Hôsea

Toko faha-7

¹² Iny izy mankany iny kosa no velariko aminy ny haratoko, ka ataoko izay hilatsahany ao toy ny voromanidina; avy eo dia faiziko izy araka ny zavatra ratsy nataony.

¹³ Lozan'ireo olon'i Efraima, satria nandositra Ahy izy. Faharavana no eo aminy, satria nikomy tamiko izy! Ny tenako dia te hanavotra azy; fa izy kosa milaza lainga, isaky ny miteny momba Ahy.

¹⁴ Tsy mba vokatry ny fony no iantsoany vonjy amiko; fa mitoloko eo am-pandriany izy, ary mandidy tena mba hahazoana vary sy divay vaovao; fanoherana Ahy no ialany amiko.

¹⁵ Izaho no nanazatra sy nampatanjaka ny sandriny; nefa izy kosa ny amiko dia nisaintsain-dratsy hatrany.

¹⁶ Raha misy ny fiverenany, dia tsy ho amiko ilay Avo izany; fa mandiso fanantenana tahaka ny tsipika ketraka izy. Ho lavon-tsabatra ny mpifehy azy noho ny fitsaontsaom-bavany; izany no handatsana azy any Ejipta!

Toko faha-8

¹ Tsofy ny anjomara, fa ho toy ny voromahery ny fiantefan'ny loza amin'ny tanin'ny TOMPO. Satria nandika ny fanekempihavanako ireo olon'i Israely ireo, hoy Izaho TOMPO, ary nanohitra ny fampianarako.

² Na dia mitaraina amiko aza izy hoe: Ry Andriamanitr'i Israely o, mahalala Anao izahay!',

³ dia efa nolavin'i Israely ny tsara, ka hanenjika azy ny fahavalo.

⁴ Nanangana mpanjaka izay tsy nofidiko izy ary nanendry filoha izay tsy fantatro akory. Nanaovany sampy ny volafotsy na ny volamenany mba ho fongotra aminy.

⁵ Maharikoriko ilay ombilahikelinareo, ry olon'i Samaria! Mampirehi-pahatezerana Ahy ianareo Mandra-pahoviana ny tenanareo no tsy hiharam-pamaizana?

⁶ Fa avy tamin'i Israely io ombilahikely io, mpahay taozavatra no namboatra azy, ka dia tsy Andriamanitra izy; eny, ho montsamontsana ilay ombilahikelin'i Samaria.

⁷ Mamafy rivotra ianareo ka hijinja tadio. Fa hoy ny ohabolana hoe: Vary tsy amin-tsalohy tsy vanon-ko lafarinina.; ary raha tahiny aza hisy, dia ny vahiny no handany azy.

⁸ Voatelina i Israely; ary indro izy efa tonga toy ny fanaka tsy misy vidiny any amin'ny hafa firenena.

⁹ Nandeha niakatra tany Asiria izy; mahay mizaka tena ny borikidia, fa mividy sakaiza ho azy kosa i Efraima.

¹⁰ Na dia nizara fanomezana tamin'ny firenen-kafa aza izy, dia tonga kosa ny fotoana hamoriako azy ankehitriny. Ary tsy ho ela izy dia hijaly noho izay hatambesatr'ilay mpanjakan'andriana.

¹¹ Nampitombo ireo alitara i Efraima mba hahatonga azy hanota; eny, ireo alitara ireo tokoa no mahatonga azy hanota.

¹² Na ho an'arivony mihitsy aza no hanoratako ho azy ny lalanako, dia hoheveriny ho zava-poana izany.

¹³ Mahavatra manatitra sorona izy satria te hihinan-kena. Nefa Izaho TOMPO tsy faly amin'izany; ankehitriny tsaroako ny heloka nataony ary teteziko tsirairay ny fahotany. Tsy maintsy hiverina any Ejipta izy.

¹⁴ Nanangan-dapa maro i Israely, ka nanadino ny Mpanao azy. I Joda koa etsy an-daniny dia nampitombo tananamimanda; nefa handefasako afo ny tananany ka holevonin'izany ny lapany.

Toko faha-9

¹ Ry Israely o! Aoka izay ny fetim-pifaliana mihoa-pampana toy ny fanaon'ireo firenen-kafa. Fa efa nanalavitra an'Andriamanitrao ianao tamin'ny fivarotan-tena nataonao sy tamin'ny fitiavan-karama maloto teny am-pivelezam-bary rehetra teny.

² Tsy hahafa-po anao anefa na ny vary eo am-pamoloana na ny menaka eo am-pamiazana; ary ny divay vaovao andrasanao dia handiso fanantenana anao.

³ I Efraima dia tsy hahazo monina intsony eo amin'ny tanin'ny TOMPO; fa tsy maintsy hiverina any Ejipta izy na hankany Asiria hihinan-java-pady.

⁴ Tsy ho afa-mandraraka divay intsony izy mba ho fanatitra ho an'ny TOMPO; tsy hahafaly Azy ny sorona ateriny; ho toy ny mofom-pisaonana amin'izy ireo izany, ka ho voaloto avokoa izay mihinana azy. Hahavoky azy ihany ny mofony fa tsy ho tafiditra ao an-tranon'ny TOMPO.

⁵ Inona kosa no hataonareo amin'ny androm-pankalazana manetriketrika, dia amin'ny andro fetin'ny TOMPO?

⁶ Rehefa tonga ny fandringanana ka mihahaka ny vahoaka, dia hanangona anareo i Ejipta; saingy Memfisa no ho fasanareo. Ho lovan-tsongosongo ny fana-bolafotsinareo sarobidy ary ho tongan'ny tsilo ny fonenanareo.

⁷ Tonga ny andro famaizana. Tonga ny andro famaliana. Ho fantatr'i Israely anie izany! Hoy ianareo hoe: Adala ny mpaminany; ary mirediredy ny tsindriam-panahy. Vokatry ny hamaroan'ny helokao sy ny fanohera-mafy nataonao izany.

⁸ Miaraka amin'Andriamanitro ny mpitily ho an'i Efraima, dia ilay mpaminany. Amelaram-pandrika izy amin'izay alehany rehetra; ary fanoherana no afitsoka azy hatrany an-tranon'Andriamanitra.

⁹ Nihoa-pampana ny faharatsianareo toy ny fahiny tany Gibeha. Nefa hotsaroan'ny Tompo ny helokareo, ary hoteteziny tsirairay ny fahotanareo.

¹⁰ Tahaka ny voaloboka any an-taniefitra no nahitako an'i Israely, tahaka ny aviavimbazaha masaka aloha indrindra no nahitako ny razanareo. Saingy rehefa mby tao Bahala-Pehora izy, dia nanokan-tena ho amin'ny henatra ka tonga maharikoriko toy ilay Bahala notiaviny ihany.

¹¹ Ankehitriny ny voninahitr'i Efraima dia hiserana toy ny fiseram-boromanidina; ka tsy hisy zaza teraka intsony, na zaza entina am-bohoka na zaza torontoronina akory aza.

¹² Na dia misy mitaiza zanaka aza izy, dia hoesoriko aminy ireny, ka tsy hisy miangana. Eny, hahita loza koa izy amin'ny handaozako azy.

¹³ I Efraima, araka ny hitako, dia manao ny zanany ho toy ny fihaza ka mamela azy hisehatra ny mpamono azy ho faty.

¹⁴ TOMPO o, inona no sazy mba homenao azy? Ataovy momba sy tsy afa-mampinono ireo vehivavy ao aminy!

¹⁵ Tao Gilgala, hoy ihany ny Tompo, no niseho ny haratsiany isan-karazany. Tao no nanombohako nankahala azy. Horoahiko izy hiala amin'ny toeram-ponenako noho ny ratsy izay nataony. Tsy hanam-pitiavana azy intsony Aho; mpikomy avokoa ny filohany rehetra.

¹⁶ Voavely i Efraima: maina ny fakany ka tsy hamoa intsony izy. Na dia miteraka aza ny vehivavy ao aminy, dia hataoko maty ihany ny malala naloaky ny kibony.

¹⁷ Harian'ilay Andriamanitro izy satria tsy nihaino Azy, ka dia ho tonga mpirenireny any amin'ny hafa firenena any.

Toko faha-10

¹ Voaloboka misandrahaka sady namoa tsara i Israely. Arakaraka ny hamaron'ny voany no nanamaroany ny alitarany; arakaraka ny nandrosoan'ny taniny no nanaovany tsangambaton-tsampy tsara tarehy kokoa hatrany.

² Feno fitaka ny fony, ka hianjady amin'ireo olona ireo ny vesatry ny heloka vitany. Izy TOMPO mihitsy no hamotika ny alitaran'ireo sy handrava ny tsangambaton-tsampiny.

³ Ankehitriny hiteny ireo hoe: Tsy mana-mpanjaka izahay noho ny tsy nanajanay ny TOMPO. Sady soa inona ho anay moa no ho vitan'izay mpanjaka?

⁴ Miteniteny foana izy no mianian-tsy to sady manao fifanekena, ka ny rariny dia nitrebona toy ny zava-maniry misy poizina eny an-tsaha voaasa eny.

⁵ Ny mponin'i Samaria dia manaja ilay sarin'ombilahikely izay ao Bety-Avena, satria misaona azy ny vahoakany mbamin'ireo mihambo ho mpisorony. Ny voninahitr'ilay ombilahikely anie no aoka hiravoravoany, amin'izao izy lasa babo ho lavitra antsika izao!

⁶ Satria io ombilahikely io koa dia hoentina any Asiria ho fanomezana ho an'ilay Mpanjaka lehibe; hahafa-baraka an'i Efraima izany; eny, hangaihay i Israely noho ny sain-dratsiny.

⁷ Vita hatreo ny amin'i Samaria, fa ny mpanjakany dia toa sila-kazo mitsingevaheva eny ambonin'ny rano.

⁸ Ho rava ireo toeram-panasinana: izany no hadisoana sy fahotan'i Israely. Songosongo aman-tsilo no handadina ny alitarany. Amin'izay no hitenenana hoe: Ry tendrombohitra, sarony izahay! Ry havoana, mianjera aminay.

⁹ Hatramin'ny andron'ilay raharaha izay niseho tao Gibeha no efa nanota i Israely, ary tsy niova tamin'izany izy. Koa tsy rariny ve raha ao Gibeha ny ady no hahatratra ireo olon-dratsy ireo?

¹⁰ Sitrako ny hanafay azy, hoy Izaho TOMPO: ireo firenena no hifamory hamely azy ho valin'ny heloka roa nataony.

¹¹ I Efraima dia ombivavy kely efa voafolaka tsara ary tia mively vary. Raha nahita ny vozony tsara tarehy aho, dia nanisy zioga azy: ka i Joda hiasa tany ary i Israely handravona.

¹² Mamafaza fahamarinana, dia hijinja fitiavana ianareo. Miasa tany vaovao fa izao no fotoana hitadiavana ny TOMPO, mandra-piaviny handatsaka aminareo ny famonjena.

¹³ Faharatsiana kosa no nambolenareo ka nijinja heloka ianareo ary nihinana ny vokatry ny lainga. Ry Israely o, ny herinao no nitokianao ary koa ny habetsahan'ny miaramilanao.

¹⁴ Koa hitrangan-tabataban'ady ny vahoakanao, ary ho rava avokoa ny tananamimandanao, tahaka ny nandravan'i Salmana an'i Bety-Arbela tamin'ny andro niadiana izay nahatorotoro ireo reny mbamin'ireo zanany.