1 Makabeo

Toko faha-5

¹ Nisafoaka mafy ireo firenena manodidina, nony nandre fa hoe voavoatra indray ny alitara fisoronan'ny Jiosy ary vita nody amin'ny toetrany taloha indray ny tempoly.

² Koa nanapa-kevitra ireo fa handringana ny taranak'i Jakoba nitoetra teo aminy ary nanomboka namono sy nandripaka maro tamin'ny vahoaka israelita.

³ Namely an'i Israely ny taranak'i Hesao tao Idomea , ka niadian'i Joda tao Akrabatana ; nataony resy dia resy tokoa ireo ka naetriny sy nangalany babo.

⁴ Tsaroan'i Joda koa ny haratsiam-pon'ireo taranak'i Baiana , izay nitsangan-ko fandrika aman-tsakana ho an'ny vahoaka israelita, ka nanao otrika hahavoa azy teny an-dalana,

⁵ notemerin'i Joda hihidy ao anaty tilikambo ireo, dia nataony fahirano sy nianianany haringana; ka nodorany ny tilikambony mbamin'izay rehetra tao anatiny.

⁶ Avy eo i Joda nankany amin'ny Hamonita, ka nisehatra tafika iray lehibe, nisy miaramila maro notarihin'i Timoty ,

⁷ niadiany imbetsaka ireo, ka montsana teo anatrehany ary resy mihitsy.

⁸ Nalainy ny tanana Jazera mbamin'ny zana-bohitra miankina aminy; dia niverina nankany Jodea izy.

⁹ Nitambatra ny hafa firenena tao Gilehada mba hamely sy handringana ny Israelita nonina teo amin'ny faritaniny; fa lasa nialoka tao amin'ny tanana mimanda atao hoe Datema kosa ireo.

¹⁰ Dia nampitondra taratasy tany amin'i Joda mbamin'ny rahalahiny izy nanao hoe: -Nitambatra hamely anay sy handringana anay ny hafa firenena manodidina anay.

¹¹ Efa miomana haka ny tanana mimanda ialofanay izy, ary i Timoty no mpitarika ny tafiny.

¹² Koa avia hanafaka anay tsy ho azon'ireo, fa efa nahafatesana maro rahateo izahay.

¹³ Ny Jiosy rehetra havanay, nonina teo amin'ny tanin'i Tobia , dia voavono avokoa; nentin'ny fahavalo ho babo ny vady aman-janany, lasany ny fananany, efa ho arivo lahy no matiny tao.

¹⁴ Mbola vakina eo izany taratasy izany no nisy iraka hafa rovi-pitafiana, tonga avy any Galilea, nitondra izao vaovao izao:

¹⁵ -Nitambatra hamongotra anay ny olona avy any Ptolemaida sy Tiro ary Tsidona mbamin'i Galilea manontolo onenan'ny hafa firenena.

¹⁶ Nony nandre izany toe-javatra izany i Joda sy ny tafiny, dia nampanao fivoriana lehibe, handinihana izay tokony hatao ho an'ireo havana jiosy tra-pahoriana sy asiam-pahavalo.

¹⁷ Dia hoy i Joda tamin'i Simona rahalahiny: -Mifidiana miaramila ka mandehana manafaka ny mpiray firenena aminao any Galilea, fa ny tenako sy i Jonatana rahalahiko kosa ho any Gilehada.

¹⁸ Dia i Josefa zanakalahin'i Zakaria ary koa i Hazaria mpifehy vahoaka no navelany tao Jodea miaraka amin'ny miaramila sisa mba hiambina,

¹⁹ ka nomeny didy hoe: - Entonareo ity vahoaka ity, nefa aza mandrafitra ady amin'ny hafa firenena mandra-piverinay.

²⁰ Vatan-dehilahy andiany telo no voatendry hiaraka amin'i Simona ho any Galilea, ary andiany iray kosa no hiaraka amin'i Joda ho any Gilehada.

²¹ Nankany Galilea i Simona, ka niady imbetsaka tamin'ny hafa firenena; dia resy ireo ka nitsoaka teo anoloany

²² ary nenjehiny hatrany amin'ny vavahadin'i Ptolemaida. Nahafatesan'ny Israelita sahabo ho andiany telo ny hafa firenena sady nentiny ny babo tamin'ireo.

²³ Nangoniny koa ny Jiosy tany Galilea sy Arbata , mbamin'ny vady aman-janany sy izay rehetra nananany, dia nentiny ho any Jodea tamin-kafaliana lehibe.

²⁴ Tamin'izay kosa ry i Joda Makabeo sy i Jonatana mirahalahy dia nita an'i Jordana, ka nandroso lalana telo andro tany an-taniefitra.

²⁵ Ny Nabateanina no tojo azy sy nandray azy tamim-pihavanana, ka nitantarany ny manjo ireo Jiosy any Gilehada hoe:

²⁶ -Maro amin'ireo Jiosy ireo no iharan'ny fahirano ao anatin'ireto tanana lehibe sady mafy ireto, dia i Bosora sy i Bosoro ary i Alema mbamin'i Kasfao sy i Makeda ary i Karnaima ,

²⁷ misy koa voafahirano amin'ny tanana hafa any Gilehada. Efa tapa-kevitra ny fahavalony fa hananika ireo tanana mimanda ialofan'ny Jiosy ireo rahampitso, ka hahazo azy ary handringana amin'ny indray andro monja ny Jiosy rehetra ao.

²⁸ Dia niova lalana tampoka i Joda sy ny tafiny, ka nizotra tany an-taniefitra hankany Bosora; nalainy ny tanana, novonoiny tamin'ny lelan-tsabatra avokoa ny lahy rehetra tamin'ny mponina, nentiny avokoa ny babo tao, ary nodorany ny tanana.

²⁹ Alina no nialan'i Joda sy ny tafiny teo ka nandrosoany hatrany Datema , izay tanana mimanda nialofan'ny Jiosy.

³⁰ Nony maraina, nanopy maso izy ireo ka nahatazana miaramila tsy tambo isaina nitondra tohatra sy milina fandroba handrindrina ary efa rafitra ady tamin'ny Jiosy.

³¹ Rehefa hitan'i Joda fa efa rafitra ny ady ary efa nisondrotra nanaka-danitra ny akoran'ny mponina niaraka tamin'ny feon-trompetra mbamin'ny horakoraka be,

³² dia hoy izy tamin'ny miaramilan'ny tafiny: -Miadia anio ho an'ny mpiray firenena aminareo.

³³ Dia nozarain'i Joda ho telo toko ny tafiny no nampandrosoiny hankeo ivohon'ny fahavalo; ka nampaneno ny trompetra ireo sady nanandra-peo nivavaka.

³⁴ Ny tafik'i Timoty kosa, vantany vao nahafantatra hoe Makabeo izay, dia nandositra teo anoloany; ka nataon'i Joda resy mafy izy ireo ary sahabo ho vatan-dehilahy andiany valo taminy no maty androtr'io.

³⁵ Taorian'izay i Joda dia nihodina nankany Alema; nasiany io tanana io, dia azony, ka novonoiny avokoa ny lahy rehetra tamin'ny mponina, nentiny avokoa ny babo tao, ary nodorany ny tanana.

³⁶ Avy eo dia nirosoany ka azony avokoa i Kasfao sy i Makeda ary i Bosoro mbamin'ny tanana hafa any Gilehada.

³⁷ Namory tafika hafa indray i Timoty taorian'izany, dia lasa nitoby tandrifin'i Rafona , teo an-dafin'ny lohasahan-driaka.

³⁸ Nandefa iraka hizaha io tafika io i Joda, ka izao no tatitra natao taminy: -Nitambatra tamin'i Timoty avokoa ny firenena manodidina antsika, ka tonga tafika iray goavana tokoa,

³⁹ nisy koa Arabo voakaramany hanampy azy. Naoriny ery an-dafin'ny lohasahan-driaka ny tobiny, ary efa vonona hirotsaka hiady aminao izy. Niroso kosa ry i Joda mba hifanehatra aminy.

⁴⁰ Rehefa nanakaiky ny lohasahan-driaka i Joda sy ny miaramilany, dia hoy i Timoty tamin'ireo lehiben'ny tafiny:-Raha mita voalohany i Joda handroso hamely antsika, dia tsy hahatohitra azy isika fa ho resiny mihitsy.

⁴¹ Raha matahotra ny hita kosa i Joda, ka miorin-toby eny an-dafin'ny lohasahan-driaka, dia isika no hita hamely azy ary handresy azy.

⁴² Nony mby teo akaikin'ny lohasahan-driaka i Joda, dia nasainy nijoro teo amoron-drano ny mpitan-tsoratry ny tafika, sady nomeny didy hoe: -Aza avela hisy hijanona fa aoka hirosoan'ady avokoa ny olona!

⁴³ Dia nita voalohany i Joda hankeny amin'ny fahavalo ary narahin'ny tafiny manontolo, ka nanamontsana ny hafa firenena izay teo anoloany. Dia nanary fiadiana ny fahavalo sisa ka rifatra nandositra tao amin'ny tempolin-tsampy tao Karnaima.

⁴⁴ Saingy azon'i Joda sy ny tafiny kosa ny tanana, ka nodorany ny tempoly mbamin'izay rehetra tao anatiny. Dia rava tanteraka i Karnaima ary tsy nahatohitra an'i Joda intsony ny fahavalo.

⁴⁵ Tamin'izay i Joda dia nanangona ny Israelita rehetra tany Gilehada, hatramin'ny kely indrindra ka hatramin'ny lehibe indrindra, mbamin'ny vady aman-janany sy ny fananany; dia vahoaka zavon-tany no nentiny ho any amin'ny faritanin'i Jodea.

⁴⁶ Tao Hefrona , tanana lehibe sy mafy tokoa sady manakana ny lalany, no tonga izany vahoaka izany; ary tsy nisy azony hiviliana hiankavia na hiankavanana fa tsy maintsy hamaky ny tanana izy.

⁴⁷ Kanefa tsy namela azy handalo ny mponin'i Hefrona, ary nanampina vato ny vavahady aza.

⁴⁸ Dia nandefasan'i Joda tenim-pihavanana ireo ka nilazany hoe: -Aoka mba hahazo mamaky ny faritaninareo izahay hankanesanay any amin'ny taninay! Tsy hisy olona hanao ratsy aminareo izahay; fa ny handalo an-tongotra ihany no hataonay. Saingy tsy nety namoha azy mihitsy ny mponin'i Hefrona.

⁴⁹ Ka nasain'i Joda nilazana ny miaramilany mba samy hivonon-kanafika eo amin'izay nisy azy avy,

⁵⁰ dia samy nivonona amin'izany tokoa ny vatan-dehilahy mpiantafika. Niadian'ny tafik'i Joda nandritra ny andro sy nandritra ny alina ilay tanana, ka natolotr'Andriamanitra azy.