1 Mpanjaka

Toko faha-13

¹⁴ Narahin'io mpaminany io ny lalan'ilay olon'Andriamanitra ka tratrany izy, raha iny nipetraka teo ambanin'ny hazo lehibe iray iny, ary nanontaniany hoe: Ianao ve ilay olon'Andriamanitra avy any Joda? Ka novaliany hoe: Eny, izaho no izy.

¹⁵ Dia hoy indray ity mpaminany taminy: Andao hiaraka amiko ho any an-tranoko mba hihinan-javatra kely.

¹⁶ Fa hoy izy namaly: Tsia, tsy mahazo miverin-dalana hiaraka aminao aho ary tsy mahazo mihinan-kanina na misotro rano aminao aty;

¹⁷ satria izao no tenin'ny TOMPO tamiko: Aza mihinan-kanina na misotro any, ary aza miverina amin'ny lalana efa nalehanao.

¹⁸ Fa hoy kosa ilay lahiantitra taminy: Izaho koa dia mba mpaminany toa anao ihany, ary nisy anjely nilaza tenin'ny TOMPO tamiko nanao hoe: Ento miverina miaraka aminao ho any an-tranonao izy mba hihinan-kanina sy hisotro rano. Kanjo nandainga taminy izy.

¹⁹ Dia niverina niaraka taminy ihany ilay olon'Andriamanitra, ka nihinan-kanina sy nisotro rano tao an-tranony.

²⁰ Fa raha mbola nipetraka nihinana izy roa lahy, dia nisy tenin'ny TOMPO tamin'ilay mpaminany antitra nampiverin-dalana;

²¹ ary izy io kosa niteny mafy tamin'ilay olon'Andriamanitra avy any Joda hoe: Izao no lazain'ny TOMPO: Noho ianao tsy nankato ny baikon'ny TOMPO Andriamanitrao ary tsy nitandrina ny didy izay nomeny anao,

²² noho ianao niverina nihinan-kanina sy nisotro rano tany amin'ny tany izay nandraran'ny TOMPO anao hoe: 'Aza mihinan-kanina na misotro rano any', dia ho faty ianao kanefa tsy hiditra am-pasan-drazanao ny fatinao.

²³ Rehefa avy nihinana sy nisotro izy roa lahy, dia nasian'ilay lahiantitra lasely ny boriky hitaingenan'ilay mpaminany voataonany hiverina teo iny.

²⁴ Kanjo nony nandeha izy, dia sendra liona teny an-dalana ka matin'izany; ary ny fatiny dia niampatra teo amin'ny lalana, fa ny boriky sy ny liona kosa nijanona teo an-daniny sy an-kilany.

²⁵ Rehefa hitan'ny mpandalo ny faty niampatra teo amin'ny lalana sy ny liona nijanona teo anilany, dia lasa ireo nitantara izany tany amin'ny tanana izay nipetrahan'ilay mpaminany antitra.

²⁶ Nony nandre izany ity mpaminany nampiverin-dalana azy, dia nilaza hoe: Ilay olon'Andriamanitra tsy nankato ny baikon'ny TOMPO izay; fa natolotry ny TOMPO ho an'ny liona izy ka noviravirainy sy nataony maty araka ny teny izay nambaran'ny TOMPO taminy.

²⁷ Avy eo dia hoy ity lahiantitra tamin'ireto zanany: Asio lasely ny borikiko! Nony voaisy lasely ny boriky,

²⁸ dia nandeha ilay mpaminany antitra ka nahita ny fatin-dralehilahy niampatra teo amin'ny lalana ary ny boriky sy ny liona nijanona teo anilan'ny faty; nefa ny liona tsy nihinana ny faty ary tsy namiravira ny boriky.

²⁹ Dia nobatain'ilay mpaminany antitra ny fatin'ilay olon'Andriamanitra ka nakariny teo ambony boriky ary nentiny niverina tany an-tananany mba hanaovany fisaonana sy fandevenana.

³⁰ Dia naleviny tao am-pasany ny faty ka nitomanian'ny olona an-kira hoe: Indrisy, ry rahalahiko!

³¹ Taorian'ny fandevenana dia hoy ilay mpaminany antitra tamin'ireo zanany: Rehefa maty aho, dia aleveno ao amin'ny fasana ilevenan'io olon'Andriamanitra io, ka ataovy eo anilan'ny taolambalony ny taolambaloko.

³² Fa tsy maintsy ho tanteraka ilay hafatra nataony antso avo araka ny tenin'ny TOMPO ho fanoherana ny alitara ao Betela sy ny trano rehetra amin'ny toeram-panasinana manerana ireo tananan'i Samaria.

³³ Na teo aza anefa izany, dia tsy nanitsy fitondrantena i Jerobohama, fa mbola nanendry olon-kafa ho mpisorona amin'ny toeram-panasinana hatrany izy; ka izay olona te hanao izany, dia natokany mba ho mpisorona amin'ireny toeram-panasinana ireny.

³⁴ Tonga fahotan'ny fianakavian'i Jerobohama izany ka nahafongotra sy naharingana azy tanteraka teto ambonin'ny tany.

Toko faha-14

¹ Tamin'izany andro izany, dia narary i Abia zanakalahin'i Jerobohama.

² Ary hoy i Jerobohama tamin'ny vadiny: Ndeha re miova endrika ianao mba tsy ho fantatr'olona ho vadiko; dia mankanesa any Silao izay misy an'i Ahia mpaminany, ilay nilaza tamiko fa ho tonga mpanjakan'ity firenena Israely ity aho.

³ Mitondra mofo folo sy mofomamy ary tantely iray tavoara, dia mankanesa ao aminy, fa hambarany aminao izay hanjo ity zanatsika ity.

⁴ Dia nataon'ny vadin'i Jerobohama izany; ka niainga nankany Silao izy ary niditra tao an-tranon'i Ahia. Tsy nahita intsony anefa ny mason'i Ahia noho ny fahanterany;

⁵ saingy ny TOMPO kosa efa nilaza taminy hoe: Indro ho avy hanontany anao ny momba an-janany marary ny vadin'i Jerobohama; ka izao sy izao avy no holazainao aminy, satria hody olon-kafa izy rehefa tonga.

⁶ Koa rehefa ren'i Ahia ny fingodongodon'ny tongo-dravehivavy nandingana ny tokonam-baravarana, dia hoy izy hoe: Mandrosoa, ry vadin'i Jerobohama, fa nahoana ianao no mody olon-kafa? Nirahina hanambara vaovao ratsy aminao aho.

⁷ Koa mandehana ka lazao amin'i Jerobohama fa izao no lazain'ny TOMPO Andriamanitr'i Israely: Efa nasandratro avy tamin'ny sarambaben'olona ianao ary notendreko ho filohan'i Israely vahoakako;

⁸ efa nesoriko ny fanjakana ho afaka tamin'ny taranak'i Davida ka nomeko anao; nefa ianao tsy mba nanao tahaka an'i Davida mpanompoko izay nitandrina ny didiko sy nanaraka Ahy tamin'ny fony manontolo ka tsy nanao afa-tsy izay mahitsy eo imasoko.

⁹ Fa ratsy kokoa noho izay vitan'ireo rehetra talohanao no nataonao, satria namboatra andriamani-kafa sy sarivongana voarendrika hampahatezitra Ahy ianao ary efa nanilika Ahy any ivohonao.

¹⁰ Izany no hampiharako loza amin'ny fianakavianao, ry Jerobohama; ka handringanako ny lehilahy rehetra amin'ny taminganao na zaza na olon-dehibe manerana an'i Israely, ary hofafako tanteraka toy ny famafa fako ny sisa amin'ny fianakavianao.

¹¹ Koa izay taminganao maty ao an-tanana dia hohanin'ny alika, ary izay maty any an-tsaha kosa dia hohanin'ny voro-manidina. Izany no efa nambaran'ny TOMPO.

¹² Dia hoy indray i Ahia mpaminany hoe: Ianao kosa, ry vadin'i Jerobohama, mitsangana ka modia any an-tranonao; fa raha vantany vao mandia ny tanana ny tongotrao, dia ho faty io zanakao lahy io.

¹³ Dia hanaovan'ny vahoaka Israely rehetra fisaonana izy ka haleviny. Fa izy irery amin'ny taranak'i Jerobohama rehetra no halevina am-pasana, satria izy irery ihany tamin'izany fianakaviana izany no mba nahitan'ny TOMPO Andriamanitr'i Israely zavatra tsara.

¹⁴ Ary ny TOMPO dia hanangana ho an'i Israely mpanjaka vaovao, izay handringana ny taranak'i Jerobohama. Amin'ity andro anio ity izany. Ahoana hoe? Izao ankehitriny izao ihany izany.

¹⁵ Ny TOMPO hamely ny Israelita ka hampipararetra azy toy ny volotara hetsiketsehan'ny rano sady hanongotra azy amin'ity tany soa izay nomeny ny razany ity ary hanely azy any an-dafin'ny ony Eofrata, satria nanao tsatokazo fanajana an'i Asera izy ka nampahatezitra ny TOMPO.

¹⁶ Hanolotra an'i Israely amim-pahavalo Izy noho ireo fahotana nataon'i Jerobohama sady nampanaoviny an'i Israely.

¹⁷ Dia nitsangana ny vadin'i Jerobohama ka lasa ary tonga tany Tiritsa. Koa rehefa nanitsaka ny tokonam-baravaran'ny tranony izy, dia maty ilay zanany lahy.

¹⁸ Dia nalevina io sady nanaovan'ny vahoaka Israely rehetra fisaonana, araka ny tenin'ny TOMPO tamin'ny alalan'i Ahia mpaminany mpanompony.

¹⁹ Ny sisa amin'ny tantaran'i Jerobohama ary koa ny ady nataony sy ny fomba nanjakany dia voasoratra ao amin'ny boky milohateny hoe Asan'ireo mpanjakan'i Israely.

²⁰ Ny nanjakan'i Jerobohama dia naharitra 22 taona; ary rehefa lasa nodimandry any amin'ny razany izy, dia i Nadaba zanany lahy no nanjaka nandimby azy.

²¹ Feno 41 taona i Rehabohama zanakalahin'i Salomona fony vao nanjaka tamin'i Joda; ary naharitra 17 taona no nanjakany tao Jerosalema, dia ilay tanana nofidin'ny TOMPO tamin'ireo fokon'i Israely rehetra mba hampitoerany ny voninahiny. Ny anaran-dreniny dia i Nahama, izay hamonita.

²² Nanao izay ratsy eo imason'ny TOMPO ny mponin'i Joda ka ny fahotana vitany nampahasaro-piaro Azy mihoatra noho ny fahotana vitan'ny razany.

²³ Fa nanorina toeram-panasinana koa izy sady nanao tsangambaton-tsampy sy tsatokazo fanajana an'i Asera teny an-tampon-kavoana sy teny ambany hazo midoroboka rehetra teny.

²⁴ Ary nisy aza lehilahy sy vehivavy izay nitolo-tena hijangajanga ho fanompoan-tsampy teo amin'ny tany, ka narahiny avokoa ny zava-maharikoriko rehetra fanaon'ny firenena izay efa noroahin'ny TOMPO teo anoloan'ny Israelita.

²⁵ Ary tamin'ny taona fahadimy nanjakan'i Rehabohama dia niakatra i Sisaka mpanjakan'i Ejipta mba hamely an'i Jerosalema,

²⁶ ka namabo ny raki-tsoa tao an-tranon'ny TOMPO sy tao an-dapan'ny mpanjaka; nobaboiny avokoa ireo, indrindra ny ampinga volamena rehetra nataon'i Salomona.

²⁷ Ho solon'ireny kosa dia nampanao ampinga halimo i Rehabohama; ka ny lehiben'ny mpiambina, izay niandry ireo varavaran'ny lapan'ny mpanjaka, no nanankinany azy.

²⁸ Ary na oviana na oviana nidiran'ny mpanjaka tao an-tranon'ny TOMPO, dia naka ireo ampinga ireo ny mpiambina ka avy eo namerina azy ho ao an'efitranon'ny mpiambina indray.

²⁹ Ny sisa amin'ny tantaran'i Rehabohama ary koa ny zavatra hafa rehetra nataony dia voasoratra ao amin'ny boky milohateny hoe Asan'ireo mpanjakan'i Joda.