2 Mpanjaka

Toko faha-20

⁹ Ka novaliany hoe: Izao no famantarana omen'ny TOMPO anao mba hahalalanao fa hotanterahiny tokoa izay nolazainy: Hikisaka ambaratonga folo ny aloka eo amin'ny tohatr'i Ahaza; koa handroso sa hihemotra no tianao hikisahany?

¹⁰ Ary i Hezekia namaly hoe: Mora amin'ny aloka ny handrosoany ambaratonga folo, fa aoka izy hihemotra ambaratonga folo.

¹¹ Dia nivavaka tamin'ny TOMPO i Isaia mpaminany ka nahemony ambaratonga folo ny aloka teo amin'ny tohatr'i Ahaza.

¹² Tamin'izany fotoana izany i Merodaky-Baladana zanakalahin'i Baladana sady mpanjakan'i Babilona no nandre fa narary i Hezekia; koa dia nandefa masoivoho mba hitondra taratasy sy fanomezana ho azy izy.

¹³ Faly i Hezekia tamin'ny fahatongavan'ireto iraka; dia nasehony azy avokoa ny trano fitahirizany zava-tsarobidy, dia volafotsy sy volamena ary zava-manitra sy menaka mamerovero; nasehony azy koa ny trano fitobian'ny fitaovam-piadiana rehetra mbamin'ny zavatra hafa isan-karazany tao amin'ny fitoeran-drakiny. Tsy nisy zavatra nafeniny azy na ny tao an-dapany na ny tao amin'ny fanjakany manontolo. 14 Taorian'izany dia nankany amin'i Hezekia mpanjaka i Isaia mpaminany ka nanontany azy hoe: Inona no nolazain'ireny olona nankaty aminao ireny? Ary mba avy taiza moa izy ireo? Dia novalian'i Hezekia hoe: Avy any Babilona lavitra any izy no nankaty amiko.

¹⁵ Ka hoy indray i Isaia: Inona avy anefa no hitany tato an-dapanao? Dia hoy ny navalin'i Hezekia: Izay rehetra ato an-dapako dia hitany avokoa. Tsy nisy zavatra nafeniko azy ny tao amin'ny fitoeran-drakitro.

¹⁶ Ary hoy i Isaia tamin'i Hezekia: Henoy ary ny tenin'ny TOMPO:

¹⁷ Indro ho avy ny andro hitondrana any Babilona izay rehetra ao an-dapanao sy izay rehetra nangonin'ny razanao ka voatahiry mandraka androany. Tsy hisy tavela eto na inona na inona, hoy Izaho TOMPO.

¹⁸ Ary na dia ny sasany amin'ireo taranakao aza hoentina any koa ho mpanompo hanao raharaha ao an-dapan'ny mpanjakan'i Babilona.

¹⁹ Dia hoy i Hezekia tamin'i Isaia: Tsara ny tenin'ny TOMPO izay nambaranao ahy. Fa hoy izy manko anakampo hoe: Raha velona koa ny aiko, dia hanjaka ny fiadanana sy ny fandriampahalemana.

²⁰ Ny sisa amin'ny tantaran'i Hezekia ary koa ny herimpo isan-karazany nasehony mbamin'ny nanaovany ny dobo sy ny lakan-drano hitarika rano hankao an-tanana, dia voasoratra ao amin'ny boky milohateny hoe Asan'ireo mpanjakan'i Joda.

²¹ Ary rehefa lasa nodimandry any amin'ny razany izy, dia i Manase zanany lahy no nanjaka nandimby azy.

Toko faha-21

¹ Feno 12 taona i Manase fony izy tonga mpanjaka; ary naharitra 55 taona no nanjakany tao Jerosalema. Ny anaran-dreniny dia Hefitsiba. 2 Nanao izay ratsy eo imason'ny TOMPO izy fa naka tahaka ny fanompoan-tsampy maharikoriko fanaon'ireo firenena izay noroahin'ny TOMPO teo anoloan'ny Israelita.

³ Naorin'i Manase indray manko ny toeram-panasinana izay efa noravan'i Hezekia rainy; ka nanangana alitara ho an'i Bahala izy sady nanao tsatokazo fanajana an'i Asera tahaka izay nataon'i Ahaba mpanjakan'i Israely; dia niankohofany sy nanaovany fanompoam-pivavahana koa ireo planeta aman-kintana eny ana habakabaka.

⁴ Ary nanorenany alitara hafa aza tao an-tranon'ny TOMPO, dia tao amin'ilay nolazain'ny TOMPO hoe: I Jerosalema no hampitoerako ny voninahitro.

⁵ Tao anatin'ny kianja roa amin'ny tranon'ny TOMPO tokoa no nanorenany alitara hafa ho fanajana ireo planeta aman-kintana eny ana habakabaka.

⁶ Ary na ny zanany lahy aza dia natolony ho sorony dorana; ankoatra izany dia mbola nanandro sady nisikidy ary naka hevitra tamin'ny olona tsindrian-javatra sy mpanao fitokavana koa izy. Nahery nanao izay ratsy eo imason'ny TOMPO izy, ka nampahatezitra Azy.

⁷ Ny sarivongan'ny andriamani-bavy Asera, izay nampanamboariny, dia napetrany tao amin'ny tempoly izay efa nolazain'ny TOMPO tamin'i Davida sy i Salomona zanany hoe: Ato amin'ity tempoly ity sy eto Jerosalema izay tanana nofidiko tamin'ny foko israelita rehetra ity no hampitoerako mandrakizay ny voninahitro.

⁸ Koa tsy hampirenireny ny Israelita hiala amin'ny tany izay nomeko ny razany intsony Aho, raha imasoany hotanterahina ny didiko rehetra sy ny lalana manontolo izay nandidian'i Mosesy mpanompoko azy.

⁹ Kanefa tsy nihaino izany ny Jodeanina, fa vao mainka aza notaomin'i Manase hanao ratsy mihoatra noho ny hafa firenena izay naringan'ny TOMPO tsy ho eo anoloan'ny Israelita.

¹⁰ Koa ny TOMPO dia nampiteny an'ireo mpaminany mpanompony hoe:

¹¹ Satria nahavita izao fanompoan-tsampy maharikoriko izao i Manase mpanjakan'i Joda ka nanao ratsy mihoatra noho ny nataon'ny Amorita teo alohany sady nampanota ny Jodeanina tamin'ny sampiny,

¹² dia izao kosa no lazain'ny TOMPO Andriamanitr'i Israely: Hitondra loza amin'i Jerosalema sy amin'ny Jodeanina Aho ka hampangintsina ny sofin'izay rehetra mandre izany.

¹³ Horavako tahaka ny nandravako an'i Samaria sy ny fianakavian'i Ahaba i Jerosalema. Hodioviko toy ny fanadio lovia izay faohina sy ahohoka i Jerosalema ka tsy hisy mponina intsony ao.

¹⁴ Ary hafoiko ny sisa tavela amin'ny vahoakako ka hatolotro amin'ny fahavalony rehetra mba hosamboriny sy hobaboiny,

¹⁵ satria efa nanao izay ratsy eo imasoko izy ka nampahatezitra Ahy hatramin'ny andro nialan'ny razany tany Ejipta ka mandraka androany.

¹⁶ Marobe ny olona tsy manantsiny nampamonoin'i Manase ho faty ka nanerana an'i Jerosalema manontolo ny rany; izany moa dia ankoatra ny fahotana nitarihany an'ireo Jodeanina tamin'ny nanaovany izay ratsy eo imason'ny TOMPO.

¹⁷ Ny sisa amin'ny tantaran'i Manase ary koa ny zavatra hafa rehetra nataony ary ny fahotana vitany dia voasoratra ao amin'ny boky milohateny hoe Asan'ireo mpanjakan'i Joda.

¹⁸ Rehefa lasa nodimandry any amin'ny razany i Manase, dia nalevina tao an-jaridainan'ny lapa na koa Zaridainan'i Hoza; ary i Amona zanany lahy no nanjaka nandimby azy.

¹⁹ Feno 22 taona i Amona fony tonga mpanjaka; ary naharitra roa taona no nanjakany tao Jerosalema. Ny anaran-dreniny dia Mesolemeta zanakavavin'i Harotsa avy any Jotva.

²⁰ Nanao izay ratsy eo imason'ny TOMPO tahaka an'i Manase rainy i Amona.

²¹ Narahiny avokoa ny toetran-drainy fa nanompo ireo sampy izay notompoin-drainy izy sady niankohoka teo anatrehany.

²² Nandao ny TOMPO Andriamanitry ny razany izy fa tsy nanaraka ny sori-dalan'ny TOMPO.

²³ Nikomy tamin'i Amona ireo manamboninahiny ka namono azy ho faty tao an-dapany.

²⁴ Fa mba nataon'ny mponin'i Joda maty kosa izay rehetra nikomy tamin'ny mpanjaka; ka dia i Josia zanany lahy no voatendriny ho mpanjaka handimby azy.

²⁵ Ny sisa amin'ny tantaran'i Amona ary koa ny zavatra hafa nataony dia voasoratra ao amin'ny Boky milohateny hoe Asan'ireo mpanjakan'i Joda.

²⁶ Dia nalevina tao amin'ny fasany tao an-jaridainan'i Hoza izy; ary i Josia zanany lahy no nanjaka handimby azy.

Toko faha-22

¹ Feno valo taona i Josia fony tonga mpanjaka ary naharitra 31 taona no nanjakany tao Jerosalema. Ny anaran-dreniny dia Jedida zanakavavin'i Hadaia avy any Botsekata.

² Nanao izay mahitsy eo imason'ny TOMPO i Josia; ka narahiny avokoa ny toetran'i Davida razambeny fa tsy mba nivily hiala tamin'izany izy.

³ Tamin'ny taona faha-18 nanjakan'i Josia mpanjaka no nanirahany an'i Safana mpitantsoratra zanakalahin'i Atsalia ary zafikelin'i Mesolama ho any an-tranon'ny TOMPO sady nilazany hoe:

⁴ Mankanesa any amin'i Hilkia mpisorombe, ka asaivo angoniny ny vola izay naterin'ny olona tao an-tranon'ny TOMPO na noraisin'ny mpiandry varavarana taminy.

⁵ Aoka hatolotra ny mpandraharaha voatendry hanamboatra ny tranon'ny TOMPO izany vola izany mba hanomezany ny karaman'ny mpandrafitra sy ny mpandatsa-bato ary ireo mpiasa hafa, ary koa hividianany hazo sy vato voapaika ilaina amin'izany fanamboarana ny simba izany.

⁷ Kanefa aza ampamoahina ny amin'ny vola natolotra azy izy, satria mahatoky amin'ny asany.

⁸ Rehefa voarain'i Hilkia mpisorombe izany hafatra izany, dia nanambara tamin'i Safana mpitantsoratra koa izy ny nahitany ny Bokin'ny Lalana tao an-tranon'ny TOMPO; ary natolony azy ny boky ka novakiny.

⁹ Avy eo dia niverina nanao tatitra tamin'ny mpanjaka i Safana nilaza hoe: Efa nangonin'ireo mpisorona ny vola azo tao an-tempoly ary natolony ny mpandraharaha voatendry hanao ny fanamboarana.

¹⁰ Dia nilazan'i Safana koa ny mpanjaka hoe: Misy boky nomen'i Hilkia mpisorombe ahy ity! Ary novakiny teo anatrehan'ny mpanjaka izany.

¹¹ Nony ren'i Josia mpanjaka ny teny tao amin'ilay Bokin'ny Lalana, dia nandriatra fitafiana izy.

¹² Ary nomeny baiko i Hilkia mpisorombe sy i Ahikama zanakalahin'i Safana mbamin'i Hakbora zanakalahin'i Mikaia mbamin'i Safana mpitantsoratra sy i Hasaia mpandraharahany ka nilazany hoe:

¹³ Ndeha anontanio ny TOMPO ho ahy sy ho an'ny vahoaka manerana an'i Joda manontolo ny amin'ny teny raketin'ity boky vao hita ity. Ireo razantsika manko tsy nihaino ny tenin'ity boky ity sady tsy nanao araka izay rehetra voasoratra ao anatiny, hany ka hirehitra mafy amintsika ny fahatezeran'ny TOMPO.

¹⁴ Dia lasa nankany amin'i Holda mpaminanivavy i Hilkia mpisorona sy i Ahikama mbamin'i Hakbora sy i Safana ary i Hasaia. I Holda, izay nonina tao Antanambaon'i Jerosalema, dia vadin'i Saloma zanakalahin'i Tikva sy zafikelin'i Harahasa sady mpitahiry ny fanamiana masina tao an-tempoly. Koa rehefa niresaka tamin-dravehivavy ry i Hilkia,.