Marka
Toko faha-3
15 ka hanam-pahefana handroaka ny demony.16 Ireto no voatendriny ho isan'ny 12 lahy: i Simona izay nampian'i Jesoa anarana hoe Petera;
17 i Jakoba sy i Johany mirahalahy zanak'i Zebedeo ary nampian'i Jesoa anarana hoe Boanerjesy, izany hoe olona mahery setra tahaka ny varatra;
18 i Andrea, i Filipo, i Bartolomeo, i Matio, i Toma, i Jakoba zanak'i Halfeo, i Tadeo, i Simona Kananeanina,
19 ary i Jodasy Iskariota ilay nanolotra an'i Jesoa.
20 Dia niverina tao an-trano i Jesoa; ary vory maro teo indray ny vahoaka, hany ka tsy afaka nisakafo Izy sy ny mpianany.
21 Ren'ny fianakavian'i Jesoa izany ka niainga ireo mba haka Azy an-keriny satria hoe lasa adala Izy.
22 Ary hoy ireo mpahay lalana nidina avy tany Jerosalema hoe: I Belzeboba no ao amin'ilay io ary fahefana avy amin'ny filohan'ny demony no androahany ny demony.
23 Fa nantsoin'i Jesoa iretsy mpahay lalana ka fanoharana no nitenenany taminy hoe: Ahoana no hahafahan'i Satana mandroaka an'i Satana?
24 Raha misy fanjakana miady an-trano, dia tsy haharitra izany fanjakana izany;
25 ary raha misy fianakaviana miady an-trano, dia tsy haharitra izany fianakaviana izany.
26 Koa raha i Satana no mitsangana hanohitra ny tenany sy miady an-trano, dia tsy haharitra izy fa ho vita eo ny aminy.
27 Kanefa tsy misy olona afaka hiditra ao an-tranon'olona matanjaka mba handroba ny fananany, raha tsy voafatony aloha ilay olona matanjaka; dia izay izy vao mandroba ny ao an-trano.
28 Ary lazaiko marina aminareo fa havelan'Andriamanitra avokoa ny heloka rehetra vitan'ny olombelona ary koa ny fanevatevana rehetra ataony an'Andriamanitra;
29 fa na iza na iza manevateva ny Fanahy Masina, dia tsy mba hahazo famelan-keloka na oviana na oviana, satria fahotana raiki-tampisaka aminy mandrakizay no mahameloka azy.
30 Nilaza manko ireo mpahay lalana fa hoe fanahy maloto no ao amin'i Jesoa.
31 Tamin'izay dia tonga ny renin'i Jesoa sy ireo rahalahiny, nijanona teo alatrano ary naniraka olona hiantso Azy.
32 Vahoaka be no nipetraka nanodidina an'i Jesoa; ary nisy nilaza taminy hoe: Indreo mitady Anao ao alatrano ao ny reninao sy ny rahalahinao.
33 Fa hoy ny navalin'i Jesoa: Iza moa no reniko sy rahalahiko?
34 Dia natopiny tamin'ireo olona nipetraka nanodidina Azy ny masony ka hoy Izy: Ireto no reniko sy rahalahiko.
35 Fa na iza na iza manao ny sitrapon'Andriamanitra, dia izany no rahalahiko, anabaviko na reniko.
Toko faha-4
1 Dia nampianatra teo moron'ny farihin'i Galilea indray i Jesoa; ary vahoaka be no nitangorona teo akaikiny, ka voatery niondrana an-tsambokely Izy, dia nipetraka teo. Ary ny vahoaka rehetra kosa tery an-tanety amoron'ny farihy.2 Fanoharana no nampianaran'i Jesoa zavatra maro azy; ary nandritra ny fampianarany no nitenenany taminy hoe:
3 Henoy ange: indro niainga ity mpamafy hamafy voa.
4 Nony namafy izy, ny voa sasany latsaka teny amoron-dalana, ka tonga ny voro-manidina nitsindroka azy rehetra.
5 Ny voa sasany latsaka tamin'ny toerana be vato sady manify nofon-tany, ka vetivety dia nitsimoka satria tsy lalina ny tany nilentehany;
6 saingy nony nipoaka ny andro, dia nalazon'ny hafanana ireo tsimoka ireo ka maina satria tsy namaka lalina.
7 Ny voa sasany indray latsaka tany anaty tsilo; ary nitombo ny tsilo ka nangeja ny tsimoka, dia tsy namoa izy.
8 Ny voa sasany kosa latsaka tamin'ny tany lonaka, dia naniry sy nitombo ary namoa: ny iray namokatra telopolo heny, ny iray enimpolo heny, ny iray zato heny.
9 Dia nofaranan'i Jesoa hoe: Izay manan-tsofina hihainoana, aoka hihaino!
10 Rehefa nitokana lavitra ny vahoaka i Jesoa, dia nanontany Azy ny hevitry ny fanoharana ireo mpomba Azy mbamin'ny 12 lahy,
11 ka novaliany hoe: Ianareo no efa nomena ny tsiambaratelo momba ny Fanjakan'Andriamanitra; fa ho an'ireo any ivelany kosa dia manjary ankamantatra saro-pantarina ny zavatra rehetra,
12 hany ka hijery dia hijery izy fa tsy hahita ary hihaino dia hihaino fa tsy hahafantatra, afa-tsy raha miverina amin'Andriamanitra izy ka ho voavela heloka.
13 Dia hoy i Jesoa tamin'ireo mpomba Azy sy tamin'ny 12 lahy: Tsy azonareo ve ilay fanoharana teo? Ka hataonareo ahoana no fahazo ny fanoharana hafa rehetra?
14 Ny mpamafy dia mamafy ny tenin'Andriamanitra.
15 Ao ny amafazana ny teny eo amoron-dalana: vao mahaheno izy, dia tonga i Satana manaisotra ny teny voafafy tao aminy.
16 Ao koa ny amafazana an-tany be vato: vao mahaheno ny teny izy, dia mandray azy an-kafaliana,
17 saingy tsy alatsany lalina ao aminy fa vetivety foana no itanany azy; ka raha vao mitranga ny fahoriana na fanenjehana noho ny tenin'Andriamanitra, dia very finoana izy.
18 Ao indray ny amafazana anaty tsilo: mahaheno ny teny izy,
19 saingy ny fiahiana ny fiainana etoana sy ny fanodokan'ny harena ary ny fitsiriritana hafa rehetra, samy miditra ao aminy, ka mangeja ny teny tsy ho afa-mamoa.
20 Ao koa ny amafazana an-tany lonaka, dia ireo mahaheno ny teny sy mandray azy ka mamokatra: ny iray telopolo heny, ny iray enimpolo heny, ny iray zato heny.
21 Hoy koa i Jesoa tamin'ireo mpomba Azy sy tamin'ny 12 lahy: Inona moa no angalana ny jiro, ny hametrahana azy ao ambany vata famarana na ao ambany farafara ve sa ny hametrahana azy eo ambony fitoeran-jiro?
22 Satria tsy misy takona izay tsy haseho, na miafina izay tsy haharihary.
23 Izay manan-tsofina hihainoana, aoka hihaino!
24 Ary hoy koa i Jesoa taminy: Diniho izao teny renareo izao: izay famarana amaranareo ihany no hamaran'Andriamanitra ho anareo koa, ary hasiany fanampiny aza ny anareo.
25 Satria izay manana no homena; ary izay tsy manana kosa, na izay kely ananany aza dia halana aminy.
26 Hoy koa i Jesoa: Ny Fanjakan'Andriamanitra dia tahaka ny amin'ity olona namafy voa amin'ny tany;
27 fa na matory izy ny alina, na mahatsiaro izy ny antoandro, dia mitsimoka sy mitombo ny voa amin'ny fomba tsy fantany akory.
28 Fa mamokatra fotsiny amin'izao ny tany: tahony aloha, dia salohiny maitso, ary farany dia voany matoy eny amin'ny salohiny.
29 Ary raha vao azo jinjaina, dia jinjain'ilay olona fa tonga ny fotoana fijinjana.