Bena-Siràka
Toko faha-14
15 Fantatrao tsara fa havelanao ho an'ny hafany vokatry ny fahasahirananao; ary ho zaraina araka izay tendrin'ny antsapaka ny vokatry ny fisasaranao.16 Sady manomeza no mandraisa, ka ampifalio araka izany ny fonao, fa tsy misy hafinaretana andrandraina any amin'ny toeran'ny maty.
17 Mihatonta toy ny fitafiana ny olona rehetra, satria ny tendry hatrizay hatrizay dia ny hoe: "Tsy maintsy ho faty tokoa ianao !"
18 Toy ny ravina eo amin'ny hazo midoroboka, misy ny mihintsana, misy ny mitsiry; toy izany koa ny taranaky ny olona nofo aman-dra, misy ny maty, misy ny teraka.
19 Levona no hiafaran'ny asa mety simba rehetra, ary ho lasa miaraka aminy koa izay nanao azy.
20 Sambatra ny olona milofo amin'ny fahendrena sy manazatra saina amin'ny famotopotorana,
21 ka mieritreritra ao am-pony ny lalam-pahendrena ary mandinidinika ny zava-miafina raketiny:
22 manenjika ny fahendrena toy ny mpihaza izy ary mihendry azy eny amin'ny fandalovany.
23 Eo am-baravarankelin'ny fahendrena no iondrehan'izany olona izany hijery, eo am-baravarambeny no ihainoany,
24 eo akaikin'ny tranony no honenany, ao anaty rindriny no anatsatohany tsimaday,
25 eo anilany no ananganany tranolay, ka toeram-pahasambarana no honenany.
26 Eo ambany fiarovan'ny fahendrena no ametrahan'izany olona izany ny zanany, ary eo ambanin'ny rantsany no ialofany;
27 noho ny alokaloky ny fahendrena dia ho voaaro amin'ny hafanana izy ary honina ao anatin'ny voninahiny.
Toko faha-15
1 Izay manaja ny TOMPO no hanao toy izany; ary ny mpahay lalana no hahazo fahendrena.2 Toy ny reny hitsena azy ny fahendrena, ary toy ny vady virijiny handray azy,
3 ka ny fahazavan-tsaina no toy ny mofo hafahany azy ary ny fahendrena no toy ny rano hampisotroiny azy.
4 Hiankina amin'ny fahendrena izy ka tsy hilofika ary hiraikitra aminy ka tsy hahazo henatra.
5 Ny fahendrena dia hanandratra azy ho ambonin'ireo mpiray fonenana aminy; ary rehefa hiteny eo anivon'ny fivoriambe izy, dia ny fahendrena no hampiloa-bava azy.
6 Fifaliana sy firavoravoana no ho hitany, ary laza maharitra mandrakizay noho anjarany.
7 Ny olona adala kosa tsy mba hahazo ny fahendrena, ary ny mpanota tsy hahita izany na oviana na oviana.
8 Mihataka lavitry ny mpiavonavona ny fahendrena; ary ny olona fandainga tsy hihevitra izany akory.
9 Tsy sitraka ny fiderana an'Andriamanitra eo am-bavan'ny mpanota, satria tsy mba avy amin'ny Tompo izany fiderana izany:
10 ny fahendrena no mampanonona ny fiderana ary ny Tompo mihitsy no manentana amin'izany.
11 Aza manao hoe: "Ny TOMPO no nampivaona ahy", satria izay zavatra halany, dia tsy ataony.
12 Aza manao hoe: "Ny TOMPO no nampania ahy", satria tsy mila izay mpanota akory Izy.
13 Ny toetra maharikoriko isan-karazany dia samy ankahalain'ny Tompo; ka ireo olona manaja Azy ihany no tsy mankamamy an'izany.
14 Tany am-piandohana no nahary ny olombelona ny TOMPO ary namela azy samy hanaraka ny fisainany avy.
15 Raha tianao ary, dia hitandrina ny didiny ianao; miankina amin'ny sitrakao ny hiraiki-po amin'izany.
16 Nataon'ny TOMPO eo anoloanao ny afo sy ny rano, ka azonao atsotra amin'izay tianao ny tananao.
17 Eo anoloan'ny olona ny fiainana sy ny fahafatesana, ka izay ironan'ny safidiny no homena azy.
18 Lehibe manko ny fahendren'ny TOMPO; sady mahery Izy no mahefa ary mahita ny zavatra rehetra;
19 ny masony dia eo amin'izay manaja Azy, ary fantany avokoa ny asan'ny olombelona.
20 Tsy misy olona notereny hankahala fivavahana ary tsy misy olona nomeny lalana hanota.
Toko faha-16
1 Aza maniry zaza maro tsy mahasoa, ary aza ifalianao ny zanaka tsy tia vavaka.2 Na dia maro aza ireo, aza ifalianao ny aminy raha tsy momba azy ny fanajana ny Tompo.
3 Aza ianteherana ny fiainan'ireo zazaireo, aza itokiana akory ny hamaroan'isany; aleo manko anankiray marin-toetra toy izay arivo amin'ireo tsy mahasoa ireo; aleo mihitsy aza maty tsy niteraka toy izay mamela zanaka tsy tia vavaka.
4 Ny olona iray mahira-tsaina dia hahabe mponina ny tanana iray; fa ny andian'olon-dratsy kosa hahatonga azy ho tanana aolo.
5 Maro ny zavatra mitovy amin'izany, efa hitan'ny masoko; ary mbola misy aza manaitra noho izany efa ren'ny sofiko.
6 Eo amin'ny fivorian'ny mpanota no mirehitra ny afon'Andriamanitra; ary eo amin'ny vahoaka mpikomy no hiredaredan'ny fahatezerany.
7 Ny TOMPO tsy namela heloka an'ireo rapeto fahiny, izay natoky ny herin'ny tenany ka nikomy taminy.
8 Ilay tanana nonenan'i Lota dia tsy notsitsin'ny TOMPO, satria naharikoriko Azy ny fiavonavonany sahy loatra.
9 Tsy nananan'ny TOMPO indrafo ireo Kanahanita izay vahoaka voatolotra haringana ka nofongorana noho ny fahotany.
10 Tsy nananany indrafo toy izany koa ireo vahoaka israelita andiany eninjato, izay samy maty noho ny ditram-pony avy.
11 Na anankiray ihany aza no mafy hatoka, dia mahagaga loatra raha ho afa-maina izy, satria samy ao amin'ny Tompo avokoana ny indrafo na ny fahatezerana: mahery mamela heloka Izy fa mandraraka ny fahatezerany koa.
12 Araka ny haben'ny indrafony no hamafin'ny famaizany; ho tsarainy araka ny asany avy ny olombelona.
13 Ny mpanota tsy ho afa-mandositra miaraka amin'ny remby azony; ny fahari-pon'ny olona tia vavaka kosa dia tsy ho diso fanantenana.
14 Ny TOMPO dia hanome sehatra hatrany hanaovana asa fiantrana isan-karazany;
15 ka samy araka ny asa nataony avy no hahazoan'ny tsirairay valiny.
16 Aza manao hoe: "Hiafina lavitra ny TOMPO aho;
17 iza moa, avy any ambony any, no hahatsiaro ahy? Ho hadino ao anaty vahoaka marobe ao aho; satria zinona moa izao tenako izao ao anatin'ny voaary tsy hita lany?