Marka

Toko faha-4

30 Dia hoy koa i Jesoa hoe: Inona no hampitahantsika ny Fanjakan'Andriamanitra sa fanoharana inona no hoentintsika manazava azy?

31 Tahaka ny voan-tsinapy, ka raha ilay afafy amin'ny tany iny, dia madinika indrindra izy amin'ny voa famafy rehetra ety ambonin'ny tany;

32 saingy rehefa voafafy, dia mitombo, ka tonga lehibe noho ny anana rehetra, sady misy rantsana vaventy ahafahan'ny voro-manidina manao akany honenana.

33 Dia fanoharana maro tahatahaka izany no nanambaran'i Jesoa ny tenin'Andriamanitra tamin'ny olona, araka izay mety ho takatry ny sain'ny mpihaino.

34 Nampiasa fanoharana Izy raha niteny tamin'ny olona; fa rehefa nitokana kosa Izy sy ny mpianany, izay vao nohazavainy tamin'ireo mpianany ny zava-drehetra.

35 Ny harivan'iny andro iny ihany dia hoy i Jesoa tamin'ny mpianany: Andeha isika hankery ampita!

36 Ary rehefa avy nandefa ny vahoaka ny mpianatra, dia nitondra an'i Jesoa tamin'ilay sambokely efa nisy Azy rahateo. Nisy sambokely maro hafa koa tafaraka taminy.

37 Ary indro nisy tafio-drivotra mahery ka tafiditry ny alon-drano hatrany anaty sambokely, ary efa nila ho feno rano ny sambokely.

38 I Jesoa anefa natory teo amin'ny zoron-tsambo tery aoriana fa nisy ondana niondanany teo; ary nofohazin'ny mpianany Izy ka nilazany hoe: Mpampianatra o, tsy mampaninona Anao ve na ho faty aza isika?

39 Dia nifoha Izy ka niteny mafy ny rivotra ary nanao tamin'ny farihy hoe: Mangina! Mitonia! Dia nitsahatra ny rivotra ary nanjary tony dia tony ny andro.

40 Dia hoy i Jesoa tamin'ny mpianany: Nahoana no saro-tahotra ianareo? Tsy mbola manam-pinoana angaha ianareo?

41 Ary natahotra dia natahotra tokoa iretsy mpianany, ka nifampilaza hoe: Fa iza ary io no manaiky Azy hatramin'ny rivotra sy ny farihy?

Toko faha-5

1 Nandeha sambokely i Jesoa sy ny mpianany ka tonga teny ampitan'ny farihin'i Galilea, teo amin'ny faritanin'i Gergesa.

2 Raha vao niala tao an-tsambokely i Jesoa, dia indro nisy lehilahy nipoitra avy eny amin'ny fasana, tonga nitsena Azy. Azon'ny fanahy maloto ralehilahy,

3 ka teny amin'ny fasana no niorim-ponenana ary tsy nisy olona nahafatotra azy intsony na dia tamin'ny rojo vy aza.

4 Matetika tokoa manko dia nasiana gadra ny tongony sady nofatorana rojo vy ny tanany; fa ny rojo vy notapahiny, ary ny gadra nopotehiny, ka dia tsy nisy olona nahafolaka an-dralehilahy.

5 Na andro na alina dia teny amin'ny fasana sy tany an-tendrombohitra tany foana izy, niantsoantso sy nandratra tena tamin'ny vato.

6 Nony nahatazana an'i Jesoa ralehilahy, dia nihazakazaka nanatona Azy ka niankohoka teo anatrehany,

7 ary niantsoantso ka niteny tamin'ny feo mahery hoe: Fa hataonao inona aho, ry Jesoa Zanak'Andriamanitra avo indrindra? Miangavy Anao amin'ny anaran'Andriamanitra aho, aza dia ampijalina re!

8 (Satria i Jesoa efa nandidy azy hoe: Miala amin'io lehilahy io, ry fanahy maloto!)

9 Dia nanontany an-dralehilahy i Jesoa nanao hoe: Iza no anaranao? Ka namaly izy hoe: Tafika no anarako, satria maro izahay!

10 Dia nitalaho mafy tamin'i Jesoa ralehilahy mba tsy horoahiny lavitra an'io tany io ireo fanahy maloto ireo.

11 Ary nisy kisoa maro, andiany iray, nandrasana teny amin'ny kisolosolon'ny havoana.

12 Koa nitalaho tamin'i Jesoa ireo fanahy maloto nanao hoe: Alefaso amin'iretsy kisoa iretsy izahay, hiditra ao aminy.

13 Neken'i Jesoa ny fangatahany. Koa dia niala tamin-dralehilahy ireo fanahy maloto ka lasa niditra tao amin'ny kisoa. Ary nirifatra ny andian-kisoa, tokony ho kisoa roa arivo, ka nivarimbarina tan-kilahila ho any anaty farihy, dia maty tao.

14 Nandositra ireo mpiandry kisoa ka lasa nilaza ny vaovao tao an-tanana sy teny ambanivohitra. Koa avy ny olona hijery ny zava-niseho,

15 dia tonga teo akaikin'i Jesoa ary nandinika ilay lehilahy azon'ny demony antsoina hoe Tafika teo, efa mipetraka tsara, mitafy lamba sady ary saina; ka nihoron-koditra izy rehetra.

16 Ry zareo nanatri-maso kosa nitantara tamin'ireo vao tonga ny zava-niseho tamin'ilay azon'ny demony sy ny nanjo ny kisoa teo.

17 Tamin'izay dia nitalahoan'ny olona i Jesoa hiala teo amin'ny taniny.

18 Raha ilay niondrana an-tsambokely iny i Jesoa, dia niangavy taminy kosa ilay azon'ny demony teo aloha nanao hoe: Avelao aho hiaraka aminao!

19 Tsy nanaiky i Jesoa fa niteny taminy hoe: Andeha mody any an-tranonao, any amin'ireo havanao; ka lazao azy izay rehetra nataon'ny Tompo taminao noho ny famindrampony.

20 Dia lasa ralehilahy nanao antso avo, eran'ny faritany atao hoe Dekapoly, izay rehetra nataon'i Jesoa taminy; ka dia gaga avokoa ny olona.

21 Nony tafaverina an-tsambokely teny ampita i Jesoa, dia vahoaka maro no nitangorona nanatona Azy, fa Izy kosa nijanona teo amoron'ny farihy ihany.

22 Dia avy ny anankiray tamin'ireo lehiben'ny sinagoga, atao hoe Jairo; raha vao nahita an'i Jesoa izy, dia niankohoka teo an-tongony

23 sady niangavy azy mafy nanao hoe: Eo ambavahoanan'ny fahafatesana ny zanako vavy; koa tongava hametra-tanana aminy, dia ho sitrana izy ka ho velona.

24 Dia lasa niaraka tamin'i Jairo i Jesoa. Vahoaka nifanitsa-kitro no nitanjozotra nanaraka Azy, ka nifanety taminy.

25 Ary nisy vehivavy marary mitsi-dra nandritra ny 12 taona;

26 efa niaritra zavatra mafy maro tamin'ny dokotera maro izy io ka lany fananana tamin'izany rehetra izany, nefa tsy nihatsara velively fa vao mainka niharatsiratsy kokoa aza.

27 Nandre ny amin'i Jesoa ravehivavy, dia lasa nifanjevo tamin'ny vahoaka avy tao ivoho, ka nikasika ny lamban'i Jesoa

28 fa hoy mantsy izy: Na dia ny lambany ihany aza no voakasiko, dia ho sitrana aho.

29 Dia ritra niaraka tamin'izay ny loharanon'aretiny, ka tsapany tao amin'ny tenany fa sitrana tsy nandeha ra intsony izy.

30 Niaraka tamin'izay koa dia tsapan'i Jesoa fa nisy hery niala avy tao aminy; ka niherikerika teo afovoan'ny vahoaka Izy nanontany hoe: Iza no nikasika ny lambako teo?

31 Ary hoy ny mpianany taminy: Hitanao ireto vahoaka mifanety aminao, ka hoy indray Ianao hoe: Iza no nikasika Ahy?

32 Dia nanopy maso manodidina Azy i Jesoa mba hijery ilay vehivavy izay efa nanao izany.

33 Dia raiki-tahotra sady nangovitra ravehivavy satria nahalala tsara ny zavatra nitranga tao aminy; ka tonga niankohoka teo anatrehan'i Jesoa izy ary nilaza taminy ny marina rehetra.

34 Dia hoy i Jesoa taminy: Ny finoanao, anaka, no nahasitrana anao! Ndeha ary ka veloma finaritra, mitohiza fahasalamana soa aman-tsara!

35 Raha mbola niteny i Jesoa, dia nisy iraka tonga avy tany an-tranon'ity lehiben'ny sinagoga ka nanao tamin'i Jairo hoe: Efa maty ny zanakao vavy, ka nahoana ianao no mbola manahirana ny Mpampianatra ihany?

36 Fa tsy nahoan'i Jesoa izany teny izany, ka hoy Izy tamin'ilay lehiben'ny sinagoga: Aza matahotra, minoa fotsiny ihany!

37 Dia tsy nisy olona navelan'i Jesoa hiaraka aminy afa-tsy i Petera sy i Jakoba ary i Johany rahalahin'i Jakoba.

38 Nankao an-tranon'ilay lehiben'ny sinagoga izy efa-mianaka, ary hitan'i Jesoa ireto olona misomaritaka sy mitomany ary mikiakiaka.

© Eugene Heriniaina - serasera.org 1999 - 2025 - page load 0.9695