Jôba
Toko faha-40
18 Ny taolany dia mafy toa fantsom-barahina ary ny taolan-tehezany dia miendrika baravy.19 Anisan'ny sangan'asako izy, ka Izaho Andriamanitra nanao azy no nanome sabatra azy.
20 Mamoka-bilona ho an'ny lalomena ireo havoana izay filalaovan'ny bibidia rehetra.
21 Mandry anaty kirihitra feno tsilo izy ary miafina anaty zozoro eny an-keniheny.
22 Manalokaloka azy ny kirihitra ary manarona azy ny hazo malahelo eny amoron'ny ranon-driaka eny.
23 Fa na dia misafoaka aza ny onjan-drano dia tsy mba mihetsika akory ny lalomena; tsy mampiraika azy akory i Jordana na dia mitroatra hatreny am-bavany aza.
24 Fa iza moa no hahasambotra azy ka hanapotsitra ny masony? Iza moa no hahavoa fandrika azy ka hahaketoka ny orony?
25 Mahajono ny voay amin'ny fintana va ianao na mahafatotra ny lelany amin'ny tadim-pintana?
26 Mahatsofoka harefo amin'ny orony va ianao na mahagorobaka ny valanoranony amim-parango?
27 Hifon-jato hifona arivo aminao va izy na hanambitamby anao amin'ny teny mamy?
28 Hanao fifanekena aminao ve izy ka ho azonao andevozina mandra-pahafatiny?
29 Hilalao azy toy ny filalao voronkely ve ianao ka hamatotra azy ho fialambolin'ny zanakavavinao?
30 Hikambana hivarotra ny voay ve ny mpanjono ka hitsinjara azy amin'ny mpivarotra?
31 Mahaloadoaka ny hodiny amin'ny tsilo ve ianao na mahatrobaka ny lohany amin'ny firombaka?
32 Fa kasiho tanana ange izy dia ho tsaroanao ny ady taminy ary tsy hanindroa intsony ianao.
Toko faha-41
1 Nofinofy ny fanantenana handresy ny voay, fa ny fahitana azy fotsiny dia mahaketraka.2 Tsy misy olona sahy mihantsy ady aminy, koa zovy kosa no sahy hifanandrina amiko?
3 Fa tsy ananan'olon-trosa Aho: Ahy izay rehetra eny ambany masoandro.
4 Kanefa mbola ho lazalazaiko izao ny amin'ny rantsam-batan'ny voay sy ny antsipirian'ireo asa mahery vitany ary ny hatsaran'ny endrika ananany.
5 Iza no mahainga ny fitafiany ivelany, na handoaka ny akanjo vy matevina ifonosany?
6 Iza koa no sahy hanokatra ny vavany, fa ireo nifiny dia mampihorohoro izay olona eny manodidina?
7 Ny lamosiny dia voasaron'ampinga milahatra sady tafatambatra mafy sy mifanety.
8 Mifanakaiky dia mifanakaiky ireo ka tsisy hirika idiran-drivotra akory.
9 Mifanindry sy mifamikitra koa ireo ka tsy azo sarahina mihitsy.
10 Vao mievina ny voay, dia mamoaka hazavana; ka ny masony manjary manjopiaka toy ny masoandro vao miposaka.
11 Ny vavany kosa ivoahan'ny lelafo sy ipariahan'ny kilalaon'afo.
12 Mivoa-tsetroka ny vavoron'ny voay moa va tsy vilany mangotraka no tanehina tamin-jozoro.
13 Mampirehitra arina ny fofonainy, satria lelafo no avoaky ny vavany.
14 Ny vozony no itoeran-kery ka mihorohoro izay mahita azy.
15 Mivalombalona ireo hotraky ny voay, ka mafy sady mihenjana tsy voalefitra.
16 Mafy tahaka ny vato ny fony, eny, mafy toy ny vato fikosoham-bary.
17 Rehefa mitsangana ny voay, dia mangovitra ireo filoha fa tsy afa-manoatra noho ny tahotra.
18 Tsy misy sabatra mahalaitra azy, toy izany koa ny lefompohy na ny firombaka na ny zana-tsipika.
19 Toy ny mololo ny vy aminy ary toy ny hazo boboka ny varahina.
20 Tsy mampandositra azy izay zana-tsipika, ataony toy ny mololo ny vaton'antsamotady
21 Toy ny vodivary ny langilangy aminy; ihomehezany ny firimorimon'ny lefona.
22 Feno fantsika miranirany ny takiban'ny voay ka mikisaka moa va tsy hersa manditra fotaka.
23 Rehefa misitrika anaty rano lalina izy, dia mampandroadroatra izany toa rano mangotraka ao am-bilany ary manova ny farihy ho fandoroan-java-manitra.
24 Mamela dindo mazava eo aoriany izy ka ny onja dia tahaka ny volofotsy mitsinkafona eny amin'ny rano lalina.
25 Tsy misy tahaka ny voay eny ambonin'ny tany fa noariko tsy hanan-tahotra izy.
26 Bandrininy avokoa ny biby goavana; izy no mpanjakan'ny biby masiaka rehetra.
Toko faha-42
1 Namaly ny TOMPO i Joba ka nanao hoe:2 Fantatro fa mahay ny zava-drehetra Ianao, ary tsy misy maharara izay tianao hatao.
3 Hoy Ianao tamiko: "Zovy moa ianao no sahy manivaiva ny fikasako amin'ireo teny foana tsisy dikany ? "Eny, zava-tsy takatry ny saiko no voateniko dia zava-mahagaga loatra amiko sady tsy fantatro!
4 Henoy, hoy Ianao, fa mbola hiteny Aho; hanontany anao Aho ka ho valianao.
5 Tsy nahafantatra ny aminao aho afa-tsy izay henoko momba Anao ihany. Kanefa ankehitriny izao kosa dia ny masoko no nahita Anao.
6 Izany no anatsoahako izay voambarako, sy iekeko hadisoana ary ietreko tena eto amin'ny vovoka sy ny lavenona.
7 Rehefa voalazan'ny TOMPO tamin'i Joba ireo teny ireo, dia i Elifaza avy any Temana no nataotaony hoe: -Tezitra aminao sy ny namanao roa lahy Aho satria tsy mba marina tahaka izay nolazain'i Joba mpanompoko ny filazanareo Ahy.
8 Koa ankehitriny maka ombilahy fito sy ondrilahy fito ianareo, dia mankanesa any amin'ny Joba mpanompoko. Hatolotrareo ho sorona dorana manontolo noho ny fahotanareo ireo biby ireo; ary hifona ho anareo i Joba mpanompoko. Fa ho sitrako ny vavak'i Joba, ka tsy hamaly anareo araka ny hadalanareo Aho na dia tsy marina tahaka izay nolazain'i Joba mpanompoko aza ny filazanareo Ahy.
9 Dia nandeha i Elifaza avy any Temana sy i Bildada avy any Soha ary i Tsofara avy any Nahama ka nanao izay nasain'ny TOMPO hataony; ary sitraky ny TOMPO ny vavak'i Joba.