Jeremià
Toko faha-26
5 ary mihainoa ny tenin'ireo mpaminany mpanompoko. Tsy nitsahatra naniraka azy taty aminareo Aho, nefa tsy nihaino azy ianareo.6 Fa raha tsy mihaino ianareo, dia horavako tahaka ny nandravako ilay tao Silao ity trano ity ; ary ny tananan'i Jerosalema dia hataoko oha-panozonana any amin'ny firenena rehetra eran-tany."
7 Ny mpisorona sy ny mpaminany ary ny vahoaka rehetra teo dia samy nahare an'i Jeremia nanambara ireo teny ireo tao an-tranon'ny TOMPO.
8 Koa rehefa tapitra voalazan'i Jeremia ny teny rehetra izay nasain'ny TOMPO nambarany tamin'ny besinimaro teo, dia nosamborin'izy rehetra i Jeremia ka nataony hoe:-Mendrika ho faty ianao.
9 Ahoana no ahasahianao milaza amin'ny anaran'ny TOMPO fa ho ravana tahaka ny tao Silao ity trano ity, ary ho simba sady tsy hisy mponina ity tanana ity?Tamin'izay dia nitangorona hamely an'i Jeremia izay rehetra teo an-kianjan'ny tranon'ny TOMPO.
10 Nony ren'ireo mpitondran'i Joda ny zava-nitranga, dia niakatra avy tao an-dapan'ny mpanjaka hankao an-tranon'ny TOMPO izy, ka nipetraka hitsara teo anoloan'ny vavahady vaovao amin'ny tranon'ny TOMPO.
11 Dia hoy ireo mpisorona ama-mpaminany tamin'ny mpitondran'i Joda ary koa tamin'ny vahoaka rehetra teo:-Mendrika ho faty io lehilahy io, satria naminany ny hamelezana ity tanana ity izy, ary ny sofinareo mihitsy no efa nandre.
12 Fa namaly ny mpitondra sy ny vahoaka rehetra teo i Jeremia ka nanao hoe:-Ny TOMPO no naniraka ahy hanambara ny hamelezana ity trano ity sy ity tanana ity araka izay efa renareo teo.
13 Koa ankehitriny hatsarao ny fitondrantenanareo sy ny fomba fanaonareo; henoy izay lazain'ny TOMPO Andriamanitrareo, dia tsy hampiharin'ny TOMPO ilay loza efa nolazainy hamelezana anareo.
14 Ary raha ny tenako dia indro eo am-pelatananareo; ka ataovy amiko izay heverinareo ho tsara sy mahitsy.
15 Saingy izao, raha hamono ahy ho faty ianareo, dia fantaro fa mamono ny tsy manan-tsiny ka hibaby ny vokatr'izany ianareo sy ny mponina rehetra amin'ity tanana ity; satria ny TOMPO tokoa no naniraka ahy hankaty aminareo hanambara ireo teny rehetra ireo mba ho renareo.
16 Tamin'izay dia hoy ireo mpitondra sy ny vahoaka rehetra tamin'ny mpisorona sy ny mpaminany hoe:-Tsy mendrika ho faty ity lehilahy ity fa tamin'ny anaran'ny TOMPO Andriamanitsika no nitenenany tamintsika.
17 Nisy nitsangana aza ny loholona ka niteny tamin'ny vahoaka vory teo hoe:
18 -Tamin'ny andron'i Hezekia mpanjakan'i Joda dia nisy mpaminany atao hoe Mika avy any Moreseta. Niteny tamin'ny vahoaka rehetra tao Joda izy ka nanao hoe:Izao no lazain'ny TOMPOn'izao rehetra izao: "Ho voatrongitrongy toy ny tanimboly i Tsiona, ho tonga ko
19 Moa nampamono azy ho faty va i Hezekia mpanjaka sy ny vahoaka rehetra tao Joda? Tsia, fa nanaja ny TOMPO izy ary niezaka hampitony Azy. Koa tsy nampiharin'ny TOMPO ilay loza efa nolazainy hamelezana azy. Fa isika kosa hampidi-doza lehibe ho an'ny tenantsika, raha manameloka ho faty io lehilahy io.
20 Nisy mpaminany iray hafa koa niteny tamin'ny anaran'ny TOMPO, dia i Oria zanakalahin'i Semahia sady avy any Kiriata-Jeharima. Nanambara ny hamelezana an'i Jerosalema sy ny tanin'i Joda koa izy tahaka ny hafatra rehetra efa nataon'i Jeremia.
21 Fa raha nandre ny tenin'i Oria i Joiakima mpanjaka sy ireo mpiambina azy ary ny mpitondra rehetra, dia nitady hahafaty azy. Ren'i Oria izany, dia natahotra izy ka nandositra tany Ejipta.
22 Fa i Joiakima mpanjaka naniraka an'i Elnatana zanakalahin'i Akbora mbamin'ny lehilahy vitsivitsy hankany Ejipta.
23 Koa nalain'ireo avy any Ejipta i Oria ary nentiny teo amin'i Joiakima mpanjaka. Dia nasainy novonoina izy ary nariany tao amin'ny fasam-bahoaka ny fatiny.
24 Fa i Jeremia kosa narovan'i Ahikama zanakalahin'i Safana ka tsy nisy sahy nanolotra azy ho eo an-tanan'ny vahoaka mba hovonoina ho faty.
Toko faha-27
1 Tamin'ny fiandohan'ny nanjakan'i Tsedekia , zanakalahin'i Josia sady mpanjakan'i Joda, dia nisy teny avy amin'ny TOMPO tonga tamin'i Jeremia nanao hoe:2 "Izao no voalazan'ny TOMPO: Manamboara mahazaka sy zioga ka lanjao eny an-tsorokao.
3 Avy eo dia alefaso any amin'ny mpanjakan'i Edoma sy ny mpanjakan'i Moaba ary ny mpanjakan'ny Hamonita mbamin'ny mpanjakan'i Tiro sy ny mpanjakan'i Tsidona ireny. Ampitondray ireo maso ivohony tonga eto Jerosalema mba hihaona amin'i Tsedekia mpanjakan'i Joda ireny zioga ireny;
4 sady asaovy ampitainy tsara amin'ny Tompony avy ity hafatra ity: Izao no lazain'ny TOMPOn'izao rehetra izao sady Andriamanitr'i Israely ka hampitainareo amin'ny TOMPOnareo:"
5 Izaho no nanao ny tany sy ny olona ary ny biby eny ambonin'ny tany tamin-kery lehibe sy tamim-pahefana tsy hay tohaina, ka manome azy ho an'izay tiako.
6 Koa ankehitriny dia atolotro eo an-tanan'i Nebokadnetsara mpanjakan'i Babilona sady mpanompoko ny taninareo rehetra; ary atolotro hanompo azy na dia ny bibidia aza.
7 Hanompo azy sy ny zanany mbamin'ny zafikeliny ny firenena rehetra ambara-pahatongan'ny andro hanompoan'ny taniny kosa an'ireo firenena matanjaka kokoa sy mpanjaka lehibe kokoa.
8 "Koa raha misy firenena na fanjakana tsy mety manompo an'i Nebokadnetsara, eny, raha misy firenena tsy manaiky hitondra ny zioga izay hampitondrain'i Nebokadnetsara azy, dia hirotsaka an-tsehatra Aho hamely izany firenena izany amin'ny ady sy ny mosary ary ny areti-mandringana, hoy ny teny hentitra avy amiko TOMPO; ary ny tanan'i Nebokadnetsara no hasaiko mandripaka azy.
9 Noho izany, dia aza henoinareo ny mpaminaninareo na ny mpisikidy milaza ny ho avy amin'ny antsapaka, na ny mpilaza nofy na ny mpanandro na ny mpimasy izay mihambo fa tsy hanompo an'i Nebokadnetsara ianareo."
10 Fa maminany lainga aminareo izy; koa raha mihaino azy ianareo, dia hoentina hanalavitra ny taninareo. Eny, horoahiko hiala eto ianareo ka ho lany ringana.
11 Fa ny firenena, izay manaiky hitondra ny zioga ampitondrain'ny mpanjakan'i Babilona azy kosa ka manompo azy, dia havelako ho eo amin'ny taniny, ary ho afaka hamboly azy sy honina eo, hoy ny teny hentitra avy amiko TOMPO.
12 Araka izany hafatra izany koa no nilazan'i Jeremia tamin'i Tsedekia mpanjakan'i Joda hoe: "Maneke hitondra ny zioga izay ampitondrain'ny mpanjakan'i Babilona ianao sy ny vahoakanao, ka manompoa azy sy ny vahoakany, dia ho velona ianareo.
13 Fa nahoana moa no tsy maintsy ho faty amin'ny ady sy ny mosary ary ny areti-mandringana ianao sy ny vahoakanao? Izany no hanjo ny firenena rehetra izay tsy manaiky hanompo ny mpanjakan'i Babilona araka izay voalazan'ny TOMPO.
14 Misy mpaminany mihambo milaza fa tsy hanompo ny mpanjakan'i Babilona intsony ianareo. Maminany lainga izy, ka aza mihaino azy ianareo.
15 Hentitra kosa ny tenin'ny TOMPO hoe: "Tsy naniraka ireny Aho. Mihambo miteny amin'ny anarako izy, nefa mandainga. Koa raha mihaino azy ianareo, dia horoahiko hiala eto, ka ho lany ringana ianareo sy ireto mpaminany izay maminany aminareo."
16 Farany dia ireo mpisorona sy ny vahoaka rehetra teo no nitenenan'i Jeremia hoe: "Izao no lazain'ny TOMPO: "Aza mihaino ny tenin'ireo mpaminany izay milaza aminareo fa haverina haingana avy any Babilona ny fanaky ny tranon'ny TOMPO , satria lainga izay nambarany taminareo.
17 Aza mihaino azy fa manompoa an'i Nebokadnetsara, dia ho velona ianareo. Fa nahoana no avela ho rava ity tanana ity?"
18 Sady nampian'i Jeremia hoe: "Raha mpaminany tokoa ireo olona ireo, ka tena mitondra ny hafatra avy amin'ny TOMPO, dia aoka izy hangataka amin'ny TOMPOn'izao rehetra izao mba tsy havelany hoentina any Babilona ireo fanaka sarobidy sisa mbola ao an-tranon'ny TOMPO sy ao an-dapan'ny mpanjakan'i Joda na eto an-tanana.
19 Fa manan-ko lazaina ny TOMPOn'izao rehetra izao momba ireo andry sy ilay fitobian-drano goavana ary ireo kovetabe misy faladia mbamin'ireo fanaka hafa mbola eto Jerosalema. (
20 I Nebokadnetsara mpanjakan'i Babilona manko tsy mbola nitondra ireo fitaovana ireo avy tao Jerosalema hankany Babilona fony izy nitondra an'i Jekonia , zanakalahin'i Joiakima sady mpanjakan'i Joda sy ireo olo-manankaja rehetra avy eto Joda sy i Jerosalema.)
21 Koa izao no lazain'ny TOMPOn'izao rehetra izao sady Andriamanitr'i Israely, ny amin'ireo fanaka sisa tafajanona ao an-tranon'ny TOMPO sy ao an-dapan'ny mpanjakan'i Joda na eto Jerosalema:
22 Hoentina any Babilona ireo fanaka rehetra ireo, ary hijanona any ambara-piavin'ny andro hirotsahako an-tsehatra hampakatra sy hamerina azy eto amin'ity toerana ity indray. Izany no teny hentitry ny TOMPO.
Toko faha-28
1 Tamin'iny taona iny ihany, izany hoe ny taona fahefatra nanjakan'i Tsedekia mpanjakan'i Joda, andro iray tamin'ny volana fahadimy , dia nankao an-tranon'ny TOMPO i Hanania mpaminany, zanakalahin'i Hazora sady avy any Gibehona. Niteny tamin'i Jeremia teo imason'ny mpisorona sy ny vahoaka rehetra teo izy, ka nanao hoe:2 Izao no lazain'ny TOMPOn'izao rehetra izao sady Andriamanitr'i Israely: Hopotehiko ny ziogam-pamoretana angejan'ny mpanjakan'i Babilona anareo.
3 Ka alohan'ny roa taona manomboka androany, dia haveriko eto ireo fanaka rehetra tato an-tranoko, fanaka izay nalain'i Nebokadnetsara mpanjaka ka nentiny tany Babilona.
4 Haveriko eto koa i Jekonia, zanakalahin'i Joiakima sady mpanjakan'i Joda, mbamin'ny Jodeanina rehetra izay nentina ho babo tany Babilona, hoy ny teny hentitra avy amiko TOMPO. Eny, hopotehiko ny ziogam-pamoretana angejan'ny mpanjakan'i Babilona anareo."
5 Fa namaly an'i Hanania mpaminany i Jeremia teo imason'ny mpisorona sy ny vahoaka rehetra izay tao an-tranon'ny TOMPO
6 ka nanao hoe: "Eny, enga tokoa anie mba ho araka izay nolazainao no hataon'ny TOMPO! Hotanterahiny anie izay nambaranao ka haveriny avy any Babilona hanketo indray ireo fanaka rehetra tao an-tranon'ny TOMPO miaraka amin'ny babo rehetra!
7 Kanefa henoy tsara izao teny ataoko renao sy ren'ny vahoaka rehetra eto izao:
8 Efa nisy tokoa mpaminany hatry ny ela talohanao sy talohako. Ireny mpaminany ireny dia manambara hafatra tamin'ireo tany matanjaka sy fanjakana malaza; nefa ady sy loza ary areti-mandringana no nambarany mazana.