1 Makabeo
Toko faha-5
33 Dia nozarain'i Joda ho telo toko ny tafiny no nampandrosoiny hankeo ivohon'ny fahavalo; ka nampaneno ny trompetra ireo sady nanandra-peo nivavaka.34 Ny tafik'i Timoty kosa, vantany vao nahafantatra hoe Makabeo izay, dia nandositra teo anoloany; ka nataon'i Joda resy mafy izy ireo ary sahabo ho vatan-dehilahy andiany valo taminy no maty androtr'io.
35 Taorian'izay i Joda dia nihodina nankany Alema; nasiany io tanana io, dia azony, ka novonoiny avokoa ny lahy rehetra tamin'ny mponina, nentiny avokoa ny babo tao, ary nodorany ny tanana.
36 Avy eo dia nirosoany ka azony avokoa i Kasfao sy i Makeda ary i Bosoro mbamin'ny tanana hafa any Gilehada.
37 Namory tafika hafa indray i Timoty taorian'izany, dia lasa nitoby tandrifin'i Rafona , teo an-dafin'ny lohasahan-driaka.
38 Nandefa iraka hizaha io tafika io i Joda, ka izao no tatitra natao taminy: -Nitambatra tamin'i Timoty avokoa ny firenena manodidina antsika, ka tonga tafika iray goavana tokoa,
39 nisy koa Arabo voakaramany hanampy azy. Naoriny ery an-dafin'ny lohasahan-driaka ny tobiny, ary efa vonona hirotsaka hiady aminao izy. Niroso kosa ry i Joda mba hifanehatra aminy.
40 Rehefa nanakaiky ny lohasahan-driaka i Joda sy ny miaramilany, dia hoy i Timoty tamin'ireo lehiben'ny tafiny:-Raha mita voalohany i Joda handroso hamely antsika, dia tsy hahatohitra azy isika fa ho resiny mihitsy.
41 Raha matahotra ny hita kosa i Joda, ka miorin-toby eny an-dafin'ny lohasahan-driaka, dia isika no hita hamely azy ary handresy azy.
42 Nony mby teo akaikin'ny lohasahan-driaka i Joda, dia nasainy nijoro teo amoron-drano ny mpitan-tsoratry ny tafika, sady nomeny didy hoe: -Aza avela hisy hijanona fa aoka hirosoan'ady avokoa ny olona!
43 Dia nita voalohany i Joda hankeny amin'ny fahavalo ary narahin'ny tafiny manontolo, ka nanamontsana ny hafa firenena izay teo anoloany. Dia nanary fiadiana ny fahavalo sisa ka rifatra nandositra tao amin'ny tempolin-tsampy tao Karnaima.
44 Saingy azon'i Joda sy ny tafiny kosa ny tanana, ka nodorany ny tempoly mbamin'izay rehetra tao anatiny. Dia rava tanteraka i Karnaima ary tsy nahatohitra an'i Joda intsony ny fahavalo.
45 Tamin'izay i Joda dia nanangona ny Israelita rehetra tany Gilehada, hatramin'ny kely indrindra ka hatramin'ny lehibe indrindra, mbamin'ny vady aman-janany sy ny fananany; dia vahoaka zavon-tany no nentiny ho any amin'ny faritanin'i Jodea.
46 Tao Hefrona , tanana lehibe sy mafy tokoa sady manakana ny lalany, no tonga izany vahoaka izany; ary tsy nisy azony hiviliana hiankavia na hiankavanana fa tsy maintsy hamaky ny tanana izy.
47 Kanefa tsy namela azy handalo ny mponin'i Hefrona, ary nanampina vato ny vavahady aza.
48 Dia nandefasan'i Joda tenim-pihavanana ireo ka nilazany hoe: -Aoka mba hahazo mamaky ny faritaninareo izahay hankanesanay any amin'ny taninay! Tsy hisy olona hanao ratsy aminareo izahay; fa ny handalo an-tongotra ihany no hataonay. Saingy tsy nety namoha azy mihitsy ny mponin'i Hefrona.
49 Ka nasain'i Joda nilazana ny miaramilany mba samy hivonon-kanafika eo amin'izay nisy azy avy,
50 dia samy nivonona amin'izany tokoa ny vatan-dehilahy mpiantafika. Niadian'ny tafik'i Joda nandritra ny andro sy nandritra ny alina ilay tanana, ka natolotr'Andriamanitra azy.
51 Novonoiny tamin'ny lelan-tsabatra ny lahy rehetra, noravany tsy nisy niangana i Hefrona, nentiny ny babo teo aminy, ary faty no voadiany namaky azy.
52 Avy eo dia nita an'i Jordana ny Israelita, dia tonga teo amin'ny lemaka lehibe tandrifin'i Bety-Seana.
53 Tsy nitsahatra i Joda nanainga ny mpitaredretra vodilaharana mba hanatratra ny namany ary koa nampirisika ny vahoaka teny an-dalana rehetra teny, mandra-pahatodiny tany Jodea.
54 Ary tamim-pifaliana sy firavoravoana no niakaran'ny besinimaro tao an-tendrombohitra Tsiona sady nanaterany sorona dorana manontolo, satria tonga soa aman-tsara izy rehetra tsy nisy maty na dia iray aza.
55 Fony mbola tany Gilehada i Joda sy i Jonatana mirahalahy, ary tany Galilea anoloan'i Ptolemaida koa i Simona rahalahiny,
56 dia ren'i Josefa zanakalahin'i Zakaria mbamin'i Hazaria izay samy mpitari-tafika ny herimpo lehibe nasehony sy ny ady nataony.
57 ka nifampilaza izy roa lahy ireto hoe: "Ndao koa isika mba hampanehoeho ny lazantsika, ka hiady amin'ny hafa firenena manodidina antsika".
58 Dia nomeny didy ny miaramila nankinina taminy ka nandroso hamely an'i Jamnia.
59 Nivoaka ny tanana kosa i Gorjia mbamin'ny miaramilany, ka nisehatra azy an'ady.
60 Resy ny tafik'i Josefa sy i Hazaria ka nenjehin'ny miaramilan'i Gorjia hatreo amin'ny sisin-tanin'i Jodea; ary nahafatesana vatan-dehilahy roa ny Israelita tamin'izay andro izay.
61 Voan'ny faharesena goavana ny vahoaka israelita, satria i Josefa sy i Hazaria dia tsy nihaino an'i Joda mirahalahy avy , fa mba nihevi-tena haneho herimpo koa.
62 Kanefa tsy isan'ireo olona izay nanankinan'Andriamanitra ny fanafahana an'i Israely izy roa lahy.
63 Nahazo voninahitra lehibe i Joda mahery fo sy ireo rahalahiny teo anatrehan'i Israely manontolo sy ny hafa firenena rehetra izay nandrenesana ny lazany.
64 Nitangorona nanodidina azy mirahalahy avy ny olona mba hiarahaba azy.
65 Dia niainga koa i Joda mbamin'ireo rahalahiny hiady amin'ny taranak'i Hesao eo amin'ny faritany atsimo; azony i Hebrona mbamin'ny tanana madinika momba azy, noravany ny mandany, nodorany ny tilikambo teo amin'izany manda manodidina azy izany.
66 Avy eo dia lasa nankany amin'ny tanin'ny Filistinina ry i Joda mirahalahy avy ka namaky ny tanana Maresa.
67 Tamin'izany andro izany no nisy mpisorona maro maty an'ady: te hanampatra herimpo fotsiny ireo, ka nisosoka niady tsy malina akory.
68 Nizotra ho any Asdoda tao anaty faritanin'ny Filistinina ihany i Joda ka noravany ny alitaran'ireny, nodorany ny sarivongan-tsampiny ary nobaboiny ny tananany, vao niverina tany Jodea izy.
Toko faha-6
1 Tamin'izay i Antiokosa mpanjaka dia nitety ireo faritra avoka nandre fa hoe ao Elimaida , any Persia, dia misy tanana anankiray malaza ho manan-karena, be volafotsy sy volamena,2 io tanana io dia manana tempoly feno zava-tsarobidy sady mirakitra fitaovana volamena fitondra an'ady sy akanjo vy fiarovan-tena ary fiadiana izay navelan'i Aleksandra zanakalahin'i Filipo sy mpanjaka masedonianina nanjaka voalohany tamin'ny Grika.
3 Dia nankany amin'ilay tanana i Antiokosa ka nitady haka sy hambabo azy, kanjo tsy nahomby. Nahalala ny fikasany manko ireo tompon-tanana,
4 ka nitsangan-kiady taminy; dia vaky nandositra ity mpanjaka, sady nihataka tamin'alahelo lehibe mba hiverina any Babilona.
5 Tamin'izay no nisy iraka tonga tany Persia nilaza tamin'i Antiokosa ny faharesen'ireo miaramila nalefa tany Jodea.
6 Nandroso nitondra tafika matanjaka dia matanjakai Lisia, kanefa voatery nandositra teo anoloan'ny Jiosy; ireo kosa nampitombo hery tamin'ny fiadiana sy fitaovam-panafihana ary babo azony tamin'ny tafika izay resiny tanteraka.
7 Noravany ilay zava-mahatsiravina natsangan'ny mpanjaka teo ambonin'ny alitara fisoronana tao Jerosalema; nohodidininy manda avo toy ny taloha indray ny tempoly; ary nohamafisiny toy izany koa i Bety-Tsoro , anankiray amin'ireo tananan'i Antiokosa.
8 Rehefa nandre izany vaovao izany ny mpanjaka, dia azon-tahotra mafy sy notsindrian-tebiteby lozan-tany, ka nandraiki-mararin'alahelo sy nidaboka teo amin'ny fandriany, satria tsy araka ny naniriany azy ny fandehan-javatra.
9 Andro maro izy teo ihany, ary nihonaka lava nianjadian'ny fahorian-tsaina lalina; ary noheveriny fa efa antomotra ny hahafatesany.
10 Dia niantso ireo rehetra nomeny anarana hoe "sakaizan'ny mpanjaka " izy sy nilaza taminy hoe: -Tsy afa-matory intsony aho sady rera-po azon'ny tebiteby,
11 ka hoy aho anakampoko: Alahelo lehibe manao ahoana ity mahazo ahy, ary onja goavana manao ahoana ity ihitsohako ankehitriny? Kanefa sambatra sy notiavina aho, fony aho mbola nahery fahefana.
12 Saingy tsaroako izao ny ratsy nataoko tany Jerosalema; fa nentiko avokoa ny fanaka volamena sy volafotsy izay tao, ary nisy tafika nalefako mba handringana tsy amin'antony ny mponina rehetra tany Jodea.
13 Koa fantatro fa noho izany no niharan'izao loza izao amiko; ary indro aho fa ho faty amin'alahelo lehibe aty an-tanin'olona aty.
14 Dia nantsoin'i Antiokosa i Filipo, izay anankiray amin'ireo "sakaizan'ny mpanjaka", ary notendreny hitondra ny fanjakany manontolo.