Lioka

Toko faha-4

¹ Ary feno ny Fanahy Masina i Jesoa no niverina avy any Jordana. Dia nentin'ny Fanahy Masina Izy honina any an-taniefitra

² efapolo andro sady nalain'ny devoly fanahy, ary tsy nikasika hanina nandritra izany andro izany ka noana tamin'ny farany.

³ Dia hoy ny devoly taminy: Raha Zanak'Andriamanitra tokoa Ianao, teneno io vato io hanjary mofo.

⁴ Fa novalian'i Jesoa hoe: Izao no voalazan'ny Soratra Masina: Tsy ny mofo ihany no hiveloman'ny olona.

⁵ Dia nentin'ny devoly tany amin'ny toerana avo i Jesoa ka nasehony Azy indray mipy maso ny fanjakana rehetra eran-tany

⁶ sady nataony hoe: Homeko Anao daholo ny hery amam-boninahitr'ireo fanjakana ireo, fa efa natolotra ahy ka omeko an'izay tiako homena azy.

⁷ Koa raha miankohoka eto anoloako Ianao, dia ho Anao avokoa ireo.

⁸ Fa novalian'i Jesoa hoe: Izao no voalazan'ny Soratra Masina: Ny Tompo Andriamanitra no hiankohofanao ary Izy irery no hivavahanao.

⁹ Dia nentin'ny devoly tany Jerosalema i Jesoa ka najorony teo an-tendron'ny zoron'ny tempoly sady nataony hoe: Raha Zanak'Andriamanitra tokoa Ianao, mianjera avy eto ho any ambany any;

¹⁰ satria izao no voalazan'ny Soratra Masina: Homen'ny Tompo baiko ireo anjeliny noho ny aminao mba hiaro Anao.

¹¹ Ary izao koa: Ny anjely hitondra Anao eny an-tanany mba tsy ho tafintohim-bato ny tongotrao.

¹² Fa novalian'i Jesoa hoe: Izao no voalazan'ny Soratra Masina: Aza maka fanahy ny Tompo Andriamanitrao.

¹³ Nony avy naka fanahy an'i Jesoa tamin'izao fomba isan-karazany izao ny devoly dia nandao Azy aloha mandra-piavin'ny fotoana hafa indray.

¹⁴ Nomban'ny Fanahy Masina i Jesoa no niverina tany Galilea; ary nanomboka niely tamin'ny faritany manontolo ny lazany.

¹⁵ Nampianatra tany amin'ny sinagoga Izy sady nomen'ny olona rehetra voninahitra.

¹⁶ Nandeha tany Nazareta tanana nahabe Azy i Jesoa ary tamin'ny andro sabata dia niditra tao amin'ny sinagoga araka ny fanaony. Nitsangana Izy hamaky ny Soratra Masina

¹⁷ ka natolotra Azy ny bokin'i Isaia mpaminany. Novelariny ilay boky ary izao no andinin-tsoratra hitany:

¹⁸ Ato amiko ny Fanahy avy amin'ny Tompo. Ka natokan'ny Tompo Aho hanambara Vaovao Mahafaly amin'ny mahantra; nirahiny Aho hitory fanafahana amin'ny mpigadra sy fahiratana amin'ny jamba, hanafaka ny ampahorina

¹⁹ ary hitory taona hanehoan'ny Tompo fanambinana.

²⁰ Rehefa nahorony ilay boky ka naveriny tamin'ny mpandraharaha, dia nipetraka i Jesoa. Nifantoka teny aminy avokoa ny mason'izay rehetra tao amin'ny sinagoga.

²¹ Fa i Jesoa kosa niteny taminy hoe: Tanteraka androany amin'izao andrenesanareo azy izao izany andinin'ny Soratra Masina izany.

²² Ary samy vavolombelona niaiky Azy daholo ny olona sady gaga noho ny teny soa naloaky ny vavany, ka hoy izy rehetra hoe: Tsy zanak'i Josefa ve ity?

²³ Fa i Jesoa kosa nanao taminy hoe: Ampiharinareo amiko tokoa ilay ohabolana hoe: Dokotera, sitrano aloha ny tenanao, satria hoy ianareo tamiko: Izay rehetra renay fa nataonao tany Kafarnahoma, mba ataovy eto an-tanindrazanao koa!

²⁴ Ary niteny indray i Jesoa hoe: Lazaiko marina aminareo fa tsy misy mpaminany to teny eo amin'ny tanana nahabe azy.

²⁵ Ary izao koa no ambarako tsotra aminareo: marobe ireo mpitondratena teo amin'i Israely tamin'ny andron'i Elia, raha nihantona telo taona sy tapany ny ranonorana ka nahatonga mosary lehibe manerana ny tany;

²⁶ kanefa tsy nisy nanirahan'Andriamanitra an'i Elia na dia iray aza, fa ilay mpitondratena tany Sarefata ao amin'ny faritr'i Sidona ihany.

²⁷ Marobe koa ny marary hoditra teo amin'i Israely faha-Elisa mpaminany; kanefa tsy nisy nodioviny na dia iray aza, fa i Nahamana Sirianina ihany.

²⁸ Nisafoaka daholo ny olona teo amin'ny sinagoga nony nandre izany,

²⁹ ka niara-nitsangana nandroaka an'i Jesoa tany ivelan'ny tanana sy nitondra Azy tany an-tampon'ilay havoana iorenan'ny tanana mba hamarina Azy any an-tevana.

³⁰ Izy kosa namakivaky teo afovoan'izy rehetra, dia lasa.

³¹ Nidina tany Kafarnahoma tanana any Galilea i Jesoa ka nampianatra ny olona isaky ny sabata.

³² Talanjona ny olona tamin'ny fampianarany, satria feno fahefana ny teniny.

³³ Ary tao amin'ny sinagoga dia nisy lehilahy azon'ny fanahin-demony maloto, ka niantsoantso tamin'ny feo mahery hoe:

³⁴ Aoka re fa hataonao inona izahay, ry Jesoa avy any Nazareta? Tonga handringana anay ve Ianao? Fantatro anie fa Ianao no ilay Masina avy amin'Andriamanitra e!

³⁵ Notenenin'i Jesoa mafy kosa ilay fanahy maloto ka nataony hoe: Mangina, ary miala amin-dralehilahy io! Dia nandavo an-dralehilahy tamin'ny tany teo afovoan'ny vahoaka ny demony vao niala taminy, nefa tsy nandratra azy.

³⁶ Raiki-tahotra izy rehetra sady nifampiresaka hoe: Ahoana re izany teny izany? Fa baikon'ity olona ity amim-pahefana sy hery ny fanahy maloto, dia lasa!

³⁷ Ary niely teny amin'ny tany manodidina rehetra ny lazan'i Jesoa.

³⁸ Rehefa niala tao amin'ny sinagoga i Jesoa, dia niantrano tao amin-dry Simona. Ary voan'ny tazo mahery ny rafozambavin'i Simona ka niangaviana Azy hositraniny.

³⁹ Niondrika teo amin-dravehivavy i Jesoa; ary notenenin'i Jesoa mafy ny tazo, ka niala taminy. Dia nitsangana teo no ho eo ihany ravehivavy nandroso sakafo ho an'ireo vahiny.

⁴⁰ Vao maty kosa ny masoandro, izay rehetra nanana marary azon'ny aretina isan-karazany dia samy nitondra ny azy teo amin'i Jesoa. Nametrahany tanana tsirairay izy ireny, ka nositraniny.

⁴¹ Olona maro koa no nialan'ny demony izay nihiakiaka nanao hoe: Ianao no ilay Zanak'Andriamanitra! Norahonan'i Jesoa mafy kosa ny demony sady tsy navelany hiteniteny satria ireo dia nahalala fa Izy no ilay Mesia.

⁴² Raha vao naraina ny andro, dia niala tao an-tanana i Jesoa ary nankany amin'ny toerana mangina. Nokarohin'ny vahoaka i Jesoa, ary dia hitany ka nokasainy hotazonina tsy hiala teo aminy.

⁴³ Fa hoy i Jesoa taminy: Tsy maintsy anambarako ny Vaovao Mahafaly momba ny Fanjakan'Andriamanitra koa ny tanana hafa, satria izany no nanirahan'Andriamanitra Ahy.

⁴⁴ Dia nitoriteny tao amin'ny sinagoga eran'i Jodea Izy.