2 Makabeo

Toko faha-12

¹⁴ Natoky ny manda mafy sy ny tahirin-tsakafo betsaka ireo voafahirano ka nanao toetra valavala mihoa-pampana tamin'i Joda sy ny namany sady nanevateva azy, ary nanao faniratsirana an'Andriamanitra amin-teny tsy mendrika hotononina.

¹⁵ I Joda sy ny namany kosa niantso ilay TOMPO lehibe sy mahery, Andriamanitr'izao tontolo izao, satria Izy no nampianjera ny mandan'i Jerikao faha-Josoa, tsy tamin'ny fitaovana fandrodana-manda na tamin'ny milina hafa; izay ry i Joda vao niantoraka hianika ny manda tamin-karomotana.

¹⁶ Araka ny sitrak'Andriamanitra no nahazoany ny tanana; dia vonoan'olona maro tsy hay tantaraina no nataony teo, ka hoatra ny feno ny ra nandriaka tao ilay kamory eo akaiky, izay nisy efajato metatra eo ho eo ny velarany.

¹⁷ Niala tao Kasfao i Joda sy ny namany, dia nandeha 140 kilaometatra eo ho eo ary tafapaka hatrany Karaksa, izay toerana nonenan'ny Jiosy atao hoe Tobianina.

¹⁸ Tsy hitan'izy ireo tao amin'izany faritra izany intsony i Timoty, satria efa lasa niala teo noho izy tsy nahavita na inona na inona teo; fa nisy kosa tanana mimanda anankiray nampitobiany miaramila maro dia maro.

¹⁹ Ny roa tamin'ny mpitari-tafik'i Joda Makabeo, izany hoe i Dositeo sy i Sosipatera, no nandeha nianika io tanana mimanda io sy namono ny olona navelan'i Timoty tao, ka nihoatra antokon-tafika folo ny isany.

²⁰ I Joda Makabeo kosa tetsy an-daniny nitsinjarazara ny tafiny ho antokony ary nanendry izay ho mpitarika an'ireo antokon-tafika ireo. Avy eo izy dia niroso hamely an'i Timoty izay nitondra miaramila an-tongotra nisy antokon-tafika 120 ary miaramila an-tsoavaly nisy antokon-tafika roa sy andiany dimy.

²¹ Rehefa ren'i Timoty fa tamy i Joda, dia nalefany ny zaza amam-behivavy mbamin'ny fananany hankao amin'ny tanana anankiray atao hoe Karnaima. Toerana tsy voaani-pahavalo izy io sady sarotra hatonina, satria ety ny lalana rehetra mankao.

²² Ny antokon-tafika notarihin'i Joda no nipoitra voalohany, ka mampivadi-po ireo fahavalo, satria niseho nampihorohoro azy ny fahefan'ilay Andriamanitra mahita ny zava-drehetra; vaky nandositra ny miaramilan'i Timoty, ny sasany nankatsy, ny sasany nankary, hany ka izy samy izy ihany mazana no nifandratra sy nifanatrobaka tamin'ny sabatra.

²³ Niezahan'i Joda hoenjehina ireo olo-meloka ireo, ka nasiany avokoa ary nahafatesany hatramin'ny antokon-tafika telopolo.

²⁴ Ny tenan'i Timoty kosa voasambotry ny miaramilan-dry i Dositeo sy i Sospatera, ka nitalaho tamin-kafetsen-dratsy mba handefasan'ireo azy soa aman-tsara. Nihambo i Timoty fa eo am-pelatanany ny havana aman-drahalahin'ny ankamaroan'izy ireo; ka raha ampijaliana izy, dia mety ho vonoina ho faty iretsy.

²⁵ Nanome toky tamin'ny teny lava teo izy fa handefa ireo olona voatana ireo sady tsy haninoninona azy akory; hany ka dia novotsoran'ny Jiosy i Timoty mba hamonjena an'ireo mpiray firenena aminy.

²⁶ Tamin'izay kosa i Joda no niditra tao Karnaima sy tao amin'ny tempoliny voatokana ho an'ilay andriamani-bavy Atargatisa , ka nampamono ho faty vatan-dehilahy nisy antokon-tafika 25.

²⁷ Avy nandresy sy nandripaka ireo fahavalo ireo i Joda, dia nitondra ny tafiny hamely an'i Hefrona, izay tanana mimanda onenan'olona maro samihafa firenena. Zatovo matanjaka no voalahatra teo anoloan'ny manda sy niady tamin-kerimpo; tao an-tanana kosa dia be dia be ny milina fitifirana sy ireo fitaovana fampiasa aminy.

²⁸ Kanefa ny Jiosy, nony avy niantso ny TOMPO mahery, Ilay mpanorotoro amin'ny fahefany ny herim-pahavalo, dia nahazo ny tanana; ary vatan-dehilahy nisy antokon-tafika 25 tamin'ireo mponina tao no nataony maty niampatrampatra tamin'ny tany.

²⁹ Niala tao Hefrona i Joda sy ny tafiny, dia nandroso hamely an'i Sitopoly, izay tanana teo amin'ny 110 kilaometatra avy ao Jerosalema.

³⁰ Kanjo nilaza ireo Jiosy niorim-ponenana tao fa tsara fitondra azy ny mponina tompon-tany ary nahazoany fanampiana aza tamin'ny andro tsy fananany.

³¹ Koa nisaotra ny mponina tao Sitopoly ry i Joda sady nampirisika azy hanohy ny fitiavany an'ireo Jiosy ireo amin'ny ho avy. Taorian'izany ry i Joda no niverina tany Jerosalema, taloha kelin'ny fety Pentekosta.

³² Taorian'io fety Pentekosta voalaza teo io i Joda Makabeo sy ny tafiny no nandeha hamely an'i Gorjia izay governoran'i Idomea.

³³ Ka niainga hisehatra azy i Gorjia nitondra miaramila an-tongotra nisy antokon-tafika telo ary miaramila an-tsoavaly nisy andian-tafika efatra.

³⁴ Rafitra ny ady, ary tamin'izay no nisy potraka vitsivitsy ny Jiosy.

³⁵ Kanjo nisambotra an'i Gorjia ity lehilahy mahery atao hoe Dositeo mpitaingin-tsoavaly tao amin'ny andian-tafik'i Bakenoro; ny lamba saron-tsorok'i Gorjia no nisamborany sy nitarihany azy an-keriny, fa ny hahazo sambo-belona an'ilay olom-boaozona io no niriny. Saingy niantoraka tamin'i Dositeo ity mpitaingin-tsoavaly trasianina anankiray, ka nanapa-tsandry azy; hany ka afa-nandositra tany Masesa i Gorjia.

³⁶ Tamin'izany kosa efa niady ela ny miaramilan'i Hazaria, ka reraky ny havizanana; dia niantso ny TOMPO i Joda Makabeo mba haneho fa mpanampy ny tafika jiosy Izy sady mpitarika azy an'ady.

³⁷ Avy eo dia feo avo no niventesan'i Joda tamin'ny tenin-drazany ny akoran'ady omban-kira; ary nirotsahany tampotampoka ny miaramilan'i Gorjia ka nataony vaky nandositra.

³⁸ Taorian'io ady io, dia novorin'i Joda Makabeo ny tafiny ka nentiny ho ao an-tananan'i Adolama ; ary higadona ny andro fahafito amin'ny herinandro, ka nanao ny fidiovana araka ny fanao ireo , ary nankalaza ny sabata teo amin'izany toerana izany.

³⁹ Nony ampitso, araka ny fotoana tsy maintsy hanaovana azy, dia naka ny fatin'ireo Jiosy lavo an'ady ry i Joda mba halevina miaraka amin'ny havany ao am-pasan-drazany.

⁴⁰ Isam-batan'olona tamin'ireo faty, dia samy nahitana tao ambanin'ny akanjo zava-masina avy amin'ireo sampy notompoina tao Jamnia : voararan'ny lalana jiosy ny fitondrana ireny. Ka niharihary tamin'ny olona rehetra fa izany no anton'ny nahafatesan'ireo.

⁴¹ Dia izy rehetra no indray nisaotra ny TOMPO, mpitsara ara-drariny, Izay nampiharihary ny zava-miafina,

⁴² ary nanomboka nivavaka izy ka nangataka tamin'ny TOMPO mba hamelany tokoa ny fahotana natao. I Joda ilay mahery fo kosa nampirisika ny miaramilany mba hitandrin-tena tsy ho voalotom-pahotana, satria he ity hita maso ny zava-nitranga noho ny fahotan'ireo lavo an'ady ireo.

⁴³ Nanao famoriam-bola i Joda ka nahangona drakma roa arivo izay nampanateriny tany Jerosalema hanaovana sorona fanalanany ota. Fiheverana ny fitsanganan-kovelona no nanaovany an'izany asa soa sy mendrika izany.

⁴⁴ Raha tsy nantenainy manko fa hitsangan-ko velona ny miaramila lavo an'ady, dia zava-poana sy tsy misy antony ny mivavaka ho an'ny maty.

⁴⁵ Noheveriny koa fa valisoa tsara aoka izany no voatahiry ho an'izay mody mandry ombam-pitiavam-bavaka, ka hevitra masina sy feno fitiavam-bavaka io fanoloran-tsorona io. Izany no nanaovan'i Joda io sorom-panonerana ho an'ny maty io, mba ho famelana ny fahotany.

Toko faha-13

¹ Tamin'ny taona faha-149 dia henon'i Joda Makabeo sy ny namany fa tamy hamely an'i Jodea i Antiokosa Eopatora omba-miaramila maro.

² Niaraka tamin'ny mpanjaka koa i Lisia , mpanabe azy sady praiminisitra. Tafika grika no samy notarihin'izy roa lahy, dia tafika izay nahitana miaramila an-tongotra nisy antokon-tafika 110 sy miaramila an-tsoavaly nisy antokon-tafika dimy sy andiany telo, elefanta 22 ary kalesy telonjato mirongo antsy lava tsirairay avy.

³ Nikambana tamin'izy ireo i Menela sady nihatsaravelatsihy ery manangoly an'i Antiokosa; kanefa tsy mba ho famonjena ny tanindrazany izany fa noho ny fanantenany haverina indray amin'ny andraikitra maha mpisorombe azy.

⁴ Kanjo ny TOMPO, ilay Mpanjakan'ny mpanjaka, dia nampirehi-katezerana an'i Antiokosa tamin'ilay tsy mifaditrovana io. Nasehon'i Lisia tamin'ny mpanjaka manko fa io Menela io no fototr'izao loza rehetra izao; ka nasain'i Antiokosa nentina any Berea izy, dia hovonoina ho faty any araka ny fanao amin'izany toerana izany.

⁵ Tao amin'io tanana io dia nisy tilikambo anankiray feno lavenona; 25 metatra ny haavony ka teny an-tampony no voaisy milina mihodina ary mampirona hatraiza hatraiza hankao an-davenona.

⁶ Ao no famarinana ny olo-meloka nandroba tempoly na diso tamina heloka bevava hafa koa.

⁷ Toy izany no nahafatesan'i Menela, ilay mpanohitra ny lalanan'Andriamanitra; ary rariny loatra ny tsy nahazoany fandevenana.

⁸ Nanota imbetsaka tamin'ny alitaran'ny TOMPO manko izy: madio ny afo aman-davenon'izany alitara izany ka tao anaty lavenona izy no tojo ny fahafatesana.

⁹ Niroso hatrany ny dian'i Antiokosa mpanjaka; feno hevitra barbarianina ny sainy ka nivonon-kamely mafy ny Jiosy izy mihoatra noho ny nataon-drainy.

¹⁰ Vao nahalala izany i Joda Makabeo, dia nandidy ny vahoaka hiantso ny TOMPO andro aman'alina mba hovonjeny amin'izao indray mandeha izao koa; tsara hoesorina amin'ny Jiosy manko ny lalanany sy ny tenin-drazany ary ny tempoly masina.

¹¹ Izany vahoaka izay vao teo no nahita hiainana izany no nasain'i Joda nivavaka mba tsy havelan'ny TOMPO ho latsaka eo am-pelatanan'ny firenena mpaniratsira.

¹² Niara-nivavaka toy izany izy rehetra sy nitaraina tamin'ny TOMPO mpamindrafo ka nanao an-dranomaso sy nifady hanina sady nandohalika lalandava nandritra ny telo andro; avy eo dia nanao teny fampaherezana azy i Joda ary nandidy azy hiomana hiatrika ady.

¹³ Rehefa niresaka manokana tamin'ny loholona i Joda, dia nanapa-kevitra ny tsy hiandry ny mpanjaka hitondra ny tafiny hiditra ao Jodea sy haka ny tanana Jerosalema, fa ny hiainga kosa miaraka amin'izay sy hisahan-draharaha omban'ny fanampian'ny TOMPO.

¹⁴ Koa nankininy tamin'ilay Mpahary an'izao tontolo izao ny ho fiafaran'ny ady; fa nampirisihany ny namany hiady amin-kerimpo hatramin'ny fahafatesana ho an'ny lalanany sy ny tempoliny, ho an'i Jerosalema sy ho an'ny tanindrazany ary ho an'ny fitondram-pireneny. Ary nasain'i Joda nitoby eo amin'ny manodidina an'i Modina ny tafiny.

¹⁵ Nomeny ny teny haikan'ady hoe "Andriamanitra no fandresena" ireo miaramilany, vao nifidy ny matanjaka indrindra tamin'ireo zatovo mpiady izy, dia namely tamin'ny alina ny faritra nisy ny lain'ny mpanjaka, ary nahafaty antokon-tafika roa tao an-tobim-pahavalo; fanampin'ireo koa dia voatrobaka ho faty ilay lehibe indrindra tamin'ny elefanta mbamin'ny mpitondra azy.

¹⁶ Hany ka nivadi-po sy nifanaritaka aoka izany ny tao an-tobim-pahavalo vao nialan'ny Jiosy tamim-pahombiazana tanteraka

¹⁷ fony efa nazava ratsy ny andro. Vita tomombana ny fanafihana natao, satria nomba fiarovana an-dry i Joda ny TOMPO.

¹⁸ Rehefa tsapan'i Antiokosa mpanjaka izany herimpon'ny Jiosy izany, dia izay hahazoana an-kafetsena ireo tanana nisy azy no nandramany.