Levitîka

Toko faha-14

¹ Dia niteny tamin'i Mosesy ny TOMPO nanao hoe:

² Ireto no fepetra momba ny marary hoditra, amin'ny andro fanadiovana azy. Hoentina any amin'ny mpisorona ilay marary hoditra,

³ dia hivoaka ny toby kosa ny mpisorona mba hizaha azy. Raha hitany fa sitrana ny aretin'ilay marary hoditra,

⁴ dia vorona anankiroa velona sady madio sy hazo sedera ary lamba jaky sy rantsana hisopa no hasain'ny mpisorona halaina ho an'ilay hodiovina.

⁵ Ny vorona anankiray dia hampamonoin'ny mpisorona eo ambony vilany tanimanga nasiana rano avy amina loharano;

⁶ fa halainy kosa ny vorona faharoa, ka hatsobony miaraka amin'ny hazo sedera sy ny lamba jaky ary ny rantsana hisopa ao anatin'ny ran'ilay vorona novonoina.

⁷ Dia hofafazana impito amin'izany ra izany ilay diovina ho afaka amin'ny aretin-kodiny, ka hambaran'ny mpisorona hoe madio ilay olona; ary halefany hisidina any an-tsaha ilay vorona velona.

⁸ Hanasa fitafiana ilay diovina, sy hanaratra ny volo rehetra eo amin'ny tenany ary handro amin'ny rano, dia hadio. Hiditra ao an-toby izy aorian'izany, kanefa hitoetra eo ivelan'ny tranolainy mandritra ny fito andro.

⁹ Amin'ny andro fahafito, dia hoharatany avokoa ny volo eo amin'ny tenany, na volon-doha na somotra na manjamaso na volo hafa rehetra; ary hanasa fitafiana izy sady handro amin'ny rano, dia hadio.

¹⁰ Amin'ny andro fahavalo, dia ireto avy no zavatra hoentiny; zanakondrilahy roa tsy misy kilema, zanakondrivavy anankiray tsy misy kilema sady vao iray taona, koba lafarinina tsara voaharo menaka sady milanja sivy kilao, ary menaka antsasa-litatra.

¹¹ Ny mpisorona, izay mitarika ny fombam-pivavahana fidiovana, dia hametraka ilay olona sy ireo zavatra ireo eo anatrehan'ny TOMPO, izany hoe eo anoloan'ny varavaran'ny Tranolay fihaonana.

¹² Dia haka ny zanakondrilahy iray ny mpisorona, ka hanolotra azy ho sorom-panonerana miaraka amin'ny menaka antsasa-litatra; hahevahevany eo anatrehan'ny TOMPO no ho fomba fanolotra an'ireo.

¹³ Io zanakondrilahy io dia hovonoiny eo amin'ny toerana famonoana ny biby hatao sorona fanalana ny ota na hatao sorona dorana manontolo, dia eo amin'ny faritra voatokana hanaovana izany; tahaka ny amin'ny sorona fanalana ny ota no fanao amin'ny sorom-panonerana, ka zava-masina dia masina natao ho anjaran'ny mpisorona izany.

¹⁴ Hangalan'ny mpisorona ny ran'ilay sorom-panonerana mba hanentenany an'ilay diovina: dia hatentiny eo amin'ny ravin-tsofiny ankavanana sy ny ankiben-tanany ankavanana ary ny ankiben-tongony ankavanana izany.

¹⁵ Hangalan'ny mpisorona koa ny menaka antsasa-litatra, ka haidiny eo am-pelatanany havia;

¹⁶ ary hatsobony amin'io menaka izay eo am-pelatanany ankavia io ny fanondrony ankavanana ka hanaovany famafazana impito eo anatrehan'ny TOMPO.

¹⁷ Avy eo dia mbola io menaka am-pelatanany io no hanentenany an'ilay diovina; dia hatentiny eo amin'ny ravin-tsofiny ankavanana sy ny ankiben-tanany ankavanana ary ny ankiben-tongony ankavanana izany, dia eo amin'ireo faritra efa notentenana ny ran'ilay sorom-panonerana.

¹⁸ Ny menaka sisa eo am-pelatanan'ny mpisorona kosa hararany amin'ny lohan'ilay diovina; ary dia eo anatrehan'ny TOMPO no hanaovany ny fombam-pivavahana fanadiovana azy.

¹⁹ Izay ny mpisorona vao hanolotra ny sorona fanalana ny ota sy hanao indray ny fombam-pivavahana fandiovana ho an'ilay diovina ho afaka amin'ny fahalotoany. Aorian'izany, dia hamono ny zanakondrilahy hatao sorona dorana manontolo ny mpisorona

²⁰ sy hanolotra azy eo ambonin'ny alitara miaraka amin'ny fanatitra lafarinina, ary hanao fanintelony ny fombam-pivavahana fanadiovana ho an'ilay diovina, dia ho voadio tokoa izy.

²¹ Raha mahantra ilay marary hoditra ka tsy misy harena firy ananany, dia ireto avy ny zavatra hoentiny: zanakondrilahy iray monja hatao sorom-panorenana ka hahevaheva eo anatrehan'ny Tompo no fanolotra azy mba hanaovana ny fombam-pivavahana fanadiovana; koba lafarinina tsara voaharo menaka sady milanja telo kilao; menaka antsasa-litatra;

²² domohina roa na voromahailala roa, arakaraka izay hareny ananany, ka ny anankiray hatao sorona fanalana ny ota ary ny anankiray hatao sorona dorana manontolo.

²³ Amin'ilay andro fahavalo, dia hoentin'ilay marary hoditra ho any amin'ny mpisorona ireo zavatra ireo mba hanaovana ny fanadiovana azy eo anoloan'ny varavaran'ny Tranolay fihaonana, eo anatrehan'ny TOMPO.

²⁴ Dia horaisin'ny mpisorona ilay zanakondrilahy hatao sorom-panonerana sy ilay menaka antsasa-litatra, ka hahevahevany eo anatrehan'ny TOMPO no ho fomba fanolotra an'ireo.

²⁵ Hovonoin'ny mpisorona io zanakondrilahy sorom-panonerana io, dia hangalany ny rany mba hanentenany an'ilay diovina dia hatentiny eo amin'ny ravin-tsofiny ankavanana sy ny ankiben-tanany ankavanana ary ny ankiben-tongony ankavanana izany.

²⁶ Avy eo dia hisy haidin'ny mpisorona eo am-pelatanany ankavia ny menaka;

²⁷ ary amin'io menaka am-pelatanany io no hakany amin'ny fanondrony ankavanana ka hanaovany famafazana impito eo anatrehan'ny TOMPO.

²⁸ Hotentenan'ny mpisorona amin'io menaka io koa ilay diovina, ka hatentiny eo amin'ny ravin-tsofiny ankavanana sy ny ankiben-tanany ankavanana ary ny ankiben-tongony ankavanana izany, dia eo amin'ireo faritra efa notentenana ny ran'ilay sorom-panonerana.

²⁹ Ny menaka sisa eo am-pelatanan'ny mpisorona kosa hararany amin'ny lohan'ilay diovina mba hanaovana ny fombam-pivavahana fanadiovana azy eo anatrehan'ny TOMPO.

³⁰ Dia horaisin'ny mpisorona ny iray amin'ny domohina na ny iray amin'ny voromahailala, arakaraka izay hareny ananan'ilay olona diovina,

³¹ ka hatolony ho sorona fanalana ny ota; ny anankiray kosa hatolony ho sorona dorana manontolo miaraka amin'ny fanatitra lafarinina. Dia eo anatrehan'ny TOMPO no hanaovan'ny mpisorona fanintelony ny fombam-pivavahana fanadiovana ho an'ilay olona.

³² Ireo no fepetra momba ny marary hoditra eo amin'ny fanadiovana azy, raha tsy misy harena firy ananany.

³³ Dia niteny tamin'i Mosesy sy i Aharona ny TOMPO nanao hoe:

³⁴ Rehefa tafiditra any amin'ny tany Kanahana izay omeko ho fanananareo ianareo ka misy trano hasiako pentina bobongolo eo amin'ny tany fanananareo,

³⁵ dia handeha ny tompontrano hilaza izany amin'ny mpisorona ka hanao hoe: 'Toa hitako misy pentina miseho ao amin'ny tranoko.'

³⁶ Alohan'ny hidiran'ny mpisorona hizaha ilay pentina, dia hasainy hesorina avokoa ny entana ao an-trano, mba tsy hisy zavatra haloto amin'ireo entana ireo; izay vao hiditra ny mpisorona mba hizaha ilay trano.

³⁷ Rehefa voazahany kosa ny pentina, ka hitany fa mihady lavaka maitsomaitso na menamena eo amin'ny rindrina,

³⁸ dia hivoaka ny trano hihoatra ny tokonam-baravarana izy mpisorona ka hanidy ny trano tsy hivoha mandritra ny fito andro.

³⁹ Amin'ny andro fahafito no hiverina ao indray ny mpisorona mba hizaha ny trano; raha hitany fa manitatra eo amin'ny rindrina ilay pentina,

⁴⁰ dia hasainy hesorina ireo vato misy izany, ka hariana amin'izay toerana maloto fanariana azy any ivelan'ny tanana;

⁴¹ ary hasainy hokikisana ny ati-trano manontolo, ka ny tany voakiky dia hariana koa amin'ilay toerana maloto fanariana azy any ivelan'ny tanana.

⁴² Vato hafa kosa no halaina hasolo ilay teo, ary feta hafa no halaina handalorana ny trano indray.

⁴³ Raha tahiny mipoitra eo amin'ny trano indray ny pentina bobongolo, taty aorian'ny nanesorana ireo vato ireo sy nikikisana ny rindrina ary nandalorana azy indray,

⁴⁴ dia ho tonga ny mpisorona mba hizaha ilay trano. Raha hitany fa nanitatra tokoa ny pentina, dia bobongolo raiki-tampisaka, ka maloto ilay trano.

⁴⁵ Ary horavana izany, dia ny vato mbamin'ny hazo ary ny lalotra manontolo ka hoentina ireo rehetra ireo ho amin'ilay toerana maloto fanariana azy any ivelan'ny tanana.

⁴⁶ Izay miditra ao amin'izany trano izany mandritra ny fe-potoana manontolo ilazana azy hoe hihidiany, dia haloto mandra-paharivan'ny andro;

⁴⁷ izay mandry ao na misakafo ao dia samy hanasa ny fitafiany.

⁴⁸ Rehefa tonga tokoa ny mpisorona mba hizaha ilay trano, ka hitany fa tsy nanitatra teo amin'ny trano ny pentina, taty aorian'ny nandalorana azy indray, dia hambarany hoe madio ilay trano satria efa afaka ny pentina bobongolo.

⁴⁹ Mba hanadiovana ny trano, dia ireto avy no zavatra hampanalain'ny mpisorona: vorona roa, hazo sedera, lamba jaky ary rantsana hisopa.

⁵⁰ Ny vorona anankiray dia hovonoiny eo ambony vilany tanimanga nasiana rano avy amina loharano.