Jeremià

Toko faha-37

⁵ Ny tafiky ny Farao dia efa niainga avy tany Ejipta rahateo; koa raha nandre izany ny Babilonianina, izay teo am-panaovana fahirano an'i Jerosalema, dia nihataka kely niala an'i Jerosalema.

⁶ Ary nisy tenin'ny TOMPO ho an'i Jeremia mpaminany manao hoe:

⁷ Izao no lazain'ny TOMPO Andriamanitr'i Israely: Ny mpanjakan'i Joda izay naniraka anareo hanontany Ahy dia ilazao hoe: Ny tafiky ny Farao, izay efa niainga mba hamonjy anareo, dia niverina ilalana ka nody any Ejipta.

⁸ Ho avy indray kosa ny Babilonianina hanafika ity tanana ity ka hahazo azy sady handoro azy amin'ny afo.

⁹ Ary izao koa nolazaiko aminareo: Aza mamita-tena foana ka hihevitra fa lasa tanteraka ny Babilonianina, satria tsy nandeha velively ireo!

¹⁰ Ary na dia ho resinareo aza ny tafika babilonianina manontolo izay miady aminareo, ka tsy misy tavela afa-tsy olona maratra, dia mbola hitsangana tsirairay ao an-dainy ireny ka ho avy handoro ity tanana ity amin'ny afo. "

¹¹ Fa raha mbola nihataka an'i Jerosalema ny tafika babilonianina mba hidify ny tafiky ny Farao,

¹² dia nivoaka ny tanana i Jeremia hankany amin'ny faritanin'i Benjamina mba handray anjara amin'ny fizaran-tany ataon'ny fianakaviany.

¹³ Kanjo raha vao nandalo teo am-bavahadin'i Benjamina izy, dia nifanehatra tamin'ny lehiben'ny mpiambina atao hoe Jiria, zanakalahin'i Selemia sady zafikelin'i Hanania. Ary nosamborin'i Jiria i Jeremia mpaminany ka nataony hoe:-Miandany amin'ny Babilonianina ianao.

¹⁴ Fa novalian'i Jeremia hoe: -Lainga izany, tsy miandany amin'ny Babilonianina aho. Nefa tsy nino izany i Jiria fa nisambotra an'i Jeremia ary nitondra azy ho any amin'ny lehibeny.

¹⁵ Tezitra tamin'i Jeremia kosa ireto ka nikapoka azy sady nanagadra azy tao an-tranon'i Jonatana mpitantsora-panjakana.

¹⁶ Ary naiditra tao amin'ilay efitra miendrika an-doha lambo i Jeremia. Efa ela nitoerana tao amin'io tranomaizina io Jeremia

¹⁷ no nanirahan'i Tsedekia olona haka azy mba hanontaniany mangina tao an-dapany hoe: -Moa misy hafatry ny TOMPO tokoa va ho ahy? Ka novalian'i Jeremia hoe: -Eny, dia inty: "Hatolotra eo an-tanan'ny mpanjakan'i Babilona ianao."

¹⁸ Ary hoy koa i Jeremia tamin'i Tsedekia mpanjaka:-Inona no heloka nataoko taminao na tamin'ny manamboninahitrao na tamin'ny mponina eto amin'ity tanana ity no dia nataonareo an-tranomaizina aho?

¹⁹ Ary nankaiza ireo mpaminany izay naminany teo aminareo fa tsy ho tonga hanafika anareo na ity tanana ity ny mpanjakan'i Babilona?

²⁰ Dia nampian'i Jeremia hoe: -Ankehitriny, ry andriamanjaka, miangavy anao aho mba hihaino ny fangatahana ataoko eo anatrehanao: Aza averina any an-tranon'i Jonatana mpitantsora-panjakana intsony aho, fandrao maty ao.

²¹ Dia nanome baiko i Tsedekia mpanjaka mba hapetraka eo an-kianjan'ny trano fiambenana i Jeremia sady homena mofo boribory iray isan'andro avy ao amin'ny lalankelin'ny Mpanao mofo mandra-pahalanin'ny mofo rehetra ao an-tanana. Toy izany no nijanonan'i Jeremia tao an-kianjan'ny trano fiambenana.

Toko faha-38

¹ I Sefatia zanakalahin'i Matana sy i Gedalia zanakalahin'i Pasehora sy i Jokaly zanakalahin'i Selemia ary i Pasehora zanakalahin'i Malkia dia samy nandre ny teny nolazain'i Jeremia tamin'ny olona rehetra nanao hoe:

² Izao no lazain'ny TOMPO: Izay mijanona eto amin'ity tanana ity dia ho fatin'ny ady sy ny mosary ary ny areti-mandringana. Fa izay mivoaka ny tanana mba hitolo-batana amin'ny Babilonianina kosa dia ho velona hahavonjy ny ainy.

³ Ary hoy koa i Jeremia hoe: "Izao no lazain'ny TOMPO: Hatolotra eo an-tanan'ny tafiky ny mpanjakan'i Babilona tokoa ity tanana ity ka ho azony."

⁴ Rehefa nandre izany ireo manamboninahitra ireo, dia niteny tamin'i Tsedekia mpanjaka hoe:-Takinay ny hamonoana ho faty an'i Jeremia, satria manakivy tanteraka ny miaramila sy ny mponina sisa ao an-tanana izy.Tsy mba mitady izay hahatsara ny vahoaka io lehilahy io fa ny hanampy trotraka ihany.

⁵ Dia namaly azy ireo i Tsedekia hoe: -Ataovy izay tianareo hatao aminy, fa na izaho mpanjaka aza tsy afaka hisakana anareo amin'izany.

⁶ Dia nalain'ireo manamboninahitra efa-dahy ireo i Jeremia ka natsipiny tao amin'ny lavaka famorian-dranon'ny andriana Malkia ; fa teo an-kianjan'ny trano fiambenana io lavaka io. Tady mahazaka no nandatsahany an'i Jeremia tao. Nefa tsy nisy rano tao fa fotaka ihany, koa nilentika tamin'ny fotaka i Jeremia.

⁷ Ary ren'ilay Etiopianina atao hoe Hebeda-Meleka izay lehilahy nahatoky tao an-dapan'ny mpanjaka fa natsipy tao an-dava-drano i Jeremia. Ny mpanjaka kosa tamin'izay dia nipetraka teo am-bavahadin'i Benjamina;

⁸ koa niainga avy tao an-dapa i Hebeda-Meleka, ary niteny tamin'ny mpanjaka hoe:

⁹ -Ry andriamanjaka o, zava-dratsy avokoa izay rehetra nataon'ireo lehilahy ireo tamin'i Jeremia mpaminany fa natsipiny tao an-dava-drano izy ka ho faty mosary ao,satria tsy misy mofo intsony ato an-tanana.

¹⁰ Dia nanome baiko an'i Hebeda-Meleka etiopianina ny mpanjaka hoe: -Mitondra telopolo lahy avy eto hiaraka aminao, ka ampiakaro hiala tao an-dava-drano i Jeremia dieny mbola tsy maty.

¹¹ Dia naka telopolo lahy hiaraka aminy i Hebeda-Meleka, ka nankao an-dapan'ny mpanjaka tao amin'ny efitrano fitahirizan-javatra; ary naka fitafiana rovitra sy tonta tao izy, ka nampidininy ho eo amin'iJeremia tao an-dava-drano tamin'ny tady mahazaka.

¹² Ary hoy i Hebeda-Meleka etiopianina tamin'i Jeremia hoe: -Ataovy ao ambany helikao ireo vorodamba ireo ka apetraho eo ambaniny ny tady mahazaka.Rehefa nataon'i Jeremia izany,

¹³ dia nosintonin'ireo ny tady mahazaka ka nakariny avy tao an-davaka i Jeremia; ary nipetraka tao an-kianjan'ny trano fiambenana izy.

¹⁴ Ary naniraka olona haka an'i Jeremia i Tsedekia mpanjaka ka nandray azy manokana teo amin'ny fidirana fahatelo mankao an-tranon'ny TOMPO, sady nanao taminy hoe: -Hanontany zavatra aminao aho, ka aza misy afenina amiko.

¹⁵ Dia hoy i Jeremia tamin'i Tsedekia: -Raha milaza ny marina aminao aho, dia ho vonoinao ho faty. Ary raha manoro hevitra anao aho, dia tsy hohenoinao akory.

¹⁶ Fa nianiana mangingina tamin'i Jeremia ny mpanjaka, ka nanao hoe: -Velona ny TOMPO Izay nanome aina antsika,ka mianiana aminao aho fa tsy hamono anao ho faty, ary tsy hanolotra anao amin'ireo olona mifofo ny ainao.

¹⁷ Dia hoy i Jeremia tamin'i Tsedekia: -Izao no lazain'ny TOMPO Andriamanitr'izao rehetra izao sady Andriamanitr'iIsraely: "Raha mivoaka hitolo-batana amin'ny manamboninahitry ny mpanjakan'i Babilona ianao, dia ho velona ianao sy ny fianakavianao, ary tsy hodorana amin'ny afo ity tanana ity.

¹⁸ Fa raha tsy manaiky hitolo-batana amin'ireo manamboninahitry ny mpanjakan'i Babilona kosa ianao, dia hatolotra eo an-tanan'ny Babilonianina ity tanana ity ka hodorany amin'ny afo; ary ianao tsy ho afa-mandositra azy akory."

¹⁹ Hoy kosa i Tsedekia mpanjaka tamin'iJeremia: -Matahotra ireo Jiosy izay efa niandany tamin'ny Babilonianina aho, fandrao hatolony ho eo an-tanan'ireo ka hataony fihomehezana.

²⁰ Fa hoy i Jeremia taminy: -Tsia, tsy hisy hanolotra anao aminy fa ankatoavy ny tenin'ny TOMPO lazaiko aminao,dia ho tsara aminao ny toe-javatra ary ho velona ny ainao.

²¹ Fa raha tsy manaiky hitolo-batana ianao, dia izao no zavatra nasehon'ny TOMPO tamiko:

²² Ny vehivavy rehetra izay tafajanona ao an-dapan'ny mpanjaka dia hoentina eo amin'ny manamboninahitry ny mpanjakan'i Babilona, ka hanao izao hira izao ny aminao hoe: Nangolen'ireo sakaiza tianao ianao ka roboka! Fa nony tafalatsaka tao amin'ny honahona ny tongotrao,dia nilaozany nandositra ianao!

²³ Eny, ny vadinao rehetra mbamin'ireo zanakao lahy dia hoentina any amin'ny Babilonianina, ary ianao koa tsy ho afaka amin'ny tanany; hataon'ny mpanjakan'i Babilona sambo-belona ianao ary noho ny aminao no handoroana ity tanana ity amin'ny afo.

²⁴ Dia hoy i Tsedekia tamin'i Jeremia: -Raha tsy te ho faty ianao, dia aoka tsy hisy hahalala izao resaka nifanaovantsika izao.

²⁵ Ho ren'ireo manamboninahitra ambony fa niresaka taminao aho, koa ho avy izy hanontany anao ny amin'izay nifampiresahantsika. Hampanantena izy fa tsy hamono anao ho faty, raha tsy manafina na inona na inona aminy ianao.

²⁶ Nefa izao no havalinao azy: "Niangavy ny mpanjaka aho mba tsy haveriny any an-tranon'i Jonatana intsony fandrao ho faty any."

²⁷ Dia tonga tany amin'i Jeremia tokoa ireo manamboninahitra ambony ka nanontany azy, saingy novalian'i Jeremia araka izay teny rehetra efa nandidian'ny mpanjaka azy. Dia nangina ireo satria tsy nisy nandre ny resaka nifanaovany.

²⁸ Ary i Jeremia dia nijanona teo an-kianjan'ny trano fiambenana mandra-pahatongan'ny andro izay nahazoana an'i Jerosalema.

Toko faha-39

¹ Tamin'ny volana fahafolo , taona fahasivy nanjakan'i Tsedekia mpanjakan'i Joda, dia tonga i Nebokadnetsara mpanjakan'i Babilona sy ny tafiny manontolo ka nanao fahirano ny tananan'i Jerosalema.

² Nony andro fahasivin'ny volana fahefatra tamin'ny taona faha-11 nanjakan'i Tsedekia dia nisy voabanga ny mandan'ny tanana.

³ Nisesika niditra tao an-tanana ireo rehetra manamboninahitry ny mpanjakan'i Babilona ary naka toerana teo amin'ny vavahady afovoany, dia i Nergala-Saretsera lehiben'ny etamazaoro, i Samgara-Nebo, i Sarisekima lehiben'ireo tandapa, ary koa ireo sisa rehetra manamboninahitry mpanjakan'i Babilona.

⁴ Raha vao nahita izany i Tsedekia mpanjaka sy ireo rehetra miaramilany, dia nandositra. Tamin'ny alina no niala tao an-tanana izy, ka namakivaky ny zaridainan'ny mpanjaka, izay nandalo tamin'ny vavahady eo anelanelan'ny manda roa , ary nihazo ny lalana mankany amin'ny lohasahan'i Jordana.

⁵ Kanjo nanenjika azy ny tafika babilonianina ka nahatratra an'i Tsedekia tao amin'ny lemak'i Jerikao. Dia nisambotra ity mpanjaka izy ary nitondra azy tany amin'i Nebokadnetsara mpanjakan'i Babilona izay tao Ribla, tanin'i Hamata , tamin'izany fotoana izany. Tao no namoahan'i Nebokadnetsara didim-pitsarana hamelezana an'i Tsedekia.