2 Makabeo

Toko faha-11

² dia namory miaramila sahaboho antokon-tafika valopolo mbamin'ny miaramila an-tsoavaly rehetra izy, ka niroso hamely ny Jiosy. Nampoiziny mihitsy ny hahatonga an'i Jerosalema ho tanana fonenan'ny Grika.

³ Tiany hampandoavina hetra ny toera-masina, tahaka ny tempoly rehetra any amin'ny hafa firenena any, ary hamidy isan-taona ny andraikitra mahampisorombe.

⁴ Tsy noheverin'i Lisia akory tamin'izany izay fahefan'Andriamanitra; fa ny miaramilany an-tongotra nisy antokon-tafika ampolony maro sy ny miaramilany an-tsoavaly an'arivony ary ny elefanta ny valopolo no nianteherany fatratra.

⁵ Nony tafiditra an'i Jodea izy ka nanakaiky an'i Bety-Tsoro , toera-mafy sahabo ho 28 kilaometatra atsimon'i Jerosalema, dia nanomboka nanery azy.

⁶ Vao ren'i Joda Makabeo sy ny namany fa hoe ataon'i Lisia fahirano ny trano mimanda, dia namory vahoaka izy ka niara-nivavaka ombam-pisentoana sy ranomaso tamin'ny TOMPO mba hanirahany anjely tsara anankiray hamonjy an'i Israely.

⁷ Avy eo dia ny tenan'i Makabeo no nandray fiadiana voalohany sy nampirisika ny hafa hanao vy very ny ainy miaraka aminy hamonjy ireo mpiray firenena.

⁸ Indray niroso tamin-kafanampo avokoa izy rehetra; ary mbola tsy lavitra loatra an'i Jerosalema izy no indro nisy mpitaingin-tsoavaly niseho teo alohany sady nampandihy fiadiana volamena.

⁹ Ka indray nisaotra an'Andriamanitra mpamindrafo izy rehetra, samy nahatsapa ho voaentan-kery lehibe ka vonon-kanagorobaka tsy hoe ny olona ihany fa ny biby faran'izay masiaka koa, ary hamaky manda vy aza.

¹⁰ Nandroso nilahatra hiady izy ireo, satria nangorahan'ny TOMPO ka nana-mpanampy avy any an-danitra.

¹¹ Niantoraka toy ny liona tamin'ny fahavalo ireo mpomba an'i Joda Makabeo, ka miaramila an-tongotra nisy antokon-tafika 11 sy miaramila an-tsoavaly 1060 no natsingidiny tamin'ny tany,

¹² ary ny sisa nataony vaky nandositra. Efa voaratra sy nanary fiadiana ny ankamaroan'ny mpandositra ary ny tenan'i Lisia aza tsy nahavonjy ny ainy, afa-tsy tamin'ny fandosirana mahamenatra.

¹³ Kanefa nanan-tsaina i Lisia ka nandinika ity fahareseny, ary nahatsapa fa tsy azo resena ny Jiosy satria Ilay Andriamanitra mahery no miara-miady aminy;

¹⁴ dia nandefasany iraka ireo mba hanolotra fihavanana araka izay famarafarana rehetra ara-drariny, ary nanome toky i Lisia fa hampanaiky ny mpanjaka hanjary sakaizan'ny Jiosy.

¹⁵ Tsy nikendry afa-tsy ny soa ho an'ny besinimaro koa i Joda Makabeo ka nanaiky ny hevitra rehetra naroson'i Lisia; ny mpanjaka rahateo nankato izay rehetra nalefan'i Joda Makabeo an-tsoratra ny amin'ny famarafaram-pihavanana momba ny Jiosy.

¹⁶ Ny taratasy nosoratan'i Lisia ho an'ny Jiosy dia mirakitra izao teny izao: "Avy amiko Lisia ity taratasy ity. Manoratra ho anareo Jiosy mitamba be aho ary miarahaba anareo.

¹⁷ "Voatolotr'i Johany sy i Absaloma izay nirahinareo ho aty amiko ity fitakiana vita an-tsoratra ity ka nangatahiny aho hampanan-kery ny andininy voarakitr'izany.

¹⁸ Efa nampahafantariko ny mpanjaka izay rehetra tsy maintsy alefa mankany aminy, ka nankatoaviny ny zavatra heveriny fa azo ekena.

¹⁹ Raha tazoninareo hatrany ny toetra miandany amin'ny fitondram-panjakana, dia hikely aina koa aho amin'ny ho avy mba hanao izay hiadananareo.

²⁰ Ny amin'ny antsipirian-javatra sasany dia nohazavaiko tamin'ireto irakareo ireto sy ny ahy, ka dia hifampidinika aminareo izy ireo.

²¹ Veloma finaritra ianareo."" Nosoratana tamin'ny taona faha-148 ,volana Zeosa-Korintianina , andro faha-24."" "

²² Toy izao kosa no raketin'ilay taratasin'ny mpanjaka ho an'i Lisia:" Avy amiko Antiokosa mpanjaka ity taratasy ity. Manoratra ho anao aho, ry Lisia rahalahiko , ary miarahaba anao.

²³ "Fony voafindra any amin'ireo andriamanitra ny raiko, ny iriko dia ny hifotoran'izay mponina eto amin'ny fanjakako amin'ny fikarakarana ny raharaha ny tsy hisy mpanelingelina.

²⁴ Reko fa tsy eken'ny Jiosy ny hanaraka ny fomba grika, araka izay notadiavin-draiko; aleony ihany ny fombany manokana, ka mangataka izy havela hiaina araka ny lalanany.

²⁵ Koa iriko tsy hisy tabataba intsony amin'izany firenena izany, ary didiako ny hamerenana ny tempoliny aminy sy ny hamelana azy hanaraka ny fomban-drazany.

²⁶ Tsara ary ny handefasanao iraka ho any aminy hanome antoka azy amin'ny fandraisan-tanana. Izany no hahazoany toky sy hifotorany amin'ny fanatontosana ny raharaha fanaony, rehefa fantany ny zava-kendrenay."

²⁷ Ny taratasin'i Antiokosa mpanjaka ho an'ny firenena jiosy kosa dia toy izao: "Avy amiko Antiokosa mpanjaka ity taratasy ity. Rariko fiadanana ianareo Antenimieran-doholona sy ianareo Jiosy hafa rehetra.

²⁸ "Raha salama tsara ianareo, dia izany no mifanaraka amin'ny faniriako. Ny tenako ihany koa dia salama tsara.

²⁹ Nampahafantarin'i Menela ahy ny fanirianareo hiverina any aminareo sy hanatontosa ny raharaha fanaonareo.

³⁰ Koa izay mody alohan'ny andro faha-30 n'ny volana Ksantika, dia homeko antoka fa hovotsoran-keloka.

³¹ Aoka ny Jiosy hihinana izay sakafo fihinany sy hanaraka ny lalanany tahaka ny taloha, ka aza misy omena soketa noho izay diso nataony tsy amim-pahalalana.

³² I Menela koa dia nirahiko mba hampatoky anareo.

³³ Veloma finaritra ianareo."" Nosoratana tamin'ny taona faha-148 , volana ksantika, andro faha-15."" "

³⁴ Ny Romanina koa dia nandefa taratasy ho an'ny Jiosy mirakitra izao teny izao:" I Kointa Memy sy i Tito Manily ary i Many Serjy, samy iraky ny Romanina, dia miarahaba anareo Jiosy.

³⁵ Ireo zavatra efa neken'i Lisia havan'ny mpanjaka taminareo, dia ankatoavinay tanteraka koa.

³⁶ Ary ny amin'ireo nataony ho tsy maintsy alefa hodinihin'ny mpanjaka dia aoka hotombananareo tsara ary aza angatahana andro fa aniraho olona hilaza ny hevitrareo aty aminay; izany no harosonay eo amin'ny mpanjaka, araka ny mahasoa anareo. Eny, hankany Antiokia izahay,

³⁷ ka alefaso faingana ny irakareo mba hahalalanay izay hevitrareo koa.

³⁸ Veloma finaritra ianareo. Nosoratana tamin'ny taona faha-148, volana Ksantika, andro faha-15."

Toko faha-12

¹ Rehefa vita ny fifanekena teo amin'i Lisia sy ny Jiosy, dia niverina nankany amin'ny mpanjaka i Lisia ary ny Jiosy kosa niroso namboly ny sahany.

² Kanefa ireo governora teo an-toerana, izany hoe i Timoty sy i Apolony ilay zanakalahin'i Genea, mbamin'i Hieronima sy i Demofona , niampy an'i Nikanora filohan'ireo miaramilasiprioty, dia tsy namela ny Jiosy handry feizay na hiaina amim-piadanana.

³ Tamin'izay no nanao heloka bevava ny hafa firenena mponina tao Jopa. Mova tsy manam-pankahalana ny Jiosy akory ireto hafa firenena ireo; ka nasainy niakatra teo amin'ny lakan-drafitra voaoman'izy ireo ny Jiosy nonina tao an-tanana ombam-bady aman-janaka.

⁴ Hevitra niarahan'ny hafa firenena rehetra tao an-tanana izany, ka neken'ny Jiosy araka ny faniriany te hihavana, ary tsy nananany ahiahy velively. Kanjo nony tonga teny afovoan-dranomasina ireto Jiosy, dia nalentika ho faty an-drano avokoa: roanjato no isany raha farafahakeliny.

⁵ Vao ren'i Joda Makabeo ny halozana nafitsoka tamin'ireo mpiray firenena aminy, dia nomeny teny ireo vatan-dehilahy namany.

⁶ Ka nony avy niantso ilay Andriamanitra mpitsara ara-drariny i Joda, dia niroso hamely ny mpamono an'ireo mpiray firenena aminy: nodorany alina ireo tranon-tseranana, notsoloany afo koa ny sambo, ary notrobarany sabatra ireo hafa firenena nitady fialofana teo.

⁷ Nilaozany ny tanana, satria nihidy; kanefa ny hiverina hamongotra ny fitambaran'ny Jopita no fikasany.

⁸ Ren'i Joda ihany koa fa ny hafa firenena mponina tao Jamnia dia mikasa hanao halozana toy izany nafitsoky ny Jopita izany amin'ireo Jiosy monina ao aminy.

⁹ Ka tahaka ny natorony tao Jopa koa no namelezan'i Joda tamin'ny alina ireo mponina teo Jamnia: nodorany ny seranana mbamin'ny sambo, ka tazana hatrany Jerosalema ny hazavana vokatry ny fandoroana, nefa nisy 45 kilaometatra ny elanelany.

¹⁰ Niala tao Jamnia i Joda, dia niroso hamely an'i Timoty. Efa lasa roa kilaometatra ny dia no nisy Arabo nirotsaka hifanehatra amin'i Joda; antokon-tafika dimy ireo Arabo an-tongotra, ary andian-tafika dimy ireo an-tsoavaly.

¹¹ Mafy tokoa ny ady, kanefa nandresy i Joda sy ny namany noho ny fanampian'Andriamanitra. Rehefa resy ireo Arabo mpifindrafindra lasy ireo, dia nangataka tamin'i Joda hamitram-pihavanana aminy, sady nanome toky hanolotra biby fiompy ho azy sy hanampy amin'ny zavatra sasany.

¹² Hitan'i Joda fa maro ny zavatra azon'ireto Arabo ireto anampiana azy, ka dia nekeny ny hanao fihavanana aminy; ary nony avy nifandray tanana ny roa tonta, dia nody ho any an-dainy kosa ny Arabo.

¹³ Taorian'izany no nianihan'i Joda ilay tanana mafy anankiray atao hoe Kasfao: voahodidina manda izy io sady onenan'olona samihafa firenena.