1 Makabeo
Toko faha-9
20 Nitomanian'ny Israelita rehetra sy nigogogogoany mafy i Joda; ary naharitra andro maro no nisaonany azy sy nanaovany hoe:21 Ahoana re no dia nahafaty an'ilay mahery, an'ilay nanafaka an'i Israely?
22 Ny sisa amin'ny tantaran'i Joda mbamin'ny ady hafa nataony sy ny herimpo hafa nasehony ary ny anaram-boninahitra hafa nananany dia tsy ary ho voasoratra mihitsy satria maro loatra.
23 Nony efa maty i Joda, dia nitrangatranga eran'ny tany Israely manontolo ireo mpanohitra ny lalanan'Andriamanitra ary niarin-doha izay rehetra mpanao ratsy.
24 Nisy mosary tena mafy koa tamin'izany andro izany, ka lasa nivadika niandany taminy mbamin'ny firenena iray manontolo.
25 Ny olona mpankahala fivavahana rahateo no voafidin'i Bakida sy notendreny hitondra ny tany.
26 Nokarohin'ireo ny sakaizan'i Joda sady nataony tsongodia, ary nentiny any amin'i Bakida, ka nofaizan'io sy nataony fihomehezana.
27 Lalina loatra ny fahoriana nanjo ny Israelita, fa nanomboka teo amin'ny andro tsy nahitana mpaminany teo aminy intsony dia tsy mbola nisy fahoriana toy izany.
28 Koa nivory izay rehetra sakaizan'i Joda ary nilaza tamin'i Jonatana hoe:
29 -Hatrizay nahalasanan'i Joda rahalahinao izay, dia tsy misy lehilahy toa azy intsony mba hitsangan-kanohitra ny fahavalontsika, izany hoe i Bakida mbamin'ireo rehetra mankahala ny firenentsika.
30 Ka dia ianao no fidinay anio ho filohanay hisolo azy, sy ho mpitari-tafika amin'ny ady hatrehintsika.
31 Dia noraisin'i Jonatana ny fanapahana tamin'izany andro izany, ary nandimby an'i Joda rahalahiny izy.
32 Vao nandre ny nifidianana an'i Jonatana i Bakida, dia nitady hamono azy.
33 Nony nahafantatra izay fikasana izany i Jonatana sy izay rehetra nomba azy mbamin'i Simona rahalahiny, dia nandositra tany an-taniefitr'i Tekoa sy nitoby teo akaikin'ny rano amin'ny lava-drano Asfara.
34 Ren'i Bakida, indray andro sabata, ny toeran'ireo; ka niainga izy mbamin'ny tafiny manontolo ho any andafin'i Jordana.
35 Nirahin'i Jonatana hankany amin'ny Nabateanina sakaizany kosa i Johany rahalahiny sady mpifehy vahoaka; hiangavy ny Nabateanina no anton-diany mba homeny lalana hametraka entana any aminy satria be entana tokoa ny tafika israelita.
36 Kanjo nivoaka avy ao Medeba ireo Jambrita ka nisambotra an'i Johany mbamin'ny entany rehetra, dia nandeha nitondra ny babony.
37 Taorian'izany zava-nitranga izany, dia nisy nilaza tamin'i Jonatana sy i Simona rahalahiny fa hoe hanao fampakaram-bady malaza ny Jambrita, ka avy any Nabata nohavoaka amim-boninahitra lehibe razazavavy izay zanaky ny andriambaventy kanahanita anankiray.
38 Tsaroan'izy roa lahy tamin'izay ny namonoana an'i Johany rahalahiny; dia niakatra izy, ka nitampify takon'ny tendrombohitra.
39 Nanopy maso nitsirika izy mirahalahy, ka indro tetsy ankilany andian'olona maro miraondraona sy enta-miavosa be dia be; tetsy an-daniny kosa ny mpampakatra otronin'ireo rahalahiny aman-tsakaizany no mandroso mitsena azy ka nomban'ny feon'amponga tapaka aman-javamaneno sady nirongo fiadiana be dia be.
40 Nahita izany i Jonatana sy ireo olony, dia niroatra avy ao am-panotrehany, ka niantoraka tamin'ny mpikorana hamono azy; niharan'ny ratra mafy ny maro tamin'ireo ka maty, fa ny sisa velona kosa nandositra tany an-tendrombohitra, ary nobaboin'ny Jiosy ny entana rehetra nananany.
41 Ka niova ho fisaonana ny fampakara-bady, ary ho fidradradradrana ny feon-javamaneno.
42 Nony avy namaly faty ny namonoana ny rahalahiny ry i Jonatana sy i Simona, dia nihataka ho any amin'ny henihenin'i Jordana.
43 Ren'i Bakida ny toeran'i Jonatana sy ny olony; ka, indray andro sabata, dia tonga hatrany amoron'i Jordana izy nitondra tafika lehibe.
44 Dia hoy i Jonatana tamin'ireo namany: -Mitsangana ankehitriny, miadia ho fiarovana ny aintsika! Fa tsy tahaka ny omaly sy afak'omaly intsony ity anio ity.
45 Indro fahavalo vonon-kiady no eo anoloantsika, ny ranon'i Jordana no ao ivohontsika, ary ala aman-keniheny no eo an-daniny roa, ka tsy misy azo andosirana akory.
46 Koa miantsoa vonjy amin'Andriamanitra ankehitriny mba ho afa-doza isika fa tsy ho azon'ny fahavalontsika.
47 Dia nanomboka ny ady. Naninji-tanana i Jonatana mba hikapa an'i Bakida; fa lasa nankany aoriana i Bakida hialana azy.
48 Tamin'izay kosa i Jonatana sy ireo olony no nivikina niroboka an'i Jordana, ka nita nilomano; nefa ny fahavalo tsy nita hanenjika azy.
49 Nisy vatan-dehilahy andiany iray no maty tamin'ireo mpomba an'i Bakida androtrizay.
50 Niverina ho any Jerosalema i Bakida. Ary nohamafisiny ny tanana sasany tao Jodea, ka nasiany manda avo sy vavahady ary hidy mafy; ireo tanana ireo dia i Jerikao sy i Emaosy ary i Bety-Horona mbamin'i Betela sy i Timna ary i Paratona sy i Tefona.
51 Nametrahan'i Bakida miaramila mpiandry koa ireo toerana ireo mba hanelingelina ny Israelita.
52 Nohamafisiny rahateo ny tanana Bety-Tsoro sy Gezera ary koa ilay toera-mafin'i Jerosalema; ka miaramila sy tahirin-tsakafo no napetrany tao amin'ny tanana ireo.
53 Nalainy ho antoka ny zanakalahin'ny lohandohany teo amin'ny tany, dia notanany ho sambo-belona tao amin'ny toera-mafin'i Jerosalema.
54 Tamin'ny taona faha-153, volana faharoa , no nandidian'i Alkima fa hazera ny rindrin'ny kianja anaty ao amin'ny tempoly. Nikendry handrava ny asa nataon'ireo mpaminany izy tamin'izany; ary efa natomboka tokoa ny fampianjerana.
55 Saingy tamin'izay fotoana izay no nidonan'aretina i Alkima, ka voatery natsahatra ny asa; fa tsy afa-niteny intsony izy, na indraim-bava aza, ary tsy afa-namoaka didim-pananana akory.
56 Dia maty tamim-pijalijaliana fatratra i Alkima tamin'izany vaninandro izany.
57 Rehefa hitan'i Bakida fa maty i Alkima, dia niverina ho any amin'ny mpanjaka Demetry izy; ka nandry feizay ny tanin'i Jodea nandritra ny roa taona.
58 Tamin'izay ny Jiosy mpivadika rehetra dia nifampidinika nanao hoe: "Miadana sy mandry feizay ity ry i Jonatana sy ny olony, ka ndao ho hafarantsika i Bakida; fa indray alina monja no hisamborany azy rehetra."
59 Dia lasa tokoa ireo nifanaraka tamin'i Bakida.
60 Ka niainga ilay io nitondra tafika goavana sady nandefa taratasy mangingina ho any amin'ireo rehetra mpiandany aminy ao Jodea mba hisamboran'ireo an'i Jonatana sy ny olona; kanjo tsy afa-nanoatra ireo, satria fantatr'i Jonatana ny tetiny.
61 Tamin'ireo vatan-dehilahy mponin'io tany io ka lohandohan'izany teti-dratsy izany aza, dia nisy dimampolo no nasain'i Jonatana nosamborina sy novonoina ho faty.
62 Avy eo dia lasa ry i Jonatana sy i Simona mbamin'ireo mpomba azy, nankany Bety-Basy any an-taniefitra; namboariny izay rava tamin'io toerana io, dia nasiany manda.
63 Ren'i Bakida izany, ka novoriny ny miaramilany rehetra sady nantsoiny ny mpomba azy tao Jodea,
64 dia lasa niorin-toby teo akaikin'i Bety-Basy izy ary nanao fahirano io tanana io nandritra ny andro maro ka namboatra milina fandrobahan-drindrina.
65 Tamin'izay kosa no navelan'i Jonatana tao an-tanana i Simona rahalahiny; ka nivoaka ho any an-tsaha izy nomban'ny miaramila vitsivitsy.
66 Dia nasiany tao an-day i Odomera sy ny mpiray tarika aminy ary koa ny Fasironita ; ka nirosohamely ny mpanao fahirano ireo sady niady niandany tamin'ny miaramilan'i Jonatana.
67 Ry i Simona sy ny namany kosa, tetsy an-daniny, nivoaka ny tanana sy nandoro ny milina namboarin'ny fahavalo.
68 Nifanotofan'izy roa tonta i Bakida ka nataony vaky nandositra ny tafiny ary novesarany fahoriana lalina ny tenany noho ny teti-panafihany tsy nahomby.
69 Loza ny hatezeran'i Bakida tamin'ny Jiosy mpankahala fivavahana, satria ireo no nanome hevitra azy ho tonga aty amin'ny taniny; ka maro tamin'ireo Jiosy ireo no nampamonoany ho faty. Avy eo dia nanapa-kevitra i Bakida ny hody any amin'ny tany fiaviany.