1 Mpanjaka

Toko faha-22

¹⁸ Dia hoy ny mpanjakan'i Israely tamin'i Josafata: Tsy efa voalazako taminao va fa tsy mba mety maminany soa ho ahy izy fa loza ihany?

¹⁹ Ary hoy indray i Mikaia: Henoy ary ny tenin'ny TOMPO: Hitako nipetraka teo amin'ny sezafiandrianany manko ny TOMPO; ary ireo anjeliny marobe any an-danitra nijoro teo ankavanany sy teo ankaviany.

²⁰ Ka hoy ny TOMPO nanontany hoe: Iza no hitaona an'i Ahaba handeha hanafika an'i Ramota-Gilehada mba hahafaty azy any? Ary samy nanana ny fomba famaliny avy ny tsirairay.

²¹ Fa nandroso ka nitsangana teo anoloan'ny TOMPO ny fanahy anankiray ary nanao hoe: Izaho no hitaona azy! Hoy kosa ny TOMPO hoe: Amin'ny fomba ahoana?

²² Dia hoy izy: Handeha aho, ka ho tonga fanahy mandainga ao am-bavan'ireo mpaminanin'i Ahaba rehetra. Ary hoy indray ny TOMPO: Ho voataonanao tokoa izy, sady zavatra manavanana anao izany; ndeha ary ka ataovy!

²³ Ankehitriny, raha ny TOMPO efa nanisy fanahy mandainga ao am-bavan'ireto mpaminaninao rehetra ireto, dia satria IZY mihitsy no efa nilaza ny loza hanjo anao.

²⁴ Tamin'izay nanatona an'i Mikaia i Tsedekia zanakalahin'i Kenahana, ka namely tehamaina azy sady nanao hoe: Niala tamiko ve ny Fanahin'ny TOMPO mba hiteny aminao?

²⁵ Dia novalian'i Mikaia hoe: Indro fa ho hitanao izany amin'ny andro izay hitsofotsofohanao efitrano mba hiery.

²⁶ Tamin'izay ny mpanjakan'i Israely dia nibaiko hoe: Sambory i Mikaia, dia ento miverina any amin'i Amona governoran'ny tanana sy any amin'i Joasy zanako lahy,

²⁷ ka lazao ireo fa baiko avy amiko ny hanaovana ity olona ity an-tranomaizina ary ny hamahanana azy mofo kely sy rano kely fotsiny mandra-piveriko soa aman-tsara.

²⁸ Fa hoy kosa i Mikaia: Raha tahiny ka tafaverina soa aman-tsara ianao, dia tsy nampitenenin'ny TOMPO aho tsy akory.

²⁹ Dia lasa nanafika an'i Ramota-Gilehada ny mpanjakan'i Israely sy i Josafata mpanjakan'i Joda.

³⁰ Ary hoy ny mpanjakan'i Israely tamin'i Josafata: Hody olon-kafa aho, dia hirotsaka an'ady; fa ianao kosa miakanjoa ny fanamianao ihany. Dia nody olon-kafa ny mpanjakan'i Israely ka nirotsaka an'ady.

³¹ Fa ny mpanjakan'i Siria kosa efa nanome baiko ireo komandy 32 mifehy ny kalesiny mba tsy hamely miaramila tsotra na mpitari-tafika fa ny mpanjakan'i Israely ihany.

³² Nony nahita an'i Josafata ireo komandin-kalesy, dia nihevitra azy ho ny mpanjakan'i Israely mihitsy. Dia isangodinany hiadiana izy; kanjo niantsoantso mafy i Josafata.

³³ Rehefa hitan'ireo komandin-kalesy fa tsy ny mpanjakan'i Israely io, dia nialany.

³⁴ Ary nisy miaramila sirianina anankiray nandefa zana-tsipika tsy nahy, ka nahavoa ny mpanjakan'i Israely teo anelanelan'ny famavan'ny akanjo vy fiarovan-tratrany. Dia hoy ity mpanjaka tamin'ny mpamily ny kalesiny: Ahodino ny kalesy, ka ento miala ny toeram-piadiana aho fa maratra mafy.

³⁵ Kanefa nihamafy ny ady tamin'izay andro izay; koa tsy maintsy notohanana ny mpanjaka mba hitsangana teo amin'ny kalesiny nanoloana ny tafika sirianina; ary maty izy nony hariva ny andro, fa nitsika tao anatin'ny kalesiny ny ra tamin'ny ratrany.

³⁶ Rehefa nilentika ny masoandro, dia nanako eran'ny toby izao antsoantso izao hoe: Samia mody any an-tananany sy any amin'ny taniny avy,

³⁷ fa maty ny mpanjaka! Dia nentina tany Samaria ny razana ka nalevina tao.

³⁸ Ary rehefa nosasana teo amin'ny farihin'i Samaria ny kalesin'i Ahaba, dia avy ny alika nilelaka ny rany, ary ny mpivarotena nandro teo, araka ny tenin'ny TOMPO.

³⁹ Ny sisa amin'ny tantaran'i Ahaba ary koa ny zavatra hafa rehetra vitany, ny trano ivoara nataony sy ny tanana rehetra naoriny, dia voasoratra ao amin'ny boky milohateny hoe Asan'ireo mpanjakan'i Israely.

⁴⁰ Rehefa lasa nodimandry any amin'ny razany izy, dia i Ahazia zanany lahy no nanjaka nandimby azy.

⁴¹ Tamin'ny taona fahefatra nanjakan'i Ahaba mpanjakan'i Israely no tonga mpanjakan'i Joda i Josafata zanakalahin'i Asa.

⁴² Feno 35 taona i Josafata fony vao nanjaka, ary naharitra 25 taona no nanjakany tany Jerosalema. Ny anaran-dreniny dia i Hazoba, zanakavavin'i Silehy.

⁴³ Narahiny avokoa ny toetran'i Asa rainy ka tsy niala tamin'izany izy, fa nanao izay mahitsy eo imason'ny TOMPO.

⁴⁴ Kanefa ny toeram-panasinana tsy voafongotra, fa ny olona dia mbola nanao sorona sy nandoro azy hanetona teny ihany.

⁴⁵ Ary nanao fanekempihavanana tamin'ny mpanjakan'i Israely i Josafata.

⁴⁶ Ny sisa amin'ny tantaran'i Josafata ary koa ny herimpo nasehony sy ny ady natrehiny, dia voasoratra ao amin'ny boky milohateny hoe Asan'ireo mpanjakan'i Joda.

⁴⁷ Izy no namongotra teo amin'ny tany ireo lehilahy sy vehivavy nitolo-tena hijangajanga ho fanompoan-tsampy ka mbola velona tamin'ny andron'i Asa rainy.

⁴⁸ Tsy nisy mpanjaka tany Edoma tamin'izany fotoana izany, fa governora notendren'ny mpanjaka ihany.

⁴⁹ Nanamboatra sambo vaventy haka volamena any Ofira i Josafata; nefa tsy afa-niainga ireo sambo ireo, satria rendrika tao Hetsiony-Gebera.

⁵⁰ Dia hoy i Ahazia zanakalahin'i Ahaba tamin'i Josafata: Aoka hiaraka amin'ny tantsambonao ny tantsamboko. Fa tsy nety i Josafata.

⁵¹ Ary rehefa lasa nodimandry any amin'ny razany i Josafata, dia nalevina am-pasan-drazana tao an-tananan'i Davida; ary i Jorama zanany lahy no nanjaka nandimby azy.

⁵² Tamin'ny taona faha-17 nanjakan'i Josafata mpanjakan'i Joda no tonga mpanjakan'i Israely tao Samaria i Ahazia zanakalahin'i Ahaba; ary naharitra roa taona no nanjakany tamin'i Israely.

⁵³ Nanao izay ratsy eo imason'ny TOMPO izy fa nanaraka ny toetran'ny rainy sy ny reniny ary ny toetran'i Jerobohama izay zanakalahin'i Nebata sady nampanota an'i Israely.

⁵⁴ Nanompo an'i Bahala sady niankohoka teo anatrehany izy ary nampahatezitra ny TOMPO Andriamanitr'i Israely tahaka izay nataon-drainy ihany.

2 Mpanjaka

Toko voalohany

¹ Taorian'ny nahafatesan'i Ahaba dia nikomy tamin'i Israely i Moaba.

² Indray andro i Ahazia mpanjakan'i Israely dia nianjera avy teny an-davarangan'ny efitrano ambony amin'ny lapany tao Samaria ka naratra mafy. Dia naniraka olona izy hanontany an'i Bahala-Zeboba andriamanitry ny tananan'i Hekrona, raha toa ka ho sitrana amin'izao ratra nahazo azy izao na tsia.

³ Fa hoy kosa ny anjelin'ny TOMPO tamin'i Elia avy any Tisbe: Mandehana mihaona amin'ny iraky ny mpanjakan'i Samaria ka lazao izy hoe: Moa tsy misy Andriamanitra ve any Israely no mandeha hanontany an'i Bahala-Zeboba andriamanitr'i Hekrona ianareo?

⁴ Dia ampio koa hoe: Izao no tenin'ny TOMPO ho an'ny mpanjakan'i Israely: 'Tsy hiala eo am-parafara izay nandrianao intsony ianao, fa ho faty tokoa.' Ary lasa i Elia nampita hafatra.

⁵ Dia niverina tany amin'ny mpanjaka ireto iraka. Rehefa nanontany ny anton'ny niverenany kosa i Ahazia, dia novaliany hoe:

⁶ Nisy lehilahy iray nanatona anay sady nanome baiko anay mba hiverina aty aminao ka hilaza aminao izao tenin'ny TOMPO izao: Moa tsy misy Andriamanitra ve any Israely no maniraka hanontany an'i Bahala-Zeboba andriamanitr'i Hekrona ianareo? Noho izany, dia tsy hiala eo am-parafara izay nandrianao intsony ianao, fa ho faty tokoa!

⁷ Ary hoy ny mpanjaka tamin'ireo: Fa manao ahoana izay lehilahy tonga nitsena anareo izay ka nilaza izany teny izany taminareo?

⁸ Dia novaliany hoe: Manao akanjo volom-biby sy fehikibo hoditra izy. Dia hoy ny mpanjaka: I Elia avy any Tisbe izay!

⁹ Dia nandefa manamboninahitra iray miaraka amin'ny miaramila dimampolo ny mpanjaka mba hisambotra an'i Elia. Ary ireo niakatra tery an-tampon-tendrombohitra izay nipetrahan'i Elia. Dia nitenenan'ilay manamboninahitra izy hoe: Ry olon'Andriamanitra o, midina ianao, hoy ny mpanjaka!

¹⁰ Fa novalian'i Elia hoe: Raha olon'Andriamanitra tokoa aho, dia aoka hisy afo hilatsaka avy any an-danitra handevona anao sy ny miaramila dimampolo fehezinao! Dia nisy afo nilatsaka avy tany an-danitra ka nandevona ilay manamboninahitra sy ny miaramilany dimampolo.

¹¹ Ary nalefan'ny mpanjaka indray ny manamboninahitra iray hafa miaraka amin'ny miaramila dimampolo hankany amin'i Elia. Dia nitenenan'ilay manamboninahitra izy hoe: Ry olon'Andriamanitra, midina faingana ianao, hoy ny mpanjaka!

¹² Fa novalian'i Elia hoe: Raha olon'Andriamanitra tokoa aho, dia aoka hisy afo hilatsaka avy any an-danitra handevona anao sy ny miaramila dimampolo fehezinao! Dia nisy afo nilatsaka avy tany an-danitra ka nandevona ilay manamboninahitra sy ny miaramilany dimampolo.

¹³ Mbola nalefan'ny mpanjaka koa ny manamboninahitra iray hafa miaraka amin'ny miaramila dimampolo. Dia niakatra ny tendrombohitra ilay manamboninahitra; rehefa tonga izy, dia nandohalika teo anatrehan'i Elia ka nitalaho taminy nanao hoe: Ry olon'Andriamanitra o, mba tsimbino re ny aiko sy ny an'ireto miaramilako dimampolo ireto!