotra aina.

⁴⁵ Nanao fitetezana hatraiza hatraiza i Matatia sy ireo sakaizany mba handrava ny alitaran-tsampy.

⁴⁶ Noforany avokoa ny zazalahy rehetra hitany tsy voafora teo amin'ny tanin'i Israely,

⁴⁷ ary noroahiny ny mpiavonavona amin'Andriamanitra; ka nahomby ny raharaha izay notarihiny.

⁴⁸ Ny lalanan'i Mosesy no narovany tamin'ny famelezana nafitsok'ireo hafa firenena sy ireo mpanjaka; ka tsy navelany hahazo vahana ilay mpanjaka mivoana.

⁴⁹ Nony efa antomotra ny andro hahafatesan'i Matatia, dia hoy izy tamin'ireo zanany: -Ankehitriny, manjaka ny avonavona sy faniratsirana, ka andro fandravana sy fahatezerana mirehitra izao.

⁵⁰ Anaka, aoka ianareo hanana zotompo hiaro ny lalanan'i Mosesy ary hahafoy aina ho an'ny fanekem-pihavanana notanan'ny razantsika.

⁵¹ Tsarovy ny asa nataon'ny razantsika tamin'ny androny, fa hahazo voninahitra sy laza maharitra mandrakizay ianareo manahaka azy.

⁵² Hita ho nahatoky i Abrahama tamin'ny fizahan-toetra, ka nankatoavana azy ho marina izany.

⁵³ Nitandrina ny didin'Andriamanitra i Josefa tamin'ny androm-pahoriany, ka tonga tompon'i Ejipta izy.

⁵⁴ Nanana zotompo nirehidrehitra i Pinehasa razantsika , ka nahazo antoka izy fa ho mpisorona hatrany ny taranany.

⁵⁵ Nanatanteraka ny teny nanirahana azy i Josoa , ka tonga mpitsara nitondra an'i Israely izy.

⁵⁶ Nijoro ho vavolombelona i Kaleba teo anatrehan'ny Israelita tafangona, ka nahazo zaratany anankiray ho lovany.

⁵⁷ Niraiki-po tamin'Andriamanitra i Davida , ka nahazo sezafiandrianana mahampanjaka ho azy sy ho an'ny taranany mifandimby.

⁵⁸ Nanana zotompo nirehidrehitra i Elia , hiarovana ny lalanan'Andriamanitra, ka nopaohina ho any an-danitra izy.

⁵⁹ Natoky an'Andriamanitra i Hanania sy i Hazaria ary i Misaela , ka novonjena tsy ho azon'ny lelafo.

⁶⁰ Nahitsy fo i Daniela , ka novonjena tsy ho azon'ny vavan'ny liona.

⁶¹ Koa dinidiniho amin'izay fa isaky ny taranaka mifandimby dia tsy mba hiketraka izay rehetra manantena an'Andriamanitra.

⁶² Aza matahotra ny rahom-bava ataon'io mpanjaka mivaona io, fa ho fahalovana aman-kankana no hiafaran'ny voninahiny.

⁶³ Anio izy manandra-tena fa rahampitso izy tsy ho hita intsony, satria miverina amin'ny vovoka niaviany; ka levona ny tetikadiny.

⁶⁴ Koa matanjaha sy mahereza fo ianareo, anaka, hiorina amin'ny lalanan'Andriamanitra satria izany no hanananareo voninahitra.

⁶⁵ Indro i Simehona rahalahinareo! Fantatro fa lehilahy tsara torohevitra izy, ka henoy mandrakariva, fa dia hanjary ray ho anareo izy.

⁶⁶ Aoka i Joda Makabeo, lehilahy tomady sy mahery fo hatramin'ny fahatanorany, no ho filohan'ny tafikareo sy hitarika ny ady amin'ny hafa firenena!

⁶⁷ Ianareo kosa, mamoria izay rehetra mitandrina ny lalana mba homba anareo ary mamalia ny ratsy natao tamin'ny mpiray firenena aminareo.

⁶⁸ Atsingereno amin'ny hafa firenena ny nafitsony taminareo ary tandremo ny didy raketin'ny lalanan'Andriamanitra.

⁶⁹ Nony avy nitsodrano ireo zanany i Matatia, dia voaangona any amin'ny razany.

⁷⁰ Tamin'ny taona faha-146 no nahafatesany; ary tao amin'ny fasan-drazany, tao Modina, no nandevenan'ireo zanany azy. Fisaonana lehibe no nataon'i Israely manontolo taminy.

Toko faha-3

¹ I Joda, izay atao hoe Makabeo, no nitsangana nandimby an'i Matatia rainy.

² Nanampy azy avokoa ireo rahalahiny mbamin'izay rehetra mpomba an-drainy, ka niady tamin-kafaliana ho an'i Israely.

³ I Joda no nampitombo voninahitra ny fireneny. Rehefa nisalotra ny akanjo vy fiarovan-tena izy, dia miendrika lehilahy goavana. Nirongo ny fitaovam-piadiany izy ary namory ny olona hiady. Ny sabatra fitondran'i Joda no niarovany ny tafika israelita.