Josoa

Toko faha-19

⁴⁶ ary i Rakona; ao koa ny ranon'i Jarkona sy ny tany manodidina an'i Jafao.

⁴⁷ Nony tsy voatanan'ny Danita io faritany io, dia nianavaratra ireo ka niady tamin'i Lesema. Nalainy ny tanana ary naringany tamin'ny sabatra ny mponina tao; lasany tanteraka i Lesema ka nipetrahany. Ary i Lesema dia nantsoiny hoe Dana, araka ny anaran'i Dana razambeny.

⁴⁸ Ireo tanan-dehibe ireo samy miampy ny tanana kely miankina aminy no zaratany nolovan'ny foko danita ho an'ireo tarika ao anatiny.

⁴⁹ Ary rehefa vitan'ny Israelita ny fizarana ny tany araka ny sisin-taniny avy, dia nomeny zaratany kosa i Josoa, zanakalahin'i Nona.

⁵⁰ Araka ny baikon'ny TOMPO, dia nomena an'i Josoa ny tanana izay nangatahiny, izany hoe i Timnata-Sera ao amin'ny tendrombohitr'i Efraima. Dia namboarin'i Josoa ilay tanana ka nonenany.

⁵¹ I Elehazara mpisorona sy i Josoa zanakalahin'i Nona ary ny filoham-pianakaviana israelita no nizara ireo tany lova ireo. Tao Silao no nizarany azy antsapaka teo anatrehan'ny TOMPO, dia teo am-baravaran'ny Tranolay fihaonana. Toy izany no nahavitana ny fizarana ny tany.

Toko faha-20

¹ Ary ny TOMPO dia nandidy an'i Josoa,

² mba hilaza amin'ny Israelita hoe: Fidio ny tanana fialokalofana araka izay efa nampilazaiko an'i Mosesy taminareo.

³ Any no handosiran'izay mahafaty olona tsy nahy fa kisendrasendra, ka ho fialofana ho anareo izany mba tsy ho azon'ny mpamaly faty.

⁴ Ary rehefa mandositra amin'ireo tanana ireo ilay namono olona tsy nahy, dia hijanona eo anoloan'ny vavahadin'ny tanana, ka hanazava amin'ireo loholona ao an-tanana ny zava-niseho. Dia horaisin'ireo ho ao an-tananany izy ka homeny toerana mba hiara-monina aminy.

⁵ Raha tahiny manenjika azy ilay mpamaly faty, dia tsy hatolotr'ireo ho eo an-tanany ilay nahafaty olona satria kisendasendra no namelezany ilay namany fa tsy fankahalana azy mialoha.

⁶ Honina ao amin'io tanana io izy ambara-pisehony hotsaraina eo anatrehan'ny fiangonana israelita ary ambara-pahafatin'ny mpisorombe niasa tamin'izany andro izany. Dia hody ilay nahafaty olona ka hiverina an-tranony, any amin'ilay tanana izay nialany fony izy nandositra.

⁷ Dia natokan'ny Israelita ireto tanana ireto: i Kedesa any Galilea any amin'ny faritra havoan'i Naftaly; sy i Sekema, any amin'ny faritra havoan'i Efraima; ary i Kiriata-Arba (antsoina hoe koa Hebrona) any amin'ny faritra havoan'i Joda.

⁸ Teny ampita atsinanan'i Jordana tandrifin'i Jerikao kosa dia ireto tanana ireto no voafidy: i Betsera, any amin'ny taniefitra lembalemba, avy amin'ny fokon'i Reobena; sy i Ramota any Gilehada, avy amin'ny fokon'i Gada; ary i Golana any Basana, avy amin'ny fokon'i Manase.

⁹ Ireo tanana ireo no natokana ho fialofana ho an'ny Israelita rehetra sy ny vahiny valovotaka ao aminy; any no handosiran'izay rehetra nahafaty olona tsy nahy, mba tsy hovonoin'ny mpamaly faty izy ambara-pisehony hotsaraina eo anatrehan'ny fiangonana israelita.

Toko faha-21

¹ Ary ny filoham-pianakaviana tamin'ny fokon'i Levy dia nanatona an'i Elehazara mpisorona sy i Josoa zanakalahin'i Nona ary ny filoham-pianakaviana tamin'ny foko israelita;

² tao Silao, tao amin'ny tany Kanahana, no nihaonana ka hoy ireo filoham-pianakaviana levita hoe: Ny TOMPO efa nanome baiko tamin'ny alalan'i Mosesy mba homena tanana maromaro honenanay izahay, ary koa homena ny kijana manodidina azy avy ho an'ny biby fiompinay.

³ Dia samy tamin'ny zarataniny avy no nanomezan'ny Israelita ireto tanana ireto mbamin'ny kijana manodidina azy mba ho an'ny Levita, araka ny baikon'ny TOMPO.

⁴ Ny anjara voatendrin'ny antsapaka voalohany dia ho an'ireo tarika taranak'i Kehata; anisan'ny levita kehatita ny taranak'i Aharona mpisorona ka ny azon'ireo tamin'ny antsapaka dia tanana 13 avy tamin'ny fokon'i Joda sy fokon'i Simehona ary fokon'i Benjamina.

⁵ Ny azon'ny taranak'i Kehata sisa kosa tamin'ny antsapaka dia tanana folo avy tamin'ny fokon'i Efraima sy fokon'i Dana ary antsasa-pokon'i Manase any andrefana.

⁶ Ny azon'ny taranak'i Geresona tamin'ny antsapaka dia tanana 13 avy tamin'ny fokon'i Jisakara sy fokon'i Asera ary fokon'i Naftaly sy antsasa-pokon'i Manase any Basana.

⁷ Ny azon'ny taranak'i Merary kosa dia tanana 12 avy tamin'ny fokon'i Reobena sy fokon'i Gada ary fokon'i Zebolona.

⁸ Ireo tanana ireo mbamin'ny kijana manodidina azy avy dia tamin'ny antsapaka no nanomezan'ny Israelita azy ny Levita, araka izay efa nandidian'ny TOMPO tamin'ny alalan'i Mosesy.

⁹ Ireto no anaran'ireo tanana avy tamin'ny fokon'i Joda sy fokon'i Simehona,

¹⁰ tanana izay nomena ny taranak'i Aharona anisan'ny tarika levita kehatita satria ry zareo no nahazo ny antsapaka voalohany.

¹¹ Nomena azy i Kiriata-Arba, na hoe tananan'i Arba araka ny anaran'ilay razamben'ny Hanakita. Io tanana io ankehitriny dia atao hoe Hebrona, any amin'ny faritra havoan'i Joda. Nomena miaraka aminy koa ny kijana manodidina azy.

¹² Fa ny saha sy ireo tanana kely miankina amin'i Hebrona kosa dia efa natolotra an'i Kaleba zanakalahin'i Jefone.

¹³ Miaraka amin'i Hebrona, izay tanana fialofan'ny mpamono olona tsy nahy, dia natolotra ny taranak'i Aharona koa i Libna,

¹⁴ i Jatira, i Estemoa,

¹⁵ i Holona, i Debira,

¹⁶ i Hasana, i Jota, ary i Bety-Semesa: izany hoe, avy amin'ny fokon'i Joda sy fokon'i Simehona, tanana sivy mbamin'ny kijana samy manodidina azy.

¹⁷ Avy tamin'ny fokon'i Benjamina koa ny nomena ny taranak'i Aharona dia i Gibehona, i Geba,

¹⁸ i Hanatota, ary i Halemeta: izany hoe tanana efatra mbamin'ny kijana samy manodidina azy.

¹⁹ Ny tanana rehetra nomena ny mpisorona taranak'i Aharona dia tanana 13 mbamin'ny kijana samy manodidina azy.

²⁰ Ary ireo tarika sisa tamin'ny levita taranak'i Kehata kosa dia ireto tanana ireto no azony tamin'ny antsapaka.

²¹ Avy tamin'i fokon'i Efraima dia i Sekema, izay tanana fialofana ao anatin'ny faritra havoan'i Efraima, i Gezera,

²² i Kibetsaima, ary i Bety-Horona: izany hoe tanana efatra mbamin'ireo kijana samy manodidina azy.

²³ Avy tamin'ny fokon'i Dana dia i Elteke, i Gibetona,

²⁴ i Aialona, ary i Gata-Rimona: izany hoe tanana efatra mbamin'ny kijana samy manodidina azy.

²⁵ Avy tamin'ny antsasa-pokon'i Manase tany ampita andrefan'i Jordana dia i Tahenaka sy i Jiblehama: izany hoe tanana roa mbamin'ny kijana samy manodidina azy.

²⁶ Ny tanana rehetra azon'ireo tarika sisa taranak'i Kehata dia tanana folo mbamin'ny kijana samy manodidina azy.

²⁷ Ireo tarika tamin'ny levita taranak'i Geresona kosa dia ireto tanana ireto no azony. Avy tamin'ny antsasa-pokon'i Manase teny atsinanana dia i Golana any Basana, izay tanana fialofana, sy i Behestera: izany hoe tanana roa mbamin'ny kijana samy manodidina azy.

²⁸ Avy tamin'ny fokon'i Jisakara dia i Kisiona, i Daberata,

²⁹ i Jarmota, ary i Haina-Genima: izany hoe tanana efatra mbamin'ny kijana samy manodidina azy.

³⁰ Avy tamin'ny fokon'i Asera dia i Misala, i Habdona,

³¹ i Helkata, ary i Rehoba: izany hoe tanana efatra mbamin'ny kijana samy manodidina azy.

³² Avy tamin'ny fokon'i Naftaly dia i Kedesa any Galilea, izay tanana fialofana, i Hamota-Dora ary i Kartana: izany hoe tanana telo mbamin'ny kijana samy manodidina azy.

³³ Ny tanana rehetra azon'ny Geresonita ho an'ireo tarika tao anatiny dia tanana 13 mbamin'ny kijana samy manodidina azy.

³⁴ Ireo Levita hafa sisa dia ny tarika taranak'i Merary, ka ireto tanana ireto no azony. Avy tamin'ny fokon'i Zebolona dia i Joknehama, i Karta,

³⁵ i Dimna, ary i Nahalala: izany hoe tanana efatra mbamin'ny kijana samy manodidina azy.