1 Samoela

Toko faha-14

²² Fa ny Israelita rehetra kosa izay niery tany an-tendrombohitr'i Efraima, raha nahare fa nandositra ny Filistinina, dia mba nanenjika azy ireo koa ka niady taminy.

²³ Toy izany no nanomezan'ny TOMPO fandresena ho an'i Israely tamin'izay andro izay. Nitatra ankoatran'i Bety-Avena ny ady.

²⁴ Reraka mafy ny Israelita tamin'io andro io, satria efa norahonan'i Saoly tamin'ny fampitandremana hoe: Ho voaozona anie izay manendry hanina alohan'ny hariva mandra-pahato ny valifatiko amin'ny fahavalo! Dia tsy nisy sahy nanendry hanina ny olon-drehetra.

²⁵ Tonga tao amin'ny ala iray feno tantely nihanaka hatreny amin'ny tany ny besinimaro.

²⁶ Rehefa tafiditra ny ala izy ireo, dia indro hitany ny tantely izay efa mitsororoka fotsiny; saingy tsy nisy sahy nikasika nihinana na iray aza fa natahotra ny ozona.

²⁷ Nefa i Jonatana tsy mba nahafantatra ny fianianana nampanaovin-drainy ny besinimaro; koa avy hatrany dia nanatsoboka ny lohatehina teny an-tanany tamin'ny tantely izy ary nanao izany am-bava. Dia tonga nazava tery ny fijeriny.

²⁸ Fa hoy ny miaramila iray taminy: Ny rainao anie efa nampianiana mafy ny vahoaka omban'ny fampitandremana hoe: Ho voaozona anie izay manendry hanina anio! Izany no nampahareraka ny vahoaka.

²⁹ Dia hoy i Jonatana hoe: Efa nampidi-doza ny firenena ny raiko! Koa jereo fa toa nihanahazo hery aho hatramin'ny nihinanako kely tamin'ny tantely teo.

³⁰ Tsy ho latsak'izany koa androany raha mba navela nihinana ny remby azony tamin'ny fahavalony ny miaramila, dia ho nihoa-pampana ny fahavoazan'ny Filistinina.

³¹ Tamin'io andro io dia resin'ny Israelita ny Filistinina ka nenjehiny nanomboka tao Mikmasy ka hatrany Aialona. Torovana loatra ny vahoaka,

³² koa avy dia niantoraka tamin'ireo remby izy; nalainy avokoa na ondry na omby na zanak'omby, dia novonoiny ary nohaniny teo amin'ny toerana nandatsahany ny rany ihany.

³³ Dia nisy nitatitra tamin'i Saoly fa manota amin'ny TOMPO ny olona satria mihinan-kena eo amin'ny nandatsahany ra azy. Ary hoy i Saoly hoe: Mpamadika ianareo! Izao ankehitriny izao dia manakodiava vato lehibe mankaty amiko.

³⁴ Avy eo dia miparitaha any amin'ny vahoaka ka asaivo mankaty amiko tsirairay izy miaraka amin'ny ombiny aman'ondriny avy. Hovonoiny eto izany ka hohaniny, mba tsy hanotany amin'ny TOMPO amin'ny fihinanana izany eo amin'ny toerana andatsahan-dra azy. Tamin'iny hariva iny dia samy nitondra ny bibiny avy ny olona ka namono azy tamin'io toerana io.

³⁵ Toy izany no nanorenan'i Saoly alitara ho an'ny TOMPO. Io no alitara voalohany izay naoriny ho AZY.

³⁶ Avy eo dia hoy i Saoly hoe: Andeha hanaovantsika latsaka alina ny Filistinina ka horobaintsika mandra-paharain'ny andro, ary dia tsy havelantsika hisy miangana na iray aza. Ka hoy ny navalin'ny miaramila azy: Ataovy izay mahadiavolana ny fonao. Fa hoy kosa ny mpisorona hoe: Andeha isika aloha haka hevitra amin'Andriamanitra.

³⁷ Dia nanontany an'Andriamanitra i Saoly hoe: Hidina hamely ny Filistinina ve aho? Hatolotrao horesen'i Israely ve izy? Nefa tsy namaly azy Andriamanitra tamin'izay andro izay.

³⁸ Dia hoy i Saoly tamin'ny filohan'ny vahoaka: Avia aty ianareo rehetra ka fantaro tsara izay fahotana natao androany.

³⁹ Velona ny TOMPO mpamonjy an'i Israely ka mianiana aminy aho, fa tsy maintsy hatao maty izay nanao izany, na dia i Jonatana zanako aza. Tsy nisy namaly azy ny vahoaka na iray aza.

⁴⁰ Fa hoy indray i Saoly tamin'ny Israelita rehetra teo: Mitsangana ianareo ety ankilany, fa izaho sy i Jonatana zanako kosa etsy andaniny. Dia hoy ny miaramila taminy: Ataovy izay sitraky ny fonao.

⁴¹ Ka hoy i Saoly hoe: Ry TOMPO Andriamanitr'i Israely o, nahoana no tsy novalianao aho anikeheo? Ry TOMPO Andriamanitr'i Israely o, valio amin'ny antsapaka masina aho. Raha avy tamin'i Jonatana na tamiko ny fahadisoana, dia valio amin'ny Orima; fa raha avy amin'ny miaramila kosa, dia valio amin'ny Tomima. I Jonatana sy i Saoly no voatendrin'ny antsapaka, fa ny vahoaka kosa afaka madiodio. 42 Ka hoy i Saoly hoe: Aoka hatao antsapaka izaho sy i Jonatana zanako. Koa dia i Jonatana no azo.

⁴³ Ary hoy i Saoly taminy: Tantarao amiko izay nataonao. Dia notantarain'i Jonatana azy izany ka hoy izy: Nihinana tantely kely tamin'ny lohatehina teny amiko aho. Koa inty aho fa vonon-ko faty.

⁴⁴ Ary hoy i Saoly hoe: Enga anie hosazin'Andriamanitra mafy tokoa aho, raha toa ka tsy hatao maty ianao, ry Jonatana!

⁴⁵ Fa hoy ny miaramila tamin'i Saoly: Ho faty hoe i Jonatana? Dia ilay nahatonga izao fandresena lehibe azon'i Israely izao! Sanatria azy izany! Fa velona ny TOMPO ka mianiana izahay fa tsy hisy singambolony na iray aza avelanay hilatsaka amin'ny tany, satria Andriamanitra mihitsy no nanampy azy tamin'izay nataony androany! Izany no nanafahan'ny miaramila an'i Jonatana, ka dia tsy maty izy.

⁴⁶ Ary natsahatr'i Saoly ny fanenjehana ny Filistinina, koa afaka nody tany amin'ny taniny izy ireny.

⁴⁷ Rehefa tonga mpanjakan'i Israely i Saoly, dia niady tamin'ireo fahavalony rehetra izay nanodidina azy, izany hoe ny Moabita, ny Hamonita, ny Edomita, ny fanjakan'i Tsoba ary ny Filistinina. Fandresena hatrany no azony tamin'izay rehetra niadiany.

⁴⁸ Niady tamin-kerim-po fatratra ka nandresy ny Hamalekita koa izy, ary dia nahafaka an'i Israely tamin'izay nandroba azy

⁴⁹ Nanan-janaka lahy i Saoly, dia i Jonatana sy i Jisvy ary i Melkisa; ny anaran-janany vavy roa kosa dia ireto: i Meraba ny zokiny, ary i Mikala ny zandriny.

⁵⁰ Ny anaram-badin'i Saoly kosa dia i Ahinohama, zanakavavin'i Ahimahatsa. Ny jeneralin'ny tafiny dia Abinera, zanakalahin'i Nera rahalahin-drain'i Saoly.

⁵¹ I Kisy rain'i Saoly sy i Nera rain'i Abinera dia samy zanakalahin'i Abiela.

⁵² Nafotaka tokoa ny ady tamin'ny Filistinina nandritra ny andro rehetra nanjakan'i Saoly. Koa izay lehilahy rehetra hitany fa matanjaka sy mahery fo, dia noraisiny ho ao amin'ny tafiny avokoa.

Toko faha-15

¹ Hoy i Samoela tamin'i Saoly indray andro: Izaho no nirahin'ny TOMPO hanokana anao ho mpanjakan'ilay Israely vahoakany; koa ankehitriny henoy ny tenin'ny TOMPO.

² Izao ary no lazain'ny TOMPOn'izao rehetra izao: Tsaroako ny nanaovan'ny Hamalekita ny vahoaka israelita fony izy ireo nakarina niala tany Ejipta, dia ny nanakanany ny lalany izany.

³ Koa ankehitriny, mandehana tafiho ny Hamalekita, ary levony avokoa izay rehetra ananany fa aza asiana miangana sy indrafo. Vonoy ho faty avokoa na lehilahy na vehivavy, na ankizy na zaza minono, na omby na ondry, na rameva na boriky.

⁴ Nohetsehin'i Saoly ny tafiny, dia nalahany tao Telaima, ka nahitany miaramila an-tongotra andiany roanjato, ary koa vatan-dehilahy andiany folo avy amin'i Joda.

⁵ Dia nandroso hatrany amin'ny tananan'ny Hamalekita i Saoly ary nanotrika ady am-pitaka tao an-dohasaha.

⁶ Hoy izy tamin'ny Kenita: Mandehana ianareo ka ilaozy ny Hamalekita, fandrao haringako miaraka aminy koa ianareo; fa mba nanisy soa ny Israelita ihany manko ianareo, raha niala tany Ejipta izy. Dia nisaraka tamin'ny Hamalekita ny Kenita.

⁷ Ary i Saoly nandresy ny Hamalekita nanomboka teo Havila ka hatrany Sora, atsinanan'i Ejipta.

⁸ Nataony jinja fary tamin'ny sabatra ny vahoaka rehetra, afa-tsy i Agaga mpanjakany izay natao sambobelona.

⁹ Fa i Saoly sy ny miaramila kosa nitsimbina ny ain'i Agaga mbamin'izay tsara indrindra amin'ny biby fiompy, toy ny omby aman'ondry, mifahy na tsia, izany hoe rehefa biby tsara rehetra misy vidiny. Fa izay tsy misy vidiny sy tsy ilaina kosa dia samy naringany avokoa.

¹⁰ Ary izao no tenin'ny TOMPO tamin'i Samoela:

¹¹ Tena nanenenako ny nanaovako an'i Saoly ho mpanjaka, satria nivadika tamiko izy ka tsy nanaraka ny teniko. Tezitra sady nalahelo i Samoela, ka nitaraina mafy tamin'ny TOMPO ny alina tontolo.

¹² Ny ampitso vao maraina, dia lasa nitady an'i Saoly i Samoela. Nisy nampandre an'i Samoela fa tonga tao Karmela i Saoly, dia nanangana tsangambato ho an'ny tenany ary lasa indray nidina hatrany Gilgala.

¹³ Rehefa tonga teo amin'i Saoly i Samoela, dia nilazany hoe: Hitahy anao anie ny TOMPO! Efa narahiko ny tenin'ny Tompo.

¹⁴ I Samoela kosa nanontany azy hoe: Fa inona ary izany ondry mibarareoka sy omby mimama reko izany?

¹⁵ Ka hoy ny navalin'i Saoly: Nentin'ny miaramila avy tany amin'ny Hamalekita izany; satria ny biby tsara tsy mba nokasihiny fa hatao sorona ho an'ny TOMPO Andriamanitrao. Ny sisa rehetra kosa dia naringany avokoa.

¹⁶ Fa hoy i Samoela tamin'i Saoly: Aoka izay, fa hambarako anao izay nolazain'ny TOMPO tamiko halina. Ary hoy izy taminy: Ambarao ary!

¹⁷ Dia hoy i Samoela hoe: Na dia nihevitra ny tenanao ho tsy nanao ahoana aza ianao taloha, dia efa tonga filohan'ny fokon'i Israely, fa ny TOMPO efa nanosotra anao ho mpanjakan'i Israely.

¹⁸ Ary IZY efa nanoro lalana anao handeha hamongotra tanteraka ireo Hamalekita mpanota ireo ary hiady aminy mandra-paharingany.

¹⁹ Koa nahoana no tsy nohenoinao ny tenin'ny TOMPO, fa avy hatrany ianao dia niantoraka tamin'ny remby, ary nanao izay nampalahelo ny TOMPO?

²⁰ Fa hoy i Saoly tamin'i Samoela: Efa nanaiky ny tenin'ny TOMPO aho, ary efa nanaraka izay natorony ahy. Efa novonoin-ko faty avokoa ny Hamalekita, afa-tsy i Agaga mpanjakany ihany izay nentiko eto;