1 Tantara

Toko faha-27

¹³ Volana fahafolo: i Maharay, avy any Netofa, isan'ny taranak'i Zera.

¹⁴ Volana faha-11: i Benaia, avy any Pirehatona, isan'ny taranak'i Efraima.

¹⁵ Volana faha-12: i Helday, avy any Netofa, isan'ny taranak'i Hotniela.

¹⁶ Ireto avy no filohan'ny fokon'i Israely: Tamin'ny fokon'i Reobena, dia i Elihezera zanakalahin'i Zikry.Tamin'ny fokon'i Simehona, dia i Sefatia zanakalahin'i Maheka.

¹⁷ Tamin'ny fokon'i Levy, dia i Hasabia zanakalahin'i Kemoela. Tamin'ny taranak'i Aharona, dia i Tsadoka.

¹⁸ Tamin'ny fokon'i Joda, dia i Eliho izay isan'ny rahalahin'i Davida. Tamin'ny fokon'i Jisakara, dia i Homry zanakalahin'i Mikaela.

¹⁹ Tamin'ny fokon'i Zebolona, dia i Jismahia zanakalahin'i Hobadia. Tamin'ny fokon'i Naftaly, dia i Jerimota zanakalahin'i Hazriela.

²⁰ Tamin'ny fokon'i Efraima, dia i Hosea zanakalahin'i Hazazia.Tamin'ny antsasa-pokon'i Manase, dia i Joela zanakalahin'i Pedaia.

²¹ Tamin'ny antsasa-pokon'i Manase tao Gilehada, dia i Jidao zanakalahin'i Zakaria. Tamin'ny fokon'i Benjamina, dia i Jahasiela zanakalahin'i Abnera.

²² Tamin'ny fokon'i Dana, dia i Hazarela zanakalahin'i Jerohama. Ireo no filohan'ny fokon'i Israely.

²³ Tsy nanisa ny hatramin'ny roapolo taona no ho midina i Davida, satria ny TOMPO efa nilaza hampitombo ny Israelita ho tahaka ny kintana eny amin'ny habakabaka.

²⁴ Nanomboka fanisana i Joaba zanakalahin'i Tseroia fa tsy namarana, noho ny fahatezeran'Andriamanitra vokatr'izany tamin'i Israely; ka tsy voasoratra ao amin'ilay boky milohateny hoe Asan'i Davida mpanjaka ny isan'ny mponina.

²⁵ I Hazmavety, zanakalahin'i Hadiela, no mpiandraikitra ny zava-tsarobidin'ny mpanjaka. I Jonatana, zanakalahin'i Hozia, no mpiandraikitra ny trano fitahirizam-bokatra, na tany ambanivohitra na tamin'ny tanan-dehibe na tamin'ny tanana kely na tamin'ny tilikambo fiambenana.

²⁶ I Hezry, zanakalahin'i Keloba, no mpiandraikitra ny tantsaha mpiasa tany.

²⁷ I Simehy, avy any Rama, no mpiandraikitra ny tanimboaloboka. I Zabdy, avy any Sefama, no mpiandraikitra ny tahirin-divay any amin'ny tanimboaloboka.

²⁸ I Bahala-Hanana, avy any Bety-Gedera, no mpiandraikitra ny voly oliva sy aviavy any amin'ny lemak'i Sefela. I Johasa no mpiandraikitra ny tahirin-diloilo.

²⁹ I Sitray, avy any Sarona, no mpiandraikitra ny omby nandrasana tany Sarona. I Safata, zanakalahin'i Hadlay, no mpiandraikitra ny omby nandrasana tan-dohasaha.

³⁰ I Obila, izay Jismahelita, no mpiandraikitra ny rameva. I Jehedeia, avy any Meronota, no mpiandraikitra ny borikivavy.

³¹ I Jaziza, izay Hagrita, no mpiandraikitra ny ondry aman'osy. Ireo rehetra ireo no mpiandraikitra ny fananan'i Davida mpanjaka.

³² I Jonatana, rahalahin-drain'i Davida sady lehilahy hendry sy be fahalalana, dia mpanolotsain'ny mpanjaka; ary i Jehiela, zanakalahin'i Hakmony, no teo amin'ny zanaky ny mpanjaka.

³³ I Ahitofela koa dia mpanolotsain'ny mpanjaka; ary i Hosay, izay Arkita, no sakaizan'ny mpanjaka.

³⁴ Ny nandimby an'i Ahitofela dia ry Joiada zanakalahin'i Benaia sy ry Abiatara. Ary ny komandin'ny tafiky ny mpanjaka dia i Joaba.

Toko faha-28

¹ Novorin'i Davida tany Jerosalema ny lehibe rehetra tamin'ny Israely: filohan'ireo foko, lehiben'ny andian-tafika manompo ny mpanjaka, komandin-tafika mpifehy arivo na mpifehy zato, mpiandraikitra ny fananana sy biby fiompy rehetra an'ny mpanjaka sy an-janany, tandapa, lehilahy mahery, izany hoe ny manampahefana rehetra.

² Dia nitsangana i Davida mpanjaka, ka nanao hoe: -Henoy aho, ry havako sy mpiray firenena amiko! Raha izaho, dia efa fikasako ny hanorina tempoly hipetrahan'ilay Vatamasina mirakitra ny fanekem-pihavanan'ny TOMPO, izany hoe ilay fitoeran-tongotry ny Andriamanitsika; ary efa novononiko izay ho enti-manorina azy.

³ Fa hoy Andriamanitra tamiko: "Tsy hanorina tempoly hanajana Ahy ianao, satria lehilahy mpiady sy mpandatsa-dra".

⁴ Nefa kosa ny TOMPO, Andriamanitr'i Israely, efa nifidy ahy teo anivon'ny ankohonan-draiko rehetra mba ho mpanjaka hifehy an'i Israely hatrany. Satria i Joda no voafidiny ho mpanapaka; teo anivon'ny fokon'i Joda, dia ny ankohonan-draiko no voafidiny; ary teo anivon'ny ankohonan-draiko, dia ny tenako no nankasitrahiny hampanjakaina amin'i Israely manontolo.

⁵ Tamin'ny zanakalahiko rehetra kosa (fa nomen'ny TOMPO zanakalahy maro aho), dia i Salomona zanako no nofidiny hipetraka eo amin'ilay sezafiandrianana manambara ny fanjakan'ny TOMPO amin'i Israely.

⁶ Ary hoy Izy tamiko: "I Salomona zanakao no hanorina ny tranoko sy hamboatra ireo kianjako; fa efa nifidy azy Aho, ka izy ho zanako ary Izaho ho rainy.

⁷ Hataoko mijoro mandrakizay ny fanjakany, raha maharitra manatanteraka ny didiko sy ny fitsipiko izy tahaka ny amin'izao anio izao."

⁸ Koa ankehitriny, ry havako, eto imason'ny vahoaka Israely rehetra izay fiangonan'ny TOMPO ary eto anatrehan'ilay Andriamanitsika Izay mandre antsika, dia tandremo sy diniho ny didy rehetra avy amin'ny TOMPO Andriamanitrareo mba hahatananareo ity tany ity sady hamindranareo azy amin'ny zanaka amam-paranareo ho lova maharitra mandrakizay.

⁹ "Ianao kosa, ry Salomona zanako, fantaro ilay Andriamanitra notompoin'ny rainao, ka manompoa Azy amin'ny fo manontolo sy amin'ny fanahy mazoto; fa ny TOMPO dia mpandinika ny fon'ny olona rehetra ary mpahafantatra ny fieritreretana rehetra. Raha mitady Azy ianao, dia hahita Azy; faraha mandao Azy kosa ianao, dia hariany mandrakizay.

¹⁰ Indro efa nofidin'ny TOMPO ianao izao mba hanorina tempoly hoToeramasiny; dia mahereza ka mahefa. "

¹¹ Dia nomen'i Davida an'i Salomona zanany ny sarin'ny Toeramasina sy ny trano fanampiny -efitrano firaketana, efitrano ambony, efitrano anatiny -ary ny trano hisy ilay Vatamasina mirakitra ny fanekem-pihavanan'ny TOMPO.

¹² Nomeny azy koa ny sarin'izay rehetra efa nokasainy hatao momba ireo kianja ao an-tranon'ny TOMPO mbamin'ny efitrano rehetra manodidina ireo kianja: efitrano fitahirizana ny zava-tsarobidin'ny tranon'Andriamanitra sy fitahirizana ny zava-tsarobidy natokana ho an'ny TOMPO.

¹³ Nomeny azy ny amin'ny fitsinjarana ireo mpisorona sy levita ho antokony, ny amin'ny fanompoana rehetra ho fanao ao an-tranon'ny TOMPO ary ny amin'ny fanaka rehetra ho fampiasa ao.

¹⁴ Nomeny azy ny lanjam-bolamena ilaina ho an'ny fanaka volamena rehetra samy hampiasaina, ny lanjam-bolafotsy ilaina ho an'ny fanaka volafotsy rehetra samy hampiasaina,

¹⁵ ny lanjan'ny fitoeran-jiro sy fanaovan-jiro volamena araka ny karazany avy, ny lanjan'ny fitoeran-jiro sy fanaovan-jiro volafotsy araka ny karazany avy,

¹⁶ ny lanjan'ny volamena ilaina isaky ny latabatra volamena fametrahana ny mofo atolotra an'Andriamanitra, ny lanjan'ny volafotsy ilaina ho an'ny latabatra volafotsy,

¹⁷ ny lanjan'ireo fitrebika sy tsatokaty ary tavoara samy volamena madio, ny lanjan'ny siny volamena sy volafotsy araka ny karazany avy,

¹⁸ ary ny lanjan'ny volamena voadio hanaovana ny alitara fandoroana vovo-javamanitra. Farany, nomen'i Davida an'i Salomona ny sarin'ilay kalesy misy ireo kerobima volamena izay samy manana elatra mivelatra manarona ny Vatamasina mirakitra ny fanekem-pihavanan'ny TOMPO.

¹⁹ Dia hoy i Davida hoe: -Izany rehetra izany, anaka, dia ao anatina rakitsoratra avy tamin'ny TOMPO, rakitsoratra izay nampahafantatra ahy ny asa rehetra asehon'ny sary.

²⁰ Ary hoy koa i Davida tamin'i Salomona zanany: -Mahereza sy matanjaha ka mahefa! Aza matahotra na mivadi-po fa ny TOMPO Andriamanitra, ilay Andriamanitro, no miaraka aminao. Tsy handao na hahafoy anao Izy mandra-pahavita ny asa rehetra fanatontosana ny tranon'ny TOMPO.

²¹ Indreo ny antoko-mpisorona sy levita, hanao ny fanompoana rehetra ao an-tempolin'Andriamanitra; mba hahavitana ny asa manontolo, dia miaraka aminao koa ireo olona feno risimpo sady kinga amin'ny taozavatra isan-karazany; ary ny lehibe mbamin'ny vahoaka rehetra dia hankato ny baikonao an-tsakany sy an-davany.

Toko faha-29

¹ Dia hoy i Davida mpanjaka tamin'ny olona rehetra tafangona teo: -I Salomona zanako, ilay hany nofidin'Andriamanitra, dia mbola tanora sady tsy za-draharaha; nefa goavana ny asa hatao, satria tsy lapa ho an'olombelona fa tempoly ho an'ny TOMPO Andriamanitra.

² Nanao izay tratry ny aiko aho namonona fitaovana ho an'ny tranon'Andriamanitro: dia ny volamena hanaovana ny fanaka volamena; ny volafotsy hanaovana ny fanaka volafotsy; ny halimo hanaovana ny fanaka halimo; ny vy hanaovana ny fanaka vy; ary hazo hanaovana fanaka hazo. Nataoko vonona ny vato berila sy vato halatsaka an-tranontranony, ny vato mainty sy vato misoratsoratra, ny vatosoa isan-karazany ary ny vato karanana betsaka.

³ Ankamamiko tokoa ny tranon'Andriamanitro; ka ho fanampin'ny zavatra rehetra nomaniko ho an'ity Toeramasina ity, dia omeko ho an'ny tranon'Andriamanitro koa izay volamena sy volafotsy ananako manokana:

⁴ dia volamena avy any Ofira , milanja zato taonina; volafotsy madio milanja 240 taonina, natao hapetaka amin'ny ati-rindrina isan'efitrano.

⁵ Iza ary, amin'izao andro anio izao, no mba mazoto hanolotra fanomezana an-tsitrapo amin'ny TOMPO mba hanaovan'ireo mpahay taozavatra ny fanaka volamena sy volafotsy ary ny asaisan-karazany?

⁶ Tamin'izay, dia samy nanolotra fanomezana an-tsitrapo avokoa ny lohan-pianakaviana, ny filohan'ireo fokon'i Israely, ny komandin-tafika mpifehy arivo sy mpifehy zato, mbamin'ny mpiandraiki-draharahan'ny mpanjaka

⁷ ka nanome izay hanaovana ny fanompoana ao amin'ny tranon'Andriamanitra: dia volamena milanja 170 taonina; farantsa volamena miisa 10000; volafotsy milanja telonjato taonina; halimo milanja eninjato taonina eo ho eo ary vy milanja telo arivo taonina.