Hezrà
Toko faha-5
1 Indray andro, ny mpaminany Hagay sy ny mpaminany Zakaria zanakalahin'i Hidao dia nitondra hafatra ho an'ny Jiosy tao Jerosalema sy Joda, tamin'ny anaran'Ilay Andriamanitr'i Israely, Izay nanentana azy.2 Dia niroso niasa indray i Zerobabela, zanakalahin'i Sealtiela, sy i Jesoa, zanakalahin'i Jotsadaka, mba hanorina ny tranon'Andriamanitra ao Jerosalema ary nanampy azy roa lahy koa ireo mpaminanin'Andriamanitra.
3 Tamin'izay ihany dia tonga teo amin'ireto mpanorina ny tranon'Andriamanitra i Tatenay governoran'ny faritra andrefan'ny ony Eofrata sy i Setara-Bozenay mbamin'ireo namany ka nanontany azy hoe: Iza no nanome baiko anareo hanorina indray io trano io sy hanangana ny manda?
4 Koa takinay aminareo ny anaran'ireo lehilahy manorina ny trano.
5 Saingy nitsinjo an'ireto loholona jiosy hatrany Ilay Andriamaniny; ka tsy nahasakana azy hanohy ny asa ry i Tatenay sy ny namany, mandra-pahatongan'ny tatitra tany amin'i Dariosa sy nahazoana taratasy ofisialy momba izany toe-javatra izany.
6 Izao no kopian'ny taratasy ho an'ny amperora Dariosa, taratasy nalefan'i Tatenay governora sy i Setara-Bozenay ary ny namany mpifehy ny Afarsekita izay teo andafy andrefan'ny ony Eofrata.
7 Nandefa tatitra ho an'ny amperora ry zareo ka hoy ny voasoratra ao anatiny hoe: Ho an'ny amperora Dariosa, Mirary soa sy fiadanana feno ho anao izahay, ry Andriamanjaka.
8 Aoka mba ho fantatrao fa teny amin'ny faritanin'i Joda sy tao amin'ny tranon'ilay Andriamanitra lehibe izahay. Aorina indray io trano io izao, ka vato vaventy no ampiasaina ary hazo matevina no alatsaka amin'ny rindrina; voakaly tsara ary mandroso haingana izany asa eo am-pelatanan'ny Jiosy izany.
9 Nanontanianay ireo loholony hoe: Iza no nanome baiko anareo hanorina indray io trano io sy hanangana ny manda?
10 Nanontanianay azy koa ny anarany mba hahazoanay manoratra aminao sy hampahafantatra anao ny anaran'ireo lehilahy mpitarika asa izao.
11 Ka izao no teny navaliny anay: ?Mpanompon'ilay Andriamanitry ny tany aman-danitra izahay; ary trano efa vita ela be ihany no amboarinay indray, fa mpanjaka lehibe anankiray tamin'i Israely no nanorina sy nahavita azy.
12 Kanefa ny nampahatezeran'ireo razanay an'Ilay Andriamanitry ny lanitra no nanolorany azy ho eo an-tanan'i Nebokadnetsara ilay Kaldeanina mpanjakan'i Babilona. Nandrava io trano io i Nebokadnetsara sady nitondra ny olona ho babo tany Babilona;
13 ny fanaka volamena sy volafotsy momba ny tranon'Andriamanitra koa dia nalainy tao amin'ny tempolin'i Jerosalema ka nentiny ho any amin'ny tempolin'i Babilona. Fa ny taona voalohany nanjakan'i Kirosa tamin'i Babilona, dia namoaka didy ity amperora ity mba haorina indray io tranon'Andriamanitra io.
14 Navoakan'i Kirosa tao amin'ny tempoli-tsampy koa ireo fanaka ireo ka natolony an'ilay atao hoe Sesebatsaro izay notendreny ho governoran'i Joda;
15 dia nasainy noraisin'i Sesebatsaro ireo fanaka ireo mba hapetrany ao amin'ny tempolin'i Jerosalema rehefa voaorina indray eo amin'izay toerany taloha izany tranon'Andriamanitra izany.
16 Dia tonga tao Jerosalema i Sesebatsaro ka nandatsaka ny fototr'ilay tranon'Andriamanitra; ary hatramin'izany andro izany ka mandraka ankehitriny dia natao ihany izy saingy tsy mbola vita.'
17 Koa raha sitrakao, ry Andriamanjaka, aoka mba hozahana ny trano firaketan'ny amperora any Babilona, na misy didy navoakan'ny amperora Kirosa hanorenana indray io tranon'Andriamanitra ao Jerosalema io na tsia; ary aoka mba hambaranao, ry Andriamanjaka, ny fanapahan-kevitrao ny amin'izany zavatra izany.