1 Samoela

Toko faha-21

12 Hoy ny minisitr'i Akisa taminy: Tsy i Davida, mpanjakan'ny tanin'i Israely ve ity? Moa tsy izy ve ilay nohiraina sy nandihizan'ny olona hoe: I Saoly nahafaty an'arivoarivo, fa i Davida kosa nahafaty an'alinalina.

13 Nieritreritra izany teny izany tao am-pony i Davida ka natahotra mafy an'i Akisa mpanjakan'i Gata.

14 Dia nisary adala teo anatrehan'ny Filistinina i Davida ka nody nanao very saina tamin'izy ireo, fa nanao sarisary teo amin'ny lelam-baravarana ary nandraraka ivy teo amin'ny volom-bavany.

15 Dia hoy i Akisa tamin'ireo minisitra: Hitanareo tsara fa olona adala io! Ka nahoana no mbola entinareo aty amiko?

16 Mitady olona adala angaha aho no nitondranareo azy io hanondrana eto amiko! Tsia, tsy mba hidiran'io ny tranoko.

Toko faha-22

1 Niala avy teo i Davida, dia nandositra niery tao an-johin'i Hadolama. Raha nahafantatra izany ny rahalahiny sy ny fianakavian-drainy rehetra, dia nirohotra nankany aminy avokoa.

2 Nitangorona teo aminy ny olona tokony ho efajato lahy, dia ireo olona sahirana sy ireo bokan-trosa ary ireo tsy faly; izy no tonga filohany.

3 Avy teo Hadolama i Davida, dia nankany Mitsepa any Moaba, ka hoy izy tamin'ny mpanjakan'i Moaba: Avelao re, tompoko, ny ray aman-dreniko mba ho avy hipetraka eto aminao mandra-pahafantarako izay tian'Andriamanitra hatao amiko.

4 Dia nentin'i Davida teo anatrehan'ny mpanjakan'i Moaba izy ireo ka nipetraka tao aminy nandritra ny fotoana rehetra nialokalofan'i Davida tao amin'ny fiereny.

5 Indray andro dia hoy i Gada mpaminany tamin'i Davida: Aza mijanona ao amin'ny fierenao fa mandehana miverina any amin'ny tanin'i Joda. Dia lasa i Davida ka nankany amin'ny alan'i Hereta.

6 Fantatr'i Saoly fa nisy nahita i Davida sy ireo niaraka taminy. Tany Gibeha i Saoly tamin'izay nipetraka teo ambanin'ny hazo tamariska tambony havoana, sady nitana lefona. Nijoro teo anilany ny mpanompony rehetra; ka hoy i Saoly tamin'izy ireo:

7 Henoy tsara, ry taranak'i Benjamina! Moa ny zanakalahin'i Jisay ve hanome anareo rehetra saha sy tanim-boaloboka, ary hanendry anareo rehetra ho mpifehy ny antokon-tafiny? Tsia!

8 Koa nahoana no mioko hikomy amiko ianareo rehetra? Ka tsy mba nisy nilaza tamiko fa ny zanako dia nanao dinam-pisakaizana tamin'ny zanakalahin'i Jisay. Tsy mba nisy taminareo nanahy kely akory ny amiko, raha nitaona ny mpanompoko hamela-pandrika ahy ny zanako, dia tahaka izay mitranga anio izao.

9 Dia hoy i Doega, ilay Edomita izay nijoro teo akaikin'ireo mpanompon'i Saoly, hoe: Izaho nahita ny zanakalahin'i Jisay tonga tany Noba tao amin'i Ahimeleka zanakalahin'i Ahitoba.

10 Ary i Ahimeleka nanontany ny TOMPO ho azy, sady namatsy azy no nanome azy ilay sabatr'i Goliata Filistinina.

11 Koa nampiantsoan'ny mpanjaka i Ahimeleka mpisorona sady zanakalahin'i Ahitoba, mbamin'ny mpisorona rehetra tao amin'ny fianakaviany izay nipetraka tao Noba; ary tonga niseho teo anatrehan'ny mpanjaka avokoa izy rehetra.

12 Dia hoy i Saoly tamin'i Ahimeleka: Henoy ary, ry zanakalahin'i Ahitoba. Ka novaliany hoe: Inty aho, tompoko.

13 Dia hoy i Saoly taminy: Nahoana no nioko hanohitra ahy ianao sy ny zanakalahin'i Jisay. Nomenao mofo sy sabatra izy; ary nanontany ny Tompo ho azy koa ianao, mba hijoroany hanohitra sy hamandrika ahy tahaka izao anio izao.

14 Hoy kosa no navalin'i Ahimeleka azy: Iza amin'ny mpanomponao rehetra ireo no mba mahatoky indrindra tahaka an'i Davida vinanton'ny mpanjaka, mpiambina ny tenanao ary nohajaina fatratra tao an-dapa?

15 Ary moa sambany androany no nanontaniako ho azy tamin'Andriamanitra? Koa sanatriaviko ny hikomy aminao, ry mpanjaka! Aza ahiahinao aho mpanomponao na ny fianakaviako rehetra izany aho.

16 Fa hoy ny mpanjaka hoe: Ry Ahimeleka, tsy maintsy matiko ianao sy ny fianakavian-drainao manontolo.

17 Avy eo dia hoy ny mpanjaka tamin'ny mpisoron'ny TOMPO, fa niray tsikombakomba tamin'i Davida izy ireo, satria nahafantatra ny fandosiran'i Davida izy, kanefa tsy nampandre ahy. Fa ny mpanompon'ny mpanjaka kosa tsy sahy nikasi-tanana ny mpisoron'ny TOMPO.

18 Koa hoy ny mpanjaka tamin'i Doega: Mandehana vonoy ho faty ireo mpisorona ireo. Dia lasa tokoa i Doega ilay Edomita ka izy mihitsy no namono nahafaty ny mpisorona. Lehilahy 85 mpisalotra ny akanjo masina no matiny androtrio ihany.

19 Ary i Noba tananan'ny mpisorona koa nasiany tamin'ny lelan-tsabatra, ka ringana avokoa na ny lehilahy na ny vehivavy, na ny ankizy na ny zaza minono, na ny omby na ny boriky na ny ondry.

20 Izany Abiatara zanakalahin'i Ahimeleka sy zafikelin'i Ahitoba izany ihany no hany afa-nandositra, ka namonjy nankany amin'i Davida.

21 Nambaran'i Abiatara an'i Davida ny nandringanan'i Saoly ireo mpisoron'ny TOMPO.

22 Ka hoy i Davida tamin'i Abiatara: Tamin'iny andro iny, dia hitako tsara fa tao Noba koa i Doega ilay Edomita, ka fantatro fa hitantara ny zava-drehetra tamin'i Saoly izy. Koa ny tenako no tompon'andraikitra tamin'ny fahafatesan'ny fianakavian-drainao manontolo.

23 Mitoera eto amiko ary aza matahotra; fa izay mitady ny ainao dia mitady ny aiko koa. Ho tsara antoka ianao eto.

Toko faha-23

1 Indray andro dia nisy nampandre an'i Davida fa notafihin'ny Filistinina ny tananan'i Kehila ka norobainy izay teo am-pamoloana sy tany an-tsompitra.

2 Ary i Davida nanontany tamin'ny TOMPO hoe: Handeha hiady amin'ireo Filistinina ireo ve aho? Ka hoy ny navalin'ny TOMPO azy; Mandehana miady aminy ka vonjeo Kehila.

3 Dia hoy ny olon'i Davida taminy: Indreto aty Joda aza isika matahotra, koa mainka rehefa mankany Kehila hiady amin'ny tafika filistinina? 4 Ary i Davida nanontany indray ny Tompo, ka novaliany hoe: Mandehana mankany Kehila, fa hatolotro ho eo an-tananao ny Filistinina.

5 Lasa nankany Kehila i Davida sy ny olony ary notafihiny ny Filistinina. Nentiny an-kery ny biby fiompiny, ka faharesena tsy nisy toy izany no nahazo azy ireo. Izany no nanafahan'i Davida ny mponin'i Kehila.

6 Raha nialokaloka eo amin'i Davida tany Kehila i Abiatara zanakalahin'i Ahimeleka, dia nitondra ny efoda niaraka taminy.

7 Vao fantatr'i Saoly fa tafiditra tao Kehila i Davida, dia hoy izy hoe: Efa natolotr'Andriamanitra eto an-tanako izy, fa namandri-tena niditra an-tanana mihidy vavahady.

8 Nohetsehin'i Saoly ny tafika manontolo hidina any Kehila mba hanao fahirano an'i Davida sy ny olony.

9 Fantatr'i Davida fa nisaina hanao ratsy azy i Saoly; koa nasainy nentin'i Abiatara mpisorona ny efoda hanontaniana ny Tompo.

10 Dia hoy i Davida taminy: Ry TOMPO Andriamanitr'i Israely o, ren'ny mpanomponao fa miomana hankaty Kehila i Saoly handrava ny tanana noho ny amiko.

11 Moa hanolotra ahy eo an-tanany ve ny manampahefana eto Kehila? Ary ho avy amiko araka ny reko tokoa ve i Saoly? Mba valio re, ry TOMPO Andriamanitr'i Israely o! Ka hoy ny navalin'ny TOMPO azy: Eny, ho avy tokoa izy.

12 Dia nanontany indray i Davida hoe: Hanolotra ahy sy ny oloko eo an-tanan'i Saoly ve ireo manampahefana eto Kehila? Ary novalian'ny TOMPO hoe: Eny, hanolotra anareo izy.

13 Dia niainga nandao an'i Kehila i Davida sy ny olony miisa ho eninjato lahy, ary nandeha tamin'ny lalana anjoanjo. Rehefa ren'i Saoly fa nandositra niala tao Kehila i Davida, dia najanony ny dia.

14 Nijanona tany an-taniefitra tao amin'ny toerana be harambato i Davida, ary nonina tany amin'ny havoan'ny taniefitr'i Zifa. Nitady azy isan'andro i Saoly, kanefa tsy navelan'Andriamanitra hatolotra eo an-tanany i Davida.

15 Hitan'i Davida fa niainga hiantafika mba hifofo ny ainy i Saoly, ka dia nijanona tao Horesa tany an-taniefitr'i Zifa izy.

16 Ary i Jonatana zanakalahin'i Saoly nankany amin'i Davida any Horesa ka nankahery azy tamin'ny anaran'Andriamanitra.

17 Hoy izy tamin'i Davida: Aza matahotra fa tsy hahazo anao akory ny tanan'i Saoly raiko. Ianao no ho mpanjakan'i Israely fa izaho kosa ho lefitrao; ary na i Saoly raiko aza dia mahalala tsara izany!

18 Ary nanao dinam-pisakaizana teo anatrehan'ny TOMPO izy roa lahy. Dia nijanona tany Horesa ihany i Davida fa i Jonatana kosa niverina nody.

19 Nankany amin'i Saoly tany Gibeha ny mponin'i Zifa ka nanao taminy hoe: Moa tsy fantatrao fa i Davida anie ka miafina any aminay ao amin'ny toerana be harambato any Horesa, any amin'ny havoanan'i Hakila eo atsimon'ny faritra be lobolobo?

20 Koa raha te hanampoka azy ianao, ry mpanjaka, dia midina any, fa anjaranay ny manolotra azy eo an-tananao.

21 Dia hoy i Saoly hoe: Hitahy anareo anie ny TOMPO noho izao fiahianareo ahy izao!

22 Koa mandehana indray ianareo, dia alaivo antoka sy fantaro tsara izay toerana marina misy azy sy izay nahita azy tany, fa tena fetsy lahy hono izy izany.

23 Ataovy fantatra avokoa izay toerana rehetra mety iafenany, dia miverena aty amiko rehefa tena azonareo antoka, fa hiaraka aminareo aho. Raha mbola eto amin'ny faritany koa iny, dia hosavako avokoa ny isam-pianakaviamben'i Joda mba hahitako azy.

© Eugene Heriniaina - serasera.org 1999 - 2025 - page load 0.9519