1 Makabeo

Toko faha-4

¹ Tamin'izay i Gorjia dia naka miaramila andiany dimy sy mpitaingin-tsoavaly voafantina andiany iray; ary niainga alina izany tafika izany

² mba hiroatra tampoka amin'ny tafika jiosy ka handresy azy. Olona avy amin'ny toera-mafin'i Jerosalema no nitari-dalana ny tafik'i Gorjia.

³ Vao nandre izany i Joda, dia niainga niaraka tamin'ny mahery fo nomba azy; ny nokendreny dia ny hamely ny tafi-panjakana izay ao Emaosy ,

⁴ fony mbola tafaely tany ivelan'ny toby ny andiany nentin'i Gorjia.

⁵ Alina no nahatongavan'i Gorjia tao an-tobin'i Joda, saingy tsy nahita olona izy. Noheveriny ho nandositra azy ny Jiosy, ka dia nokarohiny tany an-tendrombohitra.

⁶ Vao nipoaka kosa ny masoandro, dia niseho teo amin'ny tany lemaka i Joda nitondra miaramila andiany telo, izay tsy mba nanana ny fitaovam-piadiana niriny, na ny hiarovan-tena na ny hamelezana.

⁷ Hitan'ireo fa voaaro mafy ny tobin'ny hafa firenena, hitany fa mitafy akanjo vy fiarovan-tena izy ary voahodidin'ny mpitaingin-tsoavaly sady samy zatra ady avokoa;

⁸ ka hoy i Joda tamin'ireo miaramila nomba azy: -Aza matahotra izay hamaroan'ireo namivadi-po amin'izay famelezany.

⁹ Tsarovy ny namonjena ny razantsika teo amin'ny Ranomasina Mena, fony nanenjika azy ny Farao nomban-tafika lehibe.

¹⁰ Koa ankehitriny miantso vonjy amin'Andriamanitra isika; raha mitia antsika Izy, dia hahatsiarony fanekem-pihavanana nataony tamin'ny razantsika sy handrava io tafika io anio eo imasontsika.

¹¹ Ka ho fantatry ny firenena rehetra fa mana-mpanafaka sy mpamonjy azy ny vahoaka Israely.

¹² Tamin'izay ireo hafa firenena no nanopy maso ka nahatazana ny Jiosy tonga hamely azy,

¹³ ary dia nivoaka ny toby mba hiady. Notsofin'ireo mpomba an'i Joda kosa ny trompetra,

¹⁴ dia rafitra ny ady, ka rava ny hafa firenena sy nandositra teny amin'ny tany lemaka,

¹⁵ ary matin-tsabatra avokoa ny vodilaharana. Hatrany Gezera sy hatrany amin'ny lemak'i Idomea ary hatrany Asdoda sy Jamnia no nanenjehan'ny Jiosy ireo fahavalo ka nahafatesany andiany telo eo ho eo.

¹⁶ Izay vao niverin-dalana tsy nanenjika intsony i Joda mbamin'ny tafiny,

¹⁷ sady hoy izy tamin'ny miaramilany: -Aza liana ny hamabo ianareo, fa mbola misy ady miandry antsika.

¹⁸ Ato an-tendrombohitra akaikintsika ato izao i Gorjia sy ny tafiny; ka tohero mafy sy reseo aloha ny fahavalontsika, vao izay ianareo no hahazo maka ny babony tsy amin'ahiahy.

¹⁹ Vao nitsaha-niteny i Joda, dia indro niseho avy ao an-tendrombohitra sady mitsikilo ny zava-nitranga ny antoko miaramilan'i Gorjia.

²⁰ Hitan'ireo fa ny namany nandositra, ny toby nodoran'ny Jiosy, satria tazana ny setroka maneho izay natao.

²¹ Raiki-tahotra mafy ny fahavalo nahita izany; nony tazany koa ny tafik'i Joda nivonon-kiady teo amin'ny tany lemaka,

²² dia nandositra any amin'ny tanin'ny Filistinina avokoa izy rehetra.

²³ Fa i Joda kosa niverina nandraoka ny babo tao an-toby, ka volamena sy volafotsy betsaka mbamin'ny lamba jaky volomparasy sy jaky mena mangatrakatraka ary harem-bevava no nentiny.

²⁴ Fiderana sy fankalazana an'Andriamanitra no nataon-dry i Joda rehefa nody: "Eny, tsara Izy, ary maharitra mandrakizay ny fitiavany!"

²⁵ Nahazo famonjena lehibe ny vahoaka Israely tamin'izany andro izany.

²⁶ Nilaza ny nanjo rehetra tamin'i Lisia ireo miaramila hafa firenena izay afa-nandositra,

²⁷ ka nampalahelo sy nahakivy azy ny nandre izany vaovao izany; tsy ny zavatra nirin'i Lisia manko no nihatra tamin'i Israely ary tsy izay voadidin'ny mpanjaka no nitranga.

²⁸ Tamin'ny taona manaraka no namorian'i Lisia tafika anankiray, dia miaramila voafantina nisy vondron-tafika enimpolo sy mpitaingin-tsoavaly nisy vondron-tafika dimy mba hoenti-miady amin'ny Jiosy.

²⁹ Dia nankany Idomea io tafika io, ka niorin-toby teo akaikin'i Bety-tsoro. I Joda kosa niaraka tamina miaramila nisy vondron-tafika folo no nandeha hifanehatra aminy.

³⁰ Nony nahita izany tafika matanjaka nentin'i Lisia izany i Joda, dia nivavaka nanao hoe: -Hankalazaina anie Ianao, ry Mpamonjy an'i Israely o! Ianao no nanorotoro ny herin'i Goliata, lehilahy goavana , tamin'ny tanan'i Davida mpanomponao. Ianao no nanolotra ny tafika filistinina teo an-tanan'i Jonatana , zanakalahin'i Saoly, sy teo an-tanan'ilay mpitana ny fitaovam-piadiany.

³¹ Toy izany no aoka hangiazanao ity tafik'i Lisia ity eo an-tanan'ilay Israely vahoakanao; ary aoka hampahamenatra ny hafa firenena ny miaramilany na ny an-tongotrana ny an-tsoavaly!

³² Ataovy raiki-tahotra izy, levony ny hery be rehaka ananany; ary aoka hampangozohozo azy ny fahareseny!

³³ Ataovy matin'ny sabatr'ireto mpitia Anao izy; ary aoka izay rehetra mpahalala ny anaranao hiventy hira fiderana Anao!

³⁴ Dia natombok'izy roa tonta ny ady, ka nisy andiany dimy tamin'ny tafik'i Lisia no nitsitra teo anoloan'ny Jiosy.

³⁵ Hitan'i Lisia ny faharesen'ny tafiny, ary tsapany ny fahasahiana nananan'ny miaramilan'i Joda, izay nitomban-ko velona na ho faty amim-boninahitra; ka dia nody tany Antiokia i Lisia, ary nampiditra hafa firenena hampitombo isa ny miaramilany mba hiverenany hamely an'i Jodea indray.

³⁶ Tamin'izay kosa no nitenenan'i Joda sy ireo rahalahiny hoe: -Indreo efa resy ny fahavalontsika, koa ndeha isika hiakatra hanadio ny tempoly sy hanokana azy amin'Andriamanitra indray.

³⁷ Dia nifamory ny tafika manontolo ka niakatra ho any an-tendrombohitra Tsiona.

³⁸ Hitany ny tempoly foana, ny alitara voazimbazimba ary ny varavarana may; nisy koa hazo madinika naniry tao amin'ny kianja, toy ny anaty ala na eny an-tendrombohitra; ary hitany ny efitrano voarava.

³⁹ Dia nandriatra fitafiana ny miaramila, nigogogogo tamim-pisaonana mafy, ary nanoso-davenona ny lohany,

⁴⁰ nampihohoka tarehy tamin'ny tany izy, ary nanao fitalahoana tamin'Andriamanitra rehefa naneno ny trompetra famantarana.

⁴¹ Tamin'izay no nakan'i Joda antokony iray tamin'ny tafiny mba hiady amin'ny Sirianina tao amin'ny toera-mafy mandra-panadio ny tempoly.

⁴² Nifidy mpisorona tsy azo kianina sady miraiki-po amin'ny lalanan'Andriamanitra koa i Joda,

⁴³ dia nodiovin'ireo ny tempoly ary notateriny tany amina toerana maloto ny vato voazimbazimba.

⁴⁴ Nifampidinihana ny amin'izay tokony hanaovana ny alitara fanaovana sorona dorana manontolo, dia ilay alitara nozimbazimbain'ny hafa firenena,

⁴⁵ ka ny hevitra tsara niaraha-nahita dia ny handrava izany, fandrao hahatonga fahafaham-baraka ho an'ny Jiosy satria alitara efa voaloton'ny hafa firenena. Dia noravana tokoa ilay alitara;

⁴⁶ ka ny vatony dia napetraka tamina toerana sahaza teo amin'ny tendrombohitry ny tempoly, mandra-pahatongan'izay mpaminany hanapaka ny amin'ny hanaovana azy.

⁴⁷ Araka ny Lalana , dia vato tsy voapaika no nalaina, ka nanangana na alitara anankiray vaovao mitovy amin'ilay taloha.

⁴⁸ Namboarina ny Toeramasina mbamin'ny atin'ny tempoly ary naverin-kasina ny kianjany.

⁴⁹ Fanaka masina vaovao koa no natao; dia napetraka tao an-tempoly indray ny fitoeran-jiro sy ny alitara fandoroana vovo-javamanitra ary ny latabatra fametraha-mofo.

⁵⁰ Nodorana hanetona eo ambony alitara ny vovo-javamanitra; nampirehetina ny lahin-jiro teo amin'ny fitoeran-jiro ary voazava ny tempoly.