Nomerỳ
Toko voalohany
1 Izao no nolazain'ny TOMPO tamin'i Mosesy tany an-taniefitr'i Sinay, tao amin'ny Tranolay fihaonana, ny andro voalohan'ny volana faharoa tamin'ny taona faharoa nialan'ny Israelita tany Ejipta:2 Ataovy ny fanisana ny fiangonan'ny Israelita rehetra araka ny fokony sy ny fianakaviany avy, ka raiso tsirairay ny anaran'ny lehilahy rehetra,
3 dia izay vatan-dehilahy feno roapolo taona no ho miakatra ka mahatam-piadiana. Ianao sy i Aharona no hanisa ireo araka ny tafika misy azy avy.
4 Aoka hisy lehilahy anankiray isam-poko, dia lehilahy izay tokony ho filoham-pianakaviana, mba hanampy anareo.
5 Ireto avy ny anaran'ireo lehilahy hanampy anareo: i Elitsora zanak'i Sedeora no avy amin'ny fokon'i Reobena;
6 i Selomiela zanak'i Tsorisaday no avy amin'ny fokon'i Simehona;
7 i Nahasona zanak'i Haminadaba no avy amin'ny fokon'i Joda;
8 i Natanaela zanak'i Tsohara no avy amin'ny fokon'i Jisakara;
9 I Eliaba zanak'i Helona no avy amin'ny fokon'i Zebolona;
10 i Elisama zanak'i Hamihoda no avy amin'ny fokon'i Efraima zanak'i Josefa; i Gamaliela zanak'i Pedahatsoro no avy amin'ny fokon'i Manase zanak'i Josefa;
11 I Abidaha zanak'i Gidehony no avy amin'ny fokon'i Benjamina;
12 i Ahihezera zanak'i Hamisaday no avy amin'ny fokon'i Dana;
13 i Pagihiela zanak'i Hokrana no avy amin'ny fokon'i Asera;
14 i Eliasafa zanak'i Dehoela no avy amin'ny fokon'i Gada;
15 Ahira zanak'i Henana no avy amin'ny fokon'i Naftaly.
16 Ireo no filoham-pianakaviana voafidin'ny fiangonana sady filohan'ny miaramilan'i Israely ihany koa.
17 Nalain'i Mosesy sy i Aharona ho lefiny ireo olona voatonona anarana ireo,
18 ka novoriny ny fiangonana manontolo tamin'ny andro voalohan'ny volana faharoa, dia nosoratany ny anaran'ny lehilahy israelita rehetra feno roapolo taona no ho miakatra araka ny fianakaviany sy ny fokony avy,
19 mifanaraka amin'ny nandidian'ny TOMPO an'i Mosesy. Tao an-taniefitr'i Sinay no nanaovany ny fanisana.
20 Ny isam-pokon'i Israely no nanaovam-panisana araka ny tarika sy ny fianakaviany avy, ka nanoratana ny anaran'ny lehilahy rehetra feno roapolo taona no ho miakatra ka mahatam-piadiana. Natomboka tamin'ny fokon'i Reobena lahimatoan'i Jakoba izany.
21 Toy izao manaraka izao ny isa azo:
22 Ny fokon'i Reobena: 46 500
24 Ny fokon'i Simehona: 59 300
34 Ny fokon'i Manase zanakalahin'i Josefa: 32 200
36 Ny fokon'i Benjamina: 35 400
38 Ny fokon'i Dana: 62 700
40 Ny fokon'i Asera: 41 500
42 Ny fokon'i Naftaly: 53 400
44 Ireo no vokatry ny fanisam-bahoaka izay nataon'i Mosesy sy i Aharona ary izy roambinifolo lahy filoham-pianakaviana solotenan'ny fokony avy.
45 Ka ny lehilahy israelita voaisa, feno roapolo taona no ho miakatra ka mahatam-piadiana,
46 dia 603 550 no fitambarany.
47 Fa tsy mba natao fanisana niaraka tamin'ny Israelita hafa ny Levita.
48 Hoy manko ny TOMPO tamin'i Mosesy:
49 Aza isaina ny fokon'i Levy, ary aza anaovana fanisana miaraka amin'ny Israelita hafa izy.
50 Fa ampiandraiketo azy kosa ny fitandremana ny Fonena-masina izay nametrahana ny raki-tsoratry ny fanekempihavanana ary koa ny fanaka sy ny kojakoja rehetra momba azy. Ireo no hitondra ny Fonena-masina mbamin'ny fanaka rehetra momba azy sy hanao fanompoam-pivavahana ao aminy ary hitoby manodidina azy.
51 Rehefa hiainga kosa ny Fonena-masina, dia ny Levita no hangorona azy; ary rehefa hijanona ny Fonena-masina, dia ny Levita no hanangana azy. Fa izay olon-kafa mitady hanatona eo dia hatao maty.
52 Ny Israelita dia samy hitoby eo amin'ny tobiny avy sy eo akaikin'ny vondron-tafiny avy.
53 Fa ny Levita kosa dia hitoby manodidina ny Fonena-masina mba tsy hirehitra amin'ny fiangonan'ny Israelita ny fahatezerako.
54 Notanterahin'ny Israelita avokoa izany, araka izay efa nandidian'ny TOMPO an'i Mosesy.