Josoa
Toko faha-4
1 Rehefa tafita an'i Jordana avokoa ny firenena manontolo, dia hoy ny TOMPO tamin'i Josoa:2 Mifidiana 12 lahy, iray avy isaky ny foko,
3 ka omeo baiko hoe: Ndeha ianareo maka vato 12 eo afovoan'i Jordana, eo amin'ny toerana izay nijoroan'ny mpisorona, dia ento miaraka aminareo ny vato ka apetraho eo amin'ny toerana hitobianareo anio alina.
4 Dia nantsoin'i Josoa izy 12 lahy voafidiny teo amin'ny Israelita
5 ka nilazany hoe: Mandalova eo anoloan'ny Vatamasin'ny TOMPO Andriamanitrareo, dia mandehana eo afovoan'i Jordana ka samia manainga vato iray ho eny an-tsorony, araka ny isan'ireo foko israelita.
6 Ireo vato ireo dia ho famantarana eo anivonareo; koa any aoriana any ianareo, rehefa hanontanian'ny zanakareo ny anton'ireo vato,
7 dia hamaly hoe: Tapaka ny ranon'i Jordana noho ilay Vatamasina mirakitra ny fanekempihavanan'ny TOMPO. Eny raha nita an'i Jordana ny Vatamasina; dia tapaka ny rano; ary ireo vato ireo dia hahatsiarovana mandrakizay izany zava-mahagaga izany eo amin'ny Israelita.
8 Dia nanao araka izay nandidian'i Josoa azy ny olona voatendry ka naka vato 12 teo afovoan'i Jordana, araka izay nolazain'ny TOMPO tamin'i Josoa sy araka ny isan'ny foko israelita. Ireo vato ireo dia nentiny niaraka taminy ho eo amin'ny toerana izay nitobiany tamin'iny alina iny ka napetrany teo.
9 Ary i Josoa dia nampanangana vato 12 ihany koa teo afovoan'i Jordana, teo amin'ny toerana izay nijoroan'ny mpisorona nitondra ny Vatamasina mirakitra ny fanekempihavanana; ary mbola ao ihany ireo vato ireo mandraka androany.
10 Ny mpisorona nitondra ny Vatamasina kosa dia nijoro teo afovoan'i Jordana ambara-pahatanteraky ny teny rehetra izay nodidian'ny TOMPO holazain'i Josoa amin'ny vahoaka, araka izay rehetra efa nandidian'i Mosesy an'i Josoa. Dia nita faingana ny vahoaka;
11 ary rehefa tafita avokoa ireo dia nandeha ho eny alohany indray ny mpisorona miaraka amin'ny Vatamasin'ny TOMPO.
12 Ireo lehilahy mirongo fiadiana, avy amin'ny fokon'i Reobena sy fokon'i Gada ary antsasa-pokon'i Manase, dia nita teo alohan'ny Israelita sisa hafa, araka izay efa nolazain'i Mosesy taminy.
13 Tokony ho efatra alina ireo miaramila vonon-kiady no nita an'i Jordana teo anatrehan'ny TOMPO ho any amin'ny tany lemak'i Jerikao.
14 Tamin'izany andro izany, dia nohamafisin'ny TOMPO teo imason'ny Israelita rehetra ny fahefan'i Josoa; koa nohajaina tahaka ny nanajana an'i Mosesy izy nandritra ny andro rehetra niainany.
15 Taorian'izany, dia hoy ny Tompo tamin'i Josoa:
16 Omeo baiko ireo mpisorona mpitondra ny Vatamasina misy ny raki-tsoratry ny fanekempihavanana mba hiakatra avy tao Jordana.
17 Dia nomen'i Josoa baiko ry zareo mba hiakatra avy tao.
18 Ary niakatra ireo mpisorona nitondra ny Vatamasina; ka raha vao nigadona teo an-tanety ny tongony, dia niverina tamin'ny laoniny indray ny ranon'i Jordana ary nihoatra ny morony rehetra toy ny teo aloha.
19 Ny andro fahafolon'ny volana voalohany no nitan'ny vahoaka israelita an'i Jordana, ary nitobiany tao Gilgala teo atsinanan'i Jerikao.
20 Dia nasain'i Josoa natsangana tao Gilgala ireo vato 12 nalaina tao Jordana;
21 avy eo dia hoy izy tamin'ny vahoaka israelita: Any aoriana any, rehefa hanontanian'ny zanakareo ny anton'ireto vato ireto ianareo,
22 dia izao no hampahafantarinareo azy: Nandia tany maina isika Israelita fahizany raha nita io Jordana io.
23 Eny, nataon'ny TOMPO Andriamanitrareo maina ny falehan'ny ranon'i Jordana teo anoloantsika mandra-pitantsika, tahaka izay nataony tamin'ny Ranomasin'ny Volotara teo anoloan'ny razantsika mandra-pitany.
24 Izany no hahafantaran'ny firenena rehetra ambonin'ny tany fa lehibe ny herin'ny TOMPO, ary hanajanareo mandrakizay ny TOMPO Andriamanitrareo!