Jeremià

Toko faha-2

⁹ Noho izany dia hifandahatra hiady aminareo Aho, ary hatrany amin'ny zafinareo no hiadiako; teny hentitra avy amiko TOMPO izany.

¹⁰ "Fa mba mandehana ange miampita any amin'ny nosy Kitima ka zahao, mba maniraha olona hanadihady any amin'ny Arabo ao Kedara , raha mahita toe-javatra tahaka izao any e!

¹¹ Moa ve nisy firenena efa nanova ny andriamaniny, nefa tsy andriamanitra akory ireny! Fa ny vahoakako kosa efa nanakalo ny voninahiny tamin'ireo andriamanitra tsy mahasoa akory.

¹² Koa aoka ho gaga ianareo any an-danitra ka samia raiki-tahotra sy mangorohoro; teny hentitra avy amiko TOMPO izany.

¹³ Faharatsiana roa sosona no nataon'ny vahoakako: fa sady nahafoy Ahy loharano velona izy no nihady lava-drano ho azy, kanjo lava-drano mitriatra ireny ka tsy nahatan-drano. """

¹⁴ "Mpanompo ve i Israely ankehitriny? Moa nateraka ho andevo ve izy? Tsia, koa nahoana izy no ho rembin'ny firenen-kafa?

¹⁵ Tahaka ny fieron'ny biby masiaka no fandrahonan'ireo azy; ka nahatonga ny taniny ho lao sy nandorana ny tananany ho tsy azo onenana.

¹⁶ Na dia ny mponina tao Memfisa sy tao Tahapanehesa aza mba nanety ny lohanao hangadihady , ry Israely.

¹⁷ Ny nahatonga izany taminao ve tsy noho ny nandaozanao ny TOMPO Andriamanitrao tamin'ny andro nitantanany anao teny an-dalana?

¹⁸ Ankehitriny, inona no soa ho anao amin'ny fankanesana any Ejipta? Hisotro ny ranon'i Neily ve? Ary inona no soa ho anao amin'ny fankanesana any Asiria? Hisotro ny ranon'i Eofrata ve?

¹⁹ Aoka ho voasazy ianao noho ny ratsy nataonao ary ho faizina noho ny fivadihanao! Ho fantatrao amin'izay fa mangidy sy ratsy ny nandaozanao Ahy TOMPO Andriamanitrao sy ny tsy anajanao Ahy intsony, hoy ny teny hentitry ny Tompo ANDRIANANAHARIN'izao rehetra izao."

²⁰ Hatramin'ny ela no efa nanapahanao ny zioganao ary namahanao ny fatoranao tamiko ka nilazanao hoe: Tsy hanompo intsony aho". Kinanjo teny amin'ny havoana rehetra sy teny am-pototry ny hazo maitso rehetra teny no nitsilailay toy ny vehivavy mpivaro-tena ianao.

²¹ Izaho anefa no namboly anao tahaka ny voaloboka tsara, dia rantsana tsara tokoa. Koa nahoana ary ianao no niova ho sampany ratsy sy tonga voaloboka hafa?

²² Na dia misasa ny tenanao toy ny fanasa lamba aza ianao ka hampiasa savony betsaka, dia tsy ho afaka ny fahadisoanao fa ho toy ny tseroka eo anatrehako, hoy ny teny hentitry ny Tompo ANDRIANANAHARY.

²³ Ahoana no ahasahianao nilaza hoe:"Tsy nandoto tena aho, tsy nanaraka ny fivavahana tamin'i Bahala?" Jereo ange izay nataonao tao an-tsaha e! Aoka hiaiky izay nataonao ianao, fa toy ny rameva vavy mihazakazaka etsy sy eroa.

²⁴ Toy ny borikivavidia zatra any an-taniefitra ianao: Miandry lahy izy ka manimbolo rivotra, sady maimay ery ka tsy misy mahasakana azy. Tsy sahirana akory ireo lahy rehetra mitady azy, fa mahita azy amin'ny volana mahamaimay azy!

²⁵ Atsaharo ny hazakazakao , ry Israely,fandrao haradratra ny tongotrao tsy mikapa ary koa ho maina ny tendanao. Nefa hoy ny navalinao hoe: "Tsy mampiraika ahy izany, fa tiako ny andriamani-kafa ka tsy maintsy miaraka aminy aho."

²⁶ Indray andro any anefa ianareo, ry mponin'i Israely na ianareo sarambabem-bahoaka, na ianareo mpanjaka sy mpitondra, na ianareo mpisorona sy mpaminany, dia samy ho menatra toy ny mpangalatra tra-tehaka.

²⁷ Fa ny tapa-kazo itenenanareo hoe: "Ianao no raiko"; ary ny sarivongam-bato ilazanareo hoe: "Ianao no niteraka ahy". Tokony hijery manatrika Ahy ianareo, kanefa ny lamosina no atodikareo amiko. Saingy nony tra-pahoriana ianareo, dia hiantso vonjy amiko hoe: "Midira an-tsehatra ianao hamonjy anay";

²⁸ fa hamaly anareo kosa Aho hoe: "Nankaiza ireo andriamanitrareo izay nataonareo ho anareo? Aoka izy hamonjy anareo raha afaka manao izany amin'ny androm-pahorianareo! Fa maro tahaka ny isan'ny tanananareo no isan'ny sampinareo, ry mponin'i Joda.

²⁹ Nahoana no mifandahatra amiko ianareo, hoy ny teny hentitry ny TOMPO, kanefa ianareo rehetra no nivadika tamiko?

³⁰ Nikapoka anareo toy ny zanako Aho, fa tsy nahoanareo akory izany; tsy zaka nanarina ianareo. Tahaka ny liona namiravira no namonoanareo ny mpaminany ho fatin'ny sabatrareo.

³¹ Aoka ho dinihinareo ny tenin'ny TOMPO, ry taranaka ankehitriny ! Moa ve efa nanjary mahatahotra toy ny taniefitra na toy ny tany ao anaty haizina Aho, ry Israely? Ry vahoakako, nahoana no ilazanareo hoe: "Efa afaka izahay ka tsy hiverina aminao intsony?"

³² Moa manadino ny firavany ve ny virijiny? sa manadino ny etrany voarandrana ve ny ampakarina? Tsia, nefa ianareo vahoakako efa nanadino Ahy hatramin'ny andro maro tsy voaisa."

³³ "Endrey izany tetikao hitady fitia, hany ka nihazatra nanao heloka ianao!

³⁴ Hatramin'ny fitafianao avy no nahitana ny ran'ny mahantra tsy manan-tsiny. Tsy nahatratra azy na napitsoka ny varavaranao akory ianao! Nefa na eo aza izany rehetra izany,

³⁵ dia mihambo ho tsy manan-tsiny ianao, ary tsy ara-drariny ny itezerako anao. Koa noho ianao milaza ho tsy manao ratsy, dia hanenjika anao amin'ny fitsarana Aho."

³⁶ "Ahoana no nanovanao faingana ny tetikao? Kanefa ho diso fanantenana amin' i Ejipta ianao tahaka ny nahazo anao tamin'i Asiria.

³⁷ Dia hialanao amin-kenatra koa i Ejipta ka hanaron-tava amin'ny tanana ianao; satria Izaho TOMPO tsy manaiky ny hitadiavanao io karazam-panampiana io, fa tsy hanambina anao izany."

Toko faha-3

¹ Hoy ny TOMPO tamiko: Raha misy lehilahy misaraka amin'ny vadiny ka mandao azy ravehivavy mba hanambady olon-kafa, moa mahazo mampody azy indray ve izy? Tsia, fa haloto ny tany. Kanefa ianao, ry Israely, dia efa lehilahy maro no nijangajanganao , hoy ny teny hentitry ny Tompo; ka moa hahazo miverina amiko indray ve ianao?

² Atopazo eny amin'ny havoana ny masonao: jereo raha misy toerana tsy nandrian'olona taminao. Tahaka ny Arabo mpirenireny any an-taniefitra miandry ny rembiny no nipetrahanao teo amoron-dalana niandry ny lehilahinao. Ny fijangajanganao sy ny faharatsianao no nandotoanao ny tany.

³ Koa nosakanako tsy ho avy aminao ny oram-be sady tsy nisy koa ny oran-dohataona. Nefa nikiry hijangajanga ihany ianao fa tsy nety niaiky ny fahadisoanao.

⁴ Ankehitriny anefa ianao dia sahy miantsoantso Ahy hoe: "Ry raiko sady sakaizako fahazaza,

⁵ mbola ho tezitra amiko ihany ve ianao ka hitahiry alahelo amiko hatrany? "Izany no teninao tamiko, nefa tsy nitsahatra nanao ratsy ianao, sady tena havanana tamin'izany.

⁶ Tamin'ny andron'i Josia mpanjaka dia hoy ny TOMPO tamiko: "Hitanao ve izay nataon'i Israely mpiodina? Nankeny amin'ny havoana rehetra sy teny am-pototry ny hazo maitso rehetra izy ka nanolo-tena hijangajanga.

⁷ Dia hoy Aho anakampo hoe: Rehefa afaka izany dia hiverina amiko izy. Kanjo tsy niverina izy; ary nahita izany i Joda mpivadika rahavaviny.

⁸ Hitany fa nomeko taratasy fisaoram-bady i Israely mpiodina, ary nisaorako noho izy nijangajanga. Kanefa tsy natahotra akory i Joda mpivadika fa mba lasa koa aza izy nijangajanga.

⁹ Nijangajanga tamin'ireo andriamanitra vato aman-kazo izy ary nandoto ny tany tamin'ny nataony.

¹⁰ Nefa na dia tao aza izany dia tsy mbola niverina tamiko tamin'ny fony fa tamin-tendro-molotra ihany i Joda mpivadika, rahavavin'i Israely. Izaho TOMPO no manao izany teny hentitra izany."

¹¹ Fa mbola niteny tamiko indray ny TOMPO hoe: "Toa marimarina ihany i Israely mpiodina raha miohatra amin'i Joda mpivadika.

¹² Koa mandehana ambarao any avaratra any izao hafatra izao hoe: "Miverena, ry Israely mpiodina, hoy ny teny hentitry ny TOMPO;fa tsy hanao tarehy ratsy aminao Aho, satria entanim-pitiavana, fa tsy mitahiry hatezerana maharitra.

¹³ Kanefa aoka hiaiky heloka ianao fa nikomy tamiko TOMPO Andriamanitrao: nivezivezy nanaraka ireo andriamani-kafa ianao teny am-pototry ny hazo maitso rehetra teny fa tsy nihaino ny feoko: teny hentitra avy amiko TOMPO izany."

¹⁴ "Miverena amiko, ry zaza mpiodina, hoy ny teny hentitry ny TOMPO, satria Izaho no TOMPOnareo. Hangalako iray isan-tanana na roa isan-tarika ianareo ka hoentiko any an-tendrombohitra Tsiona.

¹⁵ Ka any no hanomezako anareo mpitondra araka izay sitrako sy afaka hitondra anareo amim-pahalalana sy amim-pahendrena.

¹⁶ Amin'izany fotoana izany, hoy ihany ny teny hentitry ny TOMPO, dia hanjary ho maro sy hitombo be dia be ao amin'ity tany ity ianareo. Tsy ho resahina intsony ny Vatamasina mirakitra ny fanekem-pihavanako. Tsy ho ao an-tsain'ny olona intsony izany fa hohadinoiny, tsy hisy ho manina azy na hanao Vatamasina hafa."

¹⁷ Amin'izany fotoana izany i Jerosalema dia hantsoina hoe "Seza fiandrianan'ny TOMPO". Hivory ao ny firenena rehetra hanome voninahitra Ahy TOMPO sady tsy hanaraka intsony ny ditran'ny fony ratsy.

¹⁸ Hankany amin'izay nielezan'ny vahoakan'i Israely ny vahoakan'i Joda ka hiara-miverina avy any amin'ny tany avaratra izy roa tonta ary hankany amin'ny tany izay nomeko ny razany ho fananany. "

¹⁹ "Hoy Aho anakampo hoe: Ahoana raha ataoko loha laharana amin'ireo zanako lahy ianao ka homeko tany mahafinaritra izay fananana tsara indrindra eo amin'ny samy firenena? Amin'izay dia hiantso Ahy ho rainao ianao ka tsy hiodina amiko intsony.

²⁰ Kanjo toy ny vehivavy nisintaka tamim-badiny no nisintahanao tamiko, ry taranak'i Israely; teny hentitra avy amiko TOMPO izany.

²¹ Injany misy feo re any an-tampon-kavoana: tsy inona izany fa ireo Israelita izay mitomany sy mitaraina mafy satria diso lalana tamin'izay nalehany ka nanadino Ahy TOMPO Andriamaniny.