2 Tantara

Toko faha-35

⁶ Natao hamono ny biby ho an'ny sakafo Paska ianareo ka midiova tena ary mivonona hiasa ho an'ny mpiray firenena aminareo mba hanatontosana ny fankalazana araka ny teny izay nampitain'ny TOMPO tamin'ny alalan'i Mosesy.

⁷ Ny vahoaka izay vory teo dia nomen'i Josia zanak'ondry sy zanak'osy hatao sakafo Paska: 30 000 no isan'ireo biby ireo, ary mbola niampy omby telo arivo, samy avy amin'ny fananan'ny mpanjaka.

⁸ Ny mpandraharahan'i Josia koa dia nanome biby ho an'ny vahoaka sy ho an'ny mpisorona ary ho an'ny levita. I Hilkia sy i Zakaria ary i Jehiela izay samy mpiandraikitra ny tranon'Andriamanitra, dia nanome ondry aman'osy 2600 ary omby roa arivo ho an'ny mpisorona mba hatao soron'ny Paska.

⁹ Ireo filohan'ny levita, izany hoe ry i Konania sy i Semahia ary i Natanaela mirahalahy mbamin-dry i Hasabia sy i Jehiela ary i Jozabada, dia nandroso ondry aman'osy dimy arivo ho an'ny levita mba hatao soron'ny Paska.

¹⁰ Dia nizotra toy izao ny fanompoam-pivavahana. Samy teo amin'ny toerany avy ny mpisorona, ary samy teo amin'ny antokony avy ny levita, araka ny baikon'ny mpanjaka.

¹¹ Dia novonoin'ny olona ny biby ho an'ny sakafo Paska; ny ran'ireo biby ireo dia noraisin'ny mpisorona ka nararany teo amin'ny alitara; ary ny levita kosa nanoditra ireo biby voavono.

¹² Rehefa nomena ny olona ny anjarany araka ny tarika sy fianakaviana teo amin'ny teraky ny firenena, dia navahana kosa ny sorona dorana manontolo hatolotra ho an'ny TOMPO, araka izay voasoratra ao amin'ny bokin'i Mosesy. Ary toy izany koa tamin'ny omby.

¹³ Ny zanakondrin'ny Paska dia natsatsika tamin'ny afo araka ny fanao ; fa ny fanatitra masina hafa kosa nandrahoina tao anaty vilany sy vilanibe ary kaseraola , dia nozaraina faingana tamin'izay rehetra teraky ny firenena israelita.

¹⁴ Taorian'izay ny levita vao nanamboatra ny sakafo Paska ho an'ny tenany sy ny mpisorona; ireo mpisorona taranak'i Aharona manko nanolotra ny sorona dorana manontolo sy ny jabora mandra-pahalin'ny andro, ka dia izany no nahatonga ny levita hanamboatra ny sakafo Paska ho an'ny tenany sy ny mpisorona taranak'i Aharona.

¹⁵ Ireo mpihira, taranak'i Asafa ,dia teo amin'ny toerany araka ny fepetra nataon'i Davida ary koa nataon'i Asafa sy i Hemana mbamin'i Jedotona izay samy mpanoro hevitra ny mpanjaka ; ary ny mpiandry varavarana dia teo amin'ny isam-bavahady. Noho ireo tsy afaka nialatamin'ny fanompoany, dia ny levita namany koa no nanamboatra ny sakafo Paska ho azy.

¹⁶ Dia nizotra toy izany tamin'io andro io ny fanompoana ny TOMPO mba hankalazana ny Paska sy hanolorana ny sorona dorana manontolo eo ambony alitaran'ny TOMPO, araka ny fepetra nataon'i Josia mpanjaka.

¹⁷ Ny Israelita izay vory teo dia nankalaza ny Paska tamin'izany vaninandro izany, ary koa ny fety fihinanana ny mofo tsy misy leviora nandritra ny fito andro.

¹⁸ Fa tsy nisy Paska nankalazaina toy izany teo amin'i Israely, na dia hatramin'ny andron'i Samoela mpaminany aza; ary ny mpanjaka rehetra tamin'i Israely dia tsy nisy nankalazany Paska tahaka izay nataon'i Josia sy ny mpisorona ary ny levita mbamin'ny mponin'i Jerosalema sy ny Jodeanina rehetra ary ny Israelita hafa izay vory teo.

¹⁹ Tamin'ny taona faha-18 nanjakan'i Josia no nankalazana izany Paska izany.

²⁰ Ankoatra izany rehetra izany, nony efa voavoatran'i Josia ny tempoly, dia niakatra i Nekao mpanjakan'i Ejipta mba hiady any Karkemisy eo amoron'i Eofrata; tamin'izay i Josia no niainga hifanehatra aminy.

²¹ INekao kosa naniraka olona ho any aminy hanao hoe:-Tsy natao hifamely akory izaho sy ianao, ry mpanjakan'i Joda! Tsy ady aminao izao ataoko anio izao, fa amin'ny fahavaloko; sady nasain'Andriamanitra handeha faingana aho. Koa aza toherinao Andriamanitra Izay momba ahy, fandrao matiny ianao.

²² Kanefa i Josia tsy niova hevitra fa nitady izay hiadiana tamin'i Nekao; tsy nety nihaino ny teny izay nampilazain'Andriamanitra an'i Nekao izy, fa nody olon-kafa mba tsy ho fantatra ka nandeha niady taminy ihany tao amin'ny lemak'i Megidao.

²³ Ary nahavoa an'i Josia mpanjakany mpandefa tsipika, ka hoy ity mpanjaka tamin'ny manamboninahiny:-Ento miala eto aho, fa voa mafy.

²⁴ Dia nesorin'ny manamboninahiny tamin'ny kalesy nisy azy i Josia ka napetrany teo amin'ny kalesy hafa ary nentiny ho any Jerosalema. Dia maty izy, ka rehefa nalevina tao am-pasan-drazany, dia nisaonan'ny mponin'i Jerosalema sy ny Jodeanina hafa rehetra.

²⁵ I Jeremia dia nanao hira fitomaniana an'i Josia; ny mpihira rehetra koa na lahy na vavy dia mahatsiahy an'i Josia mandraka androany, rehefa manao hira fitomaniana,satria nanjary fanao teo amin'i Israely izany; ary indreo efa voasoratra ho anisan'ny hira fitomaniana ireny hira ireny.

²⁶ Ny sisa amin'ny tantaran'i Josia ary koa ny asa soa nataony araka ny voasoratra ao amin'ny lalanan'ny TOMPO,

²⁷ eny, ny tantaran'i Josia, na tamboalohany na tafara, dia voasoratra ao amin'ny Bokin'ireo mpanjakan'i Israely sy i Joda.

Toko faha-36

¹ Nalain'ny mponin'i Joda kosa i Joahaza zanakalahin'i Josia ka nataony mpanjaka tao Jerosalema handimby an-drainy.

² Feno 23 taona i Joahaza fony tonga mpanjaka; ary telo volana ihany no nanjakany tao Jerosalema.

³ Teo koa izy no nesorin'i Nekao, mpanjakan'i Ejipta; ary nampandoavin'io Farao io sazy volafotsy sy volamena samy telo taonina ny fanjakan'i Joda.

⁴ Dia i Eliakima rahalahin'i Joahaza no nataony mpanjaka tamin'i Joda sy i Jerosalema, ary novany anarana hoe Joiakima; fa i Joahaza rahalahiny kosa nalain'i Nekao ka nentiny ho any Ejipta.

⁵ Feno 25 taona i Joiakima fony tonga mpanjaka; ary naharitra 11 taona no nanjakany tao Jerosalema. Nanao izay ratsy eo imason'ny TOMPO Andriamaniny izy.

⁶ Ary i Nebokadnetsara, mpanjakan'i Babilona, no niakatra namely azy ka namatotra azy tamin'ny gadra varahina mba hitondrany azy ho any Babilona.

⁷ Ny fanaka sasany tao an-tranon'ny TOMPO dia nentin'i Nebokadnetsara ho any Babilona koa ka nataony tao amin'ny lapany tany Babilona.

⁸ Ny sisa amin'ny tantaran'i Joiakima ary koa ny fanompoam-tsampy maharikoriko nataony sy ny zavatra hafa rehetra nanjo azy dia voasoratra ao amin'ny Bokin'ireo mpanjakan'i Israely sy i Joda. Ary i Joiakina zanany lahy no nanjaka nandimby azy.

⁹ Feno 18 taona i Joiakina, fony tonga mpanjaka; ary telo volana sy folo andro ihany no nanjakany tao Jerosalema, sady nanao izay ratsy eo imason'ny TOMPO izy.

¹⁰ Nony tonga ny lohataona, dia nandefa iraka i Nebokadnetsara ka nitondra an'i Joiakina mbamin'ny fanaka sarobidy tao an-tranon'ny TOMPO ho any Babilona ;dia i Tsedekia rahalahin-drain'i Joiakina no nampanjakain'i Nebokadnetsara tamin'i Joda sy i Jerosalema.

¹¹ Feno 21 taona i Tsedekia fony tonga mpanjaka; ary naharitra iraika ambin'ny folo taona no nanjakany tao Jerosalema.

¹² Nanao izay ratsy eo imason'ny TOMPO Andriamaniny izy, ary tsy mba niaiky heloka teo anatrehan'i Jeremia mpaminany, izay nilaza hafatra avy amin'ny TOMPO.

¹³ Nikomiany aza i Nebokadnetsara mpanjaka izay efa nampianiana azy tamin'Andriamanitra. Nanamafy hatoka sy fo izy mba tsy hiverenany amin'ny TOMPO Andriamanitr'i Israely.

¹⁴ Ny lohandoha-mpisorona sy ny loholom-bahoaka rehetra koa dia naniratsira an'Andriamanitra araka ny fanompoan-tsampy maharikoriko fanaon'ny hafa firenena, ka nandoto ny tempoly izay efa natokan'ny TOMPO ho Azy tao Jerosalema.

¹⁵ Kanefa ny TOMPO Andriamanitry ny razany dia nangoraka ilay vahoakany sy ilay fonena-masiny, ka nampitondra teny ireo iraka izay nalefany matetika ho any amin'ny olony.

¹⁶ Saingy nihomehezan'ny vahoaka ireo irak'Andriamanitra sady nozimbazimbainy ny teniny;noesoesoiny ny mpaminaniny mandra-pihatry ny fahatezeran'ny TOMPO taminy ka tsy nisy fanafany intsony.

¹⁷ Ny mpanjakan'ny Babilonianina no nentin'ny TOMPO namely ny vahoakany sy namono nahafaty ny miaramilany tamin'ny sabatra hatrany an-tempoliny mihitsy aza, ka tsy nisy olona nangorahan'io mpanjaka io, na tovolahy na tovovavy na ny olon-dehibe na ny antitra;eny, natolotr'Andriamanitra teo an-tanan'i Nebokadnetsara avokoa ny zava-drehetra.

¹⁸ Nalain'io mpanjaka io ny fanaka rehetra tao an-tranon'Andriamanitra, na ny vaventy na ny madinika, mbamin'ny zava-tsarobidy tao an-tranon'ny TOMPO ary ny zava-tsarobidin'ny mpanjaka sy ireo manampahefana;ka ireny rehetra ireny dia nentiny nankany Babilona.

¹⁹ Nodoran'ny Babilonianina koa ny tranon'Andriamanitra, ary noravany ny mandan'i Jerosalema; notselarany afo ny lapa rehetra ary nosimbany ny fanaka sarobidy isan-karazany taoan-tanana.

²⁰ Ny olona sisa tsy matin-tsabatra dia nentin'i Nebokadnetsara ho babo tany Babilona, ka tonga nanompo azy sy ny zanany ireny mandra-piavin'ny fanjakan'i Persia.

²¹ Izany no nahatanterahan'ny teny nampilazain'ny TOMPO an'i Jeremia hoe:"Ity tany ity dia hilaozana mandritra ny fitopolo taona, mandra-pahatapitra ny fe-potoana tokony hitsaharany mba ho onitry ny andro fitsaharana rehetra izay tsy voatandrina."

²² Tamin'ny taona voalohany nanjakan'i Kirosa, amperoran'i Persia, no tanteraka ny teny nampilazain'ny TOMPO an'i Jeremia mpaminany. Nanaitra fanahy an'i Kirosa manko tamin'izay ny TOMPO, ka nahatonga azy hampiely an-kabary sy an-tsoratra eran'ny fanjakany manontolo ireto hafatra ireto:

²³ Izao no lazain'i Kirosa amperoran'i Persia: Ny TOMPO Andriamanitryny lanitra dia efa nanome ahy ny fanjakana rehetra ambonin'ny tany ary efa nandidy ahy hanorina tempoly ho Azy any Jerosalema, izay ao amin'ny tanin'i Joda. Koa aoka ianareo rehetra izay anisan'ny vahoakan'ny TOMPO mba hiakatra any Jerosalema! Hiaraka aminareo anie ilay TOMPO Andriamanitrareo!

Hezrà

Toko voalohany

¹ Tamin'ny taona voalohany nanjakan'i Kirosa amperoran'i Persia no tanteraka ny teny nampilazain'ny TOMPO an'i Jeremia mpaminany. Nanaitra fanahy an'i Kirosa manko tamin'izay ny TOMPO ka nahatonga azy hampiely an-kabary sy an-tsoratra eran'ny fanjakany manontolo ireto hafatra ireto:

² Izao no lazain'i Kirosa amperoran'i Persia. Ny TOMPO Andriamanitry ny lanitra dia efa nanome ahy ny fanjakana rehetra ambonin'ny tany ary efa nandidy ahy hanorina tempoly ho Azy any Jerosalema, izay ao amin'ny tanin'i Joda.

³ Koa aoka ianareo rehetra anisan'ny vahoakan'ny Tompo mba hiakatra any Jerosalema, ao amin'ny tanin'i Joda, ka hanorina indray ny tranon'ny TOMPO Andriamanitr'i Israely, dia ilay Andriamanitra Izay ivavahana ao Jerosalema. Homba anareo anie ilay Andriamanitrareo! 4 Na aiza na aiza onenan'ireo sisa tavela amin'izany vahoaka izany dia aoka ny tompontany hanome azy volafotsy sy volamena ary koa fananana hafa sy biby fiompy mbamin'ny fanatitra an-tsitrapo ho an'ilay tranon'Andriamanitra any Jerosalema.

⁵ Dia nioman-kiainga ny loham-pianakaviana tamin'ny fokon'i Joda sy ny fokon'i Benjamina mbamin'ny mpisorona sy ny levita, izany hoe izay rehetra nampirisihin'ny TOMPO Andriamanitra hiakatra hanorina ilay tranony any Jerosalema.

⁶ Ny olona rehetra nifanakaiky taminy dia nanampy azy tamin'ny fanaka volafotsy sy volamena, fananana hafa sy biby fiompy ary zavatra sarobidy mbamin'ny fanomezana an-tsitrapo ho an'ny tempoly.