1 Makabeo

Toko faha-11

⁵⁸ Nandefasany vazy volamena sy fanaka fomban-databatra koa izy, sady nomeny lalana hisotro amina tsatokaty volamena, ary koa hitafy jaky sy hitondra jaigrafy volamena.

⁵⁹ I Simona rahalahiny kosa notendren'i Antiokosa ho mpitari-tafika amin'ny faritany eo anelanelan'ny Fiakaran'i Tiro sy ny sisin-tanin'i Ejipta.

⁶⁰ Niainga i Jonatana tamin'izay, ka nitety ny faritany manontolo andrefan'i Eofrata ary nifindrafindra tanana. Nivory homba azy sy hiara-miady aminy avokoa ny miaramila rehetra tany Siria. Tonga tao Askelona izy, ka notsenain'ny mponina tamim-pomba manetriketrika.

⁶¹ Avy teo izy dia nankany Gaza ; saingy nanidy vavahady teo anoloan'i Jonatana ny mponina, ka sady nataony fahirano ny tanana no namaboany sy nodorany ny tanana madinika manodidina azy.

⁶² Koa nitaraina tamin'i Jonatana ny olona tao Gaza; dia nekeny ny hihavana tamin'ireo, nefa nalainy ho antoka ny zanakalahin'ny lehibeny ka nalefany ho any Jerosalema. Noteteziny toy izany ny tany hatrany Damasy.

⁶³ Ren'i Jonatana tamin'izay fa tonga ao Kedesa any Galilea ireo jeneralin'i Demetry sady nitondra tafika goavana hisakanana azy amin'ity asa tontosainy.

⁶⁴ Koa niroso i Jonatana hifanehatra aminy, fa i Simona rahalahiny no napetrany tao Jodea.

⁶⁵ Lasa nankany Bety-Tsoro i Simona nanodidina azy sy nanao fahirano azy naharitra andro maromaro.

⁶⁶ Nangata-pihavanana taminy ny voafahirano ka nekeny; saingy nasainy nivoaka ny tanana ireo, dia noraisiny ho azy i Bety-Tsoro ka nametrahany andia-miaramila.

⁶⁷ I Jonatana sy ny tafiny kosa nitoby teo akaikin'ny farihin'i Genesareta. Ny ampitsovao maraina no nidirany tao amin'ny lemak' i Hatsora.

⁶⁸ Ary indreo ny miaramila hafa firenena tamy hitsena azy teo amin'io lemaka io, sady nandefa otrika teo an-tendrombohitra hamelezana an'i Jonatana. Ny ankamaroan'ny fahavalo no nandroso hanehatra azy teo anoloana,

⁶⁹ fa nipoitra tampoka kosa ny otrika avy ao am-piereny ka nisantatra ady.

⁷⁰ Dia vaky nandositra ny miaramila rehetra mpomba an'i Jonatana; tsy nisy nijanona afa-tsy i Matatia zanakalahin'i Absaloma ary koa i Joda zanakalahin'i Kalfy, samy jeneralin-tafika.

⁷¹ Tamin'izay i Jonatana dia nandriatra ny fitafiany sy nanosim-bovoka ny lohany ary nivavaka.

⁷² Avy eo izy vao lasa indray niady tamin'ny fahavalo ka nanosika azy hihemotra sy nampandositra azy.

⁷³ Nahita izany ireo mpitsoaka ady nandao an'i Jonatana dia niverina taminy indray ka niara-nanenjika ny fahavalo hatrany Kedesa nisy ny tobiny; dia izy ireo indray no tonga nitoby tamin'io toerana io.

⁷⁴ Nisy vatan-dehilahy andiany telo ireo miaramila hafa firenena no maty tamin'izany andro izany; ary niverina ho any Jerosalema i Jonatana.

Toko faha-12

¹ Hitan'i Jonatana fa nanambina azy ny toe-javatra; ka nifidy olona izy nalefany tany Roma mba hanamafy sy hanavao ny fihavanan'ny Jiosy amin'ny Romanina.

² Nandefasany taratasy araka izany tanjona izany koa i Sparta sy ny tanana hafa.

³ Ary nankany Roma ireto iraka, dia niditra tao amin'ny Antenimieran-doholona, ka nanao taminy hoe: -I Jonatana mpisorombe sy ny firenena jiosy no naniraka anay ho aty aminareo mba hanavao ny fihavanana amam-pifanekenareo aminy toy ny teo aloha.

⁴ Dia nomen'ny Antenimieran-doholona taratasy ireto iraka mba ho an'ny manampahefana romanina any amin'ny isan-tanana ho lalovany; ka hataon'ireo manampahefana ireo izay hiverenan'ny iraka soa aman-tsara any Jodea.

⁵ Izao kosa no kopian'ny taratasy nalefan'i Jonatana ho an'ny mponin'i Sparta:

⁶ "Izaho Jonatana mpisorombe sy ny loholom-pirenena ary ny mpisorona mbamin'ny vahoaka jiosy ankoatr'ireo no manoratra aminareo havanay monina ao Sparta ary koa miarahaba anareo.

⁷ Tany aloha dia efa nisy taratasy noraisin'i Onia mpisorombenay; i Areiosa, izay nanjaka taminareo fahiny, no nandefa io taratasy io ka nilaza fa havanay ianareo, araka ny voaporofon'ny kopia etsy ambanin'ity taratasiko ity.

⁸ Noraisin'i Onia tamim-pomba manetriketrika ny iraka reo; ary noraisiny koa ilay taratasy milaza mazava ny fiaraha-miasa sy fisakaizana.

⁹ Efa manana ny boky masina eo am-pelatananay izahay ho fiononam-po, ka tsy voatery hila izany zavatra izany,

¹⁰ saingy niezaka nandefa iraka taty aminareo ihany izahay hanavao ny fifankatiavana amam-pisakaizana ifamatorantsika, mba tsy ho zary olon-kafa aminareo izahay; taona maro manko izay no efa lasa, hatramin'ilay nandefasanareo iraka taty aminay.

¹¹ Izahay aloha, amin'ny fotoana rehetra, dia tsy mitsaha-mahatsiaro anareo fony manolotra sorona sy mivavaka na amin'ny fety fankalazanay na amin'ny andro masina hafa, araka izay mety sy tokony hahatsiarovan-kavana.

¹² I falianay koa ny lazanareo,

¹³ saingy izahay no hodidinin-doza maro amam-pamelezana tsy an-kijanona ary iadian'ireo mpanjaka manodidina anay.

¹⁴ Tsy satrinay tamin'izany ny nanahirana anareo sy ireo mpiara-miasa aminay ary sakaizanay hafa koa.

¹⁵ Fa manana ny vonjy avy amin'Andriamanitra hanampy anay izahay; ka dia Izy no manafaka anay sy manetry ny fahavalonay.

¹⁶ Kanefa nofidinay i Nomeniosa zanakalahin'i Antiokosa ary koa i Antipatera zanakalahin'i Jasona, ka nirahinay ho any amin'ny Romanina mba hanavao ny fisakaizana sy fiaraha-miasa nifanaovanay fahiny taminy."

¹⁷ Nohafaranay izy roa lahy hankaty aminareo koa mba hiarahaba anareo sy hitondra ny taratasinay momba ny fanavaozana ny fihavanantsika.

¹⁸ Ary ankehitriny, dia ny mamaly anay ny amin'izany no mety hataonareo.

¹⁹ "Izao no kopian'ny taratasy efa nampitondraina taloha tamin'i Onia:

²⁰ Izaho Areiosa, mpanjakan'i Sparsiata, no manoratra aminao, ry Onia mpisorombe, ary miarahaba anao."

²¹ Misy tahirin-tsoratra momba ny Sparsiata sy ny Jiosy nahitana fampihavana ny firenena roa tonta ary samy taranak'i Abrahama.

²² Ka amin'izao ahalalantsika an'izany izao, tsara ho anay ny anoratanareo ny amin'ny toe-karenareo.

²³ Fa izahay kosa dia manoratra aminareo hoe: Anareo ny biby fiompinay sy ny fanananay tahaka ny maha anay ny biby fiompinareo sy ny fanananareo. Noho izany, omenay baiko ny irakay hanao filazana araka izany aminareo."

²⁴ Nahare i Jonatana fa niverina hamely azy ny jeneralin'i Demetry, mitondra tafika lehibe lavitra noho ny teo indray.

²⁵ Ka niala tao Jerosalema i Jonatana, dia lasa nisehatra azy tao amin'ny faritr'i Hamata ; fa tsy navelany ho afa-kitsofoka amin'ny taniny akory ireo.

²⁶ Nandefa mpitsikilo ho any an-tobin'ny fahavalo i Jonatana; ka nony tafaverina ireo, dia nilaza fa nikasa hanao sovok'ady amin'ny alina ny tafika sirianina.

²⁷ Nony lentika ny masoandro, dia nodidian'i Jonatana ireo mpomba azy mba hiari-tory ka hitam-piadiana tontolo alina ho vonon-kiady; ary nandefa sany mpitily koa manodidina ny toby israelita.

²⁸ Ren'ny fahavalo kosa fa mivonon-kiady i Jonatana sy ireo mpomba azy, ka raiki-tahotra mafy izy; nivadi-po ny tafika sirianina, dia nandrehitra afo teo an-toby ary lasa nandositra.

²⁹ Maraina ihany vao fantatr'i Jonatana sy ireo mpomba azy ny zava-nitranga, satria hitany nirehitra hatrany ny afo.

³⁰ Dia lasa nanenjika ny fahavalo i Jonatana, nefa tsy nahatratra azy intsony fa efa tafita ny ony Eleotera ireo.

³¹ Tamin'izay i Jonatana dia nihodina hamely an'ireo Arabo atao hoe Zabadeanina; noreseny ireo ary nobaboiny ny fananany.

³² Avy teo izy dia nankany Damasy sady nitety ny faritra manontolo.

³³ I Simona koa teo an-daniny dia niainga hiantafika sy nandroso hatrany Askelona sy hatrany amin'ireo trano mimanda mifanila aminy; dia nihodina nankany Jopa izy sy nitana an'io tanana io,